QUIÑEQUE mu rupan huesaque dungu, ¿nienolu inei tami quelluaeteu troquiuqueimi? Famülque mu, ‘mülei cüdaungechi dungu ca cuñihun-ngei ta mongen’ (2 Tim. 3:1). Feimu quiñeque mu huesa duamafuiñ ca quisulelu troquihuafuiñ. Huelu rupaliyiñ huesaque dungu mu, mülei llemai quiñe che taiñ quelluafeteu. Biblia feipilei müna falin-ngei taiñ nieal cümeque hueni “mülen mu hueñancün” (Prov. 17:17).

Pablo amuldunguyauquefui caquelu mapu mu tañi pu hueni engün, fei engün quelluquefeyu fillque dungu mu (Col. 4:7-11). Pablo presulelu Roma mu, tañi pu hueni femingün ti cüdau Pablo ñi pepi femquenofel. Epafrodito yelelfi quiñeque chemcün tañi mandaleteu tati Filipos trahunche (Filip. 4:18). Cafei Tíquico yelelfi tati pu trahunche quiñeque carta Pablo ñi huirintucuel. Tañi quellueteu mu tañi pu hueni, Pablo presulefulu rume yafültucufi tati pu trahunche. ¿Iñchiñ cai fachantü? ¿Chumngechi quelluafuiñ iñchiñ taiñ pu hueni?

Fachantü fentren pu peñi ca lamngen pengelquei chumngechi ñi hueluconque quelluuquen pu huenihuen. Quiñe precursora Elísabet pingei, España mu mülelu feipi chumngechi ñi quellueteu quiñe lamngen rupan mu huesaque dungu. Feipingelu tañi ñuque tañi nien ta cancer ca tañi layal, quiñe lamngen mandaleyu fentrenque texto Biblia mu tripalu tañi yafültucuafiel. Elísabet feipi: “Pefilu iñche tati mensaje, inaduamün tañi mülen quiñe che tañi raquiduamcülen iñche mu, fei rume yafültucueneu. Femngechi nehuencontun tañi chaftuafiel tañi rupamequen” (Prov. 18:24).

Taiñ doi cüme hueniyeafiel taiñ pu peñi ca lamngen, quelluafuiñ engün ñi poyeafiel ta Jehová. Quelluafuiñ taiñ pu peñi ca lamngen füchalelu taiñ yeafiel trahun mu cam ñi amuldungual. Femliyiñ, huelucontu yafültucuhuafuiñ (Rom. 1:12). Huelu mülei quiñeque peñi, lamngen pepi tripaquenolu tañi ruca mu, ¿chumngechi quelluafuiñ engün?

Quiñeque taiñ pu peñi, pu lamngen amuquelaingün Trahunhue Ruca mu tañi cutrancülen mu cam caque dungu mu. Femngechi dungu mu rupai taiñ peñi David nielu cancer cutran. Doi cayu cüyen femngequefui tati quimioterapia mu. Com feichi cüyen mu, taiñ peñi ca tañi domo Lidia allcütuquefui ti trahun internet mu.

Ti trahunche, ¿chumngechi quellufi David ca tañi domo? Deulu ti trahun, quiñeque  peñi ca lamngen mülelu Trahunhue Ruca mu conquefuingün internet mu ñi nütramcayafiel David ca Lidia. Ca mandalelngequei mensaje ñi saquingeal tañi cüme huiñoldungun mu engu. Tañi femün mu ti trahunche, David ca Lidia falintungelu troquiuqueingu.

Iñchiñ cai, ¿chumafuiñ? Quelluafuiñ pu tripaquenolu ñi ruca mu tañi amuldungual. Adcünuliyiñ chumngechi taiñ quiñentrür amuldungual, fei pengelelafuiñ taiñ falintuquefiel engün (Prov. 3:27). Deumayafuiñ carta ca telefono mu amuldunguafuiñ. Pu loncolelu ca adcünuafuingün ñi pengelal internet mu feichi pichi trahun petu tañi amuldungunon engün. David ca Lidia rume ayüucüleingu tañi femngechi femün tañi trahunche. David feipi: “Taiñ coneltulen feichi pichi trahun mu ca taiñ allcütufiel ti llellipun rume nehuentucueiñmu”. Quiñeque mu, ramtuafuiñ quiñe peñi cam lamngen pepi tripaquenolu tañi ruca mu: “¿Yeafun tañi estudiante tami ruca mu taiñ quiñentrür chillcatual?”.

Compañfiliyiñ pu peñi, pu lamngen pepi tripaquenolu, doi falintuafiyiñ tañi chumngen engün ca doi hueniyerpuafiyiñ. Trür amuldunguliyiñ feitachi pu peñi, pu lamngen engün, inaduamafuiñ chumngechi ñi cüme enseñachequen Biblia mu, femngechi doi piuqueyerpuafuiñ. Felei llemai, quellufilmi tami pu peñi ca lamngen ñi poyeafiel ta Jehová, doi hueni nierpuafuimi (2 Cor. 6:13).

Pablo rupalu huesaque dungu mu, yafültucueyu ñi pemeteu tañi hueni Tito (2 Cor. 7:5-7). Feimu taiñ feipin mu müten yafültuculayafiyiñ taiñ pu peñi ca lamngen, doi mai Tito reque mülei taiñ pemeafiel ca quelluafiel engün (1 Juan 3:18).

Taiñ pu peñi ca lamngen Rusia mapu mu mülelu hueluconque quelluuqueingün, fei inayentufali. Raquiduamaiñ ñi rupan taiñ peñi Serguéi ca tañi domo Tatiana. Quiñe antü, pu soltau malocontuñmaeyu tañi ruca, fei yengeingu comisaria mu tañi ramtucadungungeal. Tatiana hune lifrecünungetui, fei huiñotui ruca mu. Taiñ peñi feipi: “Huiñotulu müten tañi ruca mu Tatiana, quiñe nehuen piuque lamngen pepaeyu. Pichi rupalu, acuyei taiñ pu peñi ca lamngen taiñ quelluaeteu taiñ liftual taiñ ruca”.

Sergéi ca feipi: “Ayüquefiñ Proverbios 17:17 feipilu: ‘Quiñe rüfngechi hueni rumel piuqueyechequei, ca quiñe peñi reque felei ñi mülen mu hueñancün’. Rupalu tüfachi huesaque dungu mu iñche, duamniefun tañi pu hueni, feimu rüfngei tañi feipin ta Proverbios. Jehová elueneu cümeque hueni, nehuen piuquecünuhuingün tañi quelluaeteu”.

Rupamequelu am iñchiñ cüdaungechi dungu mu, doi duamnieiñ taiñ pu hueni. Doi duamnieafiyiñ engün acule ti fütra cutrancahun. Feimu eluucüleaiñ feula taiñ quelluafiel taiñ pu hueni (1 Ped. 4:7, 8).