1, 2. Huesa dunguyengelmi, ¿chum duamcüleafuimi? ¿Chum duamcülefui Jehová huesa dunguyengelu?

 RAQUIDUAMNGE tüfa: huesa dunguyeimu quiñe che coila dungu mu. Fei caquelu che feyentueyu, doi mai huall püle puhui ti coilatun. ¿Chum duamelafeimu tüfa? Rüfcünu mai hueñancülafeimu tami huesa raquiduamaeteu mu caquelu che (Prov. 22:1).

² Ca femngechi duamcülefui taiñ Huenu Chau Jehová. Quiñe tañi fotüm huenu mu mülelu, huesa dunguyeyu coilatun mu. Eva feyentui ti coila, feimu taiñ hunenque chau püntütripaingu Chau Jehová mu. Femngechi coni ti culpan, feimu com culpaqueiñ ca laqueiñ (Gén. 3:1-6; Rom. 5:12). Feichi coilatun dungu ñi duam mu huall mapu püle puhui ti huesaque dungu, fei ta lan, hueichan ca cutrancahun. Ñi rume huesa tripan Huecüfü ñi coilatun, rume hueñancüleyu ta Chau Jehová. Femngechi rupalu rume, illcuchefengelai, doi mai Biblia feipi ñi ‘ayühun-ngechi Chau Ngünechen ngen’ (1 Tim. 1:11).

3. ¿Chem falin cüdau elungeiñ?

³ Quiñe falin cüdau elungeiñ ta iñchiñ, fei ñi incayafiel ca püramyeafiel Jehová tañi üi. ¿Chumngechi cai? Inayaiñ tüfachi huercün dungu: “Püramyefimün Jehová ñi  üi” (Sal. 113:1). Feimu cüme dunguqueaiñ Chau Dios ñi lif cüme üi mu. Ngüneduamaiñ cüla dungu taiñ quelluaeteu ñi püramyeafiel ta Jehová com piuque mu.

AYÜHUELQUEFIYIÑ TA JEHOVÁ

4. ¿Chemu Jehová ayühuelqueyu taiñ püramyeafiel? Feipinge quiñe nütram. (Ca inaduamnge ti adentun).

⁴ Taiñ Huenu Chau Jehová ayüquei ñi püramyengeal tañi üi (Sal. 119:108). Tati pu che ayüquei ñi saquingeal tañi cüme duamcüleal. ¿Ca femngechi femquepei mai ta Chau Dios? Femlai. Raquiduamnge tüfa, quiñe pichi malen pancofi tañi chau, fei feipifi eimi tati doi cüme chau. Ti chau rume ayühui. Tüfa, ¿duamniepei mai ñi saquiaeteu tañi ñahue fei ñi falintuhual? Femlai. Tañi ñahue piuqueyeyu ca mañumnieyu, tüfa ta ayühueleyu. Cafei quimniei tremle tañi ñahue, ayüucüleai tañi mañumchefengen ca ñi poyechefengen. Ca femngechi Jehová, tati doi cüme Chau, ayühuelqueyu taiñ püramyeafiel iñchiñ.

5. Püramyefiliyiñ Jehová, ¿chem pengelaiñ?

⁵ Huecüfü ca coila dalluntucueiñmu iñchiñ. Feipiquei chem che rume rupale huesaque dungu, püntütripayai Chau Jehová mu. Huecüfü ca feipiquei pu che elcünuafi ñi serfiafiel ta Dios ñi quisutu cümelcahual müten (Job 1:9-11; 2:4). Huelu ti huentru Job püntütripalai Jehová mu, fei pengeli ñi coilatufengen tati Huecüfü. Püramyefiliyiñ ta Jehová, pengelaiñ Huecüfü ñi coilatufengen. ¿Chumaiñ cai iñchiñ? Amulele taiñ serfiniefiel Jehová, incayafiyiñ taiñ Chau ñi üi, fei ayühuelafiyiñ (Prov. 27:11).

6. ¿Chumngechi inayentuafuiñ ta David ca pu Leví che? (Nehemías 9:5).

⁶ Tati piuqueyefilu Chau Dios eluhuingün ñi püramyeafiel tañi üi com piuque mu. Ti lonco ülmen David huirintucui: “Püramyeafiñ mai ta Jehová, com tañi piuque mu püramyeafiñ tañi lif cüme üi” (Sal. 103:1). David quimniefui püramyefile Jehová ñi üi, Jehová mai ta püramyequefi. ¿Chem raquiduameleiñmu Jehová ñi üi? Raquiduamelqueiñmu ñi cüme Chau ngen, ñi cüme piuquengen ca cümeque dungu ñi femquen. David ayüquefui com piuque mu ñi püramyeafiel  Jehová tañi lif cüme üi. Pu Leví che ca eluhuingün ñi püramyeafiel Jehová tañi üi. Ñom piuque mu quimtucuingün chem pile rume engün ñi püramyeafiel, puulayafui Jehová fente tañi alüpüralen, quisu doi mülefui ñi püramyengeal (papeltunge Nehemías 9:5). Pu Leví che entulu tañi feipin com piuque mu, ¿rume ayüupelai Chau Dios?

7. ¿Chumngechi püramyeafuiñ Jehová amuldungun mu ca cheu rume miyauliyiñ?

⁷ ¿Chumngechi püramyeafuiñ ta Jehová? Taiñ nütramcan mu pengelaiñ taiñ piuqueyeniefiel ca mañumniefiel. Amuldungun mu ayüqueiñ pu che ñi cüpa fülmayafiel ta Chau Ngünechen ca ñi piuqueyeafiel engün chumngechi piuqueyefiyiñ iñchiñ (Sant. 4:8). Ayühuelmaqueiñmu Biblia mu ñi pengelelafiel ta che Jehová ñi piuqueyechen, norngen, ñi nehuen ca quimün. Yafüluhuaiñ taiñ inayentuafiel ta Chau Jehová, femngechi ca püramyeafiyiñ ca ayühuelafiyiñ (Efes. 5:1). Inayentufiliyiñ Jehová cheu rume miyauliyiñ, tati pu che ramtuhuafui chumngelu taiñ trürngenon caquelu che meu iñchiñ (Mat. 5:14-16). Fei feipiafiyiñ femngechi chengeiñ taiñ poyequefiel mu ta Jehová, feimu pu che cüme piuquengelu cüpa fülmayafi ta Chau Jehová. Femngechi taiñ poyeafiel ta Jehová, ayühuelmapiuqueafiyiñ (1 Tim. 2:3, 4).

AYÜHUELQUEFIYIÑ TA JESÚS

8. Jesús, ¿chumngechi hunelei ñi püramyeafiel Jehová ñi üi?

⁸ Feiti che doi cüme quimniefilu ta Chau Dios fei ta Jesús (Mat. 11:27). Jesús doi piuqueyefi tañi Chau, feimu hunelei ñi püramyefiel tañi üi (Juan 14:31). Tañi amuldungun mapu mu, doi falintufi ñi quimelelafiel ta che Chau Dios ñi üi. Feimu feichi pun petu ñi lanon, llellipufi ta Jehová. Feipi: “Quimeltulelfiñ engün tami üi” (Juan 17:26).

9. ¿Chem nütram entui Jesús ñi quimfalcünual Jehová ñi chumngen?

⁹ Pu judio quimquefuingün Chau Dios ñi üi. Feimu Jesús enseñalafi müten tañi inei pingen ta Jehová, doi mai ca quimelelfi tañi chumngen (Juan 1:17, 18). Tati Hebreo Huirintucun feipi Chau Jehová cutranpiuqueyechequei ca cuñillchequei (Éx. 34:5-7). Jesús entui quiñe nütram ñi cüme quimfalcünual Jehová ñi cutranpiuqueyechequen ca ñi cuñillchequen. Feipi quiñe fotüm ñamquiyauquefulu huiñotui tañi chau ñi ruca mu. Ti chau pefilu ñi cüpalen alü camapu trafmefi, pancofi ca perdonafi (Luc. 15:11-32). Femngechi Jesús quimeltufi caquelu che ñi chumngen ta Jehová.

10. 1) Jesús üituquefui tañi Chau ñi üi ca ayüquefui pu che ñi ca femngechi femal, ¿chumngelu quimiyiñ? (Marcos 5:19; ca inaduamnge ti adentun). 2) ¿Chem ayüquei Jesús iñchiñ taiñ femal?

¹⁰ Jesús ayüquefui caquelu che ñi üituafiel Chau Dios ñi üi. Pu loncolechi judio feipiquefuingün chi ñi üitungenoal Jehová ñi üi fente ñi yamfalngen. Huelu ñi feipin pu huentru catrütulaeyu ta Jesús ñi püramyeafiel Chau Dios tañi üi. Raquiduamaiñ ñi femün ta Jesús Gerasa mapu mu. Tremoltufilu quiñe huentru conhuecüfülelu, fente ñi llicalen pu che feipifi tañi amutual (Mar. 5:16, 17). Jesús am ayüfulu com  che ñi quimafiel Jehová tañi üi, feimu petu ñi amutunon feipifi ti huentru ñi quimelelafiel pu che ñi femün ta Jehová quisu meu (papeltunge Marcos 5:19). a Jesús ca ayüfui iñchiñ taiñ quimelelafiel pu che Jehová tañi üi (Mat. 24:14; 28:19, 20). Femliyiñ, ayühuelafiyiñ ta Jesús.

11. Jesús, ¿chem dungu enseñalelfi tañi pu discipulo tañi feipial llellipun mu engün? Ca, ¿chemu fente falin-ngei? (Ezequiel 36:23).

¹¹ Fentren coilaque dungu feipingequelu Jehová tañi üi, Jehová ayüquei ñi liftuñmangeal. Jesús cüme quimniefulu ñi ayüqueel ta Chau Jehová, quimeltufi tañi pu discipulo ñi ngillatuafiel: “Taiñ Chau huenu mülelu, rume yamniengepe tami üi” (Mat. 6:9). Jesús quimniefui ñi püramyengetual Chau Jehová tañi üi doi falin-ngei chem dungu mu rume (papeltunge Ezequiel 36:23). Jesús doi dungu femi ñi fampüramafiel Chau Dios tañi üi, huelu presuntucungelu, tañi pu caiñe feipieyu ñi caiñetudungufiel ta Ngünechen ca ñi yamnienofiel. Müna huesa duampelai Jesús femngechi dalluntucungelu. Jesús deu quimniefui tañi femngechi feipintucungeal ca ñi condenangeal, feimu petu ñi presuntucungenon “rume fütra hueñancüi” (Luc. 22:41-44).

12. ¿Chumi Jesús ñi liftuñmayafiel tañi Chau ñi üi?

¹² Jesús eluucülefui tañi hulelcangeal, huesa pingeal ca coila dalluntucungeal, femngechi ñi liftuñmayafiel tañi Chau ñi üi. Jesús femi com ñi feipin tañi Chau, feimu yehuelcaulai (Heb. 12:2). Quimniefui Huecüfü tañi huesalcamequeteu (Luc. 22:2-4; 23:33, 34). Huecüfü ayüfui Jesús ñi poyehuenoafiel ta Jehová, huelu Jesús femlai, femngechi pengelfi Huecüfü ñi coilatufengen. Ca quimfalcünui Jehová tañi pu serfiqueteu püntütripalayafui fei mu rupafule rume huesaque dungu mu.

13. ¿Chumaiñ taiñ ayühuelafiel taiñ Ñidol Jesús?

¹³ Cüpa ayühuelfiliyiñ Jesús, püramyenieafiyiñ Jehová tañi üi ca  quelluafiyiñ caquelu che tañi quimaeteu, femngechi inayentuafiyiñ ta Jesús (1 Ped. 2:21). Femngechi pengelaiñ Huecüfü ñi fütra coilangen ca ayühuelafiyiñ ta Jehová.

QUELLUQUEFIYIÑ PU CHE ÑI MONTUAL

14, 15. Enseñafiliyiñ ta che Jehová mu, ¿chem cümeque dungu rupayai?

¹⁴ Püramyefiliyiñ Jehová tañi üi, quelluafiyiñ caquelu che ñi montulngeal. ¿Chemu feipiyiñ? Huecüfü traumalniefi reque tati pu feyentuquenolu (2 Cor. 4:4). Feimu fentrenque che feyentuquefi ta Huecüfü tañi coilaque dungu, feimu feipiqueingün Dios camapulei iñchiñ mu ca duamtuquelaeiñmu. Ca feipiqueingün tañi rumel castigaquefiel pu huesa femquelu. Ca quiñeque feipiqueingün tañi ngenon ta Dios. Huecüfü feipiquei com tüfachi coilaque dungu ñi podüñmayafiel Chau Dios tañi üi ca ñi famentuafiel ta che Dios mu. Huelu amuldunguliyiñ ca enseñalelfiliyiñ ta che Jehová mu, catrütuafiyiñ Huecüfü ñi femal quisu ñi ayüqueel, femngechi püramyeafiyiñ Chau Dios ñi lif cüme üi.

¹⁵ Chau Jehová tañi cüme dungu rume nehuen-ngei. Quimeltufiliyiñ pu che ñi chumngen ta Jehová, quelluafiyiñ pu che ñi ngünencahuenoaeteu tati Huecüfü, femngechi cüme quimafingün Jehová tañi chumngen. Afmatulehueaingün fente ñi nehuen-ngen ta Jehová (Is. 40:26). Inaduamingün Jehová tañi norngen, feimu maneluhuaingün quisu mu (Deut. 32:4). Quimeltuaeyu engün Jehová tañi quimün (Is. 55:9; Rom. 11:33). Ca yafültucuaeyu Jehová ñi piuqueyechefengen (1 Juan 4:8). Doi fülconcülele ta Jehová mu, doi maneluhuaingün tañi afnoachi mongen tañi nierpual ca Chau Dios tañi fotümngerpuaingün. Müna falin cüdau taiñ enseñayafiel pu che ñi fülconal tañi Chau mu. Femün mu, “quiñentrür cüdaucüleiñ Chau Ngünechen iñchiñ” (1 Cor. 3:5, 9).

16. ¿Chumquei quiñeque che quimfiel mu Chau Dios tañi üi?

 ¹⁶ Ellaca mu amuldungufiliyiñ ta quiñe che, hunelu mu feipiafuiñ Chau Dios Jehová pingei. Feipifiliyiñ müten, cacünutuafui ñi mongen quiñe che cüme piuquengelu. Peaiñ ñi rupan quiñe domo Alía b pingelu. Tañi religion ñi niequefel tañi pu che feyentuquelafui Biblia mu, huelu feitachi domo ayüucülequelafui tañi religion mu ca fülconcülenolu Chau Dios mu troquiuquefui. Huelu papeltulu pu testigo engün, hueni troquifi ta Chau Dios. Quimürpui quiñeque Biblia nielai Chau Dios ñi üi ca üituculelngei “Señor” cam “Ñidol”. Feimu afmatulehuei. Quimfilu Chau Dios tañi üi, ca raquiduam nietui. Quisu feipi: “Tañi cüme hueni nierquei ta quiñe üi. Fachantü tüngcületun ca mañumcülen quimfiel mu Chau Dios tañi üi”. Quiñe huentru judio tuhun-ngelu Steve pingei ca musicongefui. Quisu ngüneduami pu religioso ñi huesa femquen, feimu ayüquelafui ñi coneltunoal chem religion no rume. Huelu lalu tañi ñuque, feitachi huentru eluhui tañi allcütuafiel quiñe testigo enseñaquelu Biblia. Quimfilu Chau Dios tañi üi, puhui tañi piuque mu. Quisu feipi: “Turpu quimquelafun inei pingen ta Dios, feichi hula quimürpun ñi mülen ta Chau Dios ca tañi cüpa hueniyeteu”.

17. ¿Chumngelu eluucüleimi tami püramyeafiel Chau Dios tañi üi? (Ca inaduamnge ti adentun).

¹⁷ Enseñamequefiel mu Biblia ta che, ¿feipiquefiyiñ Chau Dios tañi üi ca tañi chumngen ta Jehová? Femngechi femliyiñ, püramyeafiyiñ Jehová tañi üi. Feimu llemai fentecünulayaiñ taiñ quimeltuafiel che ñi chumngen ta Jehová, femngechi püramyeafiyiñ tañi fütra üi. Femliyiñ, montulafiyiñ ta che. Inayentuafiyiñ Jesús tañi cüme femün ca ayühuelafiyiñ taiñ poyen Chau Jehová. Ti salmista reque feipiafiyiñ ta Jehová: “Püramyeñmayayu tami üi rumel mu” (Sal. 145:2).