Eimün pu chau, inaqueimün falinque ngülam ñi cüme yenieal tamün mongen. Yafüluuqueimi chi tami nor chengeal. Feimu eimi ca quimeltupelafimi tami pu pichiqueche ñi ca femngechi femal.

Cafei quimeltuquefimi ñi duamtucheal, dullintuchenoal ca cüdaufengeal. Com tüfachi cümeque huimtun doi cüdaungelai ñi quimürpual petu huechengelu quiñe che.

BIBLIA ÑI NGÜLAM: “Adümelfinge ti pichi huentru chumngechi felei ñi inayeafiel ñi rüpü quisu ngealu; füchallele rume püntütripalayai fei mu” (Proverbios 22:6).

Tüfachi cümeque quimeltun müna duamfalngei. Quiñe ñuque Karyn pingelu, feipi: “Tati pu püñeñ nielu electronico chemcün conafui quiñeque dungu mu ñi huesalcayafeteu. Fülconcüleafuiñ rume, peafuingün pod dungu”.

BIBLIA ÑI NGÜLAM: “Pu nehuencülelu [...] quim ngüneduamquei chem ñi cümen ca chem ñi cümenon” (Hebreos 5:14).

Ti cümeque huimtun cümelcachequei. Quiñe ejemplo, müna falin-ngei taiñ feipial “füreneen”, “mañumeyu” ca duamchefengeal. Famülque mu, ñamcülei tüfachi cümeque huimtun. Pu che doyümfi tañi electronico chemcün ca duamtuchequelai.

BIBLIA ÑI NGÜLAM: “Chumngechi ayüqueimün tamün femngeal, ca femngechi femafimün ta caquelu che” (Lucas 6:31).

Quimeltufinge falinque ngülam. Feipingequei pu chau ca pu ñuque mülei ñi quimeltuafiel tañi pu yall ca pu püñeñ ñi cümenon ti huesaque cudumuhun. Femngechi doi eluucüleaingün ñi connoal tüfachi dungu mu.

QUIÑE NGÜLAM: Allmalltufinge quiñe hue noticia tripalu tami quimeltuafiel tami pu yall. Quiñe ejemplo, chi noticia feipile langümngelu quiñe che, feipiafuimi tami yall: “¡Müna huesa! ¿Chumngelu quiñeque che femngechi femquei? ¿Chem raquiduamimi?”.

Brandon feipi: “Taiñ pu yall quimle chem am ti cümen ca chem am ti cümenon, doi cüdaungelayai ñi cüme dullial”.

Quimeltufinge tami pu yall cümeque huimtun. Pu pichiqueche cütu quimafuingün ñi duamtucheal ca ñi feipial “füreneen”, “cracia mai”. Quiñe lifru feipi: “Mülei taiñ quimeltuafiel taiñ yall ñi doicülenon caquelu che mu. Doi mai coneltufuingün quiñe familia cam quiñe escuela. Com trür femngechi falin-ngeingün. Cüme quimürpule tüfachi dungu, duamtuchefengeaingün” (Padres sin fronteras gringodungun mu).

QUIÑE NGÜLAM: Elufinge tami pu yall ñi quellual quiñeque cüdau ruca mu, fei ñi quimal fente falin-ngei quellucheal.

Tara feipi: “Tami pu püñeñ quelluconle quiñeque cüdau tami ruca mu, tremle müte cüdautulayafi ñi cüdahual quisu tañi ruca mu”.