1. Nabot ka tañi pu fotüm, ¿chem norngenochi dungu femngeyngün?

EPU che dalluntukufingu ta kiñe wentru ñi femün kiñe fütra weda dungu. Tüfa rüfngelafuy, welu kulpalu trokingey, feymu langümngey. Pu che inakefilu ti nor dungu pefilu engün ñi langümngen kura mew tüfachi wentru ka ñi pu fotüm, ¡müna weda duampelayngün! Tüfa kiñe epew no tati. Fütra kuyfi mew kiñe wentru poyekefilu ta Jewba, Nabot pingefulu, femngechi rupay, kidu mülefuy ti longko ülmen Akab ngüneniefilu Israel (1 Reyes 21:11-13; 2 Reyes 9:26).

2. ¿Chem kimeltuaeiñmew tüfachi chillkatun?

² Fewla inaduamaiñ Nabot ñi rupan, ka kiñe manelfal longkolelu ñi fütra welulkan tati wünen kristiano trawünche mu. Tüfa kimeltuaeiñmew chumngelu fente falin-ngey ñom chengeal ka eluwküleal ñi wiñoduamatucheal,  femngechi taiñ rakiduamal Jewba reke chem ñi norngen.

3, 4. Nabot, ¿chem chengefuy? Ka, ¿chumngelu elulafi tañi ofadentu ta Akab?

³ Nabot tañi antü mew, epe kom pu israelche inayentuñmafingün ñi weda femün ti longko ülmen Akab ka tañi ülmen domo Jesafel, weda piwkengelu. Fey engu poyekefuyngu ti koyla dios Baal, ka yamkelafuyngu ta Chaw Ngünechen ka ñi Ley. Welu Nabot püntütripakelafuy Jewba mew, rume falintukefi tañi weniyefiel ta Jewba, latripafule rume.

⁴ Biblia feypi: “Fey wüla, Nabot, tuwlu Jezreel mu, ñi ofadentu mew mülefuy dungu, tüfa Jezreel mu mülefuy, inafül Akab ñi ülmen ruka mew, ti longko ülmen Samaria mu. Akab feypilelfi ta Nabot: ‘Tami ofadentu fülküley tañi ruka mew, feymu eluen, femngechi ñi nieal tukukan. Iñche trafkintuafeyu kiñe doy küme ofadentu mu. Kam ayülmi, kulliñmayafeyu’. Welu Nabot feypieyew ta Akab: ‘Jewba mew rakiduamfalngelay iñche ñi eluafiel ta eymi tañi kuyfike che yem ñi ngen-ngefel’” (1 Reyes 21:1-3). Nabot küpa elulafi tañi ofadentu ta Akab. ¿Chumngelu? Kidu inaniefilu am Jewba ñi ley, rumel mu ñi fendenoal tañi kuyfike che yem ñi ngen-ngefel (Levítico 25:23; Números 36:7). Kimfali Nabot ñi inaniefiel Jewba ñi feypin.

5. Jesafel, ¿chem chumi ñi müntuñmayafiel Nabot ñi ofadentu?

⁵ Nabot fendelay ñi ofadentu, feymu Akab ka tañi domo wedake dungu mu müntuñmafingu. Jesafel werküfi epu wentru ñi dalluntukuafiel ta Nabot ñi rume weda femün. Feymu Nabot ka tañi pu fotüm langümngeyngün. Jewba, ¿chem chumi rupalu tüfachi norngenochi dungu?

6, 7. Jewba, ¿chumngechi pengeli ñi poyefiel ti nor dungu? Ka, ¿chumngelu tüfa yafültukupelafuy Nabot tañi pu che ka ñi pu weni?

⁶ Rupalu tüfa, Jewba werküfemfi ta Elias ñi chaftudunguafiel ta Akab. Feymu Elias feypifi: ‘Weñefe ka langümchefe’. Fey Jewba, ¿chem dulli ñi femal? Akab, tañi domo, ka tañi pu yall mülefuy ñi langümngeal, Nabot ka tañi pu fotüm reke (1 Reyes 21:17-25).

⁷ Akab tañi wedake femün mew, Nabot tañi pu che ka ñi pu weni müna kutrankawingün. Welu Jewba pefilu tüfachi norngenochi dungu, pürüm eluwi ñi norümafiel. Tüfa müna yafültukupelafuy Nabot tañi pu che ka ñi pu weni. Welu fey wüla kidu engün mülefuy ñi pengelal tañi rüf ñom chengen ka maneluwkülen Jewba mew.

8. ¿Chem chumi Akab allkütulu chem ñi femaetew Jewba? Fey, ¿chem rupay?

⁸ Akab allkütulu chem ñi femaetew Jewba, “wichafkay tañi takun, ka tukutuwi saku mu, ka eluwi ñi inoal, fey kuduy tati saku mu, ka ngañwadkiyawkefuy”. ¡Akab illamkawtuy! Feymu Jewba feypifi ta Elias: “[Akab] illamkawlu am iñche ñi adkiñ mu, iñche küpal-layan ti weda dungu kidu ñi mongen mu. Kidu tañi fotüm ñi antü mu, küpalan ti weda dungu ñi pu che mew” (1 Reyes 21:27-29; 2 Reyes 10:10, 11, 17). Jewba ‘ngüneduamkey  pu piwke’, feymu pürüm kastigalafi ta Akab ka tañi pu che (Proverbios 17:3).

9. Nabot tañi pu che ka ñi pu weni, ¿chumngechi kay kuñiwtukupelaeyew ñi ñom chengen?

⁹ Nabot tañi pu che ka ñi pu weni kimlu engün ñi feypingeel ta Akab ‘lalmi wüla kastigangeay tami pu che’, mülefuy ñi pengelal tañi rüf maneluwkülen Chaw Ngünechen mew. Welu ñi ñom chengen engün, kuñiwtukupelaeyew ka kellueyew peno ñi amuleal tañi poyefiel ta Jewba, maneluwkelu am engün Jewba ñi rumel femken norngechi dungu. Biblia feypi: “Iñche kimeldungualu kay Jewba tañi üy. ¡Wüldungumün taiñ Chaw Ngünechen ñi alüpüralen! Tati Fütra Kura, welulkawkelay ñi femün mu, nor dungu mu amukelu am kom tañi rüpü. Ngünechen ta manelfalngey, norngenochi dungu femkelay; nor piwkengey ka wedañmawkelay” (Deuteronomio 32:3, 4). Fey küpalechi antü mew, Nabot ñi pu che wiñopetuafi tañi piwkeyenieelchi pu che lalu. Femngechi küme norümngeay ti wedake dungu ñi femngeel Nabot ka tañi  pu fotüm (Job 14:14, 15; Juan 5:28, 29). Pu ñom chengelu kimnieyngün Chaw Ngünechen “‘kümey’ kam ‘kümelay’ feypiay kom ti femngekeelchi dungu mew, tati ellkalelu kütu” (Eclesiastés 12:14). Jewba ngüneduamkey fillke dungu taiñ kimnoel. Feymu taiñ ñom chengen kelluaeiñmu ñi amuleal taiñ maneluwün Jewba mu.

10. ¿Chem dungu mu müley taiñ pengelal taiñ rüf maneluwkülen Jewba mu?

¹⁰ Ayünofilmi pu longkolelu ñi dulliel, kam küme adümnofilmi, ¿chem chumaymi? Rakiduamnge tüfa: eymi kam kiñe che tami falintufiel feypingele ñi elkünual tañi elfal küdaw Jewba ñi trokiñche mu, ¿chem chumaymi? Kafey tami afkadi, tami yall, tami püñeñ kam kiñe küme weni wemünentungele ti trawünche mu, welu ayünolmi femngechi ñi dulliel pu longkolelu, ¿chem chumaymi? Ka rakiduamülmi ñi welulkawken pu longkolelu kutranpiwkeyefilu kiñe che kulpalu, ¿chem chumaymi? Rupaliyiñ tüfachi dungu mew, müley ñi pengelal taiñ rüf maneluwkülen Jewba mew ka chumngechi ñi adkünufiel ti trawünche famülke mu. Feymu tami ñom chengen, ¿chumngechi kuñiwtukuafeymew? Peaiñ epu dungu.

11. Taiñ ñom chengen, ¿chumngechi kuñiwtukuafeiñmew?

¹¹ Wüne, ñom chengeliyiñ, longkontukuaiñ taiñ kimnofiel kom ñi rupalen. Ka fentren kimfiliyiñ rume, rakiduamtukuaiñ Jewba müten ñi kimnieel chem ñi mülen kiñe che ñi piwke mu (1 Samuel 16:7). Kimtukunieliyiñ tüfa, kelluaeiñmu taiñ ñom chengeal ka küme elkünutual taiñ rakiduam. Epulelu, rupale kiñe norngenochi dungu, taiñ ñom chengen kelluaeiñmu inanieafiel Jewba ñi feypin ka maneluwküleal kidu mu ñi norümafiel ti dungu. Biblia feypi: “Pu ekuniefilu tati rüfngechi Ngünechen [...] ñi küme miyawal engün”. Welu ka feypi: “Ti weda piwkengelu küme miyawlayay, tañi ekunienofiel ta Chaw Ngünechen, ka alüñma puwlayay tañi mongen” (Eclesiastés 8:12, 13). Ñom chengeliyiñ, kümelkaleaiñ iñchiñ ka kom pu koneltulelu feychi dungu mew (papeltunge 1 Pedro 5:5).

12. ¿Chem nütram ngüneduamaiñ? ¿Chumngelu?

¹² Fewla ngüneduamaiñ ñi rupan pu wünenke kristiano Antiokia mew, Siria mu, kidu engün mülefuy ñi pengelal tañi rüf ñom chengen ka tañi eluwkülen ñi wiñoduamatual. Femngechi ngüneduamaiñ taiñ rüf eluwkülen taiñ wiñoduamatual. Ka kimaiñ chumngelu Jewba famentukelafi tañi nor dungu, elfalkünufilu tati kulpafe che.

13, 14. ¿Chem sakinke küdaw elungey ta Pedro? Ka, ¿chumngechi pengeli tañi fütra piwkengen?

¹³ Pu wünenke kristiano küme kimpelafingün  ti apostol Pedro. Tüfachi longkolelu küme weniyefi ta Jesus, ka elungey fillke sakin küdaw (Matew 16:19). Kiñe dungu, 36 tripantu mew werküngey ñi amuldunguafiel ta Korneliu ka kom pu che mülelu ñi ruka mew. ¿Chumngelu sakin-ngefuy tüfachi küdaw? Korneliu judiu tuwün-ngenolu am, ka sirkunsidangenolu. Kidu ka kom pu che ñi mülen tañi ruka mew llowlu Jewba ñi newen, Pedro ngüneduami ñi fawtisangeal engün ñi kristianongerpual. Kidu feypi: ‘¿Iney am katrütuafeyew tüfa engün tañi fawtisangeael? Llowfi engün Ngünechen ñi newen iñchiñ reke’ (Hecho 10:47).

¹⁴ Pu apostol ka pu longkolelu Jerusalen mu, 49 tripantu mew trawüyngün ñi kimal duamfalngele ñi sirkunsidangeal pu kristiano judiu tuwün-ngenolu. Feychi trawün mew, Pedro fütra piwke mu nütramkay ñi pefiel judiu tuwün-ngenolu ñi llowel Jewba ñi newen. Pedro ñi nütram kellufi ti kiñewkülechi ngünenielu ñi dullial tañi chumal (Hecho 15:6-11, 13, 14, 28, 29). Kom pu kristiano, chem tuwün-ngelu rume, müna mañumkülepelafuyngün Pedro tañi fütra piwkengen mu. ¡Küdawtukelafuy chi pu wünenke kristiano ñi maneluwal tüfachi manelfal wentru mu, küme weniyefilu ta Jewba! (Ebrew 13:7.)

15. Pedro mülelu Antiokia Siria mew, ¿chem mu welulkay? (Inaduamnge ti adentun pagina 21 mu.)

¹⁵ Pichi rupalu feychi trawün, Pedro amuy ta Antiokia, Siria mu. Üye mu trawükefuy tañi pu peñi ka lamngen engün judiu tuwün-ngenolu. Ti apostol ñi kimün ka tañi rupan müna kellueyew engün. Welu müna afmatuyngün chi ka weñangküyngün chi kiñentrür iwenolu kidu engün mew. Pedro ñi duam mu, kakelu kristiano judiu tuwün-ngelu ka femngechi femingün, Bernabe kütu. Pedro küme weniyefi ta Jewba ka manelfal wentrungefuy, welu tañi femün mew wüdamküleafuy ti trawünche, feymu ¿chumngelu fütra welulkay? Ka iñchiñ, weda duameliyiñmu kiñe longkolelu tañi feypin kam femün mu, ¿chem kimürpuafuiñ Pedro ñi rupan mew?

16. ¿Chumngechi norümngey ta Pedro? Ka, ¿chem ramtuafuiñ?

¹⁶ (Papeltunge Galata 2:11-14). Pedro llükafi pu kristiano judiu tuwün-ngelu küpalu Jerusalen mew (Proverbios 29:25). Kidu rakiduami ñi che trokingenoal tañi trawüluwken pu judiu tuwün-ngenolu engün, feymu llükay, kimlu rume Jewba ñi piwkeyefiel engün. Ti apostol Pablo feypifi ta Pedro ‘epurume piwkengeymi’, kidu kimlu am Pedro ñi dunguñpefiel pu judiu tuwün-ngenolu feychi trawün mew 49 tripantu mu (Hecho 15:12; Galata 2:13). Pedro weda duamelfi pu kristiano  judiu tuwün-ngenolu, fey ¿chumafuyngün? ¿Welulkayafeyew ñi femün? Pedro, ¿niewelayafuy sakin küdaw tañi welulkan mu?

17. ¿Chem kümeke dungu llowi Pedro Jewba ñi wiñoduamatuetew mu?

¹⁷ Pedro ñom piwke mu eluwkülefuy ñi norümaetew Pablo. Biblia feypilay Pedro ñi elkünuel tañi sakinke küdaw. Doy may, fey wüla Jewba ñi newen mu wirintukuy epu karta Biblia mew. Tañi epungechi karta mew, “sakin peñi” pifi ta Pablo (2 Pedro 3:15). Pedro ñi welulkan weda duamelpelafi pu kristiano judiu tuwün-ngenolu. Welu Jesus, ti fütra longkolelu trawünche mu, amulefuy ñi elfalkünuafiel ta Pedro (Efesio 1:22). Feymu pu peñi ka lamngen ti trawünche mew inayentuafuyngün ta Jesus ka tañi Chaw Jewba, femngechi ñi wiñoduamatuafiel ta Pedro. Maneluwkeiñ kidu engün mew ñi welulkanoetew Pedro ñi weda femün, kidu am kulpafe ngelu.

18. ¿Chumngechi inayentuafiyiñ Jewba ñi nor dungu?

¹⁸ Wünen siglo mew, pu longkolelu ti trawünche mu welulkakefuyngün, ka femngechi famülke mu. Biblia feypi: ‘Kom iñchiñ ta rume welulkakeiñ’ (Santiaw 3:2). Kom iñchiñ kimtukuiñ tüfa, welu kiñe peñi kam lamngen weda femeliyiñmu, ¿chumaiñ kay? ¿Inayentuafiyiñ Jewba ñi nor dungu? Rakiduamnge tüfa: femngentulmi kiñe longkolelu ñi dullintuchen tañi feypin mu, ¿chem chumaymi? Kam kiñe longkolelu dungule rakiduamnon mu ka müna weda duamelnieelmu, ¿welulkayaeymu tüfa? Femngechi rupale, rakiduamlayaymi ti peñi ñi pepikawkülenon tañi longkoleal, welu may maneluwküleaymi Jesus mu, ti fütra longko tati trawünche mew. Fey re ngüneduamlayaymi tañi welulkan, doy kümeafuy tami rakiduamal kom ti tripantu ñi poyefiel ta Jewba. Kafey kiñe peñi weda femelmu ka amulele tañi longkolen kam doy elfal küdaw elungele, ¿ayüwküleaymi kidu mu? Eluwkülelmi ñi wiñoduamatual, pengelaymi tami rakiduamkeel Jewba reke chem ñi norngen (papeltunge Matew 6:14, 15).

19. Petu ñi apümkangenon ti norngenochi dungu, ¿chem müley taiñ femal?

¹⁹ Iñchiñ piwkeyefiyiñ ti nor dungu, feymu maneluwküleiñ Jewba mew ñi apümkayafiel kom ti norngenochi dungu ñi femkeel ti Weküfü ka tañi pu inaniekeetew (Isaías 65:17). Welu petu ñi puwnon feychi antü, norngenochi dungu femngeliyiñ, ñom piwke mu rakiduamaiñ taiñ kimnoel kom ñi rupalen, kafey eluwküleaiñ ñi wiñoduamatuafiel taiñ weda femetew. Femngechi femliyiñ, rakiduamaiñ Jewba reke chem ñi norngen.