TROQUIÑ ÑI CHILLCATUNGEAL 43
ÜLCANTUN 90 Hueluconque yafültucuhuiyiñ
¿Chem quelluafeiñmu huiñoldungual quiñeque ramtun?
“Ngüneduamaimün ñi rüfngepen mai com dungu” (1 TES. 5:21).
¿CHEM QUIMAIÑ?
Rumel nieliyiñ ramtun taiñ lonco mu, ayüucülehuelayafuiñ taiñ serfifiel Jehová. ¿Chem quelluafeiñmu?
1, 2. 1) Quiñeque mu, ¿chem ramtuhuafuiñ com iñchiñ? 2) ¿Chem ngüneduamaiñ tüfachi troquiñ mu?
COM iñchiñ quiñeque mu ramtuuqueiñ: “¿Falintuniepeneu mai Chau Dios? Cam ¿cüme dullipen mai cuifi?”. Por ejemplo, quiñe hueche ramtuhuafui, ¿rüf duamtuniepeneu mai Chau Dios? Feimu feipiafui ¿cümepei mai tañi fautizahual? Cam raquiduamafuiñ quiñe fücha peñi tañi huechengen mu quintulai ñi huehual plata, doi mai dulli ñi cüdahuelafiel ta Jehová. Feula niei tañi familia ca pichin plata ñi eluafiel tañi duamnieel engün, feimu ramtuhuafui ¿cüme dullipen mai cuifi? Feula raquiduamaiñ quiñe cushe papai müte nehuen niehuenolu. Pepi femhuelai tunte tañi femquefel cuifi, feimu huesa duamafui. Ca femngechi rupalmi, ramtuhuafuimi chi: “¿Raquiduamtucuniepeneu mai Chau Jehová?, ¿cümepei mai tañi dulliel cuifi ñi doi serfiafiel Jehová?, ¿petu cüdahuafun Chau Jehová mu?”.
2 Nieliyiñ femngechi ramtun ca cüme huiñoldungunoliyiñ, maneluuhuelayafuiñ Jehová mu ca püntütripayafuiñ. Tüfachi troquiñ mu ngüneduamaiñ chumngechi Biblia quelluaiñmu ñi huiñoldungual cüla ramtun: 1) ¿rüf duamtuniepeneu mai Chau Dios?, 2) ¿cüme dullipen mai tañi femün cuifi mu? 3) ¿petu cüdahuelniepeafuiñ ta Chau Jehová?
NIELIYIÑ QUIÑEQUE RAMTUN, ¿CHEM QUELLUAFEIÑMU?
3. Nieliyiñ ramtun, ¿chem femafuiñ?
3 Nieliyiñ ramtun, rume falin-ngei taiñ quintual Biblia mu. Femliyiñ, doi maneluhuaiñ Jehová mu ca doi cüme hueniyerpuafiyiñ, femngechi doi ‘nehuentuleai taiñ feyentun’ (1 Cor. 16:13).
4. ¿Chumngechi ‘ngüneduamafuiñ ñi rüfngepen mai com dungu’? (1 Tesalonicenses 5:21).
4 (Papeltunge 1 Tesalonicenses 5:21). Tati Biblia ngülamtuqueiñmu taiñ ‘ngüneduamafiel ñi rüfngepen mai com dungu’. ¿Chumngechi femafuiñ? Nieliyiñ quiñeque ramtun, mülei taiñ ngüneduamal Biblia ñi chem pin. Raquiduamnge quiñe hueche falinolu troquiuquei Jehová tañi adquiñ mu. ¿Chem mülei tañi femal? Mülei tañi chillcatual Biblia tañi quimal chem raquiduamquei Jehová quisu mu. Femngechi ‘ngüneduamai ñi rüfngepen mai com dungu’.
5. ¿Chumngechi huiñoldunguqueiñmu Jehová taiñ ramtun?
5 Papeltufiel mu ta Biblia, Chau Jehová dunguqueiñmu reque. Huelu, ¿ca chem femafuiñ taiñ huiñoldunguaeteu Jehová? Quintuaiñ ca chillcatuaiñ quiñeque troquiñ Biblia huiñoldunguaeteu taiñ ramtun. Taiñ cüme femal tüfa, ngüneduamafuiñ fillque papel ca lifru ñi hulqueel Jehová tañi troquiñche (Prov. 2:3-6). Cafei llellipuafiyiñ Jehová taiñ quelluaeteu peal huiñoldungun. Ca rume quelluaiñmu papeltuafiel Biblia mu quiñeque che poyequefilu ta Jehová ca rupalu iñchiñ reque.
6. ¿Chumngechi quelluqueiñmu fillque trahun ñi huiñoldungungeal taiñ ramtun?
6 Cafei Jehová dunguqueiñmu reque trahun mu. Amuliyiñ fill trahun mu, quiñe hueupin mu ca quiñe lamngen cam peñi ñi huiñoldungun mu, allcütuafuiñ chem taiñ duamnieel (Prov. 27:17). Feula ngüneduamaiñ chem quelluafeiñmu huiñoldungual cüpalechi cüla ramtun.
¿RÜF DUAMTUNIEPENEU MAI CHAU DIOS?
7. ¿Chem ramtuhuafuimi quiñeque mu?
7 Quiñeque mu ramtuhuafuimi chi: “¿Rüfcünu duamtuquepeneu mai Chau Dios?”. Falinolu troquihulmi, raquiduamafuimi tami hueniyenoafiel Chau Dios tati itrocom Deumalu. ¿Ca femngechi raquiduampelafui ti lonco ülmen David? Fei ngüneduami Chau Dios ñi duamtuniefiel pu che, tüfa afmatuleyu. Feimu feipifi ta Jehová: “Ahuem Jehová, ¿tunte am ta fali ti huentru, fei tami loncontucunieafiel? ¿Tunte am ta fali ti huentru ñi cüpanche tami duamtunieafiel?” (Sal. 144:3). Chau Dios, ¿rüf duamtuniepefi mai caque quiñeque che? ¿Cheu peafuiñ ti huiñoldungun?
8. Chau Jehová, ¿chem pequei tati pu che meu? (1 Samuel 16:6, 7, 10-12).
8 Tati Biblia quimeltuqueiñmu Chau Jehová ngüneduamquefi ti pu che müte falintunienoeteu caquelu che. Quiñe ejemplo, Jehová huercüfi ta Samuel ñi amual Jesé tañi ruca mu üituafiel quiñe tañi fotüm, fei ñi loncoleal Israel mu. Jesé mütrümfi regle tañi pura fotüm ñi trahuluhual engün, huelu mütrümlafi tati doi huechelelu, David. a Fei Jehová dullifi David tañi loncolerpual (papeltunge 1 Samuel 16:6, 7, 10-12). Jehová quimniei ñi chumngechi piuquengen ta David ca quimniei David ñi rume piuqueyenieteu.
9. ¿Chumngechi quimnieimi Chau Jehová tami duamtunieteu? (Ca inaduamnge ti adentun).
9 Raquiduamnge chumngechi Jehová pengelqueiñmu taiñ duamtunieteu. Fei eluqueiñmu cümeque ngülam taiñ duamtunieel (Sal. 32:8). Femngechi pengelquei taiñ cüme quimnieteu (Sal. 139:1). Cüme inafiliyiñ Chau Jehová tañi ngülam, inaduamqueiñ taiñ quelluqueteu. Femngechi cüme quimnieiñ taiñ duamtunieteu (1 Crón. 28:9; Hech. 17:26, 27). Chau Jehová peniei taiñ nehuentu cüdahuelnieafiel ca inanieafiel tañi feipin. Ca penieiñmeu taiñ chumngechi chengen ca ayülei taiñ hueniyeaeteu (Jer. 17:10). Iñchiñ ca ayüliyiñ taiñ hueniyeafiel, ayüucüleai (1 Juan 4:19).
“Quintufilmi, eluhuai tami peafiel” (1 Crón. 28:9). (Inaduamnge parrafo 9). b
¿CÜME DULLIPEN MAI TAÑI FEMÜN CUIFI MU?
10. Raquiduamliyiñ taiñ dulliel cuifi mu, ¿chem ramtuhuafuiñ?
10 Quiñeque taiñ pu peñi cam lamngen ramtuuqueingün ñi cüme dullipen mai cuifi mu. Quiñeque elcünufingün chi cümeque cüdau fentren plata ñi cullingequefel, femngechi tañi doi cüdahuelafiel ta Jehová. Rupai fentrenque tripantu, fei raquiduamquei quiñeque che tañi quimfiel eluhuingün tañi cüdaucüleal müten, feimu fentren plata nieingün ca doi cümelcalelu tañi mongen mu troquiquefi. Feimu pu doyümquefilu cüdahuelafiel Jehová, ramtuhuafuingün: “¿Cümepei mai tañi dulliel cuifi? Cam, ¿mülefui tañi doi cüdahual cuifi tañi doi nieafel plata feula?”.
11. ¿Chumngelu hueñancülequefui ti huentru huirintuculu Salmo 73?
11 Ramtuuliyiñ ñi cümepen mai taiñ dulliel cuifi mu, inaduamafuiñ chem ñi rupan ti huentru huirintucufilu ti Salmo 73. Fei ngüneduami pu che serfiquenofilu ta Chau Jehová doi cümelcalelu troquifi (Sal. 73:3-5, 12). Pefiel mu tüfa, ngünam cüdahuelquefiñ ta Chau Jehová pi tañi raquiduam. Feimu ‘com antü hueñancülequefui’ (Sal. 73:13, 14). ¿Chumi am tañi femngechi raquiduamnoal?
12. ¿Chem quellueyu tüfachi salmista tañi cüme raquiduamtual? (Salmo 73:16-18).
12 (Papeltunge Salmo 73:16-18). Tüfachi huentru amui Chau Jehová tañi ruca mu. Mülepulu fei mu, doi cüme raquiduamtui. Fei inaduami tati pu che serfiquenofilu Jehová cümelcalelu quechilefuingün, huelu nielaingün maneluhun. Tüfa tüngduameleyu. Fei quimtucui tañi cüdahuelfiel ta Jehová fei tati doi cüme dungu tañi femal. Feimu eluhui ñi serfinieafiel ta Jehová (Sal. 73:23-28).
13. Ramtuuliyiñ ñi cümepen mai taiñ dulliel cuifi, ¿chem quelluafeiñmu? (Ca inaduamnge ti adentun).
13 Iñchiñ cafei tüngcüleafuiñ papeltufiliyiñ Biblia. ¿Chumngechi? Quelluqueiñmu acordanieal cümeque dungu taiñ nieel, quiñe tüfa Jehová taiñ fürenequeteu. Ca nieiñ Jehová tañi quellu, pu serfiquenofilu ta Chau Jehová nielaingün feichi quellu. Fei engün nielaingün maneluhun, feimu doyümquefingün ñi nieal cüme cüdau müten, femngechi ñi cüme rupaleal. Huelu iñchiñ Jehová eluqueiñmu cümeque dungu fachantü, ca cüpalechi antü mu eluaiñmu doi cüme mongen (Sal. 145:16). Raquiduamnge: dullifuliyiñ ca dungu rupachi antü mu, ¿chumleafui chi taiñ mongen famülque mu? Quimlayafuiñ. Huelu cüme quimnieiñ tüfa: eluuliyiñ taiñ piuqueyeafiel ta Jehová ca caquelu che, nierpuaiñ taiñ duamnieel fei taiñ ayüucüleam.
Raquiduamnge tunten cümeque dungu tami eluaeteu Chau Jehová cüpalechi antü mu. (Inaduamnge parrafo 13). c
¿PETU CÜDAHUELNIEPEAFUIÑ TA CHAU JEHOVÁ?
14. ¿Chem rupaquei quiñeque peñi ca lamngen? Ca, ¿chem ramtuuqueingün?
14 Quiñeque taiñ pu peñi ca pu lamngen pepi cüdahuelhuelafi Jehová tunte tañi femquefel cuifi, tañi füchan mu cam tañi cutran chengen mu. Feimu fente falihuenolu Jehová mu troquihuafuingün. Fei ramtuhuafuingün: “¿Petu cüdahuelniepeafuiñ ta Chau Jehová?”.
15. Ti huirintuculu ti Salmo 71, ¿chem quimniefui?
15 Tati huirintuculu Salmo 71 ca nehuen-ngehuelafui. Feimu llellipufi ta Chau Jehová: “Nehuen-ngehuenolu iñche, quisucünulaen” (Sal. 71:9, 18). Femngechi duamcülefulu rume, quisu quimniefui com piuque mu cüdahuelniefile ta Chau Dios, feita quelluafeyu. Ti salmista quimürpui pu serfiquefilu Jehová huesa rupan mu rume, fei rume ayühuelqueyu (Sal. 37:23-25).
16. Pu füchalelu, ¿chumngechi cüdahuelnieafui ta Chau Jehová? (Salmo 92:12-15).
16 Eimi füchalelmi, raquiduamnge chumngechi pequeimu Chau Jehová. Quisu ta quelluafeimu tami cüme poyenieafiel cutran chengelmi rume (papeltunge Salmo 92:12-15). Feimu raquiduamquilnge tami pepi femhuequenoel, doi mai tami tunte femafel. Por ejemplo, duamtuafuimi caquelu, ca tami cüme femün meu yafültucuafuimi engün. Nütramcayafuimi caquelu chumngechi Jehová tami quellueteu fentren tripantu mu. Ca feipiafuimi caquelu chem feipicünuelchi dungu tripalu Biblia mu doi üngümnieimi. Fei cümecünuafuimi tami llellipuafiel Jehová caquelu che mu (1 Ped. 3:12). Chem dungu mu rupaleliyiñ rume, com iñchiñ cüdahuelnieafuiñ ta Jehová ca quelluafuiñ ta caquelu pu che.
17. ¿Chumngelu am trürümuulayaiñ caquelu che mu?
17 Huesa duamcülelmi tami fente cüdahuelquenofiel Jehová cuifi reque, maneluhuafuimi tunte tami pepi femün Jehová falintuquei. Tami femquen quiñeque mu trürümafuimi caquelu che ñi femquen mu, huelu femquilnge. ¿Chumngelu am? Jehová ta trürümquelaeiñmu caquelu che mu (Gál. 6:4). Peaiñ quiñe ejemplo, María yelelfi ta Jesús quiñe falin-ngechi aceite, cüme nümün-ngelu (Juan 12:3-5). Cangelu ejemplo, quiñe pofre lantu domo tucumei Chau Jehová ñi ruca mu epu pichique moneda müte falinolu (Luc. 21:1-4). Huelu Jesús trürümlafi feichi epu domo, doi mai caque quiñeque inaduamüñmafi tañi feyentun. Jesús cüme inayentui tañi Chau. Feimu eimi maneluhuafuimi Jehová peniei com tami femquen. Tunte pichin-ngefule rume, fei falintuñmaqueimu tami manelniefiel ca piuqueyeniefiel.
18. ¿Chem quelluaiñmu huiñoldunguafiel taiñ ramtun? (Ca inaduamnge ti huichulechi dungu “ Biblia quelluaimu huiñoldungual tami ramtun”).
18 Com iñchiñ quiñeque mu nieafuiñ ramtun. Huelu inaduamiyiñ Biblia quelluaiñmu taiñ cüme raquiduamal. Femliyiñ, doi tüngduamcüleaiñ. Chau Jehová quimnieiñmeu quisuque iñchiñ. Quisu falintuquei taiñ hunentucuniefiel, fei fürenenieaiñmu. Feimu llemai, maneluhuaiñ Chau Jehová ñi piuqueyeniefiel ca duamtuniefiel com tañi pu serfiqueteu.
ÜLCANTUN 111 ¿Chem mu am ayüucüleiñ?
a Biblia feipilai tunten tripantu ñi niefel David feichi dullingelu ñi loncoleal, huelu ¿petu huechengepelafui? (Inaduamnge ti troquiñ tripalu La Atalaya 1 septiembre 2011 tripantu, pag. 29, parr. 2).
