Tami quimafiel quiñe che, quimaimi chem diturpui ta quisu ca chem huesaque dungu chaftufi ñi mongen mu. Ca femngechi, cüpa quimfilmi ta Chau Ngünechen, quimaimi ñi chumün ta quisu ñi quellucheal. Femülmi tüfa, afmatuleafuimi quimal chumngechi Chau Dios ñi femün quelluqueimu feula, ca chumngechi quelluaimu cüpalechi antü mu.

Chau Jehová ti Fütra Deumafe ürque, fei “quimafuiñ ñi chumngen ngüneduamliyiñ chumngechi ñi deumael ti mapu. Taiñ quimal ñi chumngen, ngüneduamafuiñ ñi deumael” (Romanos 1:20). “Quisu deumafi ti mapu tañi nehuen mu, ca cüme adcünufi fente ñi quimün-ngen. Ca deumafi ti huenu fente ñi quim ngüneduam mu” (Jeremías 10:12). Cafei, com tañi deumael mu pengeli Chau Ngünechen taiñ duamtunieteu.

Jehová deumafi tati pu che tañi inayentuñmayaeteu ñi chumngen, femngechi falintuñmaeiñmu taiñ mongen (Génesis 1:27). Quisu ayüquei taiñ inayentuafiel pichin rehuall ca taiñ hueniyeafiel. Chumngechi taiñ deumangeel, inaduamafuiñ Jehová ñi raquiduam. Nehuentuliyiñ taiñ raquiduamal quisu reque, doi ayüucüleaiñ.

Inaduamfilu iñchiñ com ñi deumael ta Jehová, quimafuiñ quisu taiñ piuqueyenieteu. Feimu ti apostol Pablo feipi Chau Ngünechen ‘cümeque dungu femi, fei ñi quimfalcünual tañi ineingen. Elungeiñ mahun, cümeque cosecha, alün iyael, fei ñi rume ayühual taiñ piuque’ (Hechos 14:17). Chau Dios elueiñmu com taiñ duamnieel taiñ mongeleal ca ayüucüleal. Huelu petu mülei fentren dungu taiñ eluaeteu Chau Ngünechen.

Jehová deumafi ti mapu pu che ñi afnoal tañi mongen fei mu. Biblia feipi: “Tati mapu [Jehová] elufi ta huentru ñi pu yall”. Ca feipi Chau Ngünechen ‘ngünam deumalafi, doi mai deumafi ñi müleam tati pu che’ (Salmo 115:16;  Isaías 45:18). ¿Chem che müleai mapu mu, ca tunteñma mu? Biblia feipi: “Tati pu norngechi che llohuai ti mapu ñi ngen-ngeal engün, ca rumel müleaingün fei mu” (Salmo 37:29).

Feimu Jehová deumafi tati hunen huentru ca ti hunen domo: Adán engu Eva, ca elcünufi mapu mu “ñi cüdahual ca ñi cuñiutucuafiel” (Génesis 2:8, 15). Cafei Jehová feipifi engu: “Nieaimün yall, fentren-ngeaimün, apolfimün ti mapu ca ngünenieafimün” (Génesis 1:28). Feimu aflayafui ñi mongen engu. Huelu feyentulafingu ta Chau Ngünechen, fei lloulaingu ti mapu. Feyentungenolu rume ta Ngünechen, quisu femtripayai ñi ayünieel pu che mu ca mapu mu. Huelu hune peaiñ ca chem chumi Jehová taiñ quelluaeteu.

Tati Biblia, Ngünechen ñi Dungu ca pingequei. Chau Dios elueiñmu ti Biblia iñchiñ taiñ quimal quisu mu (Proverbios 2:1-5). Ti Biblia huiñoldunguquelai itrocom taiñ nieelchi ramtun Chau Ngünechen mu, chem lifru no rume femlayafui (Eclesiastés 3:11). Huelu mai, com ñi huirintucungeel Biblia mu, quelluafeiñmu quimafiel ta Jehová. Ñi chumquefiel ta che, quimafuiñ ñi chumngen ta quisu. Ca quimafuiñ chem che hueniyequefi ca chem che hueniyequelafi (Salmo 15:1-5). Cafei quimafuiñ chem raquiduamquei Jehová tüfachi dungu mu: chumngechi ñi poyengeal quisu, chumngechi lif mongen yenieal iñchiñ ca chumngechi püneal falinque fillem. Biblia mu, ca huirintucungei ñi chumqueel ca feipiqueel ta Jesús. Quisu inayentufi ta Jehová, feimu quimfiliyiñ ta Jesús, quimafuiñ ñi chumngen ta Chau Ngünechen (Juan 14:9).

Cafei, Jehová elueiñmu ti Biblia taiñ quimal chumngelu müleiñ mapu mu ca chumngechi rüf ayüucüleafuiñ. Biblia mu, Jehová quimeltuqueiñmu cüme yeucüleal taiñ pu che iñchiñ ca chumngechi chaftuafiel taiñ huesa duameleteu. Biblia ca huiñoldunguquei famngechi ramtun: ¿Chumlerpuaiñ iñchiñ? ¿Afpeai mai taiñ cutrancaucülen? Ca feipi chumquei ta Chau Ngünechen ñi femtripayal tañi ayünieel ellaca mu. Com tüfa inaduamngeai tüfachi chillca mu.

Tati Biblia pecan lifru ngelai. Müna quimfali Chau Ngünechen ñi adcünufiel. 40 huentru huirintucuingün ti Biblia. ¿Tunteñma mu? 1.600 tripantu. Huelu Chau Ngünechen ñi pin mu huirintucungei, feimu com ñi feipin Biblia quiñeucülei ca cüme quimfalngequei quiñe dungu (2 Timoteo 3:16). Rupalechi tripantu mu, quiñeque lifru caletuquei, huelu Biblia femngequelai. Cuifique huirin chillca pengelquei tüfa. Caiñetungelu rume ñi rulpadungual, ñi elungeal ta che ca ñi papeltungeal, tati Biblia apümcangelai. Fachantü doi hulngequei ca rulpadungungequei caquelu lifru mu. Tati Biblia ñi mülequen fantepu mu, pengeli ñi rüfngen ti feipin: “Ngünechen ñi dungu rumel mülequei” (Isaías 40:8).

Jehová cüme adcünui ñi femtripayal tañi ayünieel iñchiñ mu, tüfa ca quiñe dungu ñi diturpuel Chau Ngünechen. Inaduampeiñ quisu ayüniei com pu che ñi afnoal tañi mongen mapu mu. Huelu Adán feyentulafi ta Chau Ngünechen fei culpaconi, feimu rumel mongelehuelayafui quisu ca tañi cüpanche. Biblia feipi: “Quiñe huentru ñi femün mu coni ta culpan mapu meu. Fei ti culpan cüpali lan dungu. Com pu che culpafengetui, feimu ti lan dungu com che meu puhui” (Romanos 5:12). Culpalu ti hunen huentru caiñetungei ta Jehová. ¿Chumi quisu?

Ñi femquen ta Jehová, pengelquei ñi chumngen ta quisu. Norngei, feimu juzgafi ta Adán engu Eva ñi huesa femün mu. Piuqueyefengei, feimu quisucünulafi ta quisu engu ñi cüpanche. Fente quimün-ngei, feimu cüme chaftufi feichi huesa dungu, ca pürüm feipicünui chumngechi  cüme elcünungetual chi dungu (Génesis 3:15). Tañi Fotüm Jesús mu, com pu che lifrengeafui ñi culpan ca lan dungu mu. ¿Chumngechi rupayafui ta tüfa?

Adán engu Eva ñi huesa femün mu, com pu che rulpacünulngei ti culpan ca lan dungu. Adán niequelafui ta culpan, huelu feyentulafi ta Jehová. Feimu Jehová huercüfi ta Jesús mapu mu ñi quimeltuafiel pu che chumngechi montulngeal engün, cafei “hulpai ñi mongen tañi ngillanentuafiel fentren che“ (Mateo 20:28; Juan 14:6). a Jesús niequelai ta culpan, feimu huli tañi mongen. Fentepuulu ñi mongen, rumel feyentuquefi ta Jehová, Adán femngechi femlai. Jesús felelafui ñi layal, feimu Jehová huiñomongeltueyu, fei Jesús amutui huenu mu. Adán ñi duam mu, pu che afnoafulu ñi mongen, huelu feingelai. Feimu lalu ta Jesús, pu feyentulelu huiño maneluutuafui ñi afnoal tañi mongen. Biblia feipi: ‘Quiñe huentru Adán tañi feyentunon meu, fentren che culpafengetui, huelu ca femngechi, quiñe huentru Jesucristo tañi feyentun meu, fentren che ta lifrengetui ta culpan meu’ (Romanos 5:19). Jesús ñi lan mu, Chau Jehová mupitripayai ñi feipicünuel: itrocom pu che ñi rumel müleal mapu mu.

Adán ñi feyentunon mu, caiñetungei ta Jehová. Huelu quisu cüme chaftufi com feichi huesa dungu, feimu fentren cümeque dungu quimafuiñ. Quiñe tüfa, chem no rume catrütulayafeyu ta Chau Jehová ñi femal ñi ayünieel. Com ñi feipicünuel “rüf tripayai” (Isaías 55:11). Cafei, Jehová müna piuqueyenieiñmu, feimu “pengelelngeiñ Chau Ngünechen ñi piuqueyechen: fei huercüi tañi quiñen Fotüm mapu meu taiñ rumel mongeleal tañi Fotüm ñi duam mu. Chau Ngünechen huercüi tañi Fotüm quiñe chalintucun reque taiñ culpan meu, femngechi taiñ cümelcautual Chau Ngünechen iñchiñ. Femi ta tüfa fente taiñ piuqueyeteu, iñchiñ tañi piuqueyefiel mu no” (1 Juan 4:9, 10).

Chau Ngünechen “ngüneulai ñi hultucuafiel quisu tañi Fotüm, doi mai chalintucufi ñi layal iñchiñ taiñ duam mu”, feimu maneluhuafuiñ taiñ eluaeteu itrocom dungu ñi feipicünuel ta quisu (Romanos 8:32). ¿Chem eluaiñmu Jehová? ¿Chem feipicünui quisu? Amulepe tami papeltufiel tüfachi chillca, fei quimaimi.