1. ¿Chem huesa dungu mu rupai José? ¿Chumi?

 RAQUIDUAMNGE chem huesaque dungu mu rupai José cuifi mu. José cüdaucülequefui Potifar ñi ruca mu. Quiñe antü mülenolu ta Potifar, tañi domo feipifi ta José cuduyu iñchiu pifi. José cüme quimniefui pinole tañi cudumafiel tüfachi domo, fei lladcütuafeyu ca rume huesalcayafeyu. Femfulu rume, famentufi. Tüfachi domo fentecünulai tañi feipiafiel ta José ñi cudumaeteu, huelu José turpu eluulai. ¿Chemu am femlai ta José? Quisu feipi: ‘¿Chumngechi am femafun iñche tüfachi huesa dungu ñi culpayal ta Ngünechen meu?’ (Gén. 39:7-12).

2. ¿Chumngechi quimi ta José Jehová ñi ayüquenon ti ñihuañpehun?

² Moisés tañi ley feipiquefui ñihuañpeulayaimün (Éx. 20:14). Huelu 200 tripantu rupalu hula ñi lan ta José, hulngei tüfachi ley. Feimu mülenolu am ti ley José tañi antü mu, ¿chumngechi quimfui ñi cümenon tati ñihuañpen dungu? José cüme quimniefui ta Jehová, feimu ngüneduami tañi ayüquenon tati ñihuañpen dungu. José cüme quimniepelafui Jehová elcünui tati curehuen müten tañi cudumuhual. José ¿ca quimniepelafui ñi rupan ta Sara? Abrahán tañi domongefulu am, Jehová cuñiutucueyu tañi nüntucangenoal. Ca femngechi Jehová cuñiutucufi ta Rebeca, Isaac tañi domo (Gén. 2:24; 12:14-20; 20:2-7; 26:6-11). José raquiduami com tüfachi dungu mu ñi chumün ta Jehová, femngechi quimürpui chem ñi ayüqueel ca chem tañi ayüquenoel. José am piuqueyefilu ta Jehová, quisu ayüfui ñi femal Jehová tañi ayüqueel müten.

3. ¿Chem inaduamafiyiñ feitachi troquiñ mu?

 ³ Com iñchiñ falintuquefiyiñ Jehová tañi norngechi dungu. Huelu cuñiutucuunoliyiñ, inayafuiñ chem ñi norngen pu che tañi adquiñ mu (Is. 5:20; Rom. 12:2). Feimu tüfachi troquiñ mu, inaduamaiñ ñi chumquen tati pu norngelu ca chumngechi cümelcayafeiñmu falintufiliyiñ tati nor dungu. Ca peaiñ cüla dungu chumngechi taiñ doi falintuafiel Jehová tañi huercün dungu.

4. ¿Chumquei tati che norngenolu?

⁴ Quiñeque mu, quiñeque che nor che troquiuquei. Huelu mallmangei, huesa dunguyechequei ca doicülelu caquelu mu troquiuquei. Jehová ayüquelafi femngechi che. Jesús mülepalu mapu mu, nüngaituquefi pu loncolechi religioso norngelu troquiuquelu (Ecl. 7:16; Luc. 16:15) Feimu feipiafuiñ, tati norngechi che doicülelu caquelu mu troquiuquelai. 

5. Ñi feipin ta Biblia, ¿chumquei tati norngechi che?

⁵ Biblia pengelquei tati nor chengelu cüme inaquefi Jehová tañi huercün dungu. Com tañi ayüqueel ta Jehová femquei. Peafiyiñ quiñeque dungu. Cuifi mu, Jehová feipifi tati pu negociaquelu ñi püneafiel norngechi pesa (Deut. 25:15). Feimu quiñe cristiano norngelu mülei ñi ngünencachenoal negocian dungu mu. Ca femngechi Biblia feipiquei quiñe norngechi che ayüquelai tañi huesalcangeal caquelu pu che. Cafei tati norngechi che petu ñi femnon chem dungu rume, hune ngüneduamquei chem ñi raquiduamqueel ta Jehová, femngechi tañi ayühuelafiel (Col. 1:10).

6. ¿Chemu maneluhuafuiñ Jehová tañi cümeque ngülam mu? (Isaías 55:8, 9).

⁶ Biblia pengeli Jehová mu cüpaquei com tati norngechi dungu (Jer. 50:7). Jehová am deumaeteu iñchiñ, quisu müten mülefui tañi feipial chem tañi cümen, chem tañi cümenon. Jehová ta huelulcauquelai, feimu quisu müten quimniei. Huelu iñchiñ huelulcauqueiñ, feimu chumngechi ñi raquiduamqueel ta Jehová, femngechi raquiduamquelaiñ (Prov. 14:12; papeltunge Isaías 55:8, 9). Culpafengefuliyiñ rume, deumangeiñ taiñ inayentuafiel ta Jehová, feimu inayentuafuiñ Jehová tañi norngen (Gén. 1:27). Taiñ piuqueyefiel mu taiñ Chau Dios, ayühunquechi inayentuquefiyiñ com taiñ nehuen mu (Efes. 5:1, TNM).

7. ¿Chumngelu cümei taiñ ngülamtungeal? Feipinge quiñe ejemplo.

⁷ ¿Chemu cümelcaqueiñmu ñi inayal Jehová tañi huercün dungu? Taiñ adümafiel, raquiduamaiñ tüfachi dungu. Ruca mu tati pu chau ca tati pu ñuque mülefui ñi feipiafiel tañi pichiqueche chem hora tañi acual engün, chem hora tañi iyal engün ca chem hora tañi umautual engün. Femnole tati chau, tati ñuque, pu pichiqueche chumafui rume tati ruca mu, quisu mandahuafuingün. Ca femngechi pital mu mülei huercün dungu chumngechi tañi atendengeal ta che. Tati doctor, pu enfermera inanofile tüfachi huercün dungu, chumafuingün rume, fei cüme atendechelayafuingün chi, fei layafui chi quiñeque che. Feimu tati pu che cüme quimniele ca inaniefile tañi chumal engün, fei cuñiutucuafeyu engün. Ca femngechi quimfiel mu ca inaniefiel mu  Jehová tañi cümeque ngülam, ca cümelcaqueiñmu.

8. ¿Chem cümelcan llohuafui tati norngechi che?

⁸ Jehová cümelcayafi com tati pu che inaquefilu tañi ngülam, ¿chumngechi? “Tati pu norngechi che llohuai ti Mapu ñi ngen-ngeal engün, ca rumel müleaingün fei mu” (Sal. 37:29). Cüpalechi antü mu com tati pu che inayafi Jehová tañi cümeque ngülam. Fei quiñeucületuaingün, tüngcületuaingün ca ayüucületuaingün. Jehová ayüniefui femngechi mongen tami yenieal, feimu ¿cümenoafulu am taiñ nor chengeal? Feula peafiyiñ cüla dungu taiñ doi falintuafiel tati norngechi dungu.

9. ¿Chem quelluafeiñmu taiñ falintuafiel Jehová tañi norngechi dungu?

⁹ Hunen dungu: piuqueyeafiyiñ ta Jehová. Taiñ falintuafiel tati nor dungu mülei taiñ doi piuqueyeafiel ta Jehová, quisu am feipiquelu chem ñi norngen ca chem ñi norngenon. Piuqueyeniefiliyiñ ta Jehová, doi eluucüleaiñ taiñ inayal tañi cümeque ngülam. Raquiduamnge tüfa, Adán ca Eva engu piuqueyeniefule ta Jehová, feyentuafui com tañi feipieteu. Huelu femlaingu, ¡müna huesa! (Gén. 3:1-6, 16-19).

10. ¿Chumi Abrahán tañi doi quimafiel Jehová tañi raquiduam?

¹⁰ Iñchiñ inayentulayafiyiñ ñi femün Adán ca Eva. Doi mai, amuleai taiñ quimafiel ta Jehová, falintunieafiyiñ ñi chumngen ca eluucüleaiñ taiñ quimal Jehová tañi raquiduam. Femliyiñ, doi piuqueyeafiyiñ ta Jehová. Raquiduamnge Abrahán mu. Quisu rume piuqueyefui ta Jehová. Cüdautufulu rume ñi feipieteu ta Jehová, famtripalai ta quisu mu. Doi mai, eluhui tañi doi quimafiel ta Jehová. Quiñe antü, Jehová feipieyu ñi apümcayafiel Sodoma ca Gomorra. Fei Abrahán raquiduamcülehuei. ‘¿Apümcapeafimi mai tati pu lif mongen-ngelu quiñentrür ti culpafe engün?’ pifi ta Jehová. Abrahán afmatulehuei ñi feipieteu ta Jehová, feimu ramtucafi. Tüngcülen Jehová huiñoldungueyu. Femngechi Abrahán inaduamürpui Jehová tañi quimüñmaquefiel pu che tañi raquiduam. Ca quimürpui Jehová tañi castigaquenofiel tati cümeque che quiñentrür pu huesaque che engün (Gén. 18:20-32). 

11. Abrahán, ¿chumngechi pengeli ñi piuqueyefiel ta Jehová ca ñi maneluucülen quisu mu?

¹¹ Abrahán rume quellueyu Jehová ñi nütramcan engu feiti huaria Sodoma ca Gomorra mu. Deu nütramcalu engu, Abrahán doi poyequefi ta Jehová ca yamniequefi. Rupachi tripantu, Abrahán ca huiño pengeli tunte ñi maneluucülen Jehová mu. Jehová feipieyu ñi chalintucuafiel tañi piuqueyen fotüm Isaac. Feula Abrahán doi cüme quimniefi ta Jehová, feimu ramtulafi chem no rume. Abrahán pürüm eluhui ñi femal Jehová tañi feipieteu. Raquiduamnge, ¿rume cutrantupiuquelepelai ñi chalintucual tañi fotüm Isaac? ¿Abrahán rüf loncontucuniepelai com tañi quimfiel ta Jehová? Quisu quimniefui Jehová femquei re nor dungu müten, huesaque dungu femquelai. Abrahán quimniei Jehová ñi huiñomongeltuafiel ta Isaac (Heb. 11:17-19). ¿Chumngelu? Jehová feipicünufi Abrahán Isaac mu tripayai fentren yomelche. Huelu Isaac quiñe fotüm rume nielafui.  Abrahán piuqueyefi ta Jehová, feimu quimniei ñi femquen re nor dungu. Feimu cüdaungelu rume, Abrahán eluucülei ñi femal Jehová tañi feipieteu (Gén. 22:1-12).

12. ¿Chumngechi inayentuafuiñ Abrahán? (Salmo 73:28).

¹² ¿Chumngechi inayentuafuiñ Abrahán? Abrahán reque, iñchiñ mülei taiñ doi quimnierpual ta Jehová. Femliyiñ, doi fülconpuafuiñ Jehová mu ca doi piuqueyeafuiñ (papeltunge Salmo 73:28). Com taiñ raquiduamel inayafiyiñ Jehová tañi raquiduam (Heb. 5:14). Femngechi dicümtucungeliyiñ femal huesaque dungu, famentuafiyiñ. Turpu femlayafuiñ Jehová ñi üdequeel ñi hueniyehuenoafiel. ¿Ca chumngechi pengelafuiñ ñi falintufiel nor dungu? Peafiyiñ.

13. ¿Chumngechi quintuafuiñ nor dungu? (Proverbios 15:9).

¹³ Epu dungu: eluunge tami doi falintuafiel nor dungu fill antü. Pürüm falintungequelai Jehová tañi ngülam, doi mai fill antü yafüluhuaimi tami femal. Tüfa rume cüdaungelai tati. Jehová quimtucuniei tunte taiñ femal (Sal. 103:14). Biblia pengeli Chau Jehová “piuqueyeniefi tati yafüluulu ñi femal nor dungu” (papeltunge Proverbios 15:9). Ayüliyiñ nieal quiñe cüdau trahunche mu, mülei taiñ yafüluhual taiñ diturpual. Ca femngechi taiñ femal nor dungu, mülei taiñ yafüluhual. Jehová ñochiquechi quelluaiñmu ñi femal (Sal. 84:5, 7).

14. ¿Chem adentulei ti tacun ñi feipiel Pablo? ¿Chumngelu duamniefiyiñ?

¹⁴ Jehová tañi huercün dungu cüdaungelai tañi inangeal (1 Juan 5:3). Doi mai, cuñiutucuqueiñmu, fill antü duamnieiñ ñi cuñiutucunieaeteu. Apostol Pablo huirintucui com pu cristiano ñi tucutuhual quiñe hueichahue reque (Efes. 6:14-18). Mülefui quiñe tacun ñi cuñiutucuquen hueichafe ñi piuque. Ca femngechi famülque mu, Jehová tañi ngülam cuñiutucuqueiñmu taiñ  piuque. Feimu, ¡inayafiyiñ mai Jehová tañi ngülam taiñ cuñiutucunieafiel taiñ piuque! (Prov. 4:23).

15. ¿Chumngechi cuñiutucunieafuiñ taiñ piuque?

¹⁵ Taiñ inayal Pablo ñi feipin, ¿chumngechi cuñiutucunieafuiñ taiñ piuque? Petu taiñ femnon chem dungu rume, raquiduamaiñ chem tañi ayüquen ta Jehová. Dulliliyiñ chem taiñ dungual, chem musica taiñ allcütual, chem taiñ peal television cam internet mu ca chem taiñ papeltual, hune ramtuhuaiñ: “¿Chem conafui tañi piuque mu? Iñche tañi femal, ¿ayühuelpeai mai Jehová? Cam, ¿famtucuaeneu Jehová tañi üdequen: quehuan dungu, cudumuhun dungu, piuqueyeafiel ti plata ca quisu ñi duamtuhual müten?” (Filip. 4:8). Com taiñ femqueel inaliyiñ Jehová tañi ayüqueel, cuñiutucuafiyiñ taiñ piuque huesaque dungu mu.

16, 17. Ñi feipin Isaías 48:18, ¿chumngelu maneluucüleafuiñ taiñ rumel inanieal Jehová tañi ngülam?

¹⁶ Ramtuuqueimi chi quiñeque mu: “¿Rüf inapeafiñ mai Jehová tañi ngülam com tañi mongen mu?”. ¡Femafuiñ llemai! ¿Chumngelu feipiafuiñ? Raquiduamaiñ chem ñi feipin Jehová mülelu Isaías 48:18 (papeltunge). Tüfa mu Jehová feipi: “Tami nor dungu tati lafquen ñi reu reque feleai”. Raquiduamnge, huitraleimi reque inafül lafquen. Leliniefimi ti reu tripatripamequen. Afquelai ñi huitrutripamequen ca ñi huitruconmequetun. ¿Ramtuuqueimi cai hule ñi ca mületual ti reu? Femlayafuimi llemai. Quimnieimi tañi rumel müleal tati reu.

¹⁷ Ñi feipin ta Isaías, taiñ femquen nor dungu tati reu lafquen reque turpu aflayafui. ¿Chumngechi? Petu ñi dullinon chem chumal, raquiduamaiñ Jehová mu chem tañi ayüquen, femngechi femaiñ. Quiñeque mu cüdaungeafui ñi inayafiel Jehová tañi ngülam, huelu cüme loncontucunienge: Jehová quellunieaimu ñi femal nor dungu fill antü (Is. 40:29-31). 

18. ¿Chumngelu am juzgalayafiyiñ caquelu pu che?

¹⁸ Cüla dungu: iñchiñ juzgalayafuiñ tati pu che, Jehová müten. Ñi femal Jehová tañi ayüqueel, juzgachelayaiñ ca doicülelu troquiulayaiñ. Loncontucunieaiñ, iñchiñ coneltulelaiñ taiñ juzgayafiel caquelu pu che, doi mai Jehová fei “tati doi fütra Juez mülelu com mapu meu” (Gén. 18:25). Jehová elfalcünulaeiñmu taiñ juzgayafiel tati pu che. Ca femngechi Jesús feipi: “Ngelai tamün juzgacheal, femngechi tamün juzgangenoal” (Mat. 7:1, TNM). *

19. José, ¿chumngechi maneluucülei Jehová mu ñi cüme juzgaquen?

¹⁹ Raquiduamnge chem ñi femün José cuifi mu. Quisu nor huentrungefui, feimu juzgalafi caquelu pu che huesalcangelu rume. Tañi pu peñi huesalcaeyu ca fendengei Egipto mapu mu tañi esclavongeal. Ca feipifingün tañi chau José tañi lan. Rupachi tripantu, José trahuluutui tañi familia engün. Feula quiñe  ülmen gobernantengetui. Fei quisu pile, ca huesalcayafui tañi pu peñi, huelu femlai. Tañi pu peñi llicanieyu tañi huesa femafel. Huelu José nor huentrungei, huesalcalafi tañi pu peñi, doi mai feipifi: “Llicalequilmün. Iñche ngelai tañi Ngünechen reque ñi feleal” (Gén. 37:18-20, 27, 28, 31-35; 50:15-21). José cüme quimniefui Jehová müten mülefui ñi juzgayafiel tañi pu peñi.

20, 21. ¿Chumafuiñ taiñ nor che troquiaeteu Jehová?

²⁰ José reque iñchiñ quimnieiñ Jehová müten mülei tañi juzgacheal. Iñchiñ peñmaquelafiyiñ ñi piuque taiñ pu peñi ca taiñ pu lamngen, Jehová müten ta femquei. Quisu müten “ngüneduamquei chumngelu femqueiñ fillque dungu” (Prov. 16:2). Chau Jehová piuqueyeniefi itrocom che, chem tuhun-ngeafui rume. Fei Jehová ayüniei taiñ ca femngechi femal iñchiñ (2 Cor. 6:13, TNM). Feimu juzgalayafiyiñ taiñ pu peñi ca lamngen, doi mai piuqueyenieafiyiñ engün.

²¹ Ca femngechi ngelai taiñ juzgayafiel pu coneltulenolu trahunche mu (1 Tim. 2:3, 4). Quiñe tami pu che poyenofile ta Jehová, feipilayaimi: “Tüfa turpu lloulayafi tati rüf dungu”. Femngechi feipifulmi, doicülelu troquiucüleafuimi. Jehová mangelmequefi com che tañi norcünutual tañi mongen engün (Hech. 17:30). Loncontucunieaiñ: inei rume doicülelu caquelu che mu troquiule, nor che troquilayaeyu Jehová.

22. ¿Chumngelu eluucüleimi tami nor chengeal?

²² Falintunieafiyiñ Jehová tañi norngechi ngülam, femngechi ayüucüleaiñ iñchiñ ca quellunieafiyiñ caquelu pu che. Fei fülconaingün iñchiñ mu ca taiñ Chau Dios meu. Turpu fentecünulayaiñ taiñ femal “Ngünechen tañi ayüqueelchi dungu” (Mat. 5:6). Loncontucunieaimi: Jehová penieimu ca rume ayüucülei tami cüme femmequen mu. Tati pu che poyequenofilu ta Jehová doi amulei tañi norngenon engün, huelu inayentulayafiyiñ engün. Eluucüleaiñ mai taiñ nor chengeal, Chau Jehová am piuqueyeniefilu tati pu nor che (Sal. 146:8).