1. Taiñ pu peñi ca pu lamngen, ¿chumquei ñi doi cüdahuelafiel Jehová?

FÜLCÜLEPAI ta antü ñi apümcangeal com huesaque dungu, feimu doi cüdau nieiñ (Mat. 24:14; Luc. 10:2; 1 Ped. 5:2). Com iñchiñ ayüniefuiñ taiñ cüdahuelafiel Jehová com taiñ piuque mu. Quiñeque taiñ pu peñi ca pu lamngen ayüqueingün ñi hunelerpual amuldungun mu cam ayüqueingün ñi cüdahual Betel mu. Caquelu ayüquei ñi quelluntucual ñi deumangeal Trahunhue Ruca. Ca quiñeque taiñ pu peñi cüdauqueingün ñi siervo ministerialngerpual cam ñi loncolerpual trahunche mu (1 Tim. 3:1, 8). Jehová rume ayüucülepelai tañi cüdahueleteu tañi pu che (Sal. 110:3; Is. 6:8).

2. Pepi huechurpunoliyiñ taiñ cüpa femün, ¿chum duamafuiñ?

² Huelu alünque tiempo rupafule ca huechunenturpunoliyiñ taiñ cüpa femün, müna huesa duamafuiñ. Ca fente taiñ füchalen cam cutrancülen, pepi femlayafuiñ quiñeque cüdau Jehová ñi troquiñche mu, feimu ca huesa duamafuiñ (Prov. 13:12). Femngechi dungu mu rupai taiñ lamngen Melissa. * Taiñ lamngen müna ayüniefui ñi cüdahual Betel mu ca ñi amual ti Escuela ñi Pepicangeam pu Amuldunguquelu Ngünechen ñi Gobierno. Huelu fente tañi cusen, pepi amulai feimu huesa duami.

3. Quiñeque hueche, ¿chumafuingün petu ñi elungenon quiñe falin cüdau?

³ Quiñeque hueche rume cülfüncüleingün, adümuucüleingün, müchai müten quimqueingün ñi chumal engün ca rume eluucüleingün ñi cüdahual. Huelu petu ñi elungenon  quiñe falin cüdau, duamnieafuingün chi ñi doi cüme elcünutual tañi chumngechi chengen engün. Ca duamnieafuingün chi ñi doi nieal ta paciencia ca ñi quimal ñi respetayafiel ta caquelu. Ca duamnieafuingün ñi quimal ñi doi cüme entual ñi cüdau engün. Eimi hueche doi cümechengerpulmi, raquiduamnon mu rume elungerumeafuimi quiñe falin cüdau trahunche mu. Peaiñ ñi rupan ta Nick. 20 tripantu nielu, müna huesa duamfui elungenolu ñi siervo ministerialngeal. Fei feipi: “¿Chemu am elungelan feichi falin cüdau?” pi. Huesa duamfulu rume, fentecünulai tañi cüdau. Fei rume cüdahui trahunche mu ca amuldungun meu. Famülque mu, taiñ peñi coneltulei ti Troquiñche Adcünuquelu Betel ruca mu.

4. ¿Chem inaduamaiñ tüfachi troquiñ mu?

⁴ Eimi feipicünufilmi ta Jehová tami femal quiñe falin cüdau, huelu pepi femnofulmi, huesa duamafuimi. Femngechi dungu mu rupalmi, ¿chumafuimi? Llellipuafimi ta Jehová ca feipiafimi tami chum duamcülen (Sal. 37:5-7). Ca feipiafuimi quiñeque peñi ca lamngen cüme hueniyefilu ta Jehová tami quelluaeteu, fei inayafimi tami ngülamtuaeteu. Femülmi tüfa, huechunenturpuafuimi feitachi falin cüdau tami feipicünuel. Huelu Melissa reque, ayüfulmi rume tami femal quiñe falin cüdau, femürpulayafuimi chi. Feimu, ¿chumafuimi tami ayüucüleal? Tami quellungeal, tüfachi troquiñ mu inaduamaiñ cüla dungu. Quiñe, ¿chumafuiñ taiñ ayüucüleal? Epu, ¿chumngechi doi ayüucülerpuafuiñ? Ca cüla, ¿chem falinque cüdau femafuiñ fei taiñ ayüucüleal?

5. Taiñ ayüucüleal, ¿chem dungu meu raquiduamcüleaiñ müten? (Eclesiastés 6:9).

⁵ Ñi feipin Eclesiastés 6:9 quimeltueiñmu chumafuiñ taiñ ayüucüleal (papeltunge). ¿Chem mülei taiñ femal? Raquiduamcüleaiñ taiñ nieel meu ca taiñ pepi femafel müten, femngechi ayüucüleaiñ. Huelu raquiduamtucuniefiliyiñ taiñ pepi femnoafel, ayüucülelayaiñ.

6. ¿Chem nütram inaduamaiñ? Ca ¿chem quimürpuaiñ?

⁶ Iñchiñ taiñ chengen mu, quintuyahulmequeiñ taiñ femal hueque dungu. Feimu ¿rüf ayüucülepeafuiñ mai taiñ nieel meu müten? Femafuiñ llemai. Fei ¿chem quelluaiñmu taiñ ayüucüleal? Inaduamaiñ quiñe nütram mülelu Mateo 25:14-30. Tüfa mu, Jesús nütramcai quiñeque esclavo elungelu quiñeque talento. * Fei quimürpuaiñ epu dungu. Quiñe, chumngechi ayüucüleafuiñ taiñ nieel meu müten. Ca epu, chumafuiñ taiñ doi ayüucüleal.

7. ¿Chem nütramcai Jesús?

⁷ Jesús tañi nütram mu, quiñe huentru petu ñi amunon ca mapu mütrümfi tañi pu cüdaufe, fei elfalcünulelfi quiñeque talento. * Tüfachi huentru cüme quimniefui tañi pu cüdaufe caquerumei ñi adümuhun engün. Feimu quiñe esclavo elufi quechu talento, cangelu esclavo elufi epu, cangelu cai elufi quiñe talento müten. Tati lloulu quechu talento ca tati lloulu epu talento, rume cüdahuingu fei doi plata huehuingu. Huelu tati lloulu quiñe talento müten cüdaulai, fei quechanentungei.

8. Ti cüdaufe lloulu quechu talento, ¿chemu ayüucüleafui?

 ⁸ Ti cüdaufe lloulu quechu talento müna ayüucülepelafui, ¿chumngelu? Rume fentren plata elfalcünungei, tüfa pengeli tañi ñidol fente maneluucülefui quisu meu. Huelu, ¿feiti cüdaufe cai lloulu epu talento? Rume fentren plata ta elfalcünungelai, feimu huesa duamafui. Huelu femlai. ¿Chumi? Peafiyiñ.

9. Ti cüdaufe lloulu epu talento, ¿chem raquiduam niequelai? (Mateo 25:22, 23).

⁹ (Papeltunge Mateo 25:22, 23). Feichi cüdaufe lloulu rume epu talento müten, huesa duamlai, illculai rume. Feichi cüdaufe feipilai: “¿Fei müten elfalcünungen? Iñche fente cüme cüdauquen cangelu cüdaufe reque”. Ca feipilai: “Tañi ñidol maneluuquelai iñche mu, feimu rüngaltucuafiñ ti epu talento, cüdauhuelayan quisu meu”. Jesús feipilai ñi femngechi raquiduamün tati cüdaufe.

10. Ti cüdaufe lloulu epu talento, ¿chumi?

¹⁰ Ti cüdaufe lloulu epu talento cüme quimniefui fente ñi falin-ngen ti cüdau ñi elfalcünungeel, fei eluhui ñi cüme huechunentuafiel. ¿Chum tripai tañi cüdau? Epu talento elfalcünungei, huelu ca epu talento huehui. Tañi cüme femün mu, tañi ñidol saquieyu ca doi cüdau elfalcünueyu.

11. ¿Chumafuiñ taiñ doi ayüucüleal?

 ¹¹ ¿Chem quimeltueiñmu ñi femün feitachi cüdaufe? Chem cüdau rume elfalcünungeliyiñ trahunche mu, com nehuen mu femürpuaiñ. Femngechi femliyiñ, doi ayüucüleaiñ. ¿Chumafuiñ? Com nehuen mu amuldunguaiñ ca cüme cüdahuaiñ trahunche mu (Hech. 18:5; Heb. 10:24, 25). Cüme pepicayafiyiñ chem ñi inaduamngeal trahun mu femngechi taiñ cüme huiñoldungual. Chem asignacion rume elfalcünungeliyiñ trahun mu, cüme pepicayafiyiñ. Feipingeliyiñ taiñ femal quiñe cüdau trahunche mu, alüñmalayaiñ ca pengelaiñ taiñ manelfalngen. Elungeliyiñ quiñe cüdau, müte falinolu troquilayafiyiñ. Huelu mai eluhuaiñ taiñ doi adümuucüleal taiñ cüdau mu (Prov. 22:29). Loncontucuaiñ: com taiñ nehuen mu cüdauliyiñ, doi cüme hueniyeafiyiñ Jehová ca doi ayüucüleaiñ (Gál. 6:4). Cafei quiñe peñi cam quiñe lamngen elungele quiñe cüdau iñchiñ taiñ ayüniefel, iñchiñ ca ayühuaiñ fei engün mu (Rom. 12:15; Gál. 5:26).

12. Melissa engu Nick, ¿chem quellueyu ñi doi ayüucüleal?

¹² ¿Acordaimi ñi rupan taiñ lamngen Melissa, taiñ nütramcapeel parrafo epu mu? ¿Chem quellueyu ñi ayüucüleal? Fei feipi: “Iñche precursorangen, feimu eluucülen tañi cüme amuldungual ca ñi caquerumeal tañi amuldungun. Tüfa rume ayühulqueneu” pi taiñ lamngen. ¿Acordaimi cai ñi rupan ta Nick, taiñ nütramcapeel parrafo cüla mu? ¿Chumi tañi huesa duamhuenoal? Fei feipi: “Raquiduamün chem tañi pepi femafel, fei eluhun ñi cüme amuldungual ca cüme huiñoldungual trahun mu. Cafei huirintucun ñi cüdahual Betel mu. Fei quiñe tripantu rupalu mangelngen” pi taiñ peñi.

13. Fente cüme cüdahulmi, ¿chem dungu rupayafui? (Eclesiastés 2:24).

¹³ Eimi fente cüme cüdahulmi trahunche mu, doi cüdau elungeafuimi Nick reque. Huelu Melissa reque, doi falinque cüdau elungelayafuimi chi. Femfule rume, ayüucüleafuimi tami femmequen Jehová tañi troquiñche mu (papeltunge Eclesiastés 2:24). Cafei tami cüme femün mu, ayühulquefimi ta Jesús fei ayüucüleafuimi.

14. ¿Chem rumel mülei taiñ femal?

¹⁴ Famülque mu iñchiñ cüme serfiquefiyiñ ta Jehová. Huelu ¿fei müten femaiñ? Femlai. Com iñchiñ mülei taiñ raquiduamal ca chem dungu femürpuafuiñ Jehová ñi troquiñche mu, femngechi taiñ doi cüme quimeltucheal ca quelluafiel taiñ pu peñi ca pu lamngen. Taiñ femürpual tüfa, quisutu raquiduamuulayaiñ, huelu mai eluhuaiñ taiñ duamtuafiel ta caquelu che (Prov. 11:2; Hech. 20:35).

15. ¿Chumafuimi tami doi cüdahuelafiel Jehová?

¹⁵ Ngillatufinge ta Jehová tami quimal ca chem dungu femafuimi tami doi cüdahuelafiel (Prov. 16:3; Sant. 1:5). Eimi hunelerpuafuimi amuldungun mu, cüdahuafuimi Betel mu ca quelluntucuafuimi ñi deumangeal Trahunhue Ruca. Ca quimürpuafuimi quiñe hue quehun, cam cañpüle amuafuimi tami amuldungual. Tami doi quimal tüfachi falinque cüdau tami femafel, papeltuafuimi tati lifru Organizados para hacer la voluntad de Jehová capitulo 10.  Ca nütramcayafuimi pu loncolelu engün. * Eluucülelmi tami doi cüdahual, com che quimai tami doi cüme hueniyefiel Jehová ca doi ayüucüleaimi.

16. Pepi femnofulmi quiñe cüdau, ¿chumafuimi?

¹⁶ Huelu fachantü pepi femnofulmi feitachi falinque cüdau taiñ nütramcapeel tüfachi troquiñ mu, ¿chumafuimi? Raquiduamnge tami femürpual quiñe dungu tami rüf pepi femafel. Peaiñ quiñeque dungu.

17. ¿Chem dungu mu doi cüdahuafui quiñe peñi? (1 Timoteo 4:13, 15).

¹⁷ (Papeltunge 1 Timoteo 4:13, 15). Eimi peñi eluucülenge tami doi cüme hueupifengeal, cüme papeltual ca tami doi cüme quimeltucheal. Femülmi, rume quelluafimi com tami pu allcütuqueteu. ¿Chem quelluaimu? Feipiafimi tami quelluaeteu tati consejero auxiliar cam caquelu loncolelu cüme hueupiquelu ca enseñachequelu * (1 Tim. 5:17). Estudiayafuimi ti papel Eluwnge tami küme papeltual ka kimeltucheal. Inaduamafuimi caque quiñeque quimeltun. Quisu tami ruca mu pepicahuafuimi, fei trahun mu inayaimi tami quimürpuel. Re inalayafimi tati quimeltun tami papeltuel, huelu mai quelluafimi tami pu allcütueteu ñi doi maneluhual Jehová mu ca ñi inayal tañi quimürpuel engün. Femülmi, eimi ta ayüduamaimi ca femngechi tami pu allcütuqueteu.

18. ¿Chumafuiñ taiñ doi cüme quimeltuchefengeal?

 ¹⁸ Com iñchiñ elfalcünungeiñ taiñ amuldungual ca quellucheal ñi discipulongerpual (Mat. 28:19, 20; Rom. 10:14). ¿Ayüafuimi tami doi adümuucüleal tüfachi falin cüdau mu? Estudiayafimi ti papel Kimeltucheal pingelu ca inayafimi tami quimürpuel amuldungun mu. Ca peafuimi fillque ngülam mülelu Ti papel taiñ pepicahuam mu ca mülelu fillque video mu pengelquelu chumngechi taiñ amuldungual. Pefilmi, inayaimi tati fillque nütram, femngechi quimaimi chuchi am doi cüme tripai tami lof mu. Femülmi com tüfachi dungu, doi cüme quimeltuchefengeaimi, fei tüfa rume ayühulaimu (2 Tim. 4:5, TNM).

19. ¿Chumafuiñ taiñ doi cümechengeal?

¹⁹ Turpu ngoimalayaimi tami femal quiñe doi falin dungu: eluunge tami doi cümechengeal femngechi tami ayühulafiel ta Jehová (Gál. 5:22, 23; Col. 3:12; 2 Ped. 1:5-8). Raquiduamnge tüfa: doi cüpa nielmi feyentun, ¿chem quelluafeimu? Papeltuafuimi taiñ publicacion hulquelu cümeque ngülam taiñ doi feyentual Chau Jehová mu. Ca peafuimi fillque video tripalu JW Broadcasting^® mu. Tüfa pengeli quiñeque peñi ca quiñeque lamngen chaftuingün huesaque dungu mu, femngechi pengelingün tañi maneluucülen Jehová mu. Fei hula, raquiduamnge chumngechi pengelafuimi tami maneluucülen Jehová mu fei engün reque.

20. Famülque mu, ¿chumafuiñ taiñ doi ayüucüleal?

²⁰ Com iñchiñ ayüqueiñ taiñ doi cüdahuelafiel Jehová. Huelu quiñeque mu pepi femquelaiñ. Ngünenietule Chau Dios Mapu mu, pepi femafuiñ llemai. Huelu ¿chem femafuiñ famülque mu? Eluhuaiñ taiñ cüdahuelafiel Jehová tunte taiñ rüf pepi femafel. Femngechi doi ayüucüleaiñ taiñ serfifiel mu ta Jehová. Huelu doyelchi mai püramyeafiyiñ taiñ ayühun-ngechi Chau Ngünechen, Jehová (1 Tim. 1:11, TNM). Feimu llemai, chem cüdau rume femliyiñ Jehová ñi troquiñche mu, ayüucüleaiñ.