1, 2. Rupan mu wedake dungu, ¿chumngechi yafülkeeiñmew Jewba? Fey Biblia ñi feypin mu, ¿chem rüf maneluwkeiñ?

KIÑE weche wentru kurengenolu rakiduami 1 Korintio 7:28 mu, feypilelu: “Tati kurengelu niekey fill rakiduameluwkülen epe fill dungu mew”. Fey ramtulelfi kiñe longkolelu fentren tripantu ñi kurengeel: “¿Chem am tüfachi ‘fill rakiduameluwkülen’? Ka kurengeli, ¿chumngechi chaftuafiñ?”. Ti longkolelu petu ñi wiñoldungunon, rakiduamelfi ti weche ti apostol Pablo ñi feypin mu: Jewba “taiñ yafülkeetew. Kisu ta yafülkeeiñmew kom taiñ kutrankawün mew” (2 Korintio 1:3, 4).

² Kimnieiñ ta Chaw Jewba taiñ piwkeyeetew ka yafülkeetew rupan mu wedake dungu. Rakiduamtukunieymi chi chumngechi tami kelluetew ka adnieetew Biblia mu. Rüfkünu llemay, maneluwkeiñ Jewba mu taiñ küpa kümelkayaetew, chumngechi ñi femfiel tañi pu poyekeetew kuyfi mu. Biblia feypi: “Iñche am küme kimnien tañi  rakiduamkülen eymün mu pi Jewba, nien tüngkülechi rakiduam, ka weda rakiduam nielan, tañi eluafiel ta eymün küme felen ka kiñe maneluwün. Ka eymün mütrümmuan ka küpayaymün, ka ngillatumuan ka iñche allkütuwayiñ” (Jeremías 29:11, 12).

3. ¿Chem ramtun inaduamaiñ?

³ Kimliyiñ chumngelu rupamekeiñ wedake dungu, müte küdawngelayafuy taiñ newentuleal. Feymu, taiñ kurewen kam reñmawen mu, ¿chumngelu rupayafuiñ wedake dungu mu? Kafey fillke che ñi rupan Biblia ñi antü mew ka famülke mu, ¿chumngechi kelluafeiñmew? Inaduamaiñ tüfachi ramtun, ka chumngechi newentuleal wedake dungu mu.

4, 5. ¿Chem küdawngechi dungu mu rupayafuy ti kurewen?

⁴ Jewba dewmafilu tati wünen domo, elelfi tati wentru kidu ñi domongeal. Feymu Jewba feypi: ‘Feymew ta wentru elkünuay ñi chaw ka ñi ñuke fey tañi trawüael ñi domo engu, fey mür kiñe che reke müten ñi feleael’ (Génesis 2:24). Welu kom iñchiñ kulpafengeiñ (Romanu 3:23). Feymu epu che niewlu rupayafuyngu küdawngechi dungu mu. Rakiduamnge tüfa, petu ñi fütangenon, ti domo inaniefuy tañi pu chaw ñi feypin. Welu Biblia feypi fütangele ti domo, fey tañi wentru longkoleay kidu mu (1 Korintio 11:3). Ellaka mu küdawngeafuy ti wentru mu ñi longkoleal tañi domo mew. Kafey küdawngeafuy ti domo mew ñi doyümafiel tañi wentru ñi ngünenieaetew, welu ñi doyümnoafiel tañi pu chaw. Kafey pu we niewlu, küme yewlayafuy tañi afkadi ñi pu che engu.

⁵ Kafey rakiduamnge chumngechi ñi duamkülen ti kurewen ñiepüñeñkülele ti domo. Müna ayüwküleafuyngu chi, welu ka fill rakiduamküleafuyngu. Petu niepüñeñkülelu ti domo kam dew choyülu ramtuwafuyngu chumngechi ñi tremkülen ti pichiche. Kafey doy plata duamayngu. Ka choyüngele ti püñeñ, kaletuafuy pu chaw ñi mongen. Ti ñuke doy eluway ñi dapiafiel tañi pichi püñeñ. Feymu tati kurewen newe duamuwlayay chumngechi ñi femkefel. Kafey ti chaw fillke küdaw nierpuay, femngechi ñi eluafiel tañi domo ka tañi pichiche ñi duamnieel.

6-8. Kiñe kurewen pepi nienole pichikeche, ¿chumngechi duamnagafuy?

⁶ Kiñeke kurewen kangelu küdawngechi dungu mu rupayafuyngün. Rume ayüleafuyngün ñi nieal pichikeche, welu pepi nielayngün. Feymu ti domo pepi niepüñeñnole, rume weda duamküleafuy (Proverbios 13:12). Biblia ñi antü mew, pu domo rume falintukefuyngün ñi fütangeal ka nieal pichikeche. Feymu Rakel, Jakob tañi domo, rume kutrantupiwkelefuy pepi niepüñeñnolu am, welu tañi lamngen niefuy ñi pu püñeñ (Génesis 30:1, 2). Famülke mu, fentren trokiñ mapu mew pu che rume falintukefi ñi nieal fentren pichikeche. Feymu ramtukefingün tati pu kurewen wünelekelu amuldungun mew chumngelu ñi nienon pichikeche. Pu wünelekelu yafüluwkeyngün ñi küme kimelafiel chumngelu ñi  nienon, welu femlu rume, pu che feypikefi: “Müna weda, iñche kimnien tati lawen tamu nieal pichikeche”.

⁷ Kafey rakiduamnge tüfachi dungu mew. Kiñe lamngen Inglaterra mu rume küpa niepüñeñkülefuy. Feymu rume weda duamnagi kimlu ñi pepi niepüñeñnoal petu mülele Weküfü ñi ngünenieel. Fey kidu tañi wentru engu kintuyngu kiñe pichiche ñi püñeñyeafiel. Welu femlu rume, amulefuy ñi weñangkün. Kidu feypi: “Iñche kimniefun ñi trürnon iñche mu tañi tripan kiñe püñeñ, ka püñeñyeafiel kiñe pichiche iñche ñi choyünofiel”.

⁸ Kiñeke Biblia mew 1 Timotew 2:15 rakiduamelkefi pu che tati domo ñi montuluwal niele ta püñeñ. Welu tüfachi texto feypilay ti domo ñi llowal afnoachi mongen ñi nien mu püñeñ. Fey ¿chem rüf pengeli ti texto? Ti ñuke eluwkülele ñi dapiafiel tañi püñeñ ka tañi ruka, tüfa montulafeyew ñi dunguyechenoal ka reyükonkülenoal kakelu che ñi dungu mew (1 Timotew 5:13). Welu ti domo ka rupayafuy küdawngechi dungu mu tañi kurewen ka tañi pu che mew.

9. ¿Ka chem küdawngechi dungu mu rupayafuyngün pu kurewen?

⁹ Pu kurewen rupayafuyngün kangelu küdawngechi dungu mu: lale tañi afkadi. Fentren che rupay feychi dungu mew, rakiduamtukunofulu rume ñi layafel tañi afkadi. Welu pu poyekefilu ta Jewba rüf maneluwkeiñ pu layelu ñi wiñomongetual, tüfa müna yafültukukeeiñmew (Juan 5:28, 29). Biblia mew, taiñ Chaw Jewba fillke dungu feypikünueiñmew taiñ yafültukuaetew. Feymu fewla inaduamaiñ chumngechi kiñeke che poyekefilu ta Jewba llowingün kidu ñi yafüluwün, ka chumngechi tüfa kellueyew engün.

10. ¿Chem chumi Ana ñi yafüluwküleal? (Inaduamnge ti adentun pagina 3 mu.)

¹⁰ Inaduamaiñ ñi rupan Ana, Elkana ñi poyen domo. Kidu rume küpa niepüñeñfuy, welu pepi nielafuy. Welu tañi wentru ñi kangelu domo, Penina pingelu, niefuy fentren püñeñ. Biblia feypi: “Kiñe antü Elkana chalintukuy kiñe kulliñ, fey elufi kiñe trokiñ tañi domo Penina ka kom tañi pu püñeñ, welu elufi ta Ana kiñe doy küme trokiñ, kidu am piwkeyefilu ta Ana, welu Jewba elulaeyew ñi nieal püñeñ. Kafey tati kangelu domo Penina, Ana ñi notukaetew, rume ayentukefi tañi nüngayülafiel, Jewba ñi elunoetew mu püñeñ. Femngechi femkefuy fill tripantu mu, pürapukelu Ana Jewba ñi ruka mew. Fente ñi ayentukeetew ti kangelu domo, Ana ngümakefuy ka ikelafuy rume” (1 Samuel 1:4-7). Feymu, ¿chem chumi Ana ñi yafüluwküleal? Ngillatufi ta Jewba. Amuy chew ñi poyengeken ta Jewba, fey fentreñma llellipuy. Ngillatufi ta Jewba  ñi eluaetew kiñe püñeñ, ka maneluwi kidu mu ñi kelluaetew. Dew ngillatulu, doy küme duami ka tañi ange mu pengelwelay ñi weñangkün (1 Samuel 1:12, 17, 18). Ana kimniefuy Jewba ñi eluafetew kiñe püñeñ kam ñi yafültukuaetew chumngechi rume.

11. ¿Chumngechi kelluafeiñmew ti ngillatun?

¹¹ Kulpafe chengeiñ ka ti Weküfü ngüneniey ti Mapu, feymew rupayaiñ wedake dungu mu (1 Juan 5:19). Welu nieiñ kiñe kellun: ngillatuafuiñ ta Jewba, “taiñ yafülkeetew”. Femngechi femi Ana, kidu feypifi ta Jewba chumngechi ñi duamkülen, ka llellipufi ñi kelluaetew. Ka femngechi iñchiñ, feypiafuiñ ta Jewba chem wedake dungu mu rupamekeiñ. Welu fey ka müten no, ka llellipuafiyiñ taiñ kelluaetew ka feypiafiyiñ chumngechi taiñ duamkülen (Filipense 4:6, 7).

12. Ana rupalu rume wedake dungu mu, ¿chem kellueyew ñi ayüwküleal?

¹² Nienoliyiñ pichikeche kam lale kiñe taiñ piwkeyenieelchi che, rume weñangküafuiñ. Welu yafüluwküleafuiñ. Inaduamaiñ ñi femün ta Ana, Jesus ñi antü mu. Kidu regle tripantu yenielu ñi fütangeel, lay tañi wentru, ka nielafuy chi püñeñ. Welu, ¿chem kellueyew? Kidu nielu rume 84 tripantu, fentekünukelafuy tañi poyefiel ka llellipufiel ta Jewba ti ngillatuwe ruka mew (Luka 2:37). Tüfa yafültukueyew ka kellueyew ñi ayüwküleal, rupalu rume wedake dungu mu.

13. Taiñ pu che weñangküleliyiñmu, ¿chumngechi kelluafeiñmew taiñ kümeke weni?

¹³ Kafey pu kümeke weni ti trawünche mew yafültukuafeiñmew (Proverbios 18:24). Paula nielu kechu tripantu müten, tañi ñuke poyewelafi ta Jewba. Tüfa müna weñangküleyew ka rupay küdawngechi dungu mu. Welu kiñe ñaña wünelekelu amuldungun mu, Ann pingelu, yafültukufi ka duamtufi piwkeyen mu. Paula feypi: “Ann iñche tañi pu che no tati, welu piwkeyen mu dapikefenew, tüfa müna kelluenew ñi amuleal  tañi poyeafiel ta Jewba”. Tüfa wüla Paula rume ayüwkületuy ñi ñuke wiñotulu am trawünche mew. Kafey Ann rume ayüwküley kellukefilu am ta Paula ñi püntütripanoal Jewba mu.

14. Yafültukufiliyiñ kakelu che, ¿chumngechi kelluaeiñmew tüfa?

¹⁴ Eluwküleliyiñ ñi kümelkayafiel ta kakelu che, ngoymanentuafuiñ taiñ rupameken wedake dungu mu. Fentren lamngen fütangelu ka fütangenolu kütu, rume ayüwülkeeyew amuldungual tati kümeke dungu, kimnielu am engün ñi kellukefiel ta Jewba ka ñi femken kidu ñi ayükeel. Ka femngechi, amuldungufiliyiñ ti kümeke dungu, pengelaiñ taiñ duamtucheken. Ka kümeke dungu femfiliyiñ taiñ pu peñi ka pu lamngen,  doy weniyeafiyiñ (Filipense 2:4). Femngechi femi ti apostol Pablo, kidu kellufi ka yafültukufi tañi pu peñi ka pu lamngen, chumngechi kiñe ñuke kam kiñe chaw femkey tañi pichikeche mu (papeltunge 1 Tesalonisense 2:7, 11, 12).

15. ¿Iney müley ñi kimeltuafiel pu pichikeche Jewba ñi dungu?

¹⁵ ¿Chumngechi yafültukuafiyiñ tati pu reñmawen ti trawünche mew? Kiñeke mu, pu we konlu ti trawünche mew feypiafeiñmew taiñ kimeltuafiel ñi pu pichikeche Jewba ñi dungu kam taiñ chillkatual ti Biblia tañi pu yall engün. Welu Biblia pengeli Jewba ñi elfalkünufiel tati pu chaw ñi kimeltuafiel ka pepikayafiel tañi pu yall (Proverbios 23:22; Efesio 6:1-4). Kiñeke mu kelluafuiñ chi, welu pu chaw müley ñi kimeltuafiel tañi pu yall. Müna falin-ngey pu chaw ñi rumel nütramkayafiel tañi pu yall.

16. Chillkatuliyiñ kiñe pichiche engu, ¿chem femaiñ?

¹⁶ Kiñe chaw kam kiñe ñuke feypieliyiñmu taiñ kimeltuafiel ti Biblia tañi pichikeche, trokiwlayaiñ ti pichiche ñi chaw kam ñuke. Kafey kiñeke mu, feypingeafuiñ chi ñi kimeltulelafiel ti Biblia ta kiñe pichiche nienolu tañi pu chaw Jewba ñi trokiñche mu. Welu kümeafuy taiñ chillkatual kidu ñi ruka mew mülele tañi pu chaw kam kangelu küme peñi kam lamngen, kam chillkatuafuiñ chew ñi miyawken fentren che. Femngechi weda rakiduamel-layafiyiñ kakelu che. Ka rupale ta antü, pu chaw kimeltuafuyngün chi tañi pu yall Jewba mew.

17. Pu yall, ¿chumngechi yafültukuafuyngün tañi pu che?

¹⁷ Pu yall poyekefilu ta Jewba, ¿chumngechi yafültukuafuyngün tañi pu che? Müley ñi yamnieafiel tañi pu chaw ka küme küdawal ñi kelluafiel duamfalchi dungu mu. Ka femngechi, kelluafuyngün tañi pu che ñi küme weniyeafiel ta Jewba. Petu ñi rupanon ti Fütra Mangin Ko, Lamek poyekefuy ta Jewba. Kidu feypi tañi fotüm Noe mu: “Fey tüfa ta yafülaeiñmew reke taiñ fentre küdawken mew taiñ ketrayafiel ta mapu wesa malisialeluam ta mapu Ngünechen ñi piel mew”. Rupalu ti Fütra Mangin Ko, ti mapu malisialewelay, femngechi wechurpuy tüfachi pelon dungu (Génesis 5:29; 8:21). Pu yall püntütripanole Jewba mu, yafültukuafuyngün ka kelluafuyngün tañi pu che ñi newentuleal küdawngechi dungu mu famülke ka küpalechi antü mew.

18. ¿Chem dungu yafültukukeeiñmew?

¹⁸ Iñchiñ, Jewba ñi pu che ngen, ngillatukeiñ, rakiduamkeiñ Biblia ñi nütramkaelchi pu che mu, ka küme weniyekefiyiñ taiñ pu peñi ka lamngen, tüfa yafültukukeeiñmew. Biblia feypi: “Jewba fülmaniefi kom ñi pu mütrümkeetew, kom pu mütrümkeetew rüf dungu mu. Kidu elukefi ñi ayünieel tañi pu ekunieetew; llellipukelu engün kellun mu, kidu allkütukefi ka montulkefi” (Salmo 145:18, 19). ¡Rüf maneluwküleiñ llemay! Jewba eluwküley taiñ yafültukuaetew ka kelluaeiñmew taiñ newentuleal chem küdawngechi dungu mu rupaliyiñ rume.