Canadá mapu mu quiñe cüme escuela adcünui ñi tripayal cañpüle pu huechequeche. Quiñeque engün feipintucungei ñi nüntucafiel quiñe hueche huentru feichi mu. Quiñe huentru, Leonard Stern pingelu, huirintucui quiñe diario mu: “Pu huechequeche fentren plata niele, adümuhun niele, cam cüme educacion niele rume, tüfa ta ca conafui fütra huesaque dungu mu”.

Feichi huentru ca feipi: “Pu huechequeche ñi quimal chem ñi cümen ca chem ñi cümenon, pu chau ca ñuque quimeltulelafeyu piafuiñ. Huelu fentren engün re duamtuniei müten tañi pu huechequeche ñi cüme tripayal escuela mu ca huehual fentren plata tañi cüdau mu”.

Duamfali escuelatual. Huelu ti doi cüme escuela no rume quelluquelafi pu che tañi huesa raquiduam tucuhuenoal ñi piuque mu. Feimu, ¿chem quelluafeiñmu taiñ cüme yenieal taiñ mongen?

Tati Biblia quiñe espejo reque felei. Quelluqueiñmu taiñ ngüneduamuhual, fei taiñ quimal chem taiñ pepilquenoel ca chem huesaque dungu mülei taiñ piuque mu (Santiago 1:23-25). Huelu ti quimün mülelu Biblia mu ca quelluaiñmu taiñ cüme feleal, ¿chumngelu? Inanieliyiñ feichi quimün, doi cüme chengeaiñ, fürenechefengeaiñ, ñochi chengeaiñ, quim ngüneniehuaiñ ca piuqueyechefengeaiñ. Felei llemai, “piuqueyehun mu rüf quiñeucülequei pu che” (Colosenses 3:14). ¿Chumngelu fente falin-ngei ti piuqueyechen? Ngüneduamnge chem pilen Biblia tüfa mu.

• “Ti piuqueyechequelu ñom chengei ca cüme piuquengei. Ti piuqueyechequelu ütrirchequelai, checahun-ngelai, mallmangelai. Ti piuqueyechequelu yamchequei, quisu duamuuquelai, illcufemquelai, raquintucuquelai tañi huesa femngeel. Ayüuquelai norngenochi dungu mu, doi mai ayüuquei rüf dungu mu. Chem rupale rume afeluuquelai [...], com dungu meu nehuentulequei. Piuqueyehun afquelai” (1 Corintios 13:4-8).

• “Tati piuqueyechequelu huesalcaquelafi tañi chafche” (Romanos 13:10).

• “Hueluconque rume piuqueyehuaimün. Tati piuqueyechequelu rumel eluucülequei ñi perdonacheal” (1 Pedro 4:8).

Mülelmi tami piuqueyenieteuchi pu che engün, ¿chum duamcüleimi? ¿Ayüduamcülepelaimi? Cümelcalen tüfa mu, chumngelayan fau piafuimi. Quisu engün re ayüniei tami cümelcaleal müten, fei huesa duamel-layaimu.

Nieliyiñ ta piuqueyen, famentuafuiñ quiñeque dungu taiñ ayünieel ca cüme elcünutuafuiñ taiñ  mongen, femngechi füreneafiyiñ ta caquelu. Tüfa ñi rupan quiñe huentru chedquingerpulu. Quisu müna ayüniei mür müleal tañi pichi chedqui engu. Huelu rume pütremtuquefui. Feimu “pütremtulayaimi ti pichiche ñi adquiñ mu” pingei. ¿Chumi ti huentru? Ñi füreneafiel tañi pichi chedqui pütremtuhuelai, 50 tripantu femquefulu rume. Felei llemai, ¡fente falin-ngei ti piuqueyechen!

Com iñchiñ nieafuiñ ta piuqueyen. Müna duamfali pu chau ca ñuque ñi quelluafiel tañi pu pichiqueche ñi piuqueyecheal. Pu cümeque chau ca ñuque eluquefi iyael ca cuidaquefi tañi pu pichiqueche cutrancülelu engün. Cafei ngülamtuquefi, fei quimeltulelquefi tañi feipin ca tañi femün mu chem ñi cümen ca chem ñi cümenon.

Huelu quiñeque chau ca ñuque femngechi femquelaingün, fei ¿cüme chengerpulayafui tañi pu püñeñ, fotüm, ñahue cai? ¡Cüme chengerpuafui tati! Quiñeque che huesa tremümngelu rume, eluhuingün ñi cüme yenietual tañi mongen. Fei cüme chengeingün ca manelfalngeingün. Feula inaduamaiñ epu che ñi mongen. Tüfa engu huesa ünun feipingefui, huelu cüme elcünutuingu tañi mongen.