1. 1) Jefte Ana engu, ¿chem dungu mu trürümuwingu? (Inaduamnge ti adentun tüfachi pagina mu.) 2) ¿Chem ramtun inaduamaiñ tüfachi chillkatun mu?

JEFTE kiñe fütra weychafe ngefuy ka llükakelafuy ñi longkolen mu. Kafey Ana ñomngefuy ka dapikefuy tañi wentru ka tañi ruka. Kidu engu poyekefuyngu ta Jewba, welu ka kiñe dungu mu trürümuwingu: eldungukünufingu ta Jewba, ka femürpufingu. Famülke mu kom pu eluwlu ñi eldungukünuafiel ta Jewba, inayentuafuyngün ta Jefte ka Ana. Feymu inaduamaiñ küla ramtun: ¿chem chumkey tati eldungukünulu? ¿Tunte falin-ngey taiñ eldungukünulelfiel ta Jewba? ¿Chem kimeltuafeiñmu Jefte ka Ana ñi femün?

2. ¿Chem chumkey tati eldungukünulu?

² Biblia mew, tati eldungukünulu rüf mew feypikünukefi ta Jewba kiñe dungu ñi femal, ñi wülal kiñe yewün, ñi konal kiñe sakin küdaw mu, ngünewal ñi femnoal kiñe dungu, kam kakelu dungu. Tati eldungukünulu femkey tüfa kidu ñi ayün mu, dikümtukungekelay. Welu eldungukünule, Jewba pekan trokilafi tüfa, feymu ti che müley ñi wechurpuafiel (Génesis 14:22, 23; Ebrew 6:16, 17). Biblia ñi feypin mu,  ¿tunte falin-ngey taiñ eldungukünulelfiel ta Jewba?

3. Tati Biblia, ¿chem feypiley tunte ñi falin-ngen taiñ eldungukünulelfiel ta Jewba?

³ Ti Ley Jewba ñi elufiel pu israelche feypikefuy kiñe che eldungukünufilu ta Jewba, “ngelay ñi rulpakünuafiel ñi feypin. Müley ñi wechurpual kom tañi eldungukünuel” (Números 30:2). Kafey, Salomon wirintukuy: “Chumül rume eldungukünufilmi ta Chaw Ngünechen, alüñmakilnge tami femürpual, kidu am ayükenofilu pu kimchengenolu. Femnge tami eldungukünuel” (Eclesiastés 5:4). Jesus kimeltuy tunte ñi falin-ngen taiñ eldungukünulelfiel ta Jewba, feymu feypi: “Ka femngechi allkükeymün eymün tañi feypingeken tamün fütake laku em: ‘Femkünukilmün tamün mupiael tamün chalintukulelfiel ta Ñidol kuyalltun mew [tamün eldungukünulelfiel]’” (Matew 5:33).

4. 1) ¿Tunte falin-ngey taiñ eldungukünulelfiel ta Jewba? 2) ¿Chem kimaiñ Jefte ka Ana mew?

⁴ Feley llemay, pekan trokilayafiyiñ taiñ eldungukünulelfiel ta Jewba. Chem taiñ rakiduamkeel tüfachi dungu mu, yeafeiñmew taiñ doy weniyeafiel ta Jewba kam püntütripayal kidu mew. David küme pengeli tüfa, feypilu pu wechurpukelu ñi eldungukünuel müten ñi weniyeafiel ta Jewba (Salmo 24:3, 4). Jefte ka Ana, ¿chem eldungukünuyngu? ¿Küdawngefuy ñi femürpufiel?

5. Jefte, ¿chem eldungukünuy? ¿Chem rupay?

⁵ Pu amonche kayñetukefuyngün Chaw Ngünechen ñi pu che (Jueces 10:7-9). Feymu Jefte epe weychafilu engün, ngillatufi ta Jewba ñi kelluaetew tañi wewafiel, fey eldungukünufi: “Eymi eluñmaeli ñi wewafiel pu amonche, fey iney rume tripale tañi ruka ñi wülngiñ mew tañi trafiepaetew, wiñotuli iñche tüngkülen mu dew wewfilu pu amonche, fey Jewba, eymi ngen-ngeaymi feychi che mu”. Jewba allkütueyew ñi ngillatun, fey kellueyew ñi wewal. Jefte wiñotulu, tañi poyen ñawe trafiemeeyew. Jewba ngen-ngeafuy tüfachi üllcha domo mew (Jueces 11:30-34). Feymu, ¿chem mülefuy ñi femal?

6. 1) Jefte ka tañi ñawe, ¿küdawngefuy ñi femürpual tañi feypikünuel? 2) Deuteronomio 23:21, 23 ka Salmo 15:4, ¿chem kimeltueiñmew taiñ eldungukünuel?

⁶ Jefte tañi ñawe mülefuy ñi küdawülafiel ta Jewba ñi tolto ruka mu fill antü, femngechi ñi femürpual tañi chaw ñi eldungukünuel. ¿Jefte küme rakiduamlay tañi feypikünun? Femlay. Jefte kimfuy chi tañi ñawe ñi wüne trafiepayaetew. Welu kimnofule rume, Jefte ka tañi ñawe mu küdawngefuy ñi femürpual tañi feypikünuel. Jefte pefilu tañi ñawe, allfüy ñi piwke reke, ka tañi ñawe ngümay tañi fütangenoafel. ¿Chumngelu? Jefte nielafuy fotüm, ka tañi kiñen ñawe turpu fütangelayafuy ka nielayafuy püñeñ. Mülewelayafuy Jefte tañi üy. Welu mür ngüneduamfingu chem doy fali tañi rakiduam engu. Feymu Jefte feypi ñi wiñorakiduamtunoal tañi eldungukünuel. Ka tañi ñawe eluwkülefuy ñi wechurpual tañi chaw ñi feypikünuel (Jueces 11:35-39). Jefte ka tañi ñawe manelfalngeyngu, feymu turpu wiño witrawtulayafuyngu tañi wechurpual ñi eldungukünuel ta Jewba, küdawngefule rume. Biblia feypi: “Eldungukünufilmi  tami Chaw Ngünechen Jewba, alüñmakilnge tami femürpual. Tami Chaw Ngünechen Jewba ramtukayaeymu feychi dungu mu, femnolmi, fey kulpayaymi tati. Femnge kom ñi feypikünuel tami wün, ka wechurpunge kom ñi eldungukünuel tami wün, kiñe mañumtun reke eymi tami ayün mu ñi chalintukulelfiel tami Chaw Ngünechen Jewba” (Deuteronomio 23:21, 23). Ka feypi: “Kidu famentukefi iney rume illamfalngechi chengelu, welu yamniekefi tati pu ekuniekefilu ta Jewba. Kidu femtriparpukey ñi feypikünuel, kümenofule rume kidu mu” (Salmo 15:4).

7. 1) Ana, ¿chem eldungukünuy ka chumngelu? ¿Chem rupay? 2) Samuel, ¿chem mülefuy ñi femal Ana ñi eldungukünuel? (Inaduamnge ti kimal dungu.)

⁷ Kafey Ana rupalu wedake dungu mu eldungukünufi ta Jewba. Kidu niepüñenlafuy, feymu rume weda duamkülefuy ka ayentungekefuy (1 Samuel 1:4-7, 10, 16). Feypifi ta Jewba ñi chum duamkülen, fey feypikünufi: “Awem Jewba ñidolkülelu pu weychafe mu, iñche eymi tami poyekeetew, fey ngüneduamüñmaeli ñi weda rupameken, ka rakiduamtukunieeli, ka ngoymanoeli ka elueli kiñe wentru püñeñ, fey wülkünulelaeyu Jewba kom ñi mongen mu, ka turpu kupilngelayay” * (inaduamnge ti kimal dungu) (1 Samuel 1:11). Jewba allkütueyew ta Ana, feymu kiñe tripantu rupalu choyüfi ta Samuel. ¡Rume ayüwkülefuy! Welu ngoymalay ñi eldungukünulelfiel ta Jewba. Feymu choyülu tañi püñeñ, feypi: “Iñche ngillatufiñ ta Jewba tañi eluaetew” (1 Samuel 1:20).

8. 1) Ana mu, ¿küdawngefuy ñi femürpual tañi eldungukünuel? 2) Salmo 61, ¿chumngechi rakiduamelkeeiñmew Ana ñi küme femün mu?

⁸ Samuel nielu küla tripantu, Ana femi ñi eldungukünuel. Elmefi ta Samuel ti longkolechi saserdote mew, Jewba ñi tolto ruka Silo mu, ka feypifi: “Tüfachi pichi wentru mu llellipufiñ ta Jewba ñi eluaetew tañi ngillatuel. Feymu iñche arelelfiñ ta Jewba. Kom ñi mongen mu, Jewba mew arelngeay” (1 Samuel 1:24-28). Feychi mu Samuel mülenagi Jewba ñi tolto ruka mu. Biblia feypi Samuel ñi tremün Jewba tañi adkiñ mu (1 Samuel 2:21). Müna küdawngepelafuy Ana mu ñi femürpual tañi eldungukünuel, fill antü pepi pelayafuy tañi poyen püñeñ, pelayafuy ñi tremkülen. Welu rume falintufi ñi eldungukünulelfiel ta Jewba, feymu ñi wechurpuafiel eluwkülefuy tañi elkünual ñi rume falintuniefiel. Biblia feypi: “Awem Chaw Ngünechen, allkütuñmaen tañi ngillatuel ñi kellungeal. Ngüneduamüñmaen ñi ngillatun.  Awem Chaw Ngünechen, eymi am allkütukefilu iñche ñi eldungukünuel. Eymi eluen chem ñi llowal pu yamkefilu tami üy. Feymu ülkantun mu püramyeafiñ tami üy rumel mu, tañi femürpual ñi eldungukünuel fill antü” (Salmo 61:1, 5, 8; 1 Samuel 2:1, 2).

9. ¿Chem inaduamaiñ fewla?

⁹ Dew kimürpuiñ tunte ñi falin-ngen taiñ eldungukünulelfiel ta Jewba, feymu fewla inaduamaiñ tüfachi ramtun: famülke mu, ¿chem eldungukünuafuiñ? ¿Tunte müley taiñ yafüluwal ñi femürpuafiel?

10. Kiñe poyekefilu ta Jewba, ¿chem am tati doy falin dungu ñi eldungukünulelfiel? Feymu, ¿chem müley taiñ femal?

¹⁰ Wül-lu iñchiñ taiñ mongen poyeafiel ta Jewba, tüfa tati doy falin dungu taiñ eldungukünulelafiel. Femlu tüfa, kidulen mu ngillatufiyiñ ta Jewba, fey feypikünufiyiñ ñi wülal taiñ mongen ñi poyeafiel rumel mu, chem rupale rume. Jesus feypi taiñ kidu “ngüyünentuwal”, feymu famentukeiñ taiñ ayükeel ka doyümkefiyiñ Jewba tañi piel (Matew  16:24). Feychi mu, “Jewba ngen-ngey ta iñchiñ mew” (Romanu 14:8, Traducción del Nuevo Mundo, TNM). Iñchiñ rume falintukefiyiñ taiñ eldungukünufiel ta Jewba ñi wülal taiñ mongen. Rakiduamkeiñ feyti wentru reke wirintukulu ti Biblia mu, feypi: “¿Chumngechi kulliafiñ ta Jewba kom kümeke dungu tañi femetew? Femürpuan ñi eldungukünulelfiel ta Jewba, kidu tañi pu che ñi adkiñ mu” (Salmo 116:12, 14).

11. Feychi antü tami fawtisawün, ¿chem pengelimi?

¹¹ ¿Dew wülfimi tami mongen ta Jewba? ¿Pengelfimi tüfa tami fawtisawün mu? Femngechi femülmi, ¡müna kümey! ¿Petu rakiduamtukuniefimi chem ñi rupan feychi antü? Ti wewpitulu ramtueymu ‘¿wülimi tami mongen ta Jewba mu?’ Ka feypieymu: ‘Wül-lu am tami mongen tami poyeafiel ta Ngünechen, ka fawtisawalu am eymi, fewla Dungukelu Iney Ngen Jewba ngeaymi, ¿kimtukunieymi tüfachi dungu?’. Fey “¡May!” wiñoldunguymi, feymu kom pu che ngüneduami tami wülfiel tami mongen ta Jewba ka tami pepikawkülen ñi fawtisangeal, femngechi tami konal Jewba ñi adkünuelchi trokiñche mu. ¡Jewba müna ayüwkülepelafuy feychi antü!

12. 1) ¿Chem müley taiñ ramtuwal? 2) Ti apostol Pedro, ¿chem ngülamtueiñmu ñi nieal?

¹² Fawtisawlu eymi, feypikünufimi ta Jewba ñi poyeafiel kom tami mongen mew ka yafüluwal tami inanieal ñi feypin. Welu fentepuwlay feychi antü mu. Rupalu chi antü kom müley taiñ ngüneduamuwal. Ramtuwafuiñ: “¿Doy weniyefiñ ta Jewba? ¿Kom piwke mu poyekefiñ?” (Kolosense 3:23). “¿Ngillatukefiñ? ¿Fill antü papeltuken ti Biblia? ¿Amuken Trawünwe Ruka mu? ¿Amuldunguken tunte ñi pepilnieel? Kam, ¿müte ayüwmawelaenew kom tüfa?”. Ti apostol Pedro kimeleiñmew kiñe kuñiwün-ngechi dungu: re femngechi müten feleafuy taiñ küdawülkefiel ta Jewba. Feymu ngülamtueiñmu taiñ nieal doy mupiltun, küme kimün, yafüluwün ka maneluwün Chaw Ngünechen mew (papeltunge 2 Pedro 1:5-8).

13. Kiñe che wülkünulu ñi mongen ta Jewba mu ka fawtisawlu, ¿chem femlayafuy chi?

¹³ Eldungukünufiliyiñ ta Jewba taiñ poyeafiel, wiñorakiduamtulayafuiñ. Kiñe che afeluwle ñi poyeafiel ta Jewba kam ñi inanieafiel tañi ngülam, fey feypilayafuy ñi falinon tañi fawtisawün ngillatunofilu am ta Jewba ñi wülal tañi mongen * (inaduamnge ti kimal dungu). Kiñe che wülkünulu ñi mongen ta Jewba mu, weda kulpale, tüfa ta kulpay Jewba mew ka ti trawünche mu (Romanu 14:12). Jesus feypifi kiñeke che: “Niewetulaymi ta piwkeyen chumngechi tami femkefel”, küpa inakelafiyiñ feychi pu che. Welu may ayüleiñ taiñ feypiaetew Jesus: “Iñche kimnien itrokom tamün chumken. Kimnien tami piwkeyechen, tami mupiltun, tami poyecheken ka tami yafüluwküleken, ka kimnien iñche tüfa tami doy küdawken” (Apokalipsi 2:4, 19). Küpa ayüwülkefiyiñ ta Jewba, feymu ayüwün mu femürpuaiñ taiñ eldungukünuel.

14. ¿Chem am tati epungechi dungu doy falin-ngelu ñi eldungukünungeafel? ¿Chumngelu?

¹⁴ Ñi eldungukünuel ti kurewen, fey tati epungechi dungu doy falin-ngelu. Jewba elkünuy ñi niewal pu che, feymu rume falintukefi. Pu niewalu eldungukünuwingu Jewba ñi adkiñ mu ka pu che ñi kompañetew. Feypikünuwingu tañi piwkeyewal, dapiwal kom piwke mu ka yamniewal petu mülelu engu Mapu mew Chaw Ngünechen ñi elkünuelchi kurewen mu * (inaduamnge ti kimal dungu). Welu chem rume ñi feypiel pu niewalu, eldungukünuyngu Chaw Ngünechen ñi adkiñ mu. Femngechi kurewen-ngetuyngu, müley ñi wüdawnoal (Génesis 2:24; 1 Korintio 7:39). Jesus feypi: “Fey ngelay tañi wüdamentumekeafiel Ngünechen tañi trapümel”. Feymu pu niewalu ngelay ñi rakiduamal ñi pepi wüdawal rupale wedake dungu (Marku 10:9).

15. Pu poyekefilu ta Jewba, ¿chumngelu inakelafingün pu che ñi rakiduam kurewen mu?

¹⁵ Welulkawkelu kay pu che, pu kurewen ka welulkawkeyngün. Feymu Biblia ta feypiley tati pu nielu ñi afkadi, kiñeke mu ñi nieel “fill rakiduameluwkülen epe fill dungu mew” (1 Korintio 7:28). Famülke mu pu che falintukelafi ti kurewen. Rakiduamkeyngün ‘wedake dungu rupaliyu, wüdawafuyu’. Welu pu poyekefilu ta Jewba femngechi rakiduamkelayngün. Kimnieyngün ñi eldungukünuel Jewba ñi adkiñ mu. Feymu femürpunofile, koylatuafingün ta Chaw Ngünechen, ka kidu üdekey pu koylatukelu (Levítico 19:12; Proverbios 6:16-19). Kom pu poyekefilu ta Jewba nielu ñi afkadi, müley ñi rakiduamtukunieafiel Pablo ñi feypiel: “Fey nielmi ta domo, elkünutukefilnge” (1 Korintio 7:27). Pablo feypi tüfa kimlu am Jewba ñi üdekefiel pu wüdawlu ñi afkadi mew ngünenkan dungu mu (Malaquías 2:13-16).

16. Ti Biblia, ¿chem feypiley tati püntüwün mu ka wüdawün mu ti kurewen?

¹⁶ Biblia ñi feypilen mu, kiñe kurewen wüdawafuy ley dungu mu mülele müten ñiwaluwün ka tati kulpanolu wiñoduamtunofile ñi afkadi. Tüfa kimeltuy Jesus (Matew 19:9; Ebrew 13:4). Ka ¿püntüwafuy ti kurewen? Biblia küme pengeli tüfa (papeltunge 1 Korintio 7:10, 11). Biblia feypilay tati kurewen ñi püntüwal. Welu kiñeke mu, kiñe kristiano rakiduamafuy ñi duamfalngen tañi püntüwal ñi afkadi mu. Kiñe tüfa, ñi afkadi awükaelieyew kam kayñetufile Jewba ñi rüf dungu, fey kuñiwün dungu mu rupayafuy tañi mongen kam tañi weniyefiel ta Chaw Ngünechen * (inaduamnge ti kimal dungu).

17. ¿Chem chumafuy kiñe kurewen ñi küme elkünutual tañi kurewen-ngen?

¹⁷ Kiñe kurewen feypifile pu longkolelu ñi ngülamtuaetew tañi doy küme  elkünutual ñi kurewen-ngen, pu longkolelu feypiafeyew ñi ngüneduamal ti video ¿Cómo sabes si es amor? ka ti papil Tami reñma ayüwküleafuy. Tüfa pengeli Biblia ñi ngülam ñi doy küme yenieal tañi kurewen. Kiñe kurewen feypi: “Chillkatulu am iñchiw tüfachi papil, doy ayüwküley tayu kurewen”. Kiñe lamngen 22 tripantu yenielu ñi fütangeel, rakiduami tañi kurewen ñi dew kümelkalewenon. Kidu feypi: “Mür fawtisawküleyu, welu tayu piwke kiñewkülelafuy. ¡Ti video fente küme akuy! Fewla doy küme amuley tayu kurewen-ngen”. Feley llemay, ti kurewen inafile Jewba tañi ngülam doy kiñewküleayngu ka doy ayüwküleayngu.

18. ¿Chem femkeyngün fentren pu chaw poyekefilu ta Jewba?

¹⁸ Dew ngüneduampeiñ Jefte ka Ana ñi eldungukünuel. Kidu engu ñi femün mu, Jefte tañi ñawe ka Ana ñi püñeñ wülkünuyngu ñi mongen tañi poyeafiel ta Jewba sakinke küdaw mu. Ka femngechi famülke mu fentren chaw poyekefilu ta Jewba yafültukukefingün tañi pu yall ñi küdawülafiel ta Jewba fill antü ka eluwal tañi mongen ñi poyeafiel. Kom iñchiñ ka kelluafuiñ taiñ yafültukuafiel pu wechekeche ñi amuleal tüfachi küdaw mu (Jueces 11:40; Salmo 110:3).

19. Pu fill antü femkelu sakin küdaw, ¿chem chumkeyngün?

¹⁹ Famülke mu, 67.000 peñi ka lamngen peno koneltuleyngün ti Trokiñche ñi nieel pu Dungukelu Iney Ngen Jewba wall Mapu mu fill antü femkelu sakin küdaw. Kiñeke küdawkeyngün Fetel mu, dewmarukan mew kam witranmakefingün pu trawünche. Kakelu kimeltukeyngün fillke chillkatuwe mu, wünelekeyngün amuldungun mu 130 ora, werküngeyngün ka mapu ñi amuldungual, adkünukeyngün tati Fütrake Trawünwe Ruka kam chew ñi femngekeel fillke chillkatuwe. Kom engün femkeyngün ti “Eldungun ñi inanieal tañi feypingeel ka nienoal ülmen mongen”. Femngechi feypikünukeyngün ñi femal kom newen mu chem küdaw rume ñi elungeel ñi poyeafiel ta Jewba, kafey feypikünukeyngün ñi yenieal ülmen-ngenochi mongen ka küdawkelayngün ñi wewal plata, welu eluñmangele müten femafuyngün. Tüfachi pu che sakin-ngelay, doy may tañi küdaw sakin-ngey. Kidu engün ñom piwke mu eluwkeyngün ñi inanieal tañi eldungukünuel petu ñi mülen tüfachi sakin küdaw mu.

20. Eldungukünufiliyiñ ta Chaw Ngünechen, ¿chem müley taiñ femal? ¿Chumngelu?

²⁰ Tüfachi chillkatun mu inaduampeiñ küla dungu taiñ eldungukünulelafiel ta Chaw Ngünechen. Eymi eldungukünufimi chi ta kiñe. Chumngechi ngüneduampeiñ, müley taiñ rume falintuafiel ñi eldungukünuel, ka yafüluwal taiñ femürpuafiel (Proverbios 20:25). Wechurpunoliyiñ taiñ eldungukünulelfiel ta Jewba, weda tripayafuiñ (Eclesiastés 5:6). Feymu inayentuafiyiñ tati wirintukulu Biblia mu, kidu feypifi ta Jewba: “Feymu ülkantun mu püramyeafiñ tami üy rumel mu, tañi femürpual ñi eldungukünuel fill antü” (Salmo 61:8).