Choyüngen 1955 tripantu. Inalen tañi epu hunen peñi mu. Tremün Finlandia mapu inaltu lafquen huaihuen püle. Tañi lof feula Vantaa huaria feipingei.

Tañi ñuque fautizahui quiñeque tripantu petu ñi choyüngenon. Huelu tañi chau catrütufi ñi papeltulelafiel Biblia tañi pu pichiqueche ca ñi yenoafiel trahun mu. Feimu mülenon mu tañi chau, tañi ñuque quimeltulquefeiñmu Biblia.

Petu tañi pichican feyentuquefiñ ta Jehová. Regle tripantu nielu, quiñe profesora elueneu quiñe cofque nielu mollfüñ, ngüchi tuculeleneu tañi hun mu. Iñche nehuentu famentuñmafiñ tañi tenedor.

Nielu iñche mari epu tripantu, lai tañi chau. Fei eluhun ñi trahuluhual. Tati pu peñi duamtunieneu, fei quellueneu doi fülcontuafiel ta Jehová. Fill antü papeltun Biblia, ca cüme papeltun caquelu publicacion. Tüfa quellueneu tañi fautizahual mari meli tripantu nielu iñche, 8 conchi agosto 1969 tripantu.

Pichi rupalu tañi tripan colegio mu, llitun tañi precursorngeal. Quiñeque semana rupalu, huiñamtuhun Pielavesi mapu mu ñi amuldungucheal. Tüfachi mapu epe rangiñ Finlandia mu mülei.

 Tüfachi mapu mu quimfiñ ta Sirkka, fei tañi domongerpui. Ayüfiñ tañi ñom piuquengen ca tañi rume piuqueyefiel mu ta Jehová, duamquelafi tañi falin che troquingeal ca duamquelafui nieal fentren chemcün. Iñchiu duamquefuyu serfiafiel ta Jehová ca amual cheu rume tayu huercüngen. Niehuiyu 23 marzo 1974 tripantu mu. Tripalayu tayu pasiayal, doi mai amuyu tayu amuldungucheal Karttula mapu mu. Fei mu mülequefui pichin amuldunguquelu.

Tayu niehun müten, Jehová rume cuidaeyumu. Feimu quimtucuyu: doyümliyiñ taiñ cüdahuelafiel, eluaiñmu com taiñ duamtunieel (Mat. 6:33). Karttula mapu mu mülelu iñchiu, niequelafuyu auto, re cicleta mu miyauquefuyu. Rume hutrengefulu, pepi tripalayu cicleta mu. Rume camapulei cheu taiñ amuldunguqueel, duamniefuyu nieal quiñe auto, huelu nielayu plata.

Quiñe antü acurumei quiñe tañi peñi, elcünuleluhuayiñ tañi auto pieyumu. Cullilayu chem no rume, tuculelafiel bencina müten, femngechi nierpuyu quiñe auto.

Femngechi quimtucuyu Jehová eluaeteu com taiñ duamnieel. Iñchiu mülei tayu serfiafiel müten ta Jehová.

Feichi 1978 tripantu amuyu ti Escuela ñi Pepicangeam pu Precursor. Quiñe quimeltuchequelu Raimo Kuokkanen pingei, a feipieyumu apolal ti solicitud tayu amual Galaad pingechi Escuela. Feimu eluhuiyu tayu estudiayal gringodungun, femngechi tayu pepicaucüleal. Huelu 1980 tripantu mu mangelngeyu tayu cüdahual ti Betel ruca mülelu Finlandia mapu mu, feimu apol-lafiyu ti solicitud. Feichi mu pu cüdauquelu Betel mu pepi apolquelai ti solicitud. Pepi amunolu am ta Galaad mu, huelu amuyu müten ta Betel mu. Duamnieyu tayu cüdahuelafiel ta Jehová cheu rume tayu huercüeteu. Huelu quiñe antü apolafuyu chi solicitud  amual Galaad mu, feimu doi adümnierpufiyu gringodungun.

Quiñeque tripantu rupalu, ti Troquiñ Adniechequelu feipi pu betelita pepi apolafui ti solicitud amual Galaad mu. Feimu pürümquechi huercüyu ti solicitud. Ayüucülefuyu Betel mu, huelu doi ayüniefuyu tayu pepicangeal tayu cüdahual cheu tañi doi duamtufalngen. Fei puhui chi antü, mangelngeyu tayu amual ti clase 79 Galaad pingechi Escuela mu. Fei septiembre 1985 tripantu afi ti Escuela, fei huercüngeyu Colombia mapu mu.

Puulu Colombia mu huercüngeyu tayu cüdahual ti Betel ruca mu. Cüdahun com tañi nehuen mu. Rupalu quiñe tripantu, feipin tayu huercüngeal cañpüle. Feichi mu müten feipin tañi elungeal cüdau cañpüle, doi feipihuelan. Feimu huercüngeyu tayu misionerongeal Neiva huaria, Huila mapu mu.

Rumel ayüquen tañi amuldungual. Finlandia mapu mu cauchulelu iñche, precursorngefun, fei quiñeque mu amuldunguquefun pulihuentu ca pun, com antü. Ca hue nieulu Sirkka iñchiu, ca amuldunguquefuyu com antü. Quiñeque mu camapu amuldungulu iñchiu, umaquefuyu auto mu. Femngechi ngünamcanoal tayu tiempo, fei ca antü pulihuen tripayal tayu amuldungual.

Tayu misionerongen mu doi ayüutuyu tayu amuldungual cuifi reque. Tayu trahunqueche doi tremcülerpui. Ca pu peñi, pu lamngen Colombia mu yamchequeingün, piuqueyechequeingün ca quim mañumchequeingün.

Quiñeque huaria fülcülelu Neiva huaria mu quiñe testigo no rume mülequelafui. Feichi mapu mu mülequefui pichique hueichan, feimu cüdautuquefui ñi conpual ta che. Fei raquiduamquefun chumngechi puhual ti rüf dungu feichi mapu mu. Feimu llellipufiñ Jehová quiñe che feichi pichique huaria tuhun-ngelu ñi testigongerpual. Feichi che mülele Neiva huaria mu quimürpuafui ti rüf dungu, fei huiñotuafui tañi mapu mu ñi amuldunguafiel pu che. Ca llellipufiñ Jehová feichi che fautizaule ñi cüme cristianongerpual. Müna cümelu tañi raquiduam troquiufun, huelu Jehová nierquei doi cüme raquiduam.

Pichin antü rupalu, quimeltufiñ Biblia quiñe hueche huentru Fernando González pingelu. Fei mülequefui Algeciras huaria mu, fei mu ngelai quiñe testigo no rume. Fill semana cüdaumequefui Neiva huaria mu, 50 kilometro alü camapulefui. Fernando cüme estudiaquefui com tayu inaduamal, ca pürüm eluhui tañi amual ta trahun mu. Quiñe semana rupalu müten, quisu trapümi com tañi pu che cheu tañi mülemum, fei enseñalfi com tañi quimürpuel Biblia meu.

Fernando cayu cüyen rupalu, fautizahui enero 1990 tripantu mu. Fei pürüm precursor regularngerpui. Fernando fei ta hunen  testigongerpui cheu tañi tuhun, Algeciras huaria mu. Feimu ti Betel ruca huercüfi precursores especiales feichi mapu mu. Fei febrero 1992 tripantu, mülerpui ti hunen trahunche feichi mapu mu.

Fernando tañi mapu mu müten amuldungulai, ca mapu mu ca amuldungurpui. Quisu niehui Olga engu, fei amuingu ca huaria mu cheu ñi mülenon ta testigo, San Vicente del Caguán pingechi huaria. Ca fei mu quellurpuingu ñi müleal quiñe trahunche. Fei 2002 tripantu mu, mangelngeingu ñi huitrancontumeafiel pu trahunche. Ca petu femmequei feitachi cüdau.

Tüfa quimeltueneu cheu rume cüdahuelfili ta Jehová, llellipun mu mülei tañi cüme feipiafiel chem tañi duamnieel ca tañi ayüqueel. Com taiñ pepi femnoel, Jehová femafui. Tüfachi cüdau am Jehová tañi cüdau, iñchiñ no (Mat. 9:38).

Feichi 1990 tripantu mu, feipingen tañi huitrancontuafiel pu trahunche Bogotá mu mülelu. Tañi domo iñchiu rume falin chengelayu ca huimtulelayu ñi müleal fütraque huaria mu, feimu elungelu feitachi cüdau pichi llicalefuyu. Huelu rüfngei ñi feipin Filipenses 2:13: “Chau Ngünechen chumngechi tañi ayüqueel, rume nehuentucuqueimünmeu. Femngechi quelluqueimünmeu tamün yafüluucüleal ca tamün cüpa cüdahual”.

Rupayechi tripantu mu, feipingeyu tayu huitrancontumeafiel pu trahunche mülelu Medellín huaria mu. Feiti mapu mu alün quehuan dungu mülequefui, fei pu che llicahuequelafui. Quiñe rupa enseñalfilu iñche Biblia quiñe che, huecun allcüngei ñi tralcatumequen ta che. Iñche epe trananacümuufun, huelu ti che tañi enseñalfiel Biblia duamcülelai, re papeltuniei müten. Rupan papeltulu, feipieneu pichi esperaen, pichi tripayan huecun. Fei conpatulu, epu pichiqueche tucupai, fei tüngcülen feipieneu: “Yemetun tañi epu pichiqueche”.

Huelu feichi dungu mu müten rupalayu. Quiñe rupa amuldungulu iñchiu, tañi domo lefcülen cüpai iñche mu, pellquelefui. Tralcatungen pieneu, fei iñche ca llican. Fei inaduamürpuyu tañi domo ñi tralcatungenon, huelu mai quiñe huentru rupalelu inafül tañi domo mu.

Rupachi tripantu mu huimtulelu am iñchiu, fei llicahuelayu. Afmatulqueyumu pu peñi, pu lamngen rupamequelu femngechi dungu mu ca quiñeque mu doi huesaque dungu rupamequeingün. Raquiduamqueyu Jehová quellufile engün, iñchiu ca quelluafeiñmu rupaliyiñ huesaque dungu mu. Rumel inaqueyu tayu ngülamtueteu pu loncolelu, cuñihun mu miyauquefuyu ca caquelu dungu elcünulelquefiyu ta Jehová.

Huelu re huesaque dungu müten mülelafui. Ca rupaqueyu ayühun-ngechi dungu mu. Quiñe rupa huitrancontufilu iñche quiñe che tañi ruca mu, huecun epu  domo lucutuumequelu troquihun. Huelu ti ngen ruca feipieneu ngüneltu tripange huecun, fei pefilu iñche epu choroi ürque inayentudungumequelu.

Feichi 1997 tripantu üitungen tañi quimeltual quiñe escuela mu amulu pu huentru curengenolu. b Iñche rume ayüuquen tañi amual chillcatuhue mu cheu ñi quimeltungequen Biblia ñi dungu. Huelu turpu raquiduamquelafun tañi quimeltual quiñe escuela mu.

Ca üitungen tañi superintendente de distritongeal, huelu feichi cüdau femngehuelai. Fei ca huiño üitungen tañi huitrancontuafiel pu trahunche. Doi 30 tripantu yenien tañi quimeltuquen escuela mu ca ñi huitrancontuafiel pu trahunche. Rume cümelcangen tañi mongen mu, huelu quiñeque mu pichi cüdaungei, ¿chumngelu am?

Rume trencül huentrungen. Quiñeque mu rüf quelluqueneu ñi chaftuafiel huesaque dungu, huelu cafei müte quelluquelaeneu tañi cüme elcünual quiñeque dungu trahunche mu. Por ejemplo, quiñeque mu rume nehuentu dunguquefiñ pu peñi, pu lamngen tañi piuqueyecheal ca duamtucheal engün. Rüfcünu, petu tañi dungumequefiel engün, duamniefun tañi femngechi chengenoal, doi mai ñochi duamngeal (Rom. 7:21-23).

Quiñeque mu, huesa duamquen tañi huelulcahun mu (Rom. 7:24). Quiñe rupa fente tañi huesa duamcülen, feipifiñ ta Jehová tañi misionerongehuenoal ca tañi huiñotual Finlandia mapu mu. Huelu feichi antü, allcün quiñe dungu trahun mu, fei quelluqueneu tañi inanieal müten tañi cüdau ca tañi doi cüme cristianongerpual. Turpu ngoimalayan Jehová chumngechi allcütuñmaeneu tañi llellipun. Ca mañumquefiñ ta Jehová tañi quelluqueteu ñi doi cüme cristianongeal.

Tañi domo Sirkka iñchiu rume mañumniefiyu ta Jehová, fei elueyumu quiñe falin regalo: tayu cüdahuelafiel epe com taiñ mongen mu. Ca mañumquefiñ ta Jehová tañi elueteu mu quiñe cüme domo, tañi piuqueyequeteu ca tañi quelluqueteu.

Pichiñma mu puhulan 70 tripantu. Feimu quimeltuhuelayan escuela mu ca huitrancontuhuelayafiñ pu trahunche. Huelu fei hueñancülquelaeneu, ¿chumngelu am? Duamnielaiñ fütraque cüdau taiñ püramyeafiel ta Jehová, huelu mai doi falin-ngei taiñ serfiafiel ñom piuque mu, piuqueyen mu ca fente taiñ mañumniefiel (Miq. 6:8; Mar. 12:32-34).

Fentepun tañi mongen niequen fentren elfal cüdau. Com tüfa ta nierpun quisu tañi duam mu no, Jehová ta elueneu, culpan chengelu rume iñche. Quellunoelimeu Jehová, quisu enturpulayafun com cüdau tañi elungeel. Quisu tañi nehuen doicülei tañi pepiluhun mu (2 Cor. 12:9).