1. Taiñ kulpafe chengen mu, ¿chum duamküleafuiñ?

“¡AWÜNGEN may ta iñche!”, feypi ti apostol Pablo (Romanu 7:24). Famülke mu, fentren pu poyekefilu ta Jewba weñangküleafuiñ ka ngañwadküleafuiñ, Pablo reke. ¿Chumngelu (chemu)? Eluwlu rume taiñ ayüwülafiel ta Jewba, kiñeke mu pepilkelaiñ kulpafe chengelu am iñchiñ. Tüfa weñangkülafeiñmew. Ka weda kulpaliyiñ, rakiduamürpuafuiñ taiñ turpu wiñoduamtunoaetew Jewba.

2. 1) Ñi feypin Salmo 34:22, ¿chumngelu ngünenielayaeiñmew wedake rakiduam kidu kulpantukuwken mu? 2) ¿Chem inaduamaiñ tüfachi chillkatun mu? (Inaduamnge ti wichulechi dungu “ ¿Adentulepey may doy falin dungu?”.)

² Biblia feypi: “Jewba montulnieñmafi ñi mongen tañi pu poyekeetew; kulpantukungelayay tati pu eluwkülelu ñi ingkañpeaetew” (Salmo 34:22). Tüfa kimeltueiñmu eluwliyiñ taiñ ingkañpeaetew Jewba, ngünenielayaeiñmew wedake rakiduam kidu kulpantukuwken mu. Feymu, ¿chumngechi eluwafuiñ taiñ ingkañpeaetew Jewba? ¿Chem chumafuiñ taiñ kutranpiwkeyeaetew ka wiñoduamtuaetew? Taiñ kimal tüfa, inaduamaiñ Jewba ñi femün kuyfi mew femlu ti Ley ñi eldungu pu israelche engün. Feychi mu  elkünuy kiñeke waria ñi ingkañpengeam che. Welu Pentekoste 33 tripantu mew elkünungelu rume kangelu eldungu, ngüneduamfiliyiñ tüfa, fentren dungu kimürpuaiñ Jewba mew, kidu mu küpalu kay. Kimafuiñ ñi rakiduamken tati kulpan dungu mew, pu kulpalu ka pu wiñorakiduamtulu. Feymu wüne inaduamaiñ chumngelu elkünungey tüfachi waria ka chumngechi ñi adkünungeel.

3. Kiñe israelche langümfile kiñe che, ¿chem mülefuy ñi femngeal?

³ Jewba üdekey ti langümuwün. Feymu kiñe israelche langümfile ta kiñe che, ti ngen la, wentrungele, müley ñi langümafiel (Números 35:19). Femngechi tati langümchelu müley ñi wülal tañi mongen langümfilu am kiñe che, fey ñi chumnon rume. Pürüm langümngenole feychi che, wedañmakünungeafuy ti mapu Jewba ñi elufiel pu israelche, kidu am feypilu ñi langümchenoal tañi podümnoafiel ti mapu (Números 35:33, 34).

4. Kiñe israelche langümfile kiñe che tuntukufiel mu, ¿chem chumafuy?

⁴ Welu, ¿chumafuy kiñe israelche tuntukurumefile ka langümfile kiñe che? Ayünole rume ñi femal, tüfa ta kulpay langümfilu kiñe che, fey ñi chumnon rume (Génesis 9:5). Welu rupale tüfa, Jewba feypi ñi kutranpiwkeyengeafel. Mülefuy kayu waria chew ñi amual feyti langümlu kiñe che tuntukufiel mu, fey tañi lefmawafiel ti ngen la. Eluñmangefule ñi mülenagal üye mu, fey ingkañpengeafuy. Welu lale ti longkolechi saserdote, femngechi müten amutuafuy (Números 35:15, 28).

5. Ti waria ñi ingkañpengeam che, ¿chumngelu tüfa kimeltueiñmew Jewba ñi chumngen mu?

⁵ Pu wentru elkünulafi ti waria ñi ingkañpengeam che, Jewba keta elkünufi. Kidu feypi ta Josue ñi feypiafiel pu israelche: “Dullikünuyefimün waria ñi ingkañpengeam che”. Jewba wichukünuyefi reke ñi sakingeal (Josué 20:1, 2, 7, 8). Feley, Chaw Jewba elkünulu am ñi wichukünungeal tüfachi waria, tüfa kimeltukeeiñmu kidu ñi chumngen. Feymu ramtuwafuiñ: “¿Chem pengelkeeiñmu Jewba  ñi kutranpiwkeyechen mu? Ka, ¿chumngechi kimeltukeeiñmew chem chumal taiñ ingkañpeaetew Jewba?”.

6. Kiñe israelche langümfilu kiñe che tuntukufiel mu, ¿chem mülefuy ñi femal pu longkolelu? (Inaduamnge ti adentun ellaka mu mülelu.)

⁶ Kiñe israelche langümle kiñe che tuntukufiel mu, mülefuy ñi lef amual ti waria ñi ingkañpengeam che, ka nütramkalelafiel ñi rupan pu longkolelu ti waria ñi wülngiñ mu. Fey pu longkolelu mülefuy ñi llowafiel (Josué 20:4). Kiñeke antü rupalu, werküfingün ti israelche tati waria mu chew ñi langümfiel ti che, femngechi ñi jusgayaetew pu longkolelu üye mu. Feychi pu longkolelu ngüneduamle ti israelche ñi langümfiel ti che tuntukufiel mu, fey wiño werküafingün ti waria ñi ingkañpengeam. Biblia feypi: “Pu longkolelu inaniefiel mu tüfachi werkün dungu, rangiñelweleay tati langümfilu ti che ka ti ngen la mew. Pu longkolelu montulafi ñi langümnoaetew ti ngen la, fey müley ñi wiño werküafiel ti waria ñi ingkañpengeam che, fey mülenagay üye mu lale wüla ti longkolechi saserdote dullingelu tati sakin aseyte mu” (Números 35:24, 25).

7. Tati langümchelu, ¿chumngelu mülefuy ñi nütramkayafiel pu longkolelu?

⁷ Feychi che, ¿chumngelu mülefuy ñi nütramkayafiel pu longkolelu? Tüfa engün lifkünukefuy ta Israel kulpan dungu mew ka kellukefingün ti langümchelu ñi kutranpiwkeyeaetew Jewba. Kafey ti israelche langümfilu kiñe che tuntukufiel mu nütramkanofule pu longkolelu engün langümngeafuy, ka kidutu kulpantukuwafuy ñi lan mu, inanofilu am Chaw Dios ñi feypin, femngechi pengeli kiñe adümuwkelu Biblia dungu. Ñi lanoal, ti langümchelu mülefuy ñi kintual kellun ka inayal tañi feypingeel. Ka amunole kiñe waria ñi ingkañpengeal, ti ngen la langümafeyew.

8, 9. Kiñe kristiano weda kulpale, ¿chumngelu müley ñi eluwküleal tañi kelluaetew pu longkolelu?

⁸ Famülke mu, kiñe kristiano weda kulpalu küpa weniyetufile ta Jewba, müley ñi eluwal tañi kelluaetew pu longkolelu ti trawünche mu. ¿Chumngelu müna falin-ngey tüfa? Küla dungu mu: 1) Jewba elfalkünuy pu longkolelu ñi adnieafiel ti dungu kiñe che weda kulpale (Santiaw 5:14-16). 2) Pu longkolelu elfalkünungey ñi kelluafiel ti kulpalu wiñorakiduamtulu, femngechi ñi kümelkawtual Jewba engu ka ñi kulpawenoal (Galata 6:1; Ebrew 12:11). Ka 3) pu longkolelu eluñmangeyngün ka pepikangeyngün ñi kelluafiel ti kulpalu ñi küme duamküleal ka kulpantukuwnoal. Jewba trürümfi pu longkolelu “kiñe ellkawpeyüm” reke “tati kürüftuku mawün mew” (Isaías 32:1, 2). Kom tüfa küme pengelkey Chaw Dios ñi kutranpiwkeyechen.

⁹ Fentren kristiano dew nütramkalu pu longkolelu engün ka eluwlu ñi kelluaetew, fey küme duamürpuyngün. Kiñe tüfa, taiñ peñi Daniel pingelu. Fey fentren küyen mu nütramkalel-lafi ñi weda kulpan pu longkolelu. Kidu feypi: “Dewma alüñmawyey tañi kulpan, fey pu longkolelu ‘chem no rume kellulayaenew’ rakiduamkefun”. Kafey rumel llükalekefuy ñi kimngeal tañi kulpan, ka ngillatulu kidu duamniefuy ñi wüne  feypilelafiel ta Jewba ‘wiñoduamtuen’. Fey wüla kintufi ñi kelluaetew pu longkolelu. Rakiduamlu ñi rupan mu, Daniel feypi: “Iñche llükalekefun ñi nütramkayafiel pu longkolelu. Welu dew femlu, tüfa engün entuñmaenew ñi weda duamelnieetew”. Fewla küme duamkülekey ñi ngillatuafiel ta Jewba, tañi rakiduam tüngduamkülekey ka newe kuyfi konakechi kellukelu ngerpuy.

10. Tañi wiñoduamngetual, ¿chem mülefuy ñi femal tati langümfilu kiñe che tuntukufiel mu?

¹⁰ Tañi wiñoduamngetual ti langümfilu kiñe che tuntukufiel mu, mülefuy ñi lef amual tati doy püllelechi waria mew ñi ingkañpengeam. Ñi montuluwal, mülefuy ñi pürüm puwal ti waria mu, ka mülenagal fey mu lale wüla ti longkolechi saserdote. Biblia feypi: “Kidu müley ñi lefmawal kiñe tüfachi waria mu, ka witrakünuway ti waria ñi wülngiñ mu ka nütramkalelafi ñi rupan tati pu longkolelu ti waria mu. Tüfa engün müley ñi llowafiel ti waria mu ka eluafiel chew ñi müleal, fey kidu mülenagay kidu engün mew” (Josué 20:4). Tati langümchelu elkünuy fentren dungu ñi ayünieel: tañi küdaw, küme ruka ka amulayafuy kañpüle chew ñi ayüel * (inaduamnge ti kimal dungu) (Números 35:25). Kom elkünulu rume, tüfa kümelkayafeyew. Welu tripafule ti waria mu, femngechi pengelafuy ñi weda duamkülenon tañi langümfiel kiñe che, ka kuñiwün mu tukuafuy ñi mongen.

11. Kiñe kristiano wiñorakiduamtulu ñi kulpan mew, ¿chumngechi pengelafuy ñi mañumniefiel tañi kutranpiwkeyeetew Jewba?

¹¹ Famülke mu, kiñe che wiñorakiduamtulu ñi kulpan mu, müley ñi femal kiñeke dungu tañi wiñoduamtuaetew Chaw Dios. Tüfa ta epu: elkünutual ñi kulpan ka konwenoal chem dungu mu rume ñi ngüchaltukuafetew tañi weda kulpayal. Ti apostol Pablo feypi ñi chumün pu kristiano Korinto mu. Kidu engün weñangküyngün ñi kulpan mu, fey rüf wiñorakiduamtuyngün. Feymu femwelayngün wedake dungu, lladküyngün ñi welulkan mu, llükayngün chem ñi rupayafel, rume ayüyngün ñi lifngeal Chaw Dios ñi adkiñ mu, ka küme elkünutuyngün tañi weda femün (2 Korintio 7:10, 11, TNM). Feymu eluwliyiñ taiñ kulpawenoal, pengelafiyiñ ta Jewba taiñ kutrantupiwkelen taiñ weda femün mu ka taiñ newentulen maneluwün mew Jewba taiñ kutranpiwkeyeaetew.

12. Kiñe kristiano tañi kutranpiwkeyenieaetew Jewba, ¿chem müley ñi elkünual?

¹² Kiñe kristiano, ¿chem müley ñi elkünual tañi kutranpiwkeyenieaetew Jewba? Elkünuay kiñeke dungu ñi ayünieel ngüchaltukuelieyew tañi kulpayal (Matew 18:8, 9). Rakiduamaiñ tüfa, taiñ pu weni ngüchaltukueliyiñmu taiñ femal Jewba ñi ayükenoel, ¿yafüluwaiñ taiñ weniyewenoafiel? Ka, küdawtuliyiñ taiñ rume putunoal, ¿famentuafiyiñ chem rume taiñ yeafetew ñi rume putual? Kam, küdawngele taiñ ngünewal wedake illutun kudumuwün dungu mew, ¿kiñepülekünuafiyiñ fillke pelikula, pagina internet kam chem rume taiñ rakiduameletew pekan kudumuwün  mu? Longkontukuaiñ, ngünam feyentulayafiyiñ ta Jewba. Allkütufiliyiñ, rumel nor piwkeyenieaeiñmew (Isaías 54:7, 8). Welu femnoliyiñ, kidu püntütripayay iñchiñ mu.

13. Tati lefmawlu ti waria ñi ingkañpengeam che, ¿chumngelu feypiafuiñ ñi kümelkaleafel, ñi ayüwküleafel ka ñi chumngenoafel rume?

¹³ Ti langümfilu kiñe che tuntukufiel mu konlu ti waria ñi ingkañpengeam, chem no rume chumngelayafuy, Jewba am feypilu: “Tüfa mew ingkañpewaymün” (Josué 20:2, 3). Jewba feypilay ti che ñi wiño jusgangeal. Kafey ti ngen la konlayafuy ñi langümaetew. Jewba kuñiwtukukeeyew mülen mu ti waria mew. Tati langümchelu karseltukungelafuy. Welu may küdawafuy, kelluafuy ta kakelu ka poyeafuy ta Jewba kümelkalen mu. Feley llemay, ayüwküleafuy ka ayüfal mongen nieafuy.

14. Kiñe kristiano wiñorakiduamtulu, ¿chem maneluwafuy?

¹⁴ Kiñeke kristiano weda kulpayngün, welu kulpantukuwkeyngün wiñorakiduamtulu rume. Rakiduamkeyngün “Jewba turpu ngoymanentulayay tañi kulpan”. Femngechi rakiduamülmi, maneluwnge Jewba mu, kidu rüf wiñoduamtueymu. Feymu kulpantukuwlayaymi. Feychi dungu mu rupay Daniel, taiñ nütramkapeel. Pu longkolelu adkünuyngün ti dungu ka kellufingün ñi nietual küme rakiduam, feymu Daniel yafüduami. Kidu feypi: “Kulpantukuw-welan. Jewba wiñoduamtuenew, feymu wiño lladkütuwelayaenew. Kidu am feypilu taiñ entuñmakeetew taiñ kulpan ka alü kamapu elkünukefi reke. Wiño longkontukulayafiyiñ taiñ kulpan”. Tati langümfilu kiñe che tuntukufiel mu, konlu ti waria mu llükalayafuy ñi langümaetew ti ngen la. Ka femngechi taiñ wiñoduamtuetew Jewba, llükalayaiñ taiñ angentuaetew taiñ weda femün kam taiñ kastigayaetew. Biblia feypi: “Jewba kutranpiwkeyechekey ka küme piwkengey, müchay müten lladkükelay ka rume alün-ngey tañi rüf piwkeyen. Turpu feypimekelayaeiñmew taiñ kulpan, ka lladkülewelayay rumel mu. Femkelaeiñmew femngechi taiñ kulpan mu; kullikelaeiñmew femngechi koneltulelu am iñchiñ taiñ welulkan mu. Tati wenu mapu doy alüpüralelu am ti nag Mapu mu, ka femngechi doyküley ñi nor piwkeyefiel tañi pu yamnieetew. Tunte alü kamapulelu ti tripawe antü ka ti konwe antü mu, ka femngechi alü kamapukünuy taiñ kulpan” (Salmo 103:8-12).

15, 16. Kimnieel Jesus ñi wülün tañi mongen ka tañi Longkolechi Saserdotengen, ¿chumngechi tüfa kellukeeymu tami doy maneluwal Jewba ñi kutranpiwkeyechen mu?

 ¹⁵ Iñchiñ doy küme maneluwafuiñ Jewba tañi kutranpiwkeyechen mu tati pu israelche mew. Pablo feypilu fente ñi weñangkülkeetew tañi pepi inanofiel kom ñi feypin Jewba, fey wüla feypi: “Ngünechen müten, fey kisu ta mañumtukefiñ, tañi montulaetew ta Ñidol Jesucristo mew” (Romanu 7:25). Pablo wiñorakiduamtulu am maneluwkefuy Jewba ñi wiñoduamtuetew Jesus tañi lan ñi duam mu. Ka femngechi iñchiñ nieafuiñ küme rakiduam ka tüngküleafuy taiñ piwke, Jesus wülkünulu am tañi mongen (Ebrew 9:13, 14). Taiñ Longkolechi Saserdote Jesus “feley ñi rumel montulafiel tüfey engün tati fülpulu Ngünechen mew kisu ñi duam, fey kisu am rumel mongelealu, femngechi tañi ngillatuñmayafiel ta kisu engün Ngünechen mew” (Ebrew 7:24, 25). Kuyfi mew, ti longkolechi saserdote kellukefi pu israelche ñi maneluwal Jewba mu ñi wiñoduamtuetew tañi kulpan. Ka femngechi famülke mu, taiñ Longkolechi Saserdote Jesus, ka kellukeeiñmew taiñ maneluwal Jewba “taiñ kutranpiwkeyeaetew ta iñchiñ ka taiñ füreneaetew chem lelen mew rume duamtuliyiñ taiñ kellungeael” (Ebrew 4:15, 16).

¹⁶ Taiñ ingkañpeaetew Jewba, müley taiñ maneluwal Jesus ñi lan mu. Rüfngey Jesus ñi lan tañi kellufiel kom pu che. Welu maneluwnge Jesus tañi lan tami kümelkaetew ta eymi (Galata 2:20, 21). Maneluwnge Jesus tañi lan mu, fey ñi duam mew Jewba wiñoduamtukeeymu eymi tami kulpan. Maneluwnge Jesus ñi lan mu tami llowal afnoachi mongen. ¡Jesus ñi lan kiñe yewün reke feley Jewba tami eluetew!

17. ¿Chumngelu eluwküleaymi tami ingkañpeaetew Jewba?

¹⁷ Ti waria ñi ingkañpengeam che kellukeeiñmew taiñ kimal Chaw Jewba ñi rume kutranpiwkeyechen. Kafey kimeltueiñmew ñi yamfalngen ta mongen, ka pengeleiñmew chumngechi taiñ kelluaetew pu longkolelu, chumngechi pengelafuiñ taiñ rüf wiñorakiduamtun, ka chumngelu maneluwafuiñ Jewba taiñ wiñoduamtuetew. Eymi kay, ¿eluwküleymi tami ingkañpeaetew Jewba? Iney no rume doy kuñiwtukulayaeymew kidu mu (Salmo 91:1, 2). Ti küpalechi chillkatun mu doy inaduamaiñ ti waria ñi ingkañpengeam che, ka tüfa kelluaeiñmew taiñ inayentuafiel ta Jewba ñi fentren kutranpiwkeyechen ka ñi rumel femken nor dungu.