QUIÑEQUE mu tati huirintucuquelu Biblia mufüquechi huirintucuquei tañi deu huirintucuel. Peafiyiñ cüla dungu chemu tañi femngequen.

Chumül huirintucungei. Cuifi mu tati pu Israel che niequelafuingün quisu ñi papeltuafiel Moisés tañi ley. Amun mu müten ti ngillatuhue tolto ruca, feimu allcütuquefuingün feitachi ley (Deut. 31:10-12). Fentreñma am huitralequefulu engün ñi allcütuafiel feitachi ley ca fentren che mülefui, feimu ¿cüdautuquepelafuingün tañi cañpüle amunoal tañi raquiduam? (Neh. 8:2, 3, 7). Mufüque rupa allcütuquefulu am engün ti doi falinque dungu, doi conquefui tañi lonco mu, feimu doi cüme inaquefuingün. Quiñeque ley niequefui fentren dungu, feimu doi falin-ngefui tañi mufüquechi allcütuafiel, femngechi ñi rulpacünunoafiel chem ngülam no rume (Lev. 18:4-22; Deut. 5:1).

Chumngechi huirintucungei. Biblia mu huirintucungei fentren ülcantun. Quiñeque feitachi ülcantun mülei Salmos lifru mu, Lamentaciones ca El Cantar de los Cantares. Quiñeque feitachi ülcantun mu ca huiño ülcantungequefui quiñeque troquiñ, femngechi pu allcütulu cüme ngüneduamquefuingün chem quimeltun ñi hulqueel ti ül, femngechi loncontucuquefingün. Quiñe feitachi ülcantun mülei Salmo 115:9-11, feipilei: “Ahuem Israel, maneluhuaimün Jehová mu. Fei tamün quelluqueteu ca incañpequeteu. Ahuem Aarón tañi pu cüpanche, maneluhuaimün Jehová mu. Fei tamün quelluqueteu ca incañpequeteu. Eimün tati pu yamquefilu ta Jehová, maneluhuaimün Jehová mu. Fei tamün quelluqueteu ca incañpequeteu”. Tati ülcantulu tüfachi ül rüf piuquentucuquefuingün Jehová ñi quelluchequen ca ñi incañpechequen.

Chemu huirintucungei. Quiñeque huirintuculu Biblia mufüquechi huirintucuingün quiñe dungu ñi pengelal ñi doi falin-ngen. Jehová feipifilu pu Israel che ñi inoal ta mollfüñ, Moisés mufüquechi huirintucui chemu fente falin-ngei tañi femnoal. Dios ayüfui tati pu Israel che ñi quimtucunieal mollfüñ adentulei ti mongen (Lev. 17:11, 14). Fentren tripantu rupalu, tati pu apostol ca tati pu loncolelu Jerusalén mu ca huiño feipingün ñi ingenoal ta mollfüñ taiñ ayühuelafiel ta Chau Dios (Hech. 15:20, 29).

Felei llemai, Biblia quiñeque mu mufüquechi feipiquei quiñeque dungu. Feimu quiñeque che huiño feipifeipiyequei quiñeque troquiñ Biblia mu müten, huelu Jehová ayülafui taiñ femal. Jesús feipi: “Llellipulmün, huiño feipifeipihuelayaimün fentren rupa tamün deu feipielchi dungun” (Mat. 6:7). Jesús quimeltueiñmu chem dungu mu llellipuafuiñ ta Jehová (Mat. 6:9-13). Mufüquechi feipilayaiñ quiñe rume llellipun müten. Huelu mai, llellipuafuiñ ta Jehová fillque dungu taiñ raquiduameleteu (Mat. 7:7-11).

Taiñ poyenieteu mu, Jehová mufüquechi feipiquei quiñeque dungu Biblia mu, femngechi taiñ doi cüme quimeltuaeteu. ¡Rume mañumfali tañi femquen! (Is. 48:17, 18).