1, 2. Jesus, ¿chem küpa feypi Juan 4:⁠35, 36?

JESUS miyawkefuy feychi lelfün chew ñi ngan-ngeel, fey petu choyümekefuy tati kawella peno (Juan 4:⁠3-6). Tüfachi ngan rupayafuy meli küyen tañi cosechangerpual. Welu Jesus feypi: “Eymün ta feypimün: ‘Petu müley meli küyen ñi puwal ta cosecha antü’. Welu iñche ta feypiwiyiñ: adkintumün tati lelfün, tati ngan dew lingarküley, puwi ñi cosechangeal” (Juan 4:⁠35, TNM; papeltunge Juan 4:⁠36). Pu allkütulu kangentupelayngün Jesus tañi feypin. ¿Chem küpa feypi chi?

² Tüfachi cosechan dungu mu, Jesus trürümpelafi ñi kintungeal tati pu kümeke che. Rakiduamnge chem ñi rupan feychi antü. Jesus amuldungulelfi kiñe samaria domo, fey ti domo fente küme allkütueyew. Feymu tati domo amuy ñi nütramkayafiel kakelu samariache ñi kimeltuletew Jesus, fey kidu engün ka küpayngün ñi allkütuafiel ta Jesus. Feymu kidu feypifi tañi pu inanieetew: “Tati ngan dew lingarküley, puwi ñi cosechangeal” (Juan 4:⁠9, 39-42). Feychi pu che rume ayüniefuyngün ñi allkütuafiel ta Jesus, feymu felefuyngün tati lelfün reke fülangkülelu tañi cosechangeal.

3. Küme rakiduamülmi pu che mu, ¿chem küla küme dungu femürpuaymi?

³ ¿Famülke mu kay? ¿Rakiduamkepeymi may ñi fülangkülen reke tati ngan ñi cosechangeal? Amuldungulelfilmi tati pu che, ¿rakiduamkeymi may ñi eluwkülen engün ñi inayafiel ta Jesus? Femngechi rakiduamülmi, küla küme dungu femürpuaymi: 1) Doy eluwküleaymi tami amuldungucheal. Tati cosecha antü pichiñmakey, feymu tati pu che pürüm müten eluwkey tañi küdawal. 2) Ayüwküleaymi tami küme allkütuetew tati pu che. Tati Biblia feypi pu che ayüwkey cosecha antü mu (Is. 9:⁠3). Ka 3) rakiduamaymi tati pu che ñi inanierpuafiel  ta Jesus, feymu nütramkayafimi pu che chem tañi duamnieel engün.

4. ¿Chem küla dungu ñi femün Pablo ngüneduamaiñ?

⁴ Kiñeke che inakefilu ta Jesus rakiduamkefuy chi: “Pu samariache turpu allkütulayay Jesus ñi kimeltuel”. Welu Jesus rakiduamkefuy tati pu samariache ñi inanieaetew. Iñchiñ ka femngechi rakiduamaiñ kom tati pu che mu. Kümeafuy taiñ inayentuafiel ñi femün ta Pablo. Feymu tüfachi chillkatun mu ngüneduamaiñ küla dungu ñi femün: 1) Pablo kimniefuy chem ñi feyentukeel pu che. 2) Inaduamkefuy chem ñi ayükeel engün. Ka 3) rakiduamkefuy tati pu che ñi inanierpuafiel ta Jesus.

5. Pablo, ¿chumngelu (chemu) kimniefuy chumngechi ñi amuldungulelafiel pu judio?

⁵ Pablo amuldungukefuy pu judio tañi sinagoga mu, kiñe sinagoga mülefuy Tesalonika waria mu. Üyew sabado antü mu, Pablo küla semana mu nütramkalelkefi tati pu judio. “Nütramkaley tati Wirin Chillka dungu mew” (Hecho 17:⁠1, 2). Pichikalu Pablo, kimeltulelngey pu judio tañi wimtun. Feymu küme duamkepelafuy tati sinagoga mu (Hecho 26:⁠4, 5). Pablo kimniefuy chem mongen ñi niekefel pu judio, feymu kimniefuy chumngechi ñi amuldungulelafiel engün (Filip. 3:⁠4, 5).

6. Tati sinagoga che, ¿chumngechi trürlafuy tati pu mülelu ti mercado mew?

⁶ Rupachi antü mu, Pablo puwi ta Atena waria mu. Üye mu, ka femngechi nütramkakefuy sinagoga mew tati pu judio engün, ka ti kakelu che engün feyentukelu Ngünechen mew (Hecho 17:⁠17). Fey wüla, amuy ñi amuldungulelafiel tati pu che mercado mu, welu kidu engün ka feyentun nierkefuyngün. Mülerkey kiñeke fütrake kim wentru ka kiñeke judio tuwün-ngenolu, feymu “we kimeltun” trokifingün Pablo ñi amuldunguyawün. Fey feypifingün: “Fütra kalechi dungu ta feypimukeiñ ta eymi” (Hecho 17:⁠18-20).

7. Ñi feypin Hecho 17:⁠22, 23, ¿chumngechi amuldungulelfi Pablo tati pu atenache?

⁷ (Papeltunge Hecho 17:⁠22, 23). Pablo chumngechi ñi dungufiel tati sinagoga che, femngechi dungulafi tati pu atenache. Atena waria mu, Pablo küme ngüneduami ñi chumlen tati waria ka chem wimtun ka feyentun ñi niekefel tati pu che. Kiñeke dungu ñi feyentukefel feychi pu che kiñewküley Biblia tañi kimeltukeel mu, feymu Pablo wüne nütramkay feychi dungu mu. Tüfachi pu atenache poyekelafuyngün ta Chaw Ngünechen, welu poyekefuyngün kiñe kimnoelchi Ngünechen. Feymu Pablo feypi ñi amuldunguyawün kidu engün ñi kimnoelchi Ngünechen mew.  Tüfachi pu che mülelu Atena waria mu kimkelafuyngün tati Wirin Chillka, welu Pablo rakiduamlay ñi allkütunoaetew engün. Doy may rakiduami tüfachi pu che eluwkülefuy chi ñi inayafiel ta Jesus.

8. 1) ¿Chumngechi kimafuymi chem ñi feyentukeel tati pu che? 2) Feypingelmi: “Iñche ka amuken iglesia mu”, ¿chem piafuymi?

⁸ Pablo reke, inaduamaymi chem ñi feyentukeel tati pu che. Tami kimal tüfachi dungu, ngüneduamnge chumngechi künukey tati pu che tañi ruka ka tañi auto. Kafey inaduamafuymi ñi iney pingen tati che, chumngechi ñi tukutuwkülen ka chumngechi ñi dunguken, femngechi kimürpuafuymi chem feyentukey tati che. Kiñeke che feypifemkey müten: “Iñche ka amuken iglesia mu”. Femngechi feypingelmi, feypiafuymi tati che: “Kiduke iñchiñ dulliafuiñ iney taiñ poyeafiel, welu küpa nütramkafeyu kiñe müna küme dungu”.

9. Pu che, ¿chem feyentun mew kiñewküleafuy Biblia tañi kimeltukeel mu?

⁹ Feychi pu che nielu tañi religion, ¿chem nütramkalelafuymi? Rakiduamnge chem dungu ñi feyentukeel tati che kiñewküley Biblia tañi kimeltukeel mu. Tati pu che feyentuafuy ñi kiñelen ta Chaw Dios, feyentuafuy Jesus tañi montulchefe ngen ka feyentuafuy pichiñma mu ñi afal kom wedake dungu. Dew kimülmi chem ñi feyentukeel tati che, amuldungulelfinge chem tañi ayükeel.

10. ¿Chem mülefuy taiñ ngüneduamal amuldungun mu? ¿Chumngelu am?

¹⁰ Kiñeke che feyentukelayngün kom ñi feypingeel tañi religion mu. Feymu dew kimülmi chem religion ñi inakeel kiñe che, ka mülefuy tami ngüneduamafiel chem ñi rüf feyentukeel tati che. Ngüneduamaiñ ñi femken kiñeke peñi ka lamngen. Kiñe lamngen feypi: “Kiñeke che feypikey: ‘Nien tañi religion’, welu feypitripakeyngün ñi rüf feyentukenon Ngünechen mu”. Kangelu peñi wünelekelu amuldungun mu, feypi: “Kiñeke che feypikey ñi feyentukeel tati Trinidad pingechi kimeltun mu, welu wenche feyentukeyngün müten. Tañi kimfiel tüfa, kellukeenew ñi doy küme kimal chem ñi nütramkayafiel ti che” pikey. Feymu eluwnge tami kimal chem rüf feyentukey ti che. Femngechi inayentuafuymi Pablo ñi femün, kidu küme dullikey chem ñi nütramkayafiel kake kiñeke pu che, femngechi tañi konal tañi piwke mu (1 Kor. 9:⁠19-23).

11. Ñi feypin Hecho 14:⁠14-17, ¿chumngechi amuldungulelfi Pablo tati pu che mülelu Listra?

¹¹ (Papeltunge Hecho 14:⁠14-17). Pablo ngüneduamkefuy chem ñi ayükeel tati pu che, fey amuldungulelkefuy feychi dungu mu. Ngüneduamnge chem ñi rupan Listra pingechi  waria mu. Kiñeke che mülelu feychi waria mu kimkelafuy tati Wirin Chillka, kakelu che ella kimkefuy müten. Fey, ¿chumi kay Pablo? Feypifi feychi pu che Chaw Dios ñi elel ta küme ketran, ñi ayüwküleal tati pu che. Femngechi Pablo nütramkafi fey engün ñi kimnieelchi dungu mew, fey ñi pürüm adümal engün tañi feypin.

12. ¿Chumngechi ngüneduamafuymi chem ñi ayükeel tati pu che?

¹² Feymu amuldungun mu, küme ngüneduamnge chem ñi ayükeel tati pu che, fey nütramkayafimi chem ñi duamtunieel engün. ¿Chumngechi femafuymi tüfa? Epe puwkülelmi kiñe che tañi ruka mu, küme ngüneduamnge tañi chummeken. Kiñeke che küdawmekey tañi huerta mu, küme elkünumekey tañi ruka ka tañi auto, ka mekey fillke duam mu. Kümefule, entuafuymi nütramkan tati pu che ñi femmeken mu (Juan 4:⁠7). Chumngechi ñi tukutuwkülen tati che, kiñeke mu pengelafeiñmu chew tañi tuwün, ñi chumken ka chem deporte tañi ayükeel. Kiñe peñi Gustavo pingelu, feypi: “Nütramkafiñ kiñe weche wentru, tañi polera mu pengelküley kiñe cantante. ‘Kümey tami polera’ pifiñ, fey kidu feypienew chumngelu ñi ayükefiel feychi cantante. Tayu nütramkan mu, tati weche eluwi ñi chillkatual ta Biblia. Fewla poyeniefi ta Jewba”.

13. Feypifilmi pu che ñi chillkatual ti Biblia, ¿chem rakiduamtukuafuymi?

¹³ Feypifilmi pu che ñi chillkatual ti Biblia, rakiduamtukunge chem ñi ayükeel tati pu che, femngechi tami feypin mu ayürpuafuyngün ñi chillkatual ta Biblia (Juan 4:⁠13-15). Nütramkayaiñ ñi femün kiñe lamngen. Amuldunguyawlu, küme allkütueyew kiñe domo, fey “konpange” pieyew. Konpulu taiñ lamngen tati ruka mu, ngüneduami ñi profesora ngen tati domo. Feymu taiñ lamngen feypi: “Iñchiñ niekeiñ trawün ka chillkatulelkefiyiñ Biblia tati pu che, femngechi kimeltuchekeiñ”. Feymu ti domo eluwi ñi chillkatulelngeal Biblia. Ka antü mu amuy kiñe trawün mew, ka pichi rupalu amuy kiñe fütra trawün mu. Kiñe tripantu rupalu,  fautisawi. Feymu kümeafuy tami ramtuwal: “Feychi pu che tañi pemekefiel, ¿chem ayükey ñi nütramkayal engün? ¿Chem feypiafun tati pu che, fey ñi ayünieal chillkatual ta Biblia?”.

14. Chillkatulelfilmi Biblia tati pu che, ¿chem mülefuy tami femal?

¹⁴ Ka femngechi chillkatulelfilmi Biblia tati pu che, mülefuy tami küme pepikawal, fey longkontukuaymi chem ñi duamnieel kake kiñeke pu chillkatukelu. Pepikawülmi, küme dulliaymi chem texto tami papeltual, chem video tami pengelal ka chem pengelün dungu tami entual. Ramtuwnge: “¿Chem piafun tati chillkatukelu ñi puwal tañi piwke mu?” (Prov. 16:⁠23). Kiñe lamngen Flora pingelu, chillkatulelkefuy Biblia ta kiñe domo. Welu ti domo feypieyew: “Rüfngepeafuy pu layelu ñi wiñomongetual”. Taiñ lamngen feypilafi tati domo ñi feyentual feychi kimeltun mu. Doy may taiñ lamngen rakiduami: “Wünelu mu, tati domo mülefuy ñi küme kimafiel ta Ngünechen, femngechi feyenturpuafuy ñi wiñomongetual pu layelu”. Feymu fill rupa tañi chillkatun engu, taiñ lamngen pengelelfi ti domo Jewba ñi piwkeyechen, ñi fütra kimün ka ñi newen-ngen. Pichi rupalu müten, tati domo feyenturpuy ñi wiñomongetual pu layelu. Fewla koneltuley Jewba tañi trokiñche mu.

15. 1) Ñi feypin Hecho 17:⁠16-18, ¿chumkefuy tati pu atenache? 2) ¿Chumngelu Pablo fentekünulay ñi amuldungulelafiel tati pu atenache?

¹⁵ (Papeltunge Hecho 17:⁠16-18). Tati pu atenache poyekefuy koylake dios, yeniekefuy podngechi mongen ka inakefuy koylake kimeltun. Kafey kiñeke engün lukatufingün ta Pablo, welu kidu fentekünulay ñi amuldungulelafiel engün. ¿Chumngelu am? Petu ñi cristiano ngenon Pablo, küme mongen yenielafuy, feymu feypi: “Iñche rume weda kayñetukefuiñ ta Kristo ñi küme dungu, inantukukayñetukefuiñ ka weda lukatukefuiñ” (1 Tim. 1:⁠13). Pablo ayükelafuy rume Kristo ñi küme dungu, welu Jesus rakiduami ñi inayaetew. Ka femngechi Pablo rakiduami tati pu atenache ñi inanierpuafiel ta Jesus. ¡Felerkey may! Rupachi antü mu, kiñeke atenache cristiano ngerpuyngün (Hecho 9:⁠13-15; 17:⁠34).

16, 17. ¿Chumngelu feypiafuiñ chem che rume inanierpuafuy ta Jesus? Feypinge kiñe rupan dungu.

¹⁶ Pablo ñi antü mu, fentren pu che inakefuy ta Jesus, weda mongen niekefule rume. Pablo feypi kiñeke cristiano mülelu Korinto waria mu weñefe ngefuyngün kuyfi ka rume podngechi mongen yeniekefuyngün, welu ka feypifi: “Femngechi chengekefuymün kiñekentu eymün ta kuyfi mew, welu fewla dew liftungetuymün reke” (1 Kor. 6:⁠9-11). Mülefulmi Pablo ñi antü mew, ¿rakiduampeafuymi may feychi pu che ñi cristiano ngerpual?

¹⁷ Famülke mu, fentren che küme elkünutukey tañi mongen, femngechi tañi inayafiel ta Jesus. Nütramkayaiñ ñi femün kiñe lamngen Yukina pingelu, wünelekey amuldungun mu. Kiñe antü, pefi kiñe üllcha domo wirikanielu tañi trawa tatuaje mu. Pichi llükafalngefuy ñi ad tüfachi domo, feymu ellaka mu taiñ lamngen ayülafuy tañi nütramkayafiel. Femngelu rume, nütramkafi müten tati domo, fey kimürpuy tati üllcha domo ñi rume duamtukefiel tati Biblia. Tati üllcha domo wirinierkefuy kiñeke salmo tañi cuerpo mu. Kidu eluwi ñi chillkatual tati Biblia ka eluwi ñi amual taiñ trawün mu.⁠ *

18. ¿Chumngelu müley taiñ amuldungulelafiel itrokom pu che?

 ¹⁸ Chumngechi taiñ ngüneduampeel, Jesus feypi: “Adkintumün tati lelfün, tati ngan dew lingarküley, puwi ñi cosechangeal”. Welu Jesus rakiduamkelafuy kom pu che tañi inayaetew. Tati Biblia dew feypilefuy fentren che ñi allkütunoafiel ta Jesus (Juan 12:⁠37, 38). Kafey Jesus küme kimniefuy chem ñi rakiduamkülen tati pu che, feymu kimafuy iney tañi allkütunoaetew (Mat. 9:⁠4). Welu Jesus ayüwünkechi amuldungulelfi itrokom pu che, femngechi ñi peafiel pu küme piwkengelu. Famülke mu, iñchiñ kimnielaiñ chem ñi rakiduamkülen tati pu che, feymu doyelchi may müley taiñ amuldungulelafiel itrokom pu che. Kafey müley taiñ rakiduamal kom che eluwafuy ñi cristiano ngerpual. Kiñe peñi Marc pingelu, amuldungukey ka mapu, kidu feypi: “Iñche rüf rakiduamkefun kiñeke che ñi poyerpuafiel ta Jewba, welu rupachi antü mu, piwekelayngün ñi papeltual engün tati Biblia. Kakelu che rakiduamkelafun tañi poyerpuafiel ta Jewba. Rupan mu chi antü, kidu engün keta poyerpukefi ta Jewba. Feymu doy kümey eluwal Jewba taiñ kelluaetew, femngechi taiñ peafiel feychi pu che küme piwkengelu”.

19. Amuldungulelfiliyiñ tati pu che, ¿chem rakiduamaiñ?

¹⁹ Kiñeke ta iñchiñ feypiafuiñ: “Chew taiñ amuldunguken, tati pu che eluwkülelay ñi inayafiel ta Jesus”. Welu longkontukuaiñ, Jesus feypi fentren che eluwküley tañi inayaetew. Feymu tati pu che küme elkünutuafuy tañi rakiduam, fey ñi inayafiel ta Jesus. Jewba maneluwkey ñi kimaetew tüfachi pu che, feymu rume falintukefi engün (Ageo 2:⁠7). Feley llemay, Jewba ka Jesus küme rakiduamkey tati pu che mu, feymu ka femngechi femaiñ iñchiñ. Eluwaiñ taiñ kimal chem ñi rüf ayükeel tati pu che. Amuldungulelfiliyiñ tati pu che, “tüfa engün ka piwkeyerpuafuy ta Jewba” piafuiñ taiñ rakiduam mu.