Biblia ñi rupan dungu pengeli Ngünechen ñi Ngünenien elcünungei huenu mapu 1914 tripantu mu. Femngechi quimfalcünui ti pelon dungu mülelu Daniel capitulo 4 mu.

 ¿Chem pengeli ti pelon dungu? Chau Ngünechen elufi ti lonco ülmen Nabucodonosor tuulu Babilonia mu quiñe pelon dungu peuma mu, fei pefi quiñe fütra anümca catrüngelu, huelu ñi mutrung choyülayafui. Fei afle ti “regle medin antü”, ti anümca huiño choyütuafui (Daniel 4:1, 10-16).

 Chumngechi hune huechurpui ti pelon dungu. Ti fütra anümca adentulei tati lonco ülmen Nabucodonosor, huedhuedcünuulu ca lonco ülmencülehuenolu catrüngei reque. Regle tripantu mu huedhuedcülerquefui. Af meu, Chau Dios eluñmai ñi huedhuedcülehuenoal, ca Nabucodonosor quimürpui Chau Ngünechen ñi ngünenieel ca huiño lonco ülmencületui (Daniel 4:20-22, 25, 34-36).

 Ti pelon dungu doi huechurpumequei famülque mu. Ngüneduamaiñ tüfachi pelon dungu: “Fei tati pu che ñi quimürpual engün ti Alüpüralelu Lonco Ülmencülei pu che ñi ngünenien mu, ca quisu elufi pu che tañi dulliel, ca lonco ülmencünufi tati doi ñom piuquengelu pu che meu” (Daniel 4:17). Chau Dios, ¿lonco ülmencünufi ta Nabucodonosor mallmangelu rume? Femlai tati. Doi mai, Ngünechen deu quimfalcünulelfi quiñe peuma mu ñi lonco ülmencünunoafiel quisu ca chem huentru ñi ngünenien no rume. Fei Chau Ngünechen “elcünuai quiñe ngünenien, chumcaunorume apümcangelayai” (Daniel 2:31-44).

 Cuifi mu, Chau Ngünechen elcünui quiñe ngünenien tañi pengelal ñi lonco ülmencülen Mapu mu: ti pu israelche. Huelu ti pu lonco ülmen famentufilu am ta Ngünechen, quisu eluñmai Israel ñi ngünenien ñi apümcangeal, ca feipicünui ñi lonco ülmencünuafiel quiñe che ley dungu mu ngen-ngelu ñi ngünenieal (Ezequiel 21:25-27). Biblia quimfalcünui ta Jesús ngen-ngei ñi lonco ülmencüleal Chau Ngünechen ñi Ngünenien mu, fei apümcangelayai (Luca 1:30-33). Ca chumngechi feipicünungei, Jesús “ñom piuquengelu” am trürlai ta Nabucodonosor mu (Mateo 11:29).

 Ti anümca feipingelu Daniel capitulo 4 mu, ¿chem adentulei? Biblia mu, quiñeque rupa tati anümca adentucünuquei tati ngünenien (Ezequiel 17:22-24; 31:2-5). Ti pelon dungu Daniel capitulo 4 doi huechurpumequelu famülque mu, fei tati fütra anümca adentucünui Chau Ngünechen ñi Ngünenien.

 Ti anümca ñi catrüngeel, ¿chem adentucünuquei? Chumngechi peiñ nga, ti anümca catrütungelu adentulei Nabucodonosor ñi catrütungeel tañi lonco ülmen-ngen. Ca femngechi adentulei ñi catrütungeel Chau Ngünechen ñi Ngünenien Mapu mu. Tüfa rupai Nabucodonosor apümcafilu Jerusalén, feichi huaria mu ngüneniequefui pu lonco ülmen Israel mu tuulu. Tüfachi pu lonco ülmen anülequefui “Jehová ñi ülmen huancu mu”, tüfa feipi dunguquefuingün Chau Ngünechen ñi üi mu (1 Crónicas 29:23).

 ¿Chem adentulei tati “regle medin antü? Adentulei Chau Ngünechen ñi eluñmafiel pu huentru ñi ngünenien ñi lonco ülmen-ngeal Mapu mu ca catrütunoaeteu Chau Dios ñi Ngünenien. Feichi medin antü coni octubre cüyen 607 tripantu mu petu ñi mülepanon Jesús (p.m.j.), tüfa rupai pu babiloniache apümcafilu Jerusalén, chumngechi pengeli Biblia ñi rupan dungu (2 Reyes 25:1, 8-10). a

 ¿Tunteñmayai feichi “regle medin antü”? Tüfachi regle tripantu puulai Nabucodonosor ñi rupan reque. Ñi quimal tüfa, ngüneduamaiñ Jesús ñi feipin: “Itrocom troquiñ mapu meu fei ti pu judio tuhun-ngenolu huiluconpuai ca fill huesa dungu femai ta Jerusalén huaria meu, fei puule hula ti tripantu tañi fentepu legtucünulngeel [itrocom troquiñ mapu mu]” (Lucas 21:24). Chumngechi peiñ tüfachi pelon dungu mu, Chau Ngünechen eluñmai pu troquiñque mapu fill huesa dungu femal tañi Ngünenien mu, feichi “tripantu tañi fentepu legtucünulngeel [itrocom troquiñ mapu mu]”. Feichi medin antü trürngei ti “regle medin antü” ñi feipiel Daniel capitulo 4. Feimu Jesús feipicünulu tüfa, tati “regle medin antü” petu aflai.

 Tati Biblia quelluqueiñmu taiñ quimal tunteñmayai tüfachi “regle medin antü” ñi feipicünungeel. Hune, feipi cüla medin antü ca rangiñ, fei ta 1.260 antü. Feimu, “regle medin antü” (epu rume 1.260 antü) fei ta 2.520 antü (Apocalipsis 12:6, 14). Ca Biblia ñi pelon dungu mu ngüneduamaiñ quiñe huercün dungu: “Quiñe antü quiñe tripantucünungei” (Números 14:34; Ezequiel 4:6). Feimu tüfachi huercün dungu mu raquiliyiñ 2.520 antü puhuaiñ 2.520 tripantu. Feimu, ti “regle medin antü” afpui octubre cüyen 1914 tripantu mu.