PU JUDIO ñi antü meu puulu ti antü ñi quetrayal ca nganal, feichi mu conquefui quiñe hue tripantu. Famülque mu, iñchiñ feipiafuiñ tüfachi dungu ñi rupan septiembre cam octubre cüyen.

Cuifi mu, pu che ¿chumngechi quimquefuingün tunten antü ñi nieel quiñe cüyen? Inaduamquefuingün tati ciclo lunar, tüfa puuquefui 29 cam 30 antü. Ca inaduamquefingün ti antü femngechi ñi quimal chumteñmaquen quiñe tripantu. Huelu ngüneduamfiliyiñ ti ciclo lunar taiñ quimal chumteñmaquen quiñe tripantu, tüfa doi pichiñmayafui ta ngüneduamfiliyiñ ti antü. Fei, ¿chem mülefui ñi femal engün ñi cüme raquial ti cüyen ca ti tripantu? Por ejemplo, petu ñi afnon quiñe tripantu, tucuquefingün doi antü cam cangelu cüyen. Femngechi quimquefuingün chem cüyen mu ñi nganal ca ñi cosechayal.

Moisés ñi antü meu, Jehová feipifi tañi pu che quiñe tripantu mu ti hunen cüyen abib cam nisan pingeai. ¿Tüfa ta marzo cam abril cüyen peno? (Éx. 12:2; 13:4). Fei nisan cüyen mu, pu Israel che mülefui ñi femal quiñe fiesta. Feichi fiesta mu, mülei ñi chalintuculelafiel ta Jehová ti hunenque quetran cahuella (Éx. 23:15, 16).

Quiñe quimche feipi: “Cuifi mu, cüdaungelafui ñi tuculelafiel ca quiñe cüyen tati calendario”. Ca feipi: “Tati pascua pingechi fiesta mülei ñi celebrangeal apochi cüyen mu, nisan mu. Ca mülefui ñi femngeal rupalu hula tati equinoccio primaveral. Feimu epe aflu ti tripantu quimngerumele tati pascua ñi femngeal petu ñi puunon tati equinoccio primaveral, fei ca quiñe cüyen tuculelngequefui calendario mu”.

Iñchiñ pu testigo femngechi raquiantüqueiñ taiñ quimal chem antü mu ñi acordangeal Jesús tañi lan. Tüfa rumel femngequei pehuchi antü mu 14 conchi nisan cüyen, chumngechi ñi feipin tati calendario hebreo. Fei quimelngequei com pu trahunche chumül ñi femngeal feitachi trahun. *

Famülque mu, cüdaungelai taiñ peal chumül conquei ca afquei quiñe cüyen, quiñe calendario mu cam taiñ telefono mu cütu peafuiñ. Huelu cuifi mu, pu judio ñi antü mu, rume cüdaungefui. ¿Chumngechi quimquefuingün fei engün?

Noé ñi antü mu, ti cüyen niequefui 30 antü (Gén. 7:11, 24; 8:3, 4). Rupalechi tripantu mu, ti calendario hebreo quiñeque cüyen müten niequefui 30 antü. Rupalu 29 cam 30 antü, pu hebreo che pequefuingün tati hue cüyen (luna nueva). Fei quimingün ñi conquen ca cüyen.

Quiñechi, David Jonatán engu feipihuingu hule müleai hue cüyen (luna nueva) (1 Sam. 20:5, 18). Tüfachi dungu feipilefui ñi conal ca cüyen (mes). David ca Jonatán ñi antü meu, pu che quim raquiquefuingün tunte antü mu ñi conal ca cüyen. Huelu pu Israel che, ¿chumngechi quimquefuingün ñi tuhun quiñe cüyen? Taiñ quimal tüfa, ti lifru Misná pingelu quelluafeiñmu. Fei mu huirintucungei fillque ley ca huimtun ñi nieel pu judio. Feitachi lifru feipi pu judio tripatulu Babilonia mu, feichi meu tati Sanedrin feipiquefui ñi conquen quiñe cüyen. Tati regle cüyen ñi celebraquen quiñe fiesta, tüfachi tribunal trahuluuquefuingün 30 conchi cüyen mu fill cüyen. ¿Chem femquefuingün ñi quimal chem antü mu ñi conal ca cüyen?

Fei engün mandaquefuingün quiñeque huentru ñi amual huincul püllelelu Jerusalén mu, fei ñi adquintuafiel ti huenu pun mu. Pefilu müten tati hue cüyen, pürüm amuquefuingün ñi feipiafiel tati Sanedrin. Tati tribunal cüme quimlu müten ñi huefün tati hue cüyen, fei hula feipifuingün ñi conün ca cüyen. Huelu tromülen mu penofiel mu ti cüyen, ¿chem femquefuingün?  Feimeu feipiquefuingün feiti cüyen ñi nieel 30 antü, fei ti cangelu cüyen tuuquefui ca antü mu.

Ti Sanedrin ñi quimelelafiel tati pu che chem antü mu ñi conün quiñe cüyen, cütraltuquefuingün Olivo huincul mu ca caquelu huincul püllelelu Israel mu. Rupan antü deumangehuequelai cütral, huercüngequefui quiñeque huentru ñi feipiafiel tati pu che. Femngechi com pu judio, cheu rume mülefule engün, quimingün chem antü mu ñi tuhun quiñe cüyen. Ca femngechi celebraquefuingün ti fiesta quiñe antü mu müten.

Ti cüpalechi tabla quelluaimu tami doi adümafiel ti fillque cüyen, fiesta ca estaciones ñi niequefel pu Israel che cuifi mu.