Pu papeltukelu ñi ramtukeel
Kiñe kristiano, ¿kümeafuy ñi nieal kiñe tralka tañi ingkañpewal kakelu che mew?
Pu kristiano inakefiyiñ Biblia ñi ngülam taiñ dullial chumngechi kuñiwtukuwal ka ingkañpewal. Tüfachi ngülam kimeltukey ñi kümenon tati pu kristiano ñi nieal tralka tañi ingkañpewal kakelu che mew. Feymu inaduamaiñ fillke dungu taiñ kelluaetew ñi dullial:
Jewba mew, pu che ñi mongen yamfalngey. Biblia mew, David wirintukuy: “[Chaw Dios] mew küpay ti mongen” (Salmo 36:9). Feymu, kiñe kristiano pepikawle ñi kidutu ingkañpewal kam kuñiwtukuafiel tañi nieel, müley ñi kuñiwtukuwal tañi kulpakon-noal kakelu che ñi lan mew (Deuteronomio 22:8; Salmo 51:14).
Itrofillem mew langümngeafuy kiñe che. Welu nieliyiñ kiñe tralka, doy küdawngelayafuy taiñ langümafiel kiñe che, tuntukufiel mew kam taiñ ayün mu * (inaduamnge ti kimal dungu). Kafey, taiñ kontupaetew ñochi duamkülenole, doy kuñiwün-ngeafuy inaduamle taiñ nieel kiñe tralka, fey kiñe che latripayafuy.
Ti pun epe puwlu ñi layal Jesus, kidu feypifi tañi pu inanieetew ñi nieal wayki, welu feypilafi tüfa ñi kidutu ingkañpewal engün (Luka 22:36, 38). Doy may, Jesus küpa kimeltufi kiñe falin dungu: tañi pu inanieetew ngelay ñi kewayal, kayñetuelieyew rume, fentren che küpalfilu wayki ka mamüll (Luka 22:52). Feymu Pedro waykitufilu tati longkolechi saserdote ñi kona, Jesus feypifi ta Pedro: “Üchaftukutunge tami wayki chew tami niekefimum”. Fey Jesus feypi kiñe rüf dungu kom pu kristiano ñi inayafiel fantepu mu: “Kom tati langümchekelu ta wayki mew, ka femngechi langümngeay ta wayki mew” (Matew 26:51, 52).
Chumngechi ñi feypin Miqueas 4:3, Jewba ñi pu che “tañi fütra kuchillu, ta araw ngetuay, ka tañi wayki, rosewe ngetuay”. Pu rüfngechi kristiano kimngeiñ taiñ kewafengenon. Inakeiñ ti ngülam ñi feypiel ti apostol Pablo, Chaw Dios ñi duam mew: “Wesa femngelmün, wesa femün wiñoleltukelayafimün” ka “yafüluwmün tamün kümelkawküleael itrokom che eymün” (Romanu 12:17, 18). Pablo rupay küdawngechi dungu mu, rumekefuy kütu “chew ñi mülen kuñiwünngechi saltiachefe” (2 Korintio 11:26). Welu chaftulafi Biblia ñi ngülam tañi ingkañpewal. Doy may, maneluwi Chaw Ngünechen mu ka Biblia mew wülkeelchi kimün, tüfa doy kümey fillke weychawe mew (Eclesiastés 9:18).
Pu kristiano doy falintukefiyiñ ti mongen taiñ nieelchi fillem mu. “Che ñi mongen ta kümelkalekelay tañi nien mew müten ta fentren chemkün” (Luka 12:15). Iñchiñ kimnieiñ tüfa, feymew kontupaeliyiñmu kiñe weñefe nielu kiñe tralka, ñom piwke dunguafiyiñ. Welu fentekünunole, inayafiyiñ Jesus ñi ngülam: “Kewalayafimi tami wesake femkeetew”, feymew eluñmayafiyiñ ñi yeal chem tañi ayüel (Matew 5:39, 40; Luka 6:29) * (inaduamnge ti kimal dungu). Welu doy kümeafuy taiñ kuñiwtukuwal. Feymu taiñ kontupanoaetew wedake che, pengelkiyawlayaiñ taiñ nieelchi fillem ka taiñ karukatu müley ñi kimal taiñ kewafengenon, Dungukelu Iney Ngen Jewba ngelu am iñchiñ (Proverbios 18:10; 1 Juan 2:16).
Pu kristiano yamniekeiñ kakelu che ñi rakiduam (Romanu 14:21). Kiñeke peñi ka lamngen lladküafuyngün kam püntüafuyngün kütu Jewba ñi trokiñche mew, kimfule engün kiñe chaf kristiano ñi nieel kiñe tralka tañi ingkañpewal kakelu che mu. Ti awtoridad eluñmayafeiñmew taiñ nieal kiñe tralka, welu piwkeyefilu kay iñchiñ taiñ pu peñi ka lamngen, eluwlayaiñ taiñ weda duamelafiel taiñ femken mu (1 Korintio 10:32, 33; 13:4, 5).
Pu kristiano müley taiñ inayentufalngeal (2 Korintio 4:2; 1 Pedro 5:2, 3). Kiñe kristiano niefule kiñe tralka tañi ingkañpewal kakelu che mu, pu longkolelu ngülamtuaeyew Biblia mew. Welu küpa ütrüfentunofile ti tralka, inayentufalngelayay ti trawünche mu. Feymu elungelayay chem elfal küdaw no rume. Ka femngechi femngeay tati pu nielu kiñe küdaw chew ñi duamfalngeel yenieal kiñe tralka. Doy kümeafuy tüfachi kristiano ñi kintual kangelu küdaw * (inaduamnge ti kimal dungu).
Kiduke pu kristiano müley ñi dullial chumngechi ñi ingkañpewal, kuñiwtukuafiel tañi pu che ka tañi nieel, ka chem küdaw ñi llowal. Welu müley ñi inanieafiel Biblia ñi ngülam. Taiñ Wenu Chaw fentren kimün niey, ka elueiñmew tüfachi ngülam fente taiñ piwkeyeetew. Feymew, pu kristiano küme weniyefilu ta Jewba niekelayngün tralka tañi ingkañpewal kakelu che mu. Kimnieyngün tañi rumel weniyeafiel ta Jewba ka llowafel afnoachi mongen ka küme felen, maneluwle engün Jewba mew ka inafile Biblia ñi ngülam (Salmo 97:10; Proverbios 1:33; 2:6, 7).
Ti fütra kutrankawün mew, pu kristiano maneluwayngün Jewba mu ka kidutu ingkawlayayngün.
^ parr. 3 Kiñe kristiano ayüafuy chi ñi nieal kiñe tralka tañi nüafiel kulliñ ñi ilotuafiel, kam ñi ingkañpewal awka kulliñ mew. Duamnofile ti tralka, müley ñi entuafiel ti bala, teyfüafiel ti tralka ka llafentukukünuafiel. Kafey chew taiñ mülen ti awtoridad eluñmanole taiñ nieal tralka, kam mülele kiñe ley adnielu ñi niengeam tralka, pu kristiano müley taiñ inayal tüfa (Romanu 13:1).
^ parr. 6 Tami kimal chumngechi ingkañpewal nüntukan dungu mu, ngüneduamaymi ti trokiñ “Cómo evitar una violación”, mülelu ti chillka ¡Despertad! 8 konchi marzo, 1993. Ka inaduamafuymi ti ramtun 8 “¿Chem duamfali ñi kimal tati nüntukan dungu mu?” mülelu ti papil Pu wechekeche ñi 10 ramtun tañi wiñoldungungeal.
^ parr. 2 Tami kimal ñi llowal kam llownoal kiñe küdaw chew ñi duamfalngeel yenieal kiñe tralka, inaduamafuymi ti chillka La Atalaya 1 konchi noviembre 2005, pagina 31, ka 1 konchi noviembre 1983, pagina 25 ka 26.
