¿Rumel mülequepefui mai ti fütra huenu?

Génesis 1:1 feipi: “Feichi ngenolu chem no rume Ngünechen deumafi ta callfü huenu ca mapu”.

Fentren tripantu meu pu fütraque cientifico feipiquefuingün tati fütra huenu rumel mülequei. Huelu fantepu mu tati pu cientifico quimürpuingün ellaca meu chem no rume mülequelafui. Feimu raquiduamhuelaingün tati fütra huenu ñi rumel mülequefel.

¿Chumlequefui ti Mapu hue deumangelu?

Génesis 1:2, 9 feipi ellaca mu tati “mapu nielafui chem ad no rume” apolefui co meu müten.

Biblia tañi feipin trüri tañi feipitun pu cientifico fantepu meu. Tati cientifico Patrick Shih pingelu feipi: “Hue deumangelu ti Mapu ti neyen pepi neyüngequelafui”. Tati revista Astronomy pingelu feipi: “Hue quimngerpui deumangen mu müten ta Mapu, epe com apolefui co meu, pichin ancülechi mapu mülerquefui”.

 ¿Chumlerputui tati atmosfera?

Génesis 1:3-5 pengeli ellaca mu hue deumangelu tati Mapu, tati pelon pepi rupaquelafui tati atmosfera. Huelu fei hula tati antü ca ti cüyen pengen-ngerpui Mapu meu (Génesis 1:14-18).

Ti Centro Smithsonian de Investigaciones Ambientales feipi: “Ellaca meu tati pelon rupaquelafui tati atmosfera. Feimu pichi pengen-ngefui müten chi antü Mapu meu”. Ca feipi: “Ellaca mu tati Mapu apolefui gas metano meu. Fei ti metano trucurcülefulu reque, impolniefui ti Mapu. Fei hula ti trucurngehuetulai fei peufaluhui ti callfü huenu Mapu meu”.

¿Chem mongen hune deumangei?

Génesis 1:20-27 feipi hunelu meu deumangei pu challhua, pu üñüm ca pu culliñ Mapu meu mülelu ca af meu deumangei tati pu che. Tüfa ñi feipin Biblia trüri pu cientifico ñi feipin meu. Tüfa engün raquiduamqueingün hunelu meu deumangei pu challhua ca fei hula pu culliñ mülelu Mapu meu ca af meu peufaluhui pu che Mapu meu.

Quiñeque che feipiquei Biblia tañi feipin hueluuquei tati hueque dungu tañi quimürpuel pu cientifico. Huelu fentren che femngechi feipiquei cüme adümnienofilu cai engün Biblia tañi feipin.

Tati Biblia feipilai tati fütra huenu ca tati Mapu ñi deumangen 6.000 tripantu cuifi meu. Doi mai Biblia feipi tati fütra huenu ca tati Mapu deumangei “feichi ngenolu chem no rume” (Génesis 1:1). Huelu tati Biblia feipilai tunten tripantu cuifi meu ñi deumangeel ti fütra huenu ca tati Mapu.

Tati Biblia feipilai com tati mülelu ñi deumangeel cayu antü mu 24 hora nielu. Raquiduamnge tüfa mu, Génesis capitulo 1 mu feipingei com ñi mülen Mapu meu deumangei cayu antü mu. Huelu Génesis capitulo 2 mu quiñe antücünungei chi cayu antü ca com feichi tripantu Chau Dios⁠ a ñi deumafiel tati fütra huenu ca tati Mapu (Génesis 2:4). ¿Chem quimeltueiñmu com tüfa? Biblia meu quiñeque mu feipingelu antü cüpa feipi fentren tripantu. Feimu feichi cayu antü Chau Dios ñi pepicafiel ti Mapu ñi mongeleal pu che, adentuleafui rume fentren tripantu.

Biblia feipilai fillque mongen ñi mülen caquerumeulayafui tañi femngen. Génesis pingechi lifru feipi tati pu culliñ deumangei “quisuque ñi femngen engün” (Génesis 1:24, 25, Ngünechen ñi Neyüntükumuyümchi Chillka). Tüfachi troquiñ meu huinca dungun meu feipingei “géneros”. Tüfachi dungun tuulai ciencia meu, huelu cüpa adentulepelai fillque mongen. ¿Chem cüpa feipi ta tüfa? Fillque género mülei ca caque género meu tuhuafui fillque especie. Feimu quiñe género meu caquerumechi especie tripayafui ca amulele ta tripantu feichi especie caquerumeafui tañi femngen.

 ¿Chem raquiduamimi?

Ti Biblia cüme quimfalcünui chumngechi mülerpui ti fütra huenu, chumlequefui ti Mapu hue deumangelu ca chumngechi mülerpui mongen Mapu meu. Fei Biblia, ¿ca quimelelafeimu inei am deumai com ñi mülen? Tati Encyclopædia Britannica feipi: “Tati mongen ñi huefparumen quiñe afmafalchi dungu meu, chaftuquelai ñi quimürpuel pu cientifico ta fantepu mu”.⁠ b