Pu papeltuquelu ñi ramtuqueel
Huellin mapu mu, ¿re mana ca codornices müten ipefingün mai tati pu Israel che?
Pu Israel che miyaulu 40 tripantu huellin mapu mu, doi ifingün mana pingechi iyael (Éx. 16:35). Jehová ca epu rupa elufi codornices tañi iyael engün (Éx. 16:12, 13; Núm. 11:31). Ca quiñeque mu niequefuingün caquelu iyael, huelu pichiquen müten.
Quiñeque mu, Jehová ca yequefeyu cheu tañi ürcütual, feiti mu mülequefui co ca quiñeque fün anümca (Núm. 10:33). Quiñe troquiñ mapu üitufi Elim, feiti mülefui mari epu hufco ca 70 palmera. Feichi palmera, ¿hulquepelafui datil pingechi fün? (Éx. 15:27). Quiñe lifru feipi tüfachi palmera hulquelu datil tremquei fillque püle mu. Ca feipi tüfachi palmera doi hulquelu iyael huellin mapu mu. Hulquefui iyael, aceite ca fentrenque che umayafui fei mu.
Fütra huellin mapu mu mülei quiñeque oasis cheu ñi mülen co ca anümca. Quiñe fütra oasis Farán pingei. ¿Feiti mu peno pichi ürcütuingün pu Israel che? Feiti oasis mülei Farán pingechi laf mapu mu. a Quiñe lifru feipi feiti laf mapu 130 kilometro tuhui. Tüfa ta doi tutelcalei ca doi quimniengelu Sinaí mapu mu. Farán pingechi oasis 45 kilometro alü camapulei lafquen mu, niei fentren palmera. Feiti oasis 4,8 kilometro tuhui ca 610 metro huente lafquen mu mülei. Fente ñi adelcalen trürümngequei ti jardin de Edén mu. Fütra cuifi mu, fentren che cüpaquei ñi pepayal ti palmera hulquelu datil pi tati lifru.
Palmera hulquelu datil Farán pingechi oasis mu
Tripalu Egipto mapu mu, pu Israel che yeingün masan deumangelu rüngo mu ca ti fatia cheu tañi masaquen engün. Ca yeingün chi pichin aceite ca fün quetran. Huelu tati iyael tañi yeel müte alüñmalai. Ca yengei fentren ufisa ca fentren huaca (Éx. 12:34-39). Huelu miyaulu am ta huellin mapu mu engün, feimu ¿lapelai fentrenque tañi pu culliñ engün? Ca, ¿langümpelafi tañi iyafiel engün? Cam chalintuculelfingün chi Jehová ca coilaque dios (Hech. 7:39-43). b Femfule rume, niefuingün quiñeque ufisa ca huaca. ¿Chumngechi quimiyiñ? Quisu engün feyentunofilu Jehová, Jehová feipieyu: “Tamün pu yall camañngerpuai huellin mapu meu 40 tripantu mu” (Núm. 14:33). Feimu niefuingün pichinque lichi ca pichinque ilo. Huelu pu Israel che fentren-ngefuingün ¿cüla millon peno?, feimu doi duamniefui ta iyael. c
¿Cheu entufuingün co ca iyael tañi eluafiel tañi pu culliñ? d Feichi mu, ¿doi mahunquepelafui? ¿Feimu doi alüquepelafui cachu ca anümca huellin mapu mu? Ti lifru Perspicacia para comprender las Escrituras, volumen 1 feipi 3.500 tripantu cuifi mu, cheu tañi mülequefel ti pu Israel che doi co mülequefui fachantü mu. Ca feipi: “Fei mu fentrenque co mülequefui, fachantü com feitachi co ancüi. Huelu quimfali tañi mülequefel leüfu cuifi mu, feimu ¿cuifi rume mahunquepelafui?”. Femfulu rume, feitachi huellin mapu llicafalfui (Deut. 8:14-16). Jehová am elufilu co tati pu Israel che ca tañi pu culliñ, feimu lalaingün (Éx. 15:22-25; 17:1-6; Núm. 20:2, 11).
Moisés feipifi pu Israel che Jehová tañi elueteu mana tañi iyal engün, femngechi ‘tañi quimal re cofque meu müten mongelequelai ta che, huelu mongelequei inale com ñi feipiel Jehová’ (Deut. 8:3).
a Inaduamnge La Atalaya 1 conchi mayo 1992, pagina 24 ca 25.
b Tati Biblia feipi epu rupa pu Israel che chalintuculelfingün culliñ ta Jehová huellin mapu mu. Quiñe rupa, elcünungelu quiñeque huentru tañi sacerdotengeal. Ca rupa, femngelu ti Pascua. Feitachi epu rupa, ¿quiñe tripantu peno rupai ñi tripan Egipto mapu mu? Tüfa 1512 tripantu petu ñi mülepanon Jesús (Lev. 8:14–9:24; Núm. 9:1-5).
c Epe aflelu tati 40 tripantu ñi miyahun huellin mapu pu Israel che, hueichan mu engün huehuingün fentrenque culliñ (Núm. 31:32-34). Huelu fentecünuingün tañi iyafiel ta mana conpulu engün hula ti Feipicünuelchi Mapu mu (Jos. 5:10-12).
d Jehová feipifi pu Israel che chumte mana tañi ngümitual quisuque engün, feipilai pu culliñ tañi iyal ta mana. Feimu feipiafuiñ tati culliñ ñi inofiel ta mana (Éx. 16:15, 16).
