Ti pu curehuen yamuule engu, hueluconque duamniehuaingu quiñeucülenole rume ñi raquiduam engu. Quiñe lifru feipi: “Pu curehuen yamuule, ‘femngepe iñche tañi ayün müten’ piuquelaingu. Doi mai quiñeucülenole ñi raquiduam engu, nütramcaqueingu, allcütuuqueingu yamuhun mu. Fei hula epuñpüle quelluuqueingu ñi cümeletual”(Diez claves para transformar tu matrimonio).

BIBLIA ÑI NGÜLAM: “Ti piuqueyechequelu [...] quisu duamuuquelai” (1 Corintios 13:4, 5).

Micah feipi: “Ñi yamniefiel mu ñi domo, yafüluuquen ñi falintuafiel ca ñi huesa duamelnoafiel, fei tayu cüme amuleal”.

Ti pu curehuen yamuunole, fill huesa feipihuafuingu, fei huesa duameluhuafui engu. Feipingequei pu curehuen femngechi dunguule, huesa tripayaingu.

Brian feipi: “Chi huentru ayentufile tañi domo ca cuñiutunole ñi feipin, tañi domo quisu falintuuhuelayai ca maneluuhuelayai ñi füta mu”.

NGÜNEDUAMUUNGE

Raquiduamnge chumngechi tami dunguquefiel tami afcadi rupachi semana, fei ramtuunge:

• ¿Tunten rupa huesa dungufiñ? Ca, ¿tunten rupa cüme duamelfiñ?

• ¿Chumngechi pengelfiñ tañi yamniefiel?

QUIÑENTRÜR RAMTUHUAIMU

• Tayu curehuen-ngen, ¿chumngechi pengeluhuafuyu yamuhun tayu feipin ca tayu femün mu?

• ¿Chem femlayafuyu ca chem feipilayafuyu tayu pengeluhual yamuhun?

QUIÑEQUE NGÜLAM

• Huirintucuaimi cüla dungu ñi femafel tami afcadi tami yamnieaeteu. Tami afcadi ca femngechi fempe. Hueluconque eluhuaimu tamu huiriel, fei inayaimu ñi feipin ti papel.

• Huirintucuaimi quiñe papel mu ñi cüme femquen tami afcadi, fei feipiafimi fente tami falintuniefiel.

Megan feipi: “Tañi yamnieafiel tañi huentru, falintuquefiñ ca ayühuelquefiñ ñi femün mu. Pichique dungu mu rume, pengelafun ñi füta ñi yamniefiel”.

Iñche ta yamquefiñ tañi afcadi piafuimi chi. Huelu doi falin-ngei mai chem raquiduamquei tami afcadi.

BIBLIA ÑI NGÜLAM: “Pengelqueaimün piuqueyehun, cutranpiuqueyecheaimün, cüme piuquengeaimün, ñom piuquengeaimün, tüng chengeaimün ca ñochi duamngeaimün” (Colosenses 3:12).