Quiñe lifru feipi: “Raquiduamliyiñ ñi chumlen ca ñi rupan quiñe che, ca peyenieuliyiñ reque taiñ ca femngechi rupan mu iñchiñ”, fei cüme quimnieafiyiñ ñi chum duamcülen. Cafei quiñe huentru adümuuquelu, Rick Hanson pingelu, feipi: ‘Com iñchiñ taiñ chengen mu cüme quimnieafuiñ pu che ñi chum duamcülen’.

NGÜNEDUAMNGE: Pu che müten elungei cüme quimal ñi chum duamcülen ta caquelu. ¿Chumngelu am? Biblia feipi Ngünechen ñi deumafiel pu che quisu ñi adentun (Génesis 1:26). Feimu Chau Dios taiñ deumaeteu am, iñchiñ inayentuafuiñ quisu tañi chumngen, fei cüme chengerpuafuiñ tati. Feimu ngüneduamliyiñ ñi chum duamcülen caquelu che ca quellufiliyiñ, pengelaiñ taiñ inayentuquefiel ta Chau Jehová tañi cutranpiuqueyechequen (Proverbios 14:31).

Chau Ngünechen cüme quimniei taiñ chum duamcülen ca hueñancüquei ñi peeteu mu taiñ cutrancaucülen. Cuifi mu pu Israel che conayengefui Egipto mapu mu, fei hula ca huesa rupaingün nampiyaulu 40 tripantu huellin mapu mu. Ñi pefiel mu Jehová com ñi rupan engün, Biblia feipi: “Cutrancaulu engün, quisu ca cutrantupiuquei” (Isaías 63:9). Chau Dios quimquelafui müten ñi cutrancauqueel engün, doi mai ca cutrantupiuquelequefui. Feimu feipi: “Cüme quimniefiñ ñi cutrancaucülen engün” (Éxodo 3:7). Ca feipifi tati pu Israel che: “Inei rume tamün topaeteu topañmaeneu reque tañi curalnge” (Zacarías 2:8). Feimu, huesalcangelu iñchiñ, Jehová rume huesa duamquei.

Quiñeque mu raquiduamafuiñ: “Culpantuuquen ca cüme chengenolu troquiuquen, fei Chau Dios, ¿quimniepeafui mai ñi chum duamcülen iñche?”. Huelu Biblia feipieiñmu Ngünechen tañi ‘doi fentrelen iñchiñ taiñ piuque meu, fei quisu com quimniei’ (1 Juan 3:19, 20). Quisu doi cüme quimnieiñmeu iñchiñ mu cütu. Quimniei com taiñ rupan, taiñ raquiduam ca taiñ chum duamcülen. Felei llemai, Chau Dios cüme quimniei taiñ chum duamcülen.

 Biblia feipi

• “Fei mütrümaimi, ca Jehová lloudunguaimu; llellipuaimi tami quelluaeteu, fei quisu feipiaimu: ‘¡Tüfa tañi mülen!’” (ISAÍAS 58:9).

• “‘Iñche am cüme quimnien tañi raquiduamcülen eimün mu’ pi Jehová, ‘nien tüngcülechi raquiduam, ca huesa raquiduam nielan, tañi eluafiel ta eimün cüme felen ca quiñe maneluhun. Ca eimün mütrümmuan ca cüpayaimün, ca ngillatumuan ca iñche allcütuhuayiñ’” (JEREMÍAS 29:11, 12).

• “Tami trülque metahue mu ngülümüñmaen tañi cülleñu. ¿Huiriconcülepelai eimi tami lifru mu?” (SALMO 56:8).

Ngünechen ñi cüme quimniefiel taiñ chum duamcülen, ¿chumngechi quelluafeiñmu cutrancauliyiñ? Ngüneduamnge María ñi rupan:

“Tañi huentru püñeñ contueyu cancer cutran, fei epu tripantu rupalu, lai nielu 18 tripantu. Müna hueñancünagün. ‘¿Chumngelu fente cüdaungei tañi mongen?’ pifun. Rume illcutufiñ ta Chau Dios, femnolu cai chem no rume ñi montulafiel tañi püñeñ.

Cayu tripantu rupalu, quiñe cüme hueni tañi trahunche mu nütramcalelfiñ tañi chum duamcülen. Chau Dios piuqueyelaeneu pifiñ. Quisu cüme allcütueneu fentreñma mu, fei nütramcaleneu ñi feipiel 1 Juan 3:19, 20: ‘Ngünechen am doi fentrelu iñchiñ taiñ piuque meu, fei quisu com quimniei’. ¡Tüfa pürapapiuqueleneu! Quisu feipieneu Chau Dios tañi cüme quimniefiel iñche ñi cutrancahun.

Femngele rume, müna cüdautun tañi illcuhuenoal. Fei papeltun Salmo 94:19, feipilu: ‘Rume fentrelu iñche meu tañi fill raquiduamcülen, eimi nehuentuen ca yafüduamelen’. ¡Iñchengealu troquifiñ feichi feipin! Amulechi antü meu, feipifiñ ta Jehová tañi huesa duamcülen. Quimlu iñche Chau Dios tañi allcütuñmaqueteu ñi llellipun, ca tañi cüme quimüñmaqueteu tañi chum duamcülen, müna cüme duameleneu tañi piuque”.

Felei llemai, Chau Dios cüme quimniei taiñ chum duamcülen, fei cutrancauliyiñ, quisu ca cutrancauquei. ¡Müna cüme duamelqueiñmeu quimal tüfa! Huelu ramtuhuafuiñ: ¿Chumngelu am cutrancaucüleiñ? Chau Dios ¿castiganiepeiñmu mai taiñ culpan meu? Chau Ngünechen, ¿apümafi taiñ cutrancaucülen? Tüfa ngüneduamngeai cüpalechi chillcatun meu.