1. Jehová elueiñmu taiñ llellipuafiel, ¿chum duamelqueiñmu tüfa?

 TATI Deumafilu ti huenu ca ti mapu elueiñmu quiñe falin regalo, elueiñmu taiñ llellipuafiel. Felei llemai, cheu müleliyiñ rume ca chem quehun dunguliyiñ rume, iñchiñ nülacünulelafuiñ taiñ piuque ta Jehová llellipun mu. Pitalconcüleliyiñ cam presuleliyiñ rume, maneluhuafuiñ Jehová taiñ allcütuaeteu. Rume mañumniefiyiñ ta Jehová taiñ elueteu ti llellipun.

2. Ti rey David, ¿chumngechi pengeli ñi falintuquefiel ti llellipun?

² Ti rey David rume falintuquefui tañi llellipuafiel Jehová. Fei ülcantulelfi ta Jehová: “Tañi llellipun cüme pepicalechi incienso reque felepe eimi tami adquiñ meu” (Sal. 141:1, 2). David ñi antü meu pu sacerdote cüme pepicaquefuingün ti incienso femngechi ñi cüme poyeafiel Jehová (Éx. 30:34, 35). Feimu, ¿chem quimeltueiñmu David ñi feipin? Quisu petu ñi llellipunofiel Jehová, cüme raquiduamquefui chem pial. David reque, iñchiñ ca cüme raquiduamqueiñ chem pial llellipun mu, femngechi taiñ ayühuelafiel Jehová.

3. ¿Chumngechi mülei taiñ llellipuafiel ta Jehová? Ca ¿chumngelu?

³ Iñchiñ yamquechi mülei taiñ llellipuafiel Jehová. ¿Chumngelu? Raquiduamnge ti afmatun dungu ñi peel Isaías, Ezequiel, Daniel ca Juan. Caquerumei ñi pengelelngeel caque quiñeque engün, huelu com ñi peel engün quimfalcünui Jehová ñi yamfalngechi rey ngen. Isaías pefi ta “Jehová anülelu quiñe doi alüpüralechi huancu” (Is. 6:1-3). Ezequiel pefi ta Jehová anülelu quiñe  huenulechi huancu, hualloñmanieyu quiñe huilüfcülechi relmu (Ezeq. 1:26-28). Daniel ca pefi ta Jehová lingar ropatulelu ca tañi huancu mu tripai cütral (Dan. 7:9, 10). Juan pefi ta Jehová anülelu quiñe ülmen huancu mu huallmanieyeu quiñe relmu esmeralda reque felelu (Apoc. 4:2-4). Feimu Jehová rume yamfalngelu rume, elueiñmu taiñ llellipuafiel. Müna mañumcüleiñ. Cafei mülei taiñ yamquechi llellipuafiel. Huelu, ¿chem feipiafuiñ ta Jehová llellipun mu? Peafiyiñ.

4. Jesús ñi llellipuel, ¿chem quimeltueiñmu? (Mateo 6:9, 10).

⁴ (Papeltunge Mateo 6:9, 10, TNM). Jesús quimeltufi tañi pu discipulo chem pial ngillatun meu, femngechi ñi ayühuelafiel ta Jehová. Llellipulu Jesús, hune feipi ti doi falinque dungu. ¿Chem dungu? Ñi yamniengeal Jehová ñi üi, ñi ngünenietual ti mapu ca femngechi ñi apümcangeal Jehová tañi pu caiñe. Ca llellipui ñi cüpalal cümeque dungu pu che mu ca ti mapu mu. Iñchiñ femngechi dungu mu llellipuliyiñ, pengelaiñ taiñ falintuquefiel Jehová tañi ayüqueel.

5. ¿Ca chem dungu mu llellipuafuiñ Jehová?

⁵ ¿Ca chem quimeltueiñmu Jesús taiñ llellipual? Feipiafuiñ Jehová taiñ eluaeteu iyael, taiñ perdonayaeteu taiñ culpan, taiñ huelulcangenoal ca taiñ montulaeteu Huecüfü mu (Mat. 6:11-13, TNM). Femngechi dungu mu llellipuliyiñ, pengelaiñ taiñ maneluucülen Jehová mu ca taiñ cüpa ayühuelfiel.

6. Llellipuliyiñ, ¿re feipifeipipeaiñ mai ti llellipun ñi quimeltuel Jesús? ¿Chumngelu?

⁶ Jesús enseñalfilu tañi pu discipulo ti llellipun, ayüquelafui ñi fill rupa huiño feipimequeal engün tüfachi llellipun. Caque rupa mu, Jesús llellipufi ta Chau Jehová ca feipifi chem ñi raquiduamelnieteu (Mat. 26:39, 42; Juan 17:1-26). Ca femngechi iñchiñ Jesús reque, llellipuafuiñ ta Jehová chem dungu rume taiñ raquiduamelnieteu. Por ejemplo, quimnoliyiñ taiñ chumal, llellipuafuiñ  Jehová taiñ eluaeteu quimün (Sal. 119:33, 34). Elfalcünungeliyiñ quiñe cüdau fei quimnoliyiñ chumngechi taiñ femürpual, llellipuafuiñ Jehová taiñ eluaeteu pepiluhun (Prov. 2:6). Pu chau llellipuafuingün ñi cümelcaleal tañi pu pichiqueche. Ca femngechi pu pichiqueche pediafuingün ta Jehová ñi cümelcaleal tañi pu chau. Ca com iñchiñ llellipuafiyiñ Jehová ñi quelluafiel pu che taiñ enseñalquefiel ca amuldungulelquefiel. Huelu llellipufiliyiñ Jehová, re feipilayafiyiñ müten taiñ quelluaeteu. ¿Ca chem mu llellipuafuiñ? Peafiyiñ.

7. ¿Chumngelu mülei taiñ püramyeafiel Jehová llellipun mu?

⁷ Mülei taiñ püramyeafiel ta Jehová taiñ llellipun mu. Jehová müten mülei ñi püramyengeal. Quisu ‘cüme piuquengei ca pepicaucülei ñi huiñoduamtual’. Jehová ca fürenechequei, cutranpiuqueyechefengei, ñom chengei ca rüf piuqueyechequei (Sal. 86:5, 15). Afmatufali Jehová ñi chumngen ca tañi femquen, feimu püramyequefiyiñ.

8. ¿Chem dungu mu mañumtuafuiñ ta Jehová? (Salmo 104:12-15, 24).

⁸ Llellipun mu ca femngechi mañumtuquefiyiñ Jehová com taiñ eluqueteu mu. Mañumtuafuiñ ñi mülen fentren ayüfalchi rayen, cafei ñi mülen fentren illufalchi iyael. Ca mañumtuafuiñ taiñ nieel fentren cümeque hueni. Taiñ Chau Ngünechen eluqueiñmu tüfa taiñ ayühuelaeteu (papeltunge Salmo 104:12-15, 24). Huelu doi mañumtuquefiyiñ taiñ eluqueteu mu ngülam, femngechi taiñ doi maneluhual quisu meu. Ca mañumtuquefiyiñ taiñ eluqueteu cümeque maneluhun cüpalechi antü meu.

9. ¿Chem quelluafeiñmu ngoimanoal mañumtuafiel ta Jehová? (1 Tesalonicenses 5:17, 18).

⁹ Quiñeque mu pürüm ngüyüentuafuiñ taiñ mañumafiel Jehová com taiñ eluqueteu mu. ¿Chem quelluafeiñmu taiñ ngoimanoafiel? Raquiduamafuiñ quiñeque dungu taiñ llellipufiel Jehová cuifi, fei raquiduamaiñ chumngechi taiñ huiñoldungueteu. Femliyiñ, mañumafiyiñ Jehová llellipun mu (papeltunge  1 Tesalonicenses 5:17, 18). Quiñe che mañumeliyiñmu, ayühuai taiñ piuque. Ca femngechi mañumtufiliyiñ ta Jehová, ayühuai ñi piuque (Col. 3:15). Huelu ca falin dungu mülei taiñ mañumafiel ta Jehová. ¿Chem dungu chi? Peafiyiñ.

10. ¿Chumngelu mañumtuquefiyiñ Jehová huercüfiel mu ta Jesús? (1 Pedro 2:21).

¹⁰ (Papeltunge 1 Pedro 2:21). Mañumtuafiyiñ ta Jehová huercüfilu tañi Fotüm taiñ quimeltuaeteu. Quimüñmafiel mu Jesús tañi mongen, fentren quimeltun eluqueiñmu Chau Jehová mu ca chumngechi taiñ ayühuelafiel. Iñchiñ pengel-liyiñ feyentun Jesús tañi lan meu, cüme hueniyeafiyiñ ta Jehová (Rom. 5:1).

11. ¿Chumngelu ngillatuqueiñ Jesús ñi üi mu?

¹¹ Iñchiñ ca femngechi Jesús ñi üi mu llellipuafuiñ ta Jehová, feimu mañumcüleiñ. Jehová allcütuñmaqueiñmu taiñ llellipufiel Jesús ñi üi mu, femngechi adcünuquefi ta Jesús chumngechi taiñ quelluaeteu. Jesús feipi: ‘Fei com tamün ngillatuel ta eimün iñche ñi üi meu, iñche ta feman, femngechi ta Fotüm meu ñi pengelngeal Chau ñi fütra pepiluhun’ (Juan 14:13, 14).

12. ¿Chumngelu mañumtuafuiñ Jehová ñi lan mu ta Jesús?

¹² Chau Jehová rulpacünuñmaqueiñmu taiñ culpan Jesús tañi lan meu. Biblia feipi Jesús fei taiñ Hunen Lonco Sacerdote, man püle anücünuhui Fütra Chau Ngünechen ñi ülmen huancu huenu meu (Heb. 8:1). Culpaliyiñ, Jesús ta quelluqueiñmu (1 Juan 2:1). Rume mañumquefiyiñ ta Jehová ñi elcünufiel ta Jesús tañi Hunen Lonco Sacerdote ngeal, quisu cüme quimniei taiñ culpan chengen ca llellipuquei iñchiñ mu (Rom. 8:34; Heb. 4:15). Iñchiñ culpafengeiñ, feimu lanofule Jesús iñchiñ mu, turpu ngillatulayafuiñ ta Jehová. Felei llemai, iñchiñ af mañumlayafuiñ ta Jehová taiñ elueteu tañi poyen Fotüm.

13. Jesús, ¿chumngechi pengeli ñi piuqueyeniefiel tañi pu discipulo?

¹³ Epe puulu ñi layal ta Jesús, fütra ngillatui tañi pu discipulo mu. Feipifi ta Jehová tañi cuñiutucuaeteu engün Huecüfü meu (Juan 17:15). Ñi femün mu, Jesús pengeli fente ñi piuqueyeniefiel tañi pu discipulo. Jesús quimniefui pichin mu tañi layal, femngechi rume ngillatui cümelcaleal tañi pu discipulo.

14. ¿Chumngechi pengelafuiñ piuqueyefiel taiñ pu peñi ca pu lamngen?

¹⁴ Jesús reque, iñchiñ raquiduamcülequelaiñ iñchiñ taiñ duam meu müten, doi mai rumel ngillatulequeiñ taiñ pu peñi ca pu lamngen meu. Femliyiñ, pengelaiñ taiñ hueluconque piuqueyeuquen, chumngechi taiñ mandaeteu Jesús. Ca femngechi pengelelafiyiñ ta Jehová fente taiñ piuqueyefiel pu peñi ca pu lamngen (Juan 13:34). Huelu llellipuliyiñ taiñ pu peñi ca pu lamngen mu, ¿rüf quellupeafiyiñ mai? Femaiñ llemai. Biblia feipieiñmu: “Tati nor che ñi llellipun rume nehuen-ngei ca quelluchequei” (Sant. 5:16, TNM).

15. Taiñ pu peñi ca pu lamngen, ¿chumngelu duamniei ñi ngillatuñmangeal?

¹⁵ Fentren taiñ pu peñi ca pu lamngen contunieyu huesaque cutran ca caiñetungequei. Cafei mülequei fütraque aucan  (hueichan) cheu ñi mülemum engün ca rupaquei fütraque nüyün ca cürüftucu mahun. Com fei engün duamniei ñi ngillatuñmangeal. Iñchiñ ca llellipuafuiñ pu peñi pu lamngen mu nehuentu cüdauquelu ñi quellucheal. Quimniefiyiñ chi quiñeque peñi, lamngen huesa rupamequelu. Cümeafui taiñ üituafiel engün ngillatufiliyiñ ta Jehová. Llellipufiliyiñ Jehová ñi nehuentucuafiel engün, pengelqueiñ taiñ rüf piuqueyefiel taiñ pu peñi ca pu lamngen.

16. ¿Chumngelu mülei taiñ ngillatual pu peñi nehuentu cüdauquelu Jehová ñi troquiñche mu?

¹⁶ Pu peñi nielu falinque cüdau Jehová ñi troquiñche mu ca duamnieingün tañi ngillatuñmangeal. Taiñ llellipun müna quelluafeyu engün. Ti apostol Pablo cafei duamtuquefui tañi ngillatuñmangeal. Quisu feipi: “Ca femngechi ngillatuñmamuchi ta iñche, femngechi ta Ngünechen eluaeneu ta dungu chumngechi felei tañi feipial. Ca femngechi ta pepi cüme dunguan yafüluhun meu fei ta famngechi hulafiñ tañi quimngeal ti quimeltungequenofelchi huerquen montuluhun dungu” (Efes. 6:19). Ca femngechi famülque mu, mülei fentren peñi nehuentu cüdauquelu Jehová ñi troquiñche mu. Ngillatuñmafiliyiñ tañi cüme entual ñi cüdau engün, pengelqueiñ taiñ piuqueyeniefiel.

17, 18. ¿Chumül ngillatunge pingeafuiñ? Ca ¿chem mülei taiñ acordayal?

¹⁷ Quiñeque mu feipingeafuiñ taiñ ngillatual. Por ejemplo, quiñe lamngen conpañfilu cangelu lamngen ñi enseñacheal, feipingeafui ñi llellipual. Huelu ti compañ müte quimlafi ti estudiaquelu, feimu doi cümeafui ñi llellipual fentepun chi chillcatun. Femngechi femle, doi quimafui chem pial ñi ngillatun mu ñi quellungeal ti estudiante.

¹⁸ Quiñe peñi feipingeafui ñi llellipual trahun cam amuldungun mu. Fei petu ñi llellipunon, ti peñi mülei ñi acordayal chumal ñi trahuluucülen pu peñi ca pu lamngen, femngechi ñi quimal chem pial ti llellipun mu. Quiñe peñi petu tañi  ngillatun trahun mu, ngelai tañi quimeltucheal cam norümtucheal. Epe com taiñ trahun meu elungequeiñ quechu minuto ülcantual ca llellipual. Feimu pu peñi mülei ñi müte alüñmanoal tañi llellipun mu, doyelchi mai hue amulcünungelu ti trahun (Mat. 6:7).

19. ¿Chem quelluaiñmu pepicaucüleal acule Jehová ñi antü?

¹⁹ Jehová tañi antü fülcülepai, feimu rume falintufali taiñ ngillatuleal, fentecünulayaiñ taiñ femal. Jesús feipi: ‘Eimün ta pehutuucüleaimün, fill antü ngillatulequeaimün, femngechi tamün montuluhual com tati cüpalechi dungu meu’ (Luc. 21:36). Rumel ngillatuleliyiñ Jehová mu, doi maneluhuaiñ quisu meu ca cüme pepicaucüleaiñ acule Jehová tañi antü.

20. Taiñ ngillatun, ¿chumngechi cüme nümün-ngechi incienso reque feleafui?

²⁰ ¿Chem ngüneduamiyiñ tüfa mu? Rume falintuniefiyiñ ngillatuleal taiñ Chau Ngünechen meu. ¿Chem dungu mu doi falintufali taiñ llellipual? Com dungu nüucülelu Jehová tañi ayüqueel mu. Cafei mañumtuafiyiñ ta Jehová ñi hultucun mu tañi Fotüm ca tañi Gobierno meu. Ca ngillatuqueiñ taiñ pu peñi ca pu lamngen meu. Llellipuafiyiñ ta Jehová taiñ eluaeteu com taiñ duamnieel ca taiñ quelluaeteu doi maneluhual quisu mu. Hune cüme raquiduamliyiñ taiñ chem pial llellipun mu, pengelqueiñ taiñ falintuquefiel ti llellipun. Femngechi femliyiñ, taiñ llellipun quiñe cüme nümün-ngechi incienso reque puhuai Jehová mu (Prov. 15:8).