1. ¿Chum duamquei quiñeque peñi, quiñeque lamngen tañi amuldungun mu? (Ca inaduamnge ti adentun).

 ¿CHUMNGELU amuldunguqueiñ? Taiñ piuqueyefiel ta Jehová ca ayüqueiñ caquelu che tañi quimaeteu. Quiñeque peñi ca quiñeque lamngen rume ayüquei tañi amuldungual, caquelu müte ayühuelquelaeyu tañi amuldungun, ¿chumngelu am? Quiñeque engün yehuen chengei ca cüme amuldunguquenolu troquiuqueingün. Ca quiñeque ayüquelai ñi amual ruca mu tañi mangelngenon mu. Caquelu llicaqueingün tañi huesa pingeal ca ñi notucangeal engün. Com engün piuqueyefilu rume ta Jehová, huelu cüdautuquei tañi amuldungulelafiel quimnoelchi che. Quisu engün am quimlu ñi falin-ngen tañi amuldungual, feimu femqueingün, fei Jehová ayüucülei fei engün mu.

2. Müte ayüucülenolmi tami amuldungual, ¿chumngelu huesa duamcülelayaimi?

² Eimi, ¿cüdautuqueimi tami ayüucüleal tami amuldungun mu? Femngechi dungu rupalmi, huesa duamlayaimi. Cüme pepicaucülenolu troquihulmi, tüfa pengelafui tami ñom piuquengen ca ayüquelaimi tami afmatungeal. Cafei eimi cüpa quellufimi pu che, feimu ayüquelaimi tami famentungeal. Tami Huenu Chau cüme quimniei tami rupamequen, feimu ayüquei tami quelluaeteu (Is. 41:13). Feitachi troquiñ mu, peaiñ quechu ngülam taiñ huesa duamcülenoal ca taiñ ayühunquechi amuldungual.

 CHAU DIOS TAÑI DUNGU NEHUENTUCUAIMU

3. ¿Chem quellueyu Jeremías ñi amuldungual?

³ Cuifi ca fantepu mu, Jehová tañi dungu quellufi tañi pu che ñi femal cüdaungechi dungu. Peafiyiñ ñi rupan ta Jeremías. Jehová huercüeyu ñi amuldungual, huelu Jeremías llicalefui. Fei feipi: “Quimlan cüme dungual, rume hueche huentrungen” (Jer. 1:6). ¿Chem quellueyu ñi nehuencünuhual? Jehová tañi dungu quellueyu llemai. Jeremías feipi: “Fei ñi huercün dungu ponhuitu tañi […] foro mu puhui chi cütral reque, fei cüdautun ñi nünieafiel, huelu ürcünagün” (Jer. 20:8, 9). Cüdaungeafui cheu ñi amuldunguquefel ta Jeremías, huelu ti huercün dungu ñi yenieel ta Jeremías nehuentucueyu entual tañi cüdau.

4. Papeltufiliyiñ Biblia ca raquiduamliyiñ, ¿chumngechi quelluafeiñmu? (Colosenses 1:9, 10).

⁴ Taiñ cristianongen ca nehuentucuqueiñmu Chau Dios tañi Dungu. Pablo feipifi pu cristiano Colosas mu ti rüf quimün Jehová mu cüpalu quelluafeyu engün ñi ‘cüme miyahual chumngechi miyauquei Chau Jehová ñi pu che’ ca ñi ‘femal itrofill cümeque dungu’ (papeltunge Colosenses 1:9, 10). ¿Chem cüme dungu am femafuiñ iñchiñ? Amuldunguaiñ ti cümeque dungu. Feimu papeltufiliyiñ Biblia ca raquiduamliyiñ taiñ papeltupeel mu, doi feyentuaiñ Jehová mu ca quimürpuaiñ ñi fente falin-ngen taiñ amuldungual.

5. ¿Chumaiñ taiñ rüf quelluafeteu Biblia?

⁵ Papeltuliyiñ Biblia, rulparulpacünulayafiyiñ, doi mai eluhuaiñ taiñ cüme estudiayafiel ca raquiduamal taiñ papeltuel mu, femngechi müten rüf quelluafeiñmu Biblia. Feimu papeltufilmi quiñe texto, entendenofilmi ¿chumafuimi? Rulpacünulayafimi, ngüneduamaimi ti Índice de las publicaciones Watch Tower cam ti Quellu ñi ngüneduamal pu Dunguquelu Ineingen Jehová, femngechi doi quimürpuaimi ñi chem pin ti versiculo. Eimi doi elcünulmi tiempo tami estudiayal Biblia, doi maneluhuaimi Chau Dios tañi Dungu mu (1 Tes. 5:21). Fei doi maneluhulmi Biblia mu, doi ayühuelaimu tami amuldungual.

 CÜME PEPICAHUAIMI TAMI AMULDUNGUAL

6. ¿Chumngelu am cüme pepicahuaiñ taiñ amuldungual?

⁶ Cüme pepicahulmi, doi cüdautulayaimi tami amuldungual. Jesús petu ñi huercünofiel tañi pu discipulo ñi amuldungual, hune pepicafi (Luc. 10:1-11). Pu discipulo inafingün com ñi quimeltueteu Jesús, feimu rume ayühuingün com ñi femürpuel mu (Luc. 10:17).

7. ¿Chumngechi am pepicahuafuiñ taiñ amuldungual? (Ca inaduamnge ti adentun).

⁷ ¿Chumngechi am pepicahuafuiñ taiñ amuldungual? Raquiduamaiñ taiñ chem feipial, femngechi piuque mu entuaiñ taiñ feipin. Ca raquiduamaiñ chem taiñ feipiafeteu pu che ca chumngechi taiñ huiñoldunguafiel. Femngechi nütramcafiliyiñ ta che, doi tüngcüleaiñ ca ayühunquechi dunguafiyiñ.

8. Pu cristiano, ¿chumngelu metahue mu trürümngequeiñ?

⁸ Pablo feipifi tañi pu peñi, pu lamngen: “Nieiñ tüfachi falin cüdau. Iñchiñ trürümngeafuiñ quiñe metahue reque nielu quiñe falin chemcün” (2 Cor. 4:7). ¿Chem falin cüdau am chi? Amuldungual Chau Dios ñi cümeque dungu, feitachi cüdau montulchequei (2 Cor. 4:1). Iñchiñ Jehová ñi pu chengen trürümngeiñ metahue mu, ¿chumngelu? Iñchiñ am yeniequelu ti cümeque dungu. Pablo ñi antü mu, tati pu comerciante yequefuingün falinque chemcün metahue mu. Yequefuingün iyael, pulcu, plata. Jehová ca elfalcünueiñmu quiñe falin dungu taiñ yenieal, fei tati cümeque dungu. Jehová tañi quellun mu nehuencüleaiñ taiñ amuldungual.

LLELLIPUAFIMI JEHOVÁ TAMI NEHUENTUCUAETEU

9. ¿Chem quelluaiñmu taiñ llicalenoal? (Ca inaduamnge ti adentun).

⁹ Quiñeque mu llicayafuiñ taiñ famentungeal cam taiñ allcütungenoal. ¿Chem quelluafeiñmu taiñ llicalenoal? Ngüneduamaiñ ñi chumün pu apostol. Feipingelu engün ñi amuldunguhuenoal, eluulaingün ñi llicalcangeal. Ca llellipufingün ta Jehová tañi quelluaeteu, femngechi nehuen piuque mu  ñi amuldungual. Fei Jehová quellueyu engün (Hech. 4:18, 29, 31). Feimu llicafiliyiñ pu che amuldungun mu, llellipuafiyiñ Jehová taiñ quelluaeteu. Feipiafiyiñ Jehová taiñ doi piuqueyeafiel pu che, femngechi taiñ llicalenoal ca nehuen piuque mu amuldungucheal.

10. ¿Chumngechi quelluqueiñmu Jehová taiñ dungual quisu mu? (Isaías 43:10-12).

¹⁰ Jehová elfalcünueiñmu taiñ dungual quisu mu, ca feipieiñmu taiñ quelluaeteu taiñ nehuencüleal (papeltunge Isaías 43:10-12). Peaiñ meli dungu chumngechi taiñ quelluqueteu ta Jehová. Quiñe dungu, amuldungulu iñchiñ, Jesús mülei iñchiñ mu (Mat. 28:18-20). Epu, Jehová elcünufi pu cümeque püllü taiñ quelluaeteu (Apoc. 14:6). Cüla, Jehová eluqueiñmu tañi nehuen, femngechi taiñ acordayal taiñ quimürpuel (Juan 14:25, 26). Ca meli, Jehová elueiñmu taiñ pu peñi, pu lamngen taiñ quelluaeteu. Jehová tañi duam mu ca taiñ pu peñi, pu lamngen mu eluqueiñmu ta nehuen taiñ amuldunguleal.

CACÜNUTUAFUIÑ TAIÑ AMULDUNGUN CA AYÜUCÜLEAIÑ

11. ¿Chumafuiñ taiñ doi peafiel ta che amuldungun mu? (Ca inaduamnge ti adentun).

¹¹ ¿Huesa duamqueimi tripanon mu che ruca mu? Femülmi, fei ramtuunge: “¿Cheu am miyahui tati che? ¿Cüdauquiyaupeingün mai cam ngillacayahuingün chi?” (Hech. 16:13). Ngenole che ruca mu, ¿chumafuimi? Amuldunguafuimi rüpü mu. Quiñe peñi Joshua pingelu feipi: “Iñche amuldunguquen cheu ñi ngillacapeyüm pu che ca cheu ñi rupaquen fentren che” pi. Taiñ peñi ca tañi domo, ¿ca chem femqueingu? Tañi doi peafiel che tañi ruca mu, tarde mu amuquei ca fillque domingo rupan rangiantülu (Efes. 5:15, 16).

12. ¿Chumngechi quimafuiñ chem mu feyentuquei ca raquiduamcülequei ta che?

¹² Tati che duamüñmanoeliyiñmu taiñ amuldungulelfiel, raquiduamaiñ chem mu tañi feyentuquen engün ca chem dungu mu raquiduamcüleingün. Joshua ca tañi domo hue nütramcafilu ti che, entuqueingün ti ramtun tripalu  fillque tratado mu. Por ejemplo, ñi pengelal ti tratado Eimi meu, ¿chem am tati Biblia? pingelu, taiñ peñi ca tañi domo feipiquefingu ti che: “Quiñeque raquiduamqueingün Biblia ñi cüpan Chau Dios mu, caquelu feyentuquelaingün. Eimi cai, ¿chem raquiduamqueimi?”. Femün mu engu, cümeque nütram entuqueingu.

13. Allcütungenoliyiñ rume, ¿chumngelu ayüucüleafuiñ taiñ amuldungun mu? (Proverbios 27:11).

¹³ Allcütunoeliyiñmu rume ta che, cüme tripayai taiñ cüdau. ¿Chumngelu am? Taiñ amuldungun mu femqueiñ Jehová ca Jesús taiñ huercüeteu (Hech. 10:42). Feimu penofiliyiñ inei no rume cam allcütungenoliyiñ, quimnieiñ taiñ ayühuelfiel taiñ Huenu Chau, feimu ayüucüleaiñ (papeltunge Proverbios 27:11).

14. Quiñe peñi pefiel mu quiñe che ayülu ñi doi quimal, ¿chumngelu com ayüuqueiñ?

¹⁴ Taiñ pu peñi, pu lamngen pefiel mu quiñe che ayülu ñi papeltuafiel ta Biblia, iñchiñ ca ayüuqueiñ. Ti Huerquen trürümquei taiñ amuldungun cüdau quiñe quintuyahulngechi pichiche. Quiñe pichiche ñamrumele, fentren che fill püle quintuyahulafeyu. Fei quiñe che petufile ti pichiche, müna ayühuafui, quisu müten ayüulayai, com tati quintuyahulpelu ca ayühuafui. Ca femngechi com ti trahunche quelluntucuquei ñi quintuafiel che com püle, fei ñi discipulongerpual engün. Fei quiñe che amule ta trahun mu, com ayühuafuiñ.

LONCONTUCUAIMI FENTE TAMI PIUQUEYENIEFIEL JEHOVÁ CA TATI PU CHE

15. ¿Chumafuiñ taiñ doi ayüucüleal amuldungun mu? (Mateo 22:37-39; ca inaduamnge ti adentun).

¹⁵ Loncontucuaiñ, taiñ amuldungun mu pengelquefiyiñ fente taiñ piuqueyeniefiel ta Jehová ca taiñ chafche. Femliyiñ, doi ayüucüleaiñ taiñ amuldungun mu (papeltunge Mateo 22:37-39). Raquiduamnge fente ñi ayüucülequen ta Jehová taiñ amuldungun mu. Ca tati pu che ayühuafui papeltufile ta Biblia. Ca com pu allcütulu ca eluule ñi  serfiafiel Jehová, rumel mongeleaingün (Juan 6:40; 1 Tim. 4:16).

16. Pepi tripanoliyiñ taiñ amuldungual, ¿chumngechi ayüucüleafuiñ?

¹⁶ ¿Chumafuiñ tripanoliyiñ taiñ ruca mu ñi amuldungual? Raquiduamaiñ chumngechi taiñ pengelelafiel ta Jehová taiñ piuqueyeniefiel ca taiñ chafche. Peaiñ ñi rupan Samuel engu Dania. Aculu ti pandemia COVID-19, pepi tripalafuingu ruca mu. Cüdaungefulu rume, amuldunguquefuingün telefono, carta, ca Zoom meu estudialquefuingu che. Ca Samuel contueyu cancer cutran, fei amun mu ta pital mu, amuldunguquefui tañi atendeeteu. Samuel feipi: “Rupan mu cüdaungechi dungu mu, fill raquiduamcülefuiñ ca cansaleafuiñ. Ca cüdautuafuiñ maneluhual Jehová mu, huelu taiñ serfiniefiel mu ta Jehová ayühuelafeiñmu” pi. Feichi mu Dania trani, fei cüla cüyen huitrahuelafui ca cayu cüyen silla de rueda mu miyauquefui. Feipi: “Chumfun rume tañi amuldungual, amuldungulelquefuiñ quiñe enfermera tañi pepaqueteu ca tati pu elelpaqueteu chemcün ruca mu. Cafei quiñe domo cüdauquelu empresa medica mu, ca amuldungulelquefiñ telefono mu” pi. Samuel ca Dania amuldunguquelafuingu fente tañi femquefel cuifi, huelu femingu com tañi pepi femfel, feimu ayüucülefuingu.

17. Taiñ inaduampeel tüfachi troquiñ mu, ¿chem mülei taiñ femal?

¹⁷ Tüfachi troquiñ mu, inaduamiyiñ quechu ngülam. Com inafiliyiñ, quelluaiñmu. Caque quiñeque ngülam quiñe ingrediente reque felei. Cüme trapümfiliyiñ com ti ingrediente, deumayaiñ quiñe cüme iyael. Ca femngechi inafiliyiñ com feitachi ngülam, chaftuafiyiñ huesaque raquiduam ca doi ayüucüleaiñ amuldungun mu.