Com ñi mülen, ¿Ngünechen deumapefi mai? Cam ¿inei no rume deumalaeyu? Ñi feipin tüfachi epu cientifico trürngelai Biblia tañi feipiel meu. Quiñeque che maneluuquei pu cientifico ñi feipin meu ca caquelu maneluuquei Biblia ñi feipin mu. Huelu quiñeque che müte quimnielaingün chem ñi feyentual.

Tami pu quimeltuchefe colegio mu quimeleimu chi inei no rume ñi deumanofiel com ñi mülen. Huelu tami pu quimeltuchefe, ¿cüme quimfalcünupeimu mai ñi mülenon ta Ngünechen? Cam allcüpeimi chi quiñeque loncolechi religioso quimeltuquelu Ngünechen ñi deumafiel com ñi mülen. Huelu feichi loncolechi religioso, ¿cüme quimfalcünupeimu mai ñi mülen ta Ngünechen? Cam feipingeimi: “Mülei tami feyentual müten ñi mülen ta Ngünechen”.

Eimi raquiduamquefuimi chi tüfachi dungu meu ca raquiduamqueimi chi ñi quimfalngenon ñi mülepen mai quiñe Ngünechen. Huelu cafei ramtuuqueimi chi, ¿duamfalngepei mai quimal ñi mülen cam ñi mülenon quiñe Ngünechen?

Tüfachi revista mu ngüneduamaiñ epu dungu. Hune peaiñ chem raquiduamelfi fentren che ñi mülen quiñe Ngünechen deumafilu itrofill mülelu ca quimürpuaiñ chumngelu rume falin-ngei taiñ quimal chumngechi deumangei itrocom ñi mülen.