Pu chau ca tañi pu yall engün mülei ñi epuñpüle nütramcahual engün tañi raquiduam ca chem mülei ñi piuque mu.

Nütramcangeal pu huechequeche müna cüdaungeafui. Petu pichicalu tami yall, com ñi femquen nütramcaqueimu. Huelu tremlu engün, nehue nütramcahuelaeimu. Quimhuelaimi chem tañi raquiduamcülen engün ca ñi chumlen engün. Nometu quiñe fütra leufü mülelu troquiquetufiyiñ. Ayünolu ñi nütramcayaeteu troquiafuiñ, huelu feimu mai doi mülefui taiñ nütramcayafiel.

Pepilniefinge tami yall, tami püñeñ. Fei tami yall alüpunfule rume ayülu ñi nütramcayal, nütramcayafimi.

Lisa feipi: “Quiñeque mu feipiafuiñ: ‘Fachantü com antü müleiñ, ¿feula ayüimi tami nütramcayal?’. Huelu femngechi feipiquelan. Tañi püñeñ ayüle ñi nütramcayaeteu, ¿cümenoafulu am? Com taiñ pu ñuquengen, ayüqueiñ taiñ pu püñeñ ñi femngechi femal”.

Herbert feipi: “Ella pun ayüquen ñi cudupual. Huelu rupan mu ti rangipun, doi cüme nütramcaquefuiñ tañi pu yall iñchiñ”.

BIBLIA ÑI NGÜLAM: “Inei no rume ngelai ñi quisu duamuhual müten, doi mai caquelu che ñi cüme feleal” (1 Corintios 10:24).

Ca raquiduamcülequilnge. Quiñe chau feipi: “Nütramcaeteu mu tañi pu yall, quiñeque mu ca raquiduamcülequen. Quisu engün inaduamqueingün”.

Femngechi dungu rupalmi, chongümfinge tami televisor. Elcünufinge com tami electronico chemcün. Femngechi pengelelafimi tami falintuquefiel tañi rupan, pichingefule rume.

Maranda ca feipi: “Taiñ pu püñeñ mülefui tañi quimal fente taiñ falintuniefiel quisu engün tañi raquiduam. Femngechi femnoliyiñ, chem no rume feipihuelayaiñmu. Cañpüle quintuaingün ñi quellungeal engün”.

Anthony feipi: “Afmatulayaimi tami yall huesa entule tañi feipin”.

BIBLIA ÑI NGÜLAM: “Cüme allcütumün” (Lucas 8:18).

Tunten tiempo rume nielmün, nütramcahuaimün. Dicümtucungenon mu, tati pu hueche doi eluucülei ñi nütramcayal.

Nicole feipi: “Iñchiñ allmalltuqueiñ miyauliyiñ auto mu taiñ nütramcayal. Peñmauquelaiñ taiñ ange, feimu cüme entuqueiñ taiñ nütram”.

Cümeafui tamün nütramcayal petu yafütulmün.

Robin feipi: “Petu oncetulu iñchiñ, nütramcaqueiñ ti doi cüme dungu ca ti huesa dungu rupaquelu feichi antü mu. Femngechi doi quiñeucülequeiñ ca quisulelu troquiuquelaiñ”.

BIBLIA ÑI NGÜLAM: “Com eimün eluucülemün tamün allcütual, matucaulayaimün tamün dungual” (Santiago 1:19).