Biblia rüf quelluafeiñmu taiñ cüme dullial
Biblia quelluquefi ta fentren che. Peaiñ meli dungu taiñ quelluafeteu.
1. Tati curehuen mu
Pu che rume calei ñi raquiduam curehuen dungu meu. Cafei caquerumei ñi raquiduam engün chem duamniei ti curehuen ñi ayüucüleal.
BIBLIA ÑI FEIPILEN: “Quisuque eimün mülei ñi piuqueyeafiel tañi domo chumngechi quisu piuqueyeuquei. Ca femngechi ti domo, com piuque mu mülei ñi yamnieafiel tañi füta” (Efesios 5:33).
¿CHEM QUIMELTUEIÑMU?: Chau Dios deumai chi curehuen, feimu cüme quimniei chem duamnien pu curehuen ñi ayüucüleal (Marcos 10:6-9). Ti füta ayüle ñi ayüucüleal tañi curehuen-ngen, mülei ñi doyümnieafiel tañi domo. Ca femngechi mülei ñi femal ti domo. Ti füta piuqueyeniefilu tañi domo, cüme duam mu cümelcaquefi ca dapiquefi. Cafei ti domo yamniequefilu tañi füta, ñochi duam mu dunguquefi ca quelluntucuniequefi.
BIBLIA ÑI FEIPIN QUELLUCHEQUEI: Quiñe huentru Quang pingelu ca tañi domo Vietnam mu mülei. Nielafui ayühun tañi curehuen-ngen engu. Quang pengelelquelafui tañi domo ñi piuqueyeniefiel. Fei feipi: “Duamtuquelafiñ ñi chum duamcülen tañi domo, rume illamcaquefuiñ” pi. Tañi domo ayülefui ñi hudayaeteu. Fei feipi: “Maneluuquelafun ñi füta mu, ca yamhuequelafiñ” pi.
Rupalechi antü mu papelturpui Biblia engu. Fei quimürpuingu ñi feipin Efesios 5:33 ca eluhui ñi inayafiel. ¿Chum tripai chi dungu? Ti huentru feipi: “Tüfachi troquiñ Biblia quimeltueneu tañi cümelcayafiel tañi domo ca piuqueyenieafiel. Ca quimürpun tañi dapiafiel tañi domo, eluafiel com ñi duamnieel ca cüme allcütuafiel. Femlu iñche, tañi domo doi piuqueyeneu ca doi yamnieneu” pi. Ca ti domo feipi: “Yafüluuquen ñi yamnieafiel tañi huentru chumngechi ñi feipin Efesios 5:33. Feula tañi huentru piuqueyenieneu ca cuñiutucuqueneu, feimu tüngduamcülen”.
Tami doi quimal curehuen dungu mu, amunge ta jw.org ca papeltuafuimi ti troquiñ “12 ngülam ñi ayüucüleal pu familia”, tripalu ti chillca ¡Tami quimafel! numero 2, 2018 tripantu.
2. Chumngechi yeucüleaiñ caquelu che iñchiñ
Fentren che huesalcaquefi caquelu ñi nien mu ca tuhun, ca religion, tañi homosexualngen mu cam cangentuñmafiel ñi ad.
BIBLIA ÑI FEIPILEN: “Yamnieafimün itrofill che” (1 Pedro 2:17).
¿CHEM QUIMELTUEIÑMU?: Biblia quimeltuquei taiñ yamnieafiel itrofill che, fill tuhun-ngele rume ca tunten plata niele rume. Biblia feipilei huesalcalei taiñ üdeafiel pu che ca tuhun nielu, ca tati pu homosexualngelu (Hechos 10:34). Chem feyentun niele rume pu che ca femle quiñeque dungu iñchiñ taiñ ayüquenoel, mülei taiñ yamnieafiel engün (Mateo 7:12).
BIBLIA ÑI FEIPIN QUELLUCHEQUEI: Quiñe huentru Daniel pingelu, quimelelngei pu che Asia mu tuulu ñi rume huesalcachequen. Feimu quisu üderpufi pu Asia che ca lucatuquefui. Daniel feipi: “Femngechi tañi femün mu incaquefiñ tañi pais piquefun. Raquiduamquelafun rume ñi huesalcalen tañi femquen”.
Rupachi antü mu Daniel quimürpui ñi quimeltuqueel Biblia. Fei feipi: “Com cacünutun ñi raquiduam. Quimürpun Chau Dios ñi dullintuchequenon, fei iñche mülefui ñi ca femngechi raquiduamal”. ¿Chem raquiduamquei Daniel feula hue quimfilu quiñe che? Fei feipi: “Feula ngüneduamquelan chem tuhun nien chi che. Feula piuqueyefiñ com pu che, chem tuhun niele rume. Com püle nien hueni”.
Tami doi quimal, amunge ta jw.org ca papeltuafuimi ti troquiñ “¿Chem chumafuymi tami illamkachewenoal?”, tripalu ti chillca ¡Tami kimafel! numero 3, 2020 tripantu.
3. Plata dungu
Fentren che rume cüdauquei ñi nieal fentren plata, “femngechi tañi ayüucüleal ca cüme feleal cüpalechi antü mu” piqueingün.
BIBLIA ÑI FEIPILEN: “Ti quimün am cuñiutucuchequei chumngechi ñi cuñiutucuchequen ta plata, huelu doi cümei ta quimün, tüfa montulquefilu am tati pu nielu quimün” (Eclesiastés 7:12).
¿CHEM QUIMELTUEIÑMU?: Duamnieiñ plata taiñ mongeluhuam, huelu plata hulquelai rüfngechi ayühun ca cüme felen cüpalechi antü mu (Proverbios 18:11; 23:4, 5). Taiñ rüf ayüucüleal ca cüme feleal cüpalechi antü mu, mülei taiñ inayafiel Chau Dios ñi ngülam Biblia mu mülelu (1 Timoteo 6:17-19).
BIBLIA ÑI FEIPIN QUELLUCHEQUEI: Quiñe huentru Cardo pingelu, Indonesia mapu tuulu, ayüfui ñi ricungerpual. Fei diturpui tañi ayünieel. Fei feipi: “Amuquefun cañpüle, ngillacaquefun falinque chemcün, auto ca fentren ruca. Fentren che ayüniefui nieal iñche tañi mongen” pi ti huentru. Huelu ñamümi com tañi nieel. Fei feipi: “Ngünencangen, fei hueñeñmangen com tati plata ñi trapümel fentren tripantu. Com tañi mongen mu yafüluhun ñi ricungerpual. Huelu rupalu com tüfa, müna huesa duamcülefun ca falinolu troquiuquefun”.
Ti huentru eluhui ñi inayafiel Biblia ñi ngülam plata dungu mu. Fei feula quintuquelai ñi ricungerpual, doi mai yafüluuquei ñi nieal tañi duamnieel mu müten. Fei feipi: “Quimtucun ñi doi falin-ngen cüme hueniyeafiel Chau Dios. Feula tüngcülequen ca rüf ayüucülequen”.
Tami doi quimal chem pilen ta Biblia plata dungu mu, amunge ta jw.org ca papeltuafuimi ti quimeltun 37 feipilelu “Tati Biblia, ¿chem quimeltuquei tati plata ca cüdau meu?” tripai ti lifru ¡Rumel ayüucüleaimi!
4. Cudumuhun dungu
Caquerumei ñi raquiduamqueel pu che cudumuhun dungu mu.
BIBLIA ÑI FEIPILEN: ‘Conquilmün pod cudumuhun mu. Caque quiñeque eimün mülei ñi ngünenieafiel quisu tamün cuerpo, femngechi ñi lifngeal ca ñi yamfalngeal’ (1 Tesalonicenses 4:3-5).
¿CHEM QUIMELTUEIÑMU?: Biblia quimeltuquei chem ñi cümen ca chem ñi cümenon cudumuhun dungu mu. Ti feipin “pod cudumuhun” coneltulei ñihualuhun, cudumuhual fei ñi llohual plata, cudumuhual pu curehuen-ngenolu, cudumuhual chaf huentru cam chaf domo engu ca cudumafiel pu culliñ (1 Corintios 6:9, 10). Chau Dios elufi pu curehuen müten ñi cudumuhual (Proverbios 5:18, 19).
BIBLIA ÑI FEIPIN QUELLUCHEQUEI: Quiñe domo Kylie pingelu, Australia mapu tuulu, feipi: “Petu fütangenolu iñche, raquiduamquefun: ‘Cudumuuli quiñe huentru iñchiu, cüme felean ca piuqueyengean’ piquefun, huelu femlai. Doi huesalcalefui tañi mongen ca allfütripai reque tañi piuque”.
Rupachi antü mu, Kylie eluhui ñi chillcatual ti Biblia, fei inanierpufi chem ngülamtuquei Biblia cudumuhun dungu mu. Fei feipi: “Inayal Chau Dios ñi ngülam quelluqueiñmu taiñ cutrancaunoal. Feula rüf cüme felen ca piuqueyeneu tañi füta. Biblia adnieneu tañi mongen mu, fei montuleneu huesa rupan mu”.
Tami doi quimal, amunge ta jw.org ca papeltuafuimi ti troquiñ feipilelu “¿Chem piquei Biblia epu che cureyeungenolu ñi trür müleal?”.
Chau Jehová deumaeiñmu, fei quimeltuqueiñmu chem ñi cümen ca chem ñi cümenon. Quiñeque mu cüdautuafuiñ taiñ inayal Chau Jehová ñi feipin, huelu müna cümelcaqueiñmu. Rüf maneluhuaiñ ñi afnoal taiñ ayühun.
