Chumngechi ngüneduampeiñ, Jesús cüme pengeli Chau Dios elcünui tañi Reino huenu meu ca loncocünufi ta Jesucristo.

Hue loncocünungelu ta Jesús, huemünentufi ta Huecüfü ca tati huesaque püllü huenu mu. Tüfa engün nagpalu mapu mu, fentren huesaque dungu ruparupangei 1914 tripantu ta fantepu mu (Apocalipsis 12:7, 9).

Rupalu rume fentren huesaque dungu, Jesús, tati Lonco Ülmen Chau Dios ñi Reino meu, femmequei fillque dungu ñi quelluafiel pu che. Quiñe tüfa, huall mapu mu enseñalngei Biblia tati pu che, femngechi quimürpuingün Biblia ñi ngülam ca inaqueingün tüfa tañi mongen mu (Isaías 2:2-4). Pütrünque che femlu tüfa cüme raquiduamquei ti cüdau mu, diñmatuquelai ta plata, ca doi cüme yeuquei tañi familia engün. Fei engün petu quimürpuingün chumngechi cüme feletual feula ca ñi doi cüme chengerpual chumngechi ñi ayüqueel ta Chau Dios.

Jesús deu ngüneniei huenu meu, huelu pu che tañi gobierno petu ngüneniefi tati mapu. Femngelu rume, Chau Dios feipifi ta Jesús: “Rangiñ tami pu caiñe mu ngünenieaimi” (Salmo 110:2). Pichilehuei Jesús ñi apümcayafiel com tañi pu caiñe, huelu cümelcayafi tati pu che eluulu ñi ngünenieaeteu Chau Dios.

Feichi mu Chau Dios ñi Reino femürpuai tüfa:

• Apümcayafi tati coilaque religion. Biblia trürümfi tati coilaque religion ta quiñe cüri domo mu. Tati coilaque religion enseñachequei coilaque dungu Chau Dios mu ca huesalcaquefi engün, feimu com tüfachi religion apümcangeai. Rupale tüfa, fentren pu che afmatulehueai (Apocalipsis 17:15, 16).

• Apümcayafi pu gobierno ñi nieel ta che. Chau Dios ngünenieafi ta mapu, fei apümcayafi itrofill gobierno (Apocalipsis 19:15, 17, 18).

• Apümcayafi pu huesaque che. Fentren che eluuquei ñi femal huesaque dungu ca piquelai ñi ngünenieaeteu Chau Dios, fei ¿chumngeai engün? Biblia feipi: “Tati pu huesaque che apümngeaingün mapu meu” (Proverbios 2:22).

• Apümcayafi ta Huecüfü ca pu huesaque püllü. Tüfachi huesaque püllü ngünencahuelayafi tati pu che (Apocalipsis 20:3, 10).

Rupale com tüfa, ¿chumletuai pu che eluulu ñi ngünenieaeteu Chau Dios?

Jesús, loncolei Chau Dios tañi Reino meu, fei doi niei nehuen chem huentru meu rume, feimu fentren cümeque dungu femürpuai. Huenu meu, Jesús trür ngünenieai 144 mil che engün. Tüfa engün mongelequefui mapu mu, fei dullingei ñi mülepual huenu mu (Apocalipsis 5:9, 10; 14:1, 3). Jesús eluhuai ñi femal Chau Dios ñi ayüqueel mapu mu. Fei, ¿chumngechi cümelcayafi pu che?

• Ngehuelayai cutran ca lan dungu no rume. Biblia feipi: “Inei no rume feipilayai: ‘Iñche cutrancülen’”. Ca feipi: “Ngehuelayai lan” (Isaías 33:24; Apocalipsis 21:4).

• Pu che cüme feletuai. Biblia feipi: ‘Com tami pu fotüm ca pu ñahue rume cüme feletuaingün’. Ca feipi: “Anücünuhuaingün miñche quisuque ñi anüm ofad meu, ca miñche ñi higuera engün, ca inei no rume llicalcalayaeyu engün” (Isaías 54:13; Miqueas 4:4).

• Cüme cüdau ta nietuai ta che. Biblia feipi: “Tañi dullinche ayühuaingün ñi deumael quisu ñi cuhu mu. Ngünam cüdaulayaingün” (Isaías 65:22, 23).

• Cüme elcünungetuai ta mapu. Biblia feipi: “Tati desierto ca tati anquen mapu rume ayühun nieai, ca tati laf mapu ayüucületuai ca rume rayületuai” (Isaías 35:1).

• Com pu che enseñalngeai ñi chumal engün tañi rumel mongeleal. Biblia feipi: “Ñi nieal engün rumel mongen, mülei tami quimaeteu engün, tati quiñen rüfngechi Ngünechen, ca ñi quimafiel ta Jesucristo, eimi tami huercüfiel” (Juan 17:3).

Loncontucunge, Chau Dios cüpa cümelcaeimu (Isaías 48:18). Inalechi troquiñ mu, ngüneduamaimi chem mülei tami femal tami llohual com tüfachi cümeque dungu.