Chau Ngünechen castigaquelaeiñmu, huelu huall püle mülei huesaque cutran, filla, entrilequei che ngüñün mu ca laquei fütraque hueichan (aucan) mu, fei ¿chumngelu am rupaquei tüfa? Biblia pengeli cüla dungu quimfalcünulu chumngelu pu che cutrancauquei:

1. Pu che quisutu duamuuquei, diñmatuquei fillque chemcün ca üdechequei. Biblia feipi: “Tati pu che ñi ngüneniefiel caquelu pu che, fei quiñentrür ñi huesalcalerpual engün” (Eclesiastés 8:9). Feimu cutrancauqueiñ taiñ huesalcaqueteu pu che culpafengelu, quisutu duamuuquelu ca huesa piuquengelu.

2. Huesa ruparumeafuiñ ca tuntucupayafeiñmu huesaque dungu. Iñchiñ cutrancahuafuiñ taiñ huesa ruparumequen mu (Eclesiastés 9:11). Feimu chem che rume allfüafui ruparumele quiñe huesa dungu cheu ñi mülen engün, tuntucungele, cuñiutucuunole cam huelulcaule engün.

3. Huecüfü gobiernaniei Mapu mu. Biblia feipi: “Com tüfachi chüf mapu ñi ngünenieteu tati huecüfü”, feimu quimfali chumngelu cutrancaucüleiñ (1 Juan 5:19). Feichi Huecüfü, Satanás ca pingequei, cuifi quiñe cüme püllüngefui, huelu huecüfüngerputui, ca “inahuelafi ti rüfngechi dungu” (Juan 8:44). Caquelu püllü quiñeucülei Huecüfü engün ñi chaftuafiel ta Chau Ngünechen, fei ñi femal engün tañi ayüqueel müten, feimu ca huecüfücünuhuingün (Génesis 6:1-5). Doyelchi mai fantepu mu, Satanás ca tañi pu huesaque püllü petu amulei ñi huesa gobiernaquen ti müleyechi dungu Mapu mu. Huecüfü pofoi tañi piuque fente ñi lladcülen mu, fei ‘ngünencaquefi com mapu meu mülechi pu che’, feimu “aungeai tati müleyelu mapu meu” (Apocalipsis 12:9, 12). Rüfcünu mai, Huecüfü huesa loncolei. Quisu ayüumapiuquelei pefiel ñi cutrancaumequen pu che. Feimu Chau Ngünechen cutrancaquelafi pu che, Satanás queta femquei tüfa.

NGÜNEDUAMNGE: Quiñe huesa piuquengelu müten femafui ñi cutrancayafiel chumconpanochi che. Huelu Biblia feipi: “Ngünechen am ta piuqueyen ürque” (1 Juan 4:8). Quisu cüme piuqueyechequei, feimu “¡raquiduamfalngelai Chau Ngünechen ñi femal huesaque dungu, ca ñi huesalcayal tati com nehuen nielu!” (Job 34:10).

Huelu ramtuhuafuimi chi: “Chau Dios, ¿chumül am apümafi Huecüfü ñi huesa ngünenieel?”. Chumngechi taiñ ngüneduampeel nga, Chau Dios üdequei ti huesaque dungu, ca cutrancaulu iñchiñ quisu ca cutrancauquei. Biblia feipiqueiñmu: ‘Elcünumün Ngünechen meu com tamün raquiduamelnieteu, quisu am ta piuqueyenieteu ta eimün’ (1 Pedro 5:7). Chau Dios piuqueyequeiñmu ca com pepiluhun niei, feimu apümafi ti cutrancahun ca ti huesaque dungu Mapu meu. Inaduamaiñ tüfa cüpalechi chillcatun mu. *