TATI musica rume falin-ngefui pu cuifique Israel che ñi huimtun mu. Biblia feipi alünque che pünequefui musica ca ülcantuquefui. Cafei Biblia mu huirintucungei fentren ül. Por ejemplo, ti lifru Salmos mülei re ülcantun. Ca quiñe dungu, fillque salmo, El Cantar de los Cantares ca Lamentaciones huirintucungei ülcantuam. Tati lifru Music in Biblical Life (La música en la vida bíblica) feipi ta Biblia mu cüme quimfalcünui pu Israel che rume falintuquefuingün musica, fill antü tañi mongen mu.

Ti musica ñi allcütungequeel fill antü. Pu Israel che pünequefui musica ñi pengelal ñi chum duamcülen engün (Is. 30:29). Ca ülcantuquefuingün ñi üitungen mu quiñe hue rey, ñi celebrangen mu fiesta ñi püramyeafiel ta Jehová ca ñi huehun mu quiñe hueichan. Pu domo ayühunquechi ülcantuquefui, failaquefui ca pünequefui ti pandereta (Juec. 11:34; 1 Sam. 18:6, 7; 1 Rey. 1:39, 40). Quiñe che ñi lan, pu Israel che ülcantuquefuingün femngechi ñi pengelal ñi hueñancün engün (2 Crón. 35:25). Rüfngei ñi feipin quiñe lifru: “Quimfali pu hebreo rume ayüquefuingün ñi ülcantual ti musica” (Cyclopedia, de McClintock y Strong).

Tati musica ñi allcütuqueel ti lonco ülmen. Pu lonco ülmen Israel mu rume ayüquefuingün ti musica. Ti lonco ülmen Saúl dullifi David ñi dungulelaeteu ti arpa (1 Sam. 16:18, 23). David lonco ülmen-ngerpulu, deumai hueque instrumento ñi pünengeam musica, deumai rume cümeque ülcantun ca trahulfi che ñi püneafiel instrumento Jehová ñi ruca mu (2 Crón. 7:6; Amós 6:5). Ti lonco ülmen Salomón niefui huentru ca pu domo ñi ülcantual tañi palacio mu (Ecl. 2:8).

Ti musica ñi püramyengeam ta Jehová. Jerusalén mu, Ngünechen ñi ruca mu mülequefui 4 mil huentru quim pünequefilu fillque instrumento (1 Crón. 23:5). Dungulelquefui cimbalo, instrumento de cuerda, arpa ca trompeta (2 Crón. 5:12). Huelu fei engün müten pünequelafui musica ñi püramyeafiel ta Jehová. Fentrenque Israel che petu amulelu Jerusalén mu ñi celebrayal fillque fiesta, ülcantuquefuingün quiñeque ül “Las canciones de las subidas” pingelu (Sal. 120-134). Quiñeque judio ñi huirintucun feipi pu cuifique Israel che ülcantuquefuingün ti Hallel a petu ñi celebrafiel ti Pascua pun mu.

Tati ülcantun rume falin-ngei Jehová ñi troquiñche mu fachantü (Sant. 5:13). Ülcantuqueiñ taiñ püramyeafiel ta Jehová (Efes. 5:19). Taiñ ülcantuquefiel mu ta Jehová, doi quiñeucülequeiñ taiñ pu peñi ca pu lamngen iñchiñ (Col. 3:16). Cafei quelluqueiñmu taiñ chaftuafiel huesaque dungu (Hech. 16:25). Femngechi eluñmaqueiñmu taiñ feipiafiel ta Jehová taiñ maneluucülen fei mu ca taiñ rume piuqueyeniefiel.