1. ¿Chem ad niei ta Chau Jehová? ¿Chem piquei tami raquiduam?

 ¿RAQUIDUAMQUEIMI mai chem ad niei ta Chau Jehová? Ngillatulu eimi, ¿chem piquei tami raquiduam? Chau Jehová pengequelai, huelu Biblia trürümquefi fillque dungu mu. Biblia feipi “pelontuqueiñmu ti Antü reque, ca incañpequeiñmu quiñe escudo reque”. Ca feipi “Chau Ngünechen trürümfali quiñe cütral apümcaquelu” (Sal. 84:11; Heb. 12:29). Ca trürümfi quiñe falichi cura reque, zafiro pingelu. Ca quiñe huilüf pañillhue reque. Ca trürümngei quiñe relmu reque (Ezeq. 1:26-28). Raquiduamlu tüfa, afmatulqueiñmeu ca raquiduamelqueiñmeu fente ñi alüpüralen taiñ Huenu Chau.

2. ¿Chumngelu cüdautuafuiñ taiñ fülconal ta Chau Jehová?

² Pequenofilu am iñchiñ ta Chau Dios, ¿piuqueyepeneu mai? piafuiñ. Taiñ rume huesa rupan ta mongen mu, ¿chem piuqueyeafeneu ta Chau Dios? piafuiñ. Ca femngechi raquiduamquei quiñeque che ñi duamnoeteu quisu tañi chau. Jehová cüme quimniei taiñ chum duamcülen, cafei quimi chumngelu cüdaungei taiñ fülconal quisu meu. Feimu Biblia mu feipicünui tañi chumngechi chengen, femngechi taiñ quelluaeteu taiñ fülmayafiel.

3. ¿Chumngelu cümei taiñ doi quimafiel ta Chau Jehová ca tañi piuqueyechen?

³ Biblia feipi “Chau Ngünechen fei ta piuqueyen” (1 Juan 4:8). Com tañi femün ta Chau Dios pengelquei tañi piuqueyechen. Fente alün-ngen tañi piuqueyechen, feichi pu che ñi piuqueyenoeteu rume, piuqueyequefi (Mat. 5:44, 45). Tüfachi troquiñ doi quimafiyiñ ta Jehová ca tañi piuqueyechequen.  Femngechi doi quimafiyiñ ta Chau Dios, fei doi piuqueyeafiyiñ.

CHAU JEHOVÁ RUME PIUQUEYENIEIÑMU

4. Chau Jehová ñi poyechefengen, ¿chum duameleiñmu? (Ca inaduamnge ti adentun).

⁴ ‘Chau Jehová rume poyechefengei’ (Sant. 5:11). Biblia mu Chau Jehová trürümuuquei quiñe poyen-ngechi ñuque reque (Is. 66:12, 13). Raquiduamnge quiñe ñuque metaniefi tañi pichiche, ñochi dungulelquefi piuqueyen mu. Ngümale ti pichiche, dapiquefi. Ca femngechi iñchiñ cutrancaucüleliyiñ, maneluhuafuiñ Chau Jehová taiñ cutranpiuqueyenieteu. Ti salmista feipi: “Rume fentrelu iñche meu tañi fill raquiduamcülen, eimi yafüduamelen ca tüngduamelen” (Sal. 94:19).

5. Jehová ñi piuqueyechen afquelai, ¿chem raquiduamelqueiñmu tüfa?

⁵ Chau Dios ñi piuqueyechen afquelai (Sal. 103:8). Huelulcaulu rume iñchiñ, Chau Jehová fentecünuquelai taiñ piuqueyenieteu. Pu Israel che fentren rupa lladcütufi ta Chau Jehová, fei huiño raquiduamtulu engün ca elcünulu tañi huesa femün, ¿chumi Jehová? Quimfalcünulelquefi tañi rumel piuqueyenieafiel. Feipifi engün: “Eimi falin-ngelu cai iñche tañi adquiñ mu, yamfalngeimi, ca iñche piuqueyeyu” (Is. 43:4, 5). Fantepu mu, ca femngechi piuqueyequeiñmeu ta Chau Jehová. Rumel recüluhuafuiñ fei meu. Fütra huelulcauliyiñ rume, Chau Jehová elcünuquelaeiñmeu. Huiño raquiduamtulu iñchiñ, fei huiñotulu Chau Jehová mu, ngüneduamaiñ taiñ piuqueyenieteu. Fei feipicünui taiñ huiñoduamatuaeteu (Is. 55:7). Biblia feipi taiñ perdonaeteu Chau Jehová füshcüñmaqueiñmeu taiñ piuque (Hech. 3:19).

6. ¿Chem quimeltueiñmu Zacarías 2:8 Jehová mu?

⁶ (Papeltunge Zacarías 2:8). Jehová trürümeiñmu quisu tañi curalnge mu. Ti nge rume falin-ngei ca tuntucufal-lai. Feimu Jehová feipieiñmu reque: “Eimün rume falimün. Inei rume huesalcaelmu, iñche ta huesalcaeneu”. Chau Jehová piuqueyeiñmeu, feimu duamtuñmaqueiñmu taiñ chum duamcülen ca cuñiutucuqueiñmu. Cutrancaulu iñchiñ, ca cutrancauquei. Feimu feipiafiyiñ: “Cuñiutucuen tami curalnge reque” (Sal. 17:8).

7. ¿Chumngelu mülei taiñ maneluhual taiñ piuqueyenieteu Chau Jehová?

 ⁷ Jehová ayüquei tami rüf maneluhual quisu tami piuqueyenieteu. Jehová quimniei huesaque dungu taiñ rupan mu, cüdautuafuiñ taiñ maneluhual fei taiñ piuqueyenieteu. Fei, ¿chem quelluafeiñmu? Ngüneduamaiñ Chau Jehová chumngechi pengelelfi tañi piuqueyefiel ta Jesús, pu dullingelu ca com iñchiñ.

JEHOVÁ, ¿CHUMNGECHI PENGELQUEI TAÑI PIUQUEYECHEN?

8. ¿Chumngelu Jesús maneluuquefui ñi piuqueyenieteu tañi Chau?

⁸ Jehová ca tañi Fotüm Jesús raquifal-lai tunten tripantu trür ñi mülen engu. Feimu rume piuqueyehuingu ca quiñeucüleingu. Mateo 17:5 mu Jehová cüme quimfalcünui fente ñi piuqueyeniefiel tañi Fotüm. Jehová feipilai müten: ‘Tüfa iñche tañi ayühuelqueteu’. Jehová ayüquefui com iñchiñ taiñ quimal fente ñi piuqueyeniefiel tañi Fotüm, feimu feipi: “Tüfa iñche tañi poyen Fotüm”. Chau Jehová saquiuquefui Jesús mu, quisu am eluulu ñi hulal tañi mongen iñchiñ mu (Efes. 1:7). Jesús maneluuquefui ñi piuqueyenieteu tañi Chau, feimu mufüque rupa feipi ñi piuqueyenieteu (Juan 3:35; 10:17; 17:24).

9. Jehová ñi piuqueyeniefiel pu dullinque cristiano, ¿chem mu trürümngeafui? (Romanos 5:5).

⁹ Jehová ca pengelelfi tañi piuqueyefiel tati pu dullinque cristiano (papeltunge Romanos 5:5). Griego quehun dungu mu, Jehová ñi piuqueyeniefiel pu dullinque cristiano trürümngeafui huitrunco reque. Tüfa pengeli Jehová ñi fente piuqueyefiel pu dullingelu. Fei engün quimniei ñi piuqueyenieteu Chau Dios (Jud. 1). Apostol Juan reque, com pu dullinque cristiano feipingün: “¡Müna piuqueyenieiñmu taiñ Fütra Chau! ¡Chau Dios ñi pu yall pingeiñ!” (1 Juan 3:1). Jehová, ¿pu dullinche müten piuqueyequefi? Femlai, piuqueyequefi com tañi pu che.

10. Chau Jehová ñi pengelal taiñ piuqueyenieteu, ¿chem doi falin dungu femi?

¹⁰ Chau Jehová ñi pengelal taiñ piuqueyenieteu, ¿chem doi falin dungu femi? Huli tañi Fotüm ñi lapayal iñchiñ mu. Chem che no rume pengelquelai femngechi piuqueyechen (Juan 3:16; Rom. 5:8). Jehová huli tañi piuqueyen Fotüm, femngechi ñi perdonangeal taiñ culpan chengen mu, ca taiñ hueniyeafiel (1 Juan 4:10). Doi raquiduamtuculiyiñ ñi femün Jehová ca tañi Fotüm Jesús, doi maneluhuaiñ taiñ piuqueyenieteu (Gál. 2:20). Jehová hul-lu tañi Fotüm, re tañi norngen pengel-lai, doi mai pengeli fente tañi piuqueyechen. Chalintucui tañi doi poyen Fotüm, eluñmai ñi cutrancahual ca ñi layal iñchiñ mu, femngechi taiñ montulaeteu.

11. ¿Chem quimeleiñmeu ñi feipin Jeremías 31:3?

¹¹ Jehová piuqueyeiñmu, ca pengelquei fente taiñ piuqueyenieteu (papeltunge Jeremías 31:3). Feimu cüpaleiñmu quisu mu (ca ngüneduamnge Deuteronomio 7:7, 8). Inei no rume ca chem no rume catrütulayafui Chau Ngünechen taiñ piuqueyenieteu (Rom. 8:38, 39). Raquiduamülmi tüfa mu, ¿chem piquei tami piuque? Feula ngüneduamaiñ Salmo 23, ca peaiñ David ñi chum duamcülen ca chumngechi duamcüleafuiñ iñchiñ.

¿CHUM DUAMELEIMU FENTE TAMI PIUQUEYENIETEU TA JEHOVÁ?

12. ¿Chem pilei ñi nütram Salmo 23?

¹² (Papeltunge Salmo 23:1-6). Salmo 23 mu, David pengeli tañi maneluucülen Jehová tañi piuqueyenieteu ca ñi cuidanieteu. David feipi tañi fülmaucülen Jehová mu, ca iñche tañi Camañfe pieyu.  David quimniefui Jehová tañi adnieteu, feimu tüngduamcülefui. Feimu recüluucülefui tañi Huenu Chau mu, quimniefui tañi piuqueyenieaeteu tunte puule tañi mongen. Peaiñ chumngelu fente maneluuquefui Chau Jehová mu.

13. ¿Chumngelu maneluucülefui David Jehová tañi cuidanieteu?

¹³ “Chem no rume faltalayan”. David ngüneduamquefui ñi cuidanieteu Chau Ngünechen. Rumel eluqueyu com tañi duamnieel. Ca quimniefui tañi hueniyenieteu ca ñi fürenenieteu. Chem rupafule rume, David maneluucülefui Jehová tañi cuidanieaeteu. Feimu David fill raquiduamcülequelafui ca ayüucülefui (Sal. 16:11).

14. Chau Jehová, ¿chumngechi pengelquei taiñ piuqueyenieteu?

¹⁴ Jehová cuidaqueiñmu, doi mai rupaliyiñ huesaque dungu mu. Peafiyiñ ñi rupan taiñ lamngen Claire. a Doi 20 tripantu yeniei Betel mu, tañi pu che rupai fentren huesaque dungu, fei quimlafui chumngechi ñi quelluafiel engün. Tañi chau contueyu quiñe cutran ataque cerebral pingelu, quiñe tañi lamngen huemünentungei trahunche mu. Tañi familia niefuingün quiñe pichi negocio, huelu huesa tripai, cerrañmangei. Feimu müntuñmangei tañi ruca. ¿Chumngechi cuñiutucueyu Jehová? Claire feipi: “Jehová fill antü elufi tañi pu che com tañi duamnieel. Chem taiñ duamnieel müten no, doi elueiñmu llemai. Piuquentucuniefiñ com ñi femün Jehová iñchiñ mu. Turpu ngoimalayan chumngechi pengeli taiñ piuqueyenieteu. Tüfa quellueneu ñi ayüucüleal tañi cüdahuelniefiel ta Chau Jehová rupafule rume huesaque dungu”.

15. ¿Chumngechi nehuencontui David? (Ca inaduamnge ti adentun).

 ¹⁵ “Quisu huiñoleltuqueneu tañi nehuen”. Fentren huesaque dungu ñi rupan David, quiñeque mu cutrantupiuquelefui (Sal. 18:4-6). Huelu ngüneduamlu Jehová tañi cutranpiuqueyenieteu, nehuencontui. Chumngechi quiñe camañfe yequefi tati pu ufisa cheu ñi mülen “carü cachu” ca “alün co”, ca femngechi Jehová cüme duamelfi ta David. Feimu David yafüluhui, ca ayühun mu amulefui ñi serfiniefiel ta Chau Dios (Sal. 18:28-32).

16. Eimi cai, ¿ca nehuentucueimu Jehová? ¿Chumngechi am?

¹⁶ Rupan mu huesaque dungu, iñchiñ ca feipiafuiñ: “Chau Jehová taiñ nor piuqueyenieteu mu petu nieiñ mongen” (Lam. 3:22; Col. 1:11). Peaiñ ñi rupan taiñ lamngen Rachel. Mülen mu ti pandemia COVID-19, tañi füta elcünueyu ca püntütripai Jehová mu, tüfa rume cutrantupiuqueleyu. ¿Chumi Jehová tañi cuidayaeteu? Fei feipi: “Jehová pengeleneu tañi rume piuqueyeniengen iñche. Elueneu fentren hueni tañi compañnieaeteu. Cüpalelngen iyael, huercülelngen ayüfalchi mensaje, yafültucungen quiñeque troquiñ Biblia mu. Ayühunquechi nütramelngen, Jehová cuñiutucueimu tati pingen. Fentecünuquelan tañi mañumniefiel Jehová tañi elueteu iñche tüfachi fütra familia poyechequelu”.

17. ¿Chumngelu David feipifui: “Llicalayan”?

¹⁷ “Llicalayan, eimi am mülelu iñche mu”. Fütraque caiñe nierquei David, fei fentren rupa epe langümngei. Huelu quimnielu am Jehová tañi piuqueyenieteu, feimu maneluucülefui. Jehová ñi afcadinieteu troquihui, fei ülcantui: “Quisu ta montuleneu com tañi llicalcaqueteu mu” (Sal. 34:4). Quiñeque mu, David llicalefui, huelu nehuencontui Jehová tañi piuqueyenieteu mu.

18. Llicaleliyiñ, ¿chumngechi quelluafeiñmu Jehová taiñ piuqueyenieteu? Feipinge ñi rupan quiñeque peñi ca lamngen.

¹⁸ Fütraque huesa dungu rupaliyiñ, llicaleafuiñ. ¿Chumngechi quelluafeiñmu Jehová taiñ piuqueyenieteu? Peaiñ ñi rupan quiñeque peñi ca lamngen. Taiñ lamngen Susi precursorangei, rupai quiñe huesa dungu: tañi püñeñ langümuhui. Fei ca tañi füta rume cutrantupiuquelefuingu. Feipi: “Ñi rupan quiñe fütra huesa dungu mu, rume huesa duamcüleafuiñ, llicaleafuiñ ñi rupayal doi huesa dungu. Huelu Jehová taiñ piuqueyenieteu cuñiutucueiñmu, feimu doi tüngcületuyu”. Rachel taiñ nütramcapeel parrafo 16 mu feipi: “Quiñe pun müna hueñancülefun ca llicalefun. Yafüngehuenolu troquihun, fei huirarün ñi ngüman llellipufilu ta  Chau Jehová iñche. Müchai müten tüngduamnagi tañi piuque, chumngechi quiñe ñuque metaquefi tañi püñeñ, femngechi duameleneu Chau Jehová, fei umaunagün. Turpu ngoimalayan ñi rupan”. Quiñe loncolelu Tasos pingelu pilai ñi conal ejercito mu, feimu meli tripantu carceltucungei. ¿Chumngechi pengeleleyu tañi piuqueyenieteu Chau Jehová? Fei feipi: “Com tañi duamnieel müten elulaeneu Chau Jehová, doi elueneu. Fei ta doi maneluhun fei meu. Nehuentucueneu tañi ayüucüleal carcel mu rume mülefulu iñche. Fei doi maneluuli Chau Jehová mu, doi cüme ngüneduaman tañi piuqueyenieteu pilefun. Feimu precursor regularngerpun carcel meu”.

FÜLCONAIÑ TAIÑ POYEN CHAU DIOS MU

19. 1) Quimliyiñ Jehová taiñ piuqueyenieteu, ¿chumngechi entuaiñ taiñ llellipun? 2) ¿Chem texto nütramcalu Jehová ñi piuqueyen doi puuquei tami piuque mu? (Ca inaduamnge ti huichulechi dungu “ Troquiñ Biblia mu pengelquelu Jehová ñi poyechefengen”).

¹⁹ Chem ñi rupan taiñ pu peñi ca lamngen pengeli Chau Ngünechen ñi piuqueyechequen (2 Cor. 13:11). Quisu caque quiñeque iñchiñ duamtuqueiñmu. Cüme quimnieiñ ‘Jehová nor piuqueyen mu cuñiutucuqueiñmu’ (Sal. 32:10). Doi raquiduamliyiñ chumngechi taiñ piuqueyenieteu Jehová, inaduamaiñ chumte taiñ cuñiutucuqueteu, femngechi doi fülconaiñ quisu mu. Nülacünulelafiyiñ taiñ piuque llellipun mu. Pengelelen tami piuqueyeniefiel, quelluen piafiyiñ. Nütramcalelafiyiñ com taiñ raquiduamcülen, maneluhuafuiñ taiñ allcütuqueteu ca taiñ quelluaeteu (Sal. 145:18, 19).

20. Jehová ñi piuqueyechen, ¿chumngechi quelluqueiñmu ñi fülconcüleal quisu mu?

²⁰ Chumngechi ti cütral eñumalqueiñmeu hutre mu, ca femngechi Jehová tañi piuqueyen yafültucueiñmu rupan mu huesaque dungu. Feimu ayüqueiñ taiñ fülmanieafiel ta Jehová. Tañi piuqueyechen yafültucuqueiñmu ca tüngduamelqueiñmu. Ayühuelqueiñmu fente taiñ piuqueyenieteu mu, feimu iñchiñ ca feipiafiyiñ: “Piuqueyeniefiñ ta Jehová” (Sal. 116:1).