Chumngechi ngüneduamiyiñ, Chau Ngünechen pürüm apümafi com huesaque che ca com huesaque dungu. ¿Chumngelu maneluhuafuiñ ñi femürpual? Biblia ta feipicünui:

“Pu che quiñepüle tripalelu Ngünechen mu apümcangeai” (1 JUAN 2:17, TNM).

Huelu com che ta apümngelayai, quiñeque che ta montuai. Biblia ca feipicünui:

“Tati femquelu ñi ayünieel ta Chau Ngünechen rumel mongeleai”.

Feimu taiñ montulngeal, mülei taiñ femal Chau Dios tañi ayünieel. Huelu hunelu mu mülefui taiñ quimafiel.

Jesús feipi: “Fei tüfa lle tati rumel mongen: tami quimngeal eimi, tami quiñen rüfngechi Ngünechen-ngen” (Juan 17:3). Feimu taiñ montual ca taiñ rumel mongeleal, mülei taiñ quimafiel ta Chau Dios. Re femngechi quimlayafuiñ müten ta Chau Dios, ca mülei taiñ hueniyeafiel. Raquiduamnge tüfa, epu che pürüm müten hueniyeuquelai, mülei tañi cüme quimuhual engu. Ca femngechi iñchiñ taiñ hueniyeafiel ta Chau Dios, mülei taiñ cüme quimafiel. Ngüneduamaiñ quiñeque quimeltun Biblia mu mülelu, feita quelluaiñmu taiñ cüme hueniyeafiel ta Chau Dios.

Taiñ mongeleal, duamnieiñ taiñ iyael fill antü. Huelu Jesús feipi: ‘Re cofque meu müten mongelequelai ta che, huelu mai mongeleai Ngünechen ñi dungu meu’ (Mateo 4:4).

Jehová ñi dungu Biblia mu mülei. Papeltufiliyiñ, quimafuiñ ñi chumün Chau Dios cuifi mu, ñi chummequen feula ca cüpalechi antü mu.

Ayüqueiñ taiñ femal Chau Dios tañi ayüqueel, huelu quiñeque mu cüdautuqueiñ. Femngechi rupaliyiñ, rume quelluafeiñmu taiñ cüme quimnieafiel ta Chau Dios.

Peafiyiñ ñi rupan quiñe domo. Podngechi mongen niequefui. Huelu papeltulu Biblia, quimürpui Chau Dios ayüniei taiñ ‘lefmahual fillque pecan cudumuhun mu’ (1 Corintios 6:18, TNM). Tüfachi domo llellipufi ta Chau Dios, fei norcünutui tañi mongen. Huelu quiñeque mu ca conturumequeyu huesaque illutun dungu. Fei feipi: “Iñche quisu ñi duam mu famentulayafun tañi huesaque raquiduam. Feimu com piuque mu llellipuquefiñ ta Jehová, femngechi doi fülmaniefiñ” pi. Feitachi domo reque, famülque mu fentren che quimürpuquefi ta Chau Dios, fei quellueyu ñi norcünutual tañi mongen engün (2 Corintios 4:7).

Doi quimürpufiliyiñ ta Chau Dios, doi quimaiñmu iñchiñ ca doi hueniyerpuaiñmu (Salmo 25:14; Gálatas 4:9, 10). Femngechi apümcangele ti huesaque dungu, montulngeaiñ ca rumel mongeleaiñ. Huelu, ¿chumleai ta mongen feichi mu? Cüpalechi troquiñ mu peafiyiñ.