Génesis 48:1-22
48 Deu rupalu tüfachi dungu, José feipingei: “Tami chau cümelcalelai”. Feimu pemefi tañi epu fotüm engün, Manasés ca Efraín.
2 Fei feipingei ta Jacob: “Tami fotüm José mülepai, pepaeimu”. Feimu Israel rume yafüluhui ñi anüpürayal tañi ngütantu mu.*
3 Jacob nütramcafi ta José, feipifi:
“Chau Ngünechen Com Nehuen Nielu peufaluhueneu Luz huaria mu, Canaán mapu meu. Fei cümelcaeneu.
4 Eldungucünueneu: ‘Femcünuan tami nieal fentren yall ca ñi alün-ngeal. Eluhuan ñi tripayal eimi mu fillque troquiñche. Eluafiñ tüfachi mapu tami pu cüpanche, rumel mu ngen-ngeaingün’.
5 Petu tayu trahuluupanon, eimi nierpuimi epu fotüm Egipto mu. Fei feula iñche ngen-ngean. Efraín ca Manasés iñche tañi fotümngeaingu, Rubén ca Simeón reque.
6 Huelu nielmi caquelu fotüm, eimi ngen-ngeaimi. Tañi epu peñi ñi mapu meu, coneltuaingün tami caquelu fotüm.
7 Iñche tripapalu Padán mapu mu, tami ñuque Raquel lai Canaán mapu mu, petu alü camapulelu ñi puhual Efrat huaria. Rüngaltucufiñ feichi rüpü amulelu Efrat mu, Belén ca pingerquei”.
8 Israel pefilu José tañi epu fotüm ramtui: “¿Inei engu am?”.
9 Fei José huiñoldungui:* “Tüfa engu tañi pu fotüm Chau Ngünechen ñi elueteu fau”. Fei tañi chau feipi: “Füreneen, fültuculelen engu* tañi feipiafiel ñi cümelcaleal engu”.
10 Israel rume füchai, feimu nehue pelohuelai. José fültuculelfi ñi epu fotüm, fei Jacob trurufi* ca pancofi engu.*
11 Fei hula Israel feipifi ta José: “Turpu raquiduamlafun tami huiño petuafiel. Huelu tüfei nga, Chau Dios elueneu ñi peafiel tami pu cüpanche”.
12 José entufi tañi epu fotüm cheu ñi mülen ta Israel.* Fei pochongnagi,* puhuli tañi lonco mapu mu.
13 Fei José nüfi tañi epu fotüm ca fültuculelfi ta Israel. Tañi man cuhu mu nüfi ta Efraín, fei elcünufi Israel ñi huele püle. Manasés cai nüfi tañi huele cuhu meu ca elcünufi Israel ñi man püle.
14 Israel quimniefui Manasés ñi hunen fotümngen. Huelu fampuhulfi tañi man cuhu Efraín ñi lonco mu, inan fotümngelu rume. Ca tañi huele cuhu puhulfi Manasés ñi lonco mu.
15 Fei cümeque dungu feipifi ta José:
“Tañi lacu Abrahán ca tañi chau Isaac serfifingu ta Chau Ngünechen. Fei cümelcape tati huecheque huentru.
Fantepu mu Chau Ngünechen camañnieneu com tañi mongen.
16 Fei huercüfi ñi cüme püllü tañi montulaeteu fill huesaque dungu mu.
Yeniepe engu iñche tañi üi ca tañi lacu Abrahán ca tañi chau Isaac ñi üi
ca alün-ngepe tañi cüpanche mapu mu”.
17 Huelu José ayülafi tañi chau ñi fampuhulniefiel ñi man cuhu Efraín ñi lonco mu. Feimu eluhui ñi entuafiel tañi chau ñi cuhu Efraín ñi lonco mu, José ayüfui ñi yeafiel Manasés tañi lonco mu.
18 José feipifi tañi chau: “Femngechi no, chachai. Tüfa tati hunen fotüm. Quisu tañi lonco mu fampuhulfinge tami man cuhu”.
19 Huelu tañi chau pilai, feipifi: “Quimnien, saquin fotüm, quimnien tati. Quisu cafei quiñe troquiñchengeai, falin-ngeai. Huelu tañi inan peñi doi falin-ngeai. Tañi cüpanche alün-ngeai, fentren troquiñche tripayai quisu meu”.
20 Fei hula feichi antü amulei ñi feipimequefiel cümeque dungu, feipi:
“Pu Israel che eluule ñi cümelcacheal, feipipe engün tami üi, ca feipiai engün:
‘Chau Dios femaimu chumngechi ñi femfiel ta Efraín ca Manasés’”.
Femngechi Jacob cümeque dungu feipifilu ta Efraín ca Manasés, hunentucufi ta Efraín.
21 Fei hula Israel feipifi ta José: “Pichilehuei ñi layal, huelu Chau Dios afcadinieaimünmeu ca huiño yetuaimünmeu tamün cuifiqueche yem ñi mapu.
22 Caque quiñeque tami pu peñi elufiñ quiñe troquiñ mapu, huelu eimi eluayu epu troquiñ. Feitichi cangelu mapu tami eluafiel müntuñmafiñ* tati pu amorreo che tañi fütra cuchillo ca tañi arco mu”.
Quimnieal
^ Cam: “Cahuitu”.
^ Cam: “Lloudungui”.
^ Cam: “Püllentuculelen”.
^ Cam: “Pechitufi, truyufi, trepetufi”.
^ Cam: “Rofülfi engu”.
^ Hebreo quehun feipilei: “Israel tañi lucu meu”.
^ Cam: “Lloyünagi”.
^ Cam: “Montuñmafiñ”.
