1. 1) Taiñ peñi Russell ka kiñeke wentru, ¿chumngechi chillkatukefuyngün ti Biblia? 2) ¿Chumngelu fente kümey ñi chillkatun tüfachi pu wentru?

DOY pataka tripantu rupalu, Charles Russell ka kiñeke wentru trawükefuyngün ñi chillkatual ta Biblia, femngechi ñi kimal chem kimeltukey Biblia Chaw Dios mu, Jesus mu ka kakelu falinke kimeltun. ¿Chumngechi chillkatukefuyngün ti Biblia? Trawüluwlu engün, kiñe wentru entukefuy kiñe ramtun, fey kiñentrür ngüneduamkefuyngün chem piley tati Biblia feychi kimeltun mu. Fey wirintukukefuyngün chem tañi ngüneduamürpun. Jewba kellufi feychi pu wentru ñi kimürpual falinke kimeltun Biblia mu. Fentren tripantu rupafuy rume, feychi kimeltun amuley taiñ kellukeetew.

2. ¿Chumngelu küdawngey adümngeal tati profecia Biblia mu mülelu?

² Pepilfali chem rüf kimeltukey Biblia, welu doy küdawngey adümngeal kuyfi mu feypikünungeelchi dungu, profecia pingelu. ¿Chumngelu am? Petu ñi femtripanon kiñe profecia, doy küdawngey adümngeal chem ñi feypilen. Kafey küme ngüneduamngenole kom ñi feypilen ti profecia, welu adümngeafuy. Feymu iñchiñ welu adümkefuiñ ñi feypilen Joel capitulo 1 ka 2. Fewla ngüneduamaiñ chem ñi feypikünuel feychi lifru, fey kimaiñ chumngelu mülefuy taiñ doy küme adümafiel.

3, 4. ¿Chem rakiduamkefuiñ ñi feypilen Joel 2:⁠7-9?

³ Biblia feypi: “Feychi chori [langosta] lefkontukeyngün weychafe reke, ka pürakeyngün fütrake malal mu chumngechi ñi femken tati pu weychafe. Kake kiñeke ti pu chori nor amukey ka kiñepülekünuwkelay tañi rüpü mew engün. Welukonke tronküwkelayngün, doy may inakeyngün kiduke  ñi rüpü. Kiñeke chori allfülkangele ka langümngele rume, kakelu püntüwkelayngün. Wünwünkonkeyngün waria mew, lefkiyawkeyngün wechun ti kura malal mew. Pürakeyngün ñi konpual tati ruka mew, fey konpukeyngün tati fentana mu chumngechi ñi konpuken pu weñefe” (Joel 2:⁠7-9). Joel feypikünuy fentren chori ñi wedalkayafiel ta Israel. Feychi pu chori niey ayewe foro trapial reke, ka nieyngün trangatranga trapial reke, femngechi ñi apümkayafiel kom tati kachu mülelu Israel mew (Joel 1:⁠4, 6). Tati chori turpu afeluwkelay, ka femngechi iñchiñ turpu afeluwkelaiñ taiñ amuldungual, feymu rakiduamkefuiñ ñi feypin Joel adentuley taiñ amuldungun küdaw. Kafey rakiduamkefuiñ feychi mapu wedalkangelu adentuley feychi pu che inakefilu koylake religion.⁠ *

⁴ Kuyfi ngüneduamkefuiñ Joel capitulo 2, versiculo 7 puwlu 9 müten, feymu rakiduamkefuiñ ñi adentulen ti amuldungun küdaw. Welu fewla ngüneduamiyiñ kom ñi feypikünuel feychi profecia, feymu kimürpuiñ ñi adentulen ka dungu, fey welulkalefuy chumngechi taiñ adümkefel ñi feypin Joel. ¿Chumngelu? Fewla inaduamafiyiñ.

5, 6. 1) Ñi feypin Joel 2:⁠20, ¿chumngelu adentulelay tati pu amuldungukelu? 2) Ñi feypin Joel 2:⁠25, ¿ chumngelu adentulelay tati pu amuldungukelu?

⁵ Kuyfi rakiduamkefuiñ tati chori adentuley tati pu amuldungukelu, welu tüfachi dungu feyngelayafuy. ¿Chumngelu? Ngüneduamnge, Jewba feypikünuy: “Iñche alü kamapukünutuafiñ” tati pu chori (Joel 2:⁠20). Tati chori adentulefule tati pu amuldungukelu, feytachi versiculo feypiafuy Jewba ñi alü kamapukünutuafiel tañi pu poyekeetew. Welu Jewba turpu femngechi femlayafuy tañi pu che (Ezeq. 33:⁠7-9; Mat. 28:⁠19, 20). Doy may, Jewba kiñepülekünukefi feychi pu che wedalkafilu tañi trokiñche.

⁶ Ngüneduamnge ka kiñe dungu. Jewba feypi: “Kiñe trokiñ weychafe reke, iñche werküleluwiyiñ tati chori, tati weke chori, tati chori apümkakelu ka ti chori tuwedakenolu. Fentren tripantu apümingün kom tamün nganel, feymu iñche kom kullileluwayiñ” (Joel 2:⁠25). ¿Inaduamimi feyti? Jewba feypifi pu israelche ñi kullilelafiel kom tañi wedalkaetew pu chori. Tati chori adentulefule tati pu amuldungukelu, feytachi versiculo feypiafuy ñi wedalkacheken taiñ amuldungun küdaw. Welu, ¡feyngelay tati! Doy may taiñ amuldungun kellukefi pu che tañi montual. Allkütule pu che, müna kümelkayafuyngün (Eze. 33:⁠8, 19).

7. Ñi feypin Joel 2:⁠28, 29, ¿chumngechi pengelkey tati pu chori adentulelay pu amuldungukelu?

⁷ ¿Ka chem dungu pengelkey ñi feypin Joel adentulelay tati pu amuldungukelu? Jewba feypi: “Fey wüla, eluafiñ tañi newen ta kom che. Fey tamün pu fotüm ka pu ñawe dunguayngün iñche tañi werküfielchi dungu, tamün fütakeche pewmayayngün ka tamün wechekeche pengelelngeay chem ñi rupayal. Feychi antü mu, ka eluafiñ tañi newen feychi pu illam wentru ka pu illam domo tañi küdawelkeetew” (Joel 2:⁠28, 29). ¿Ngüneduamimi? Jewba feypi: “Fey wüla, eluafiñ tañi newen ta kom che”. Tüfa pengeli Jewba ñi wülal tañi newen dew ñi wechurpun tañi küdaw tati pu chori. Tati chori  adentulefule tati pu amuldungukelu, feytachi versiculo feypiafuy Jewba ñi eluafiel ñi newen tati pu amuldungukelu dew ñi wechurpun tañi küdaw. Welu taiñ pu peñi ka pu lamngen nienofule Jewba tañi newen, fente amuldungulayafuy engün. Kidu engün fentren tripantu kayñetungey, welu amulerpuyngün tañi amuldungumeken.

8. Ñi feypin Apokalipsi 9:⁠1-11, ¿iney engün adentuley tati pu chori? (Inaduamnge ti adentun wenulelu).

⁸ Ti lifru Apokalipsi ka nütramkay tati pu chori mu (papeltunge Apokalipsi 9:⁠1-11). Kuyfi rakiduamkefuiñ ñi feypin Joel nüwküley tañi feypin Apokalipsi, feymu trürümkefuiñ taiñ amuldungun mu. Welu ti lifru Apokalipsi nütramkay kiñeke chori “longko mew niey engün allwe oro corona femngerumelu, fey tañi ange che femngerumey” (Apok. 9:⁠7). Feychi pu chori kechu küyen kutrankarkeafulu pu wedake che “nienolu Ngünechen tañi marca ñi tol mew” (Apok. 9:⁠4, 5). Feychi dungu adentuley ñi femken pu dullin cristiano. Kidu engün newen piwke mu wüldungukeyngün ñi afal kom ñi ngünenieel tati Weküfü, femngechi kutrankakefingün reke Weküfü ñi pu inanieetew.

9. Ñi feypin Joel ka Apokalipsi, ¿chem dungu mu trürlay?

⁹ Kiñeke dungu mu trüri ñi feypin Joel ka ñi feypin Apokalipsi, welu ka kiñeke dungu mu trürlay. Ngüneduamaiñ kiñeke dungu. Joel feypi tati pu chori ñi apümkafiel ti kachu (Joel 1:⁠4, 6, 7). Welu Apokalipsi feypi tati chori “werküngey engün tañi üñfitunoafiel ti kachu müleyelu ta mapu mew” (Apok. 9:⁠4). Joel feypi pikun (norte) püle ñi  küpan tati pu chori (Joel 2:⁠20). Welu Apokalipsi feypi tati chori tripay ti fütrakonchi lolo mew (Apok. 9:⁠2, 3). Joel feypi tati pu chori alü kamapu püntünentungey. Welu Apokalipsi feypi tati chori elungey ñi wechurpual tañi küdaw. Feymu feypiafuiñ Jewba ayüwi tañi femün mu tüfachi pu chori ñi feypiel Apokalipsi (inaduamnge ti wichulechi dungu “ Ñi feypin epu lifru pu chori mu, ¿chumngelu trürngelayngu?”).

10. ¿Chumngelu feypiafuiñ kiñeke pengelün dungu adentuley epurume dungu?

¹⁰ Fütra trürlay ñi feypin Joel ka ñi feypin Apokalipsi, feymu feypiafuiñ ñi nüwkülenon tüfachi epu dungu. Tati chori ñi feypiel Joel adentuley kiñe dungu, welu tati chori ñi feypiel Apokalipsi ka dungu adentuley. Biblia mew, kiñeke pengelün dungu trüri ta kangelu pengelün dungu ñi feypiel, welu kiñeke mu adentuley epurume dungu. Fewla ngüneduamaiñ kiñe tüfachi pengelün dungu. Ti lifru Apokalipsi feypi Jesus “fey tati trapial reke felelu, tati mülelu Juda” (Apok. 5:⁠5). Welu tati lifru Wünen Pedro feypi tati Weküfü fey ta “ñawawkiyawchi trapial reke femyawlu” (1 Ped. 5:⁠8). Fantepu mew taiñ ngüneduampeel tüfachi chillkatun mu, mülefuy taiñ doy küme adümafiel ñi feypin ti lifru Joel.

11. Ñi feypin Joel 1:⁠6 ka 2:⁠1, 8, 11, ¿iney engün adentuley ti pu chori?

¹¹ Kakelu dungu ñi wirintukuel Joel pengeli tati chori adentuley ñi femürkeafel kiñe trokiñ weychafe (Joel 1:⁠6; 2:⁠1, 8, 11). Jewba feypi ñi adnieafiel kiñe “trokiñ weychafe”, fey ñi castigayafiel pu israelche tañi feyentunoetew. Feychi trokiñ weychafe Babilonia tuwün-ngey (Joel 2:⁠25). Kidu engün konpuyngün ta Israel pikun mapu püle, feymu ti lifru Joel feypi tati pu chori ñi küparkeafel pikun püle (Joel 2:⁠20). Feychi trokiñ weychafe trürümngeafuy ta kiñe fütra llamllam chori küme adümuwkülelu. Feymu Joel feypi kake kiñeke weychafe “inakeyngün kiduke ñi rüpü”. “Wünwünkonkeyngün waria mew, lefkiyawkeyngün wechun ti kura malal mew. Pürakeyngün ñi konpual tati ruka mew, fey konpukeyngün tati fentana mu chumngechi ñi konpuken pu weñefe” (Joel 2:⁠8, 9). Tüfa rakiduameleiñmu ñi femün pu babiloniache. Fill püle mülerkefuy ta weychafe, ka chew rume mülewelafuy tañi ellkawam pu israelche, iney no rume montulay tati pu weychafe mew.

12. ¿Chumngechi femtriparpuy Joel ñi feypikünuel?

¹² Ngüneduamaiñ chumngechi femtriparpuy ñi feypikünuel Joel. Babilonia ñi pu weychafe, caldeo ka feypingekey. Tüfa engün chori reke, konpuyngün Jerusalen waria mew 607 tripantu mew petu ñi mülepanon Jesus. Biblia feypi: “Ngünechen werküfi pu caldeo ñi longko, femngechi ñi apümkayafiel feychi pu israelche. Fey langümyengey fütra cuchillo mu tati pu weche [...]. Pichi no rume ngünayelafi tati pu weche ka tati pu üllchake domo ka pu putremche ka pu kutrankülelu no rume. Ngünechen kom eluyefi tati longko ülmen, femngechi ñi femal kidu tañi piel”. “Kidu lüpümfi Ngünechen tañi ngillatuwe ruka, melarulpafi Jerusalen tañi kura malal, lüpümtukufi tati fütrake ülmen ñi ruka ka wichafkafi kom tati mülelu” (2 Crón. 36:⁠17, 19). Dew apümkangelu Jerusalen waria, pu che feypilewey: “Ti mapu wellilewey, ngewelay che, kulliñ rume ngewelay. Tüfachi mapu elungey tati pu caldeo” (Jer. 32:⁠43).

13. ¿Chem kimeltukeeiñmu ñi feypin Jeremías 16:⁠16, 18?

 ¹³ Doy 200 tripantu dew ñi wirintukuel Joel chem tañi rupayal, Jewba ka feypifi ta Jeremia ka chem dungu ñi rupayafel feychi antü tañi nüngeal ta Jerusalen. Jewba feypi tati pu weychafe ñi küme kintuafiel kom pu wedake israelche, femngechi tañi nüafiel kom tüfa engün. Chaw Ngünechen feypi: “Mütrümafiñ fentren challwafe, fey tüfa engün nüafingün tati pu israelche. Fey wüla, mütrümafiñ fentren pu nükelu pu awka kulliñ, fey tüfa engün nüafingün tati pu israelche chew rume tañi mülen, mawidantu mu, wingkul mu, kafey chew ñi triralen pu kura kütu”. Jewba ka feypi ñi wedalkayafiel pu israelche tañi culpan mew. Chew rume ellkawfule pu culpafe israelche, peafeyew pu babilonia ñi weychafe (Jer. 16:⁠16, 18).

14. ¿Chumül wechurpuy ñi feypin Joel 2:⁠28, 29?

¹⁴ Joel ka feypi ti mapu ñi wiño wültual ñi fün (Joel 2:⁠23-26). Ka feypi ñi mületual fentren kimün Jewba mew küpalu. Jewba feypi: “Eluafiñ tañi newen ta kom che. Fey tamün pu fotüm ka pu ñawe dunguayngün iñche tañi werküfielchi dungu [...]. Feychi antü mu, ka eluafiñ tañi newen feychi pu illam wentru ka pu illam domo tañi küdawelkeetew” (Joel 2:⁠28, 29). Welu feychi dungu femtripalay tripatulu pu israelche Babilonia mu. Doy may tüfachi dungu wechurpuy tati Pentekoste 33 tripantu mew. ¿Chumngechi kimnieiñ tüfachi dungu?

15. Pedro ñi feypin Hecho 2:⁠16, 17, ¿chumngechi doy küme kimfalkünufi ñi feypin Joel?

¹⁵ Chaw Ngünechen tañi adkünuel mew, feychi Pentekoste 33 tripantu mew Pedro feypi ñi femtripan Joel capitulo 2, versiculo  28 ka 29. Puliwen mu, Ngünechen elufi ñi newen tati pu trawülelu, fey dungurkeyngün “Ngünechen ñi afman-ngechi dungu” (Hecho 2:⁠11). Feychi antü mu, Pedro ka wiño feypi Joel ñi feypiel, welu doy küme kimfalkünufi (papeltunge Hecho 2:⁠16, 17). Joel wirintukuy Chaw Ngünechen ñi feypiel: “Fey wüla, eluafiñ tañi newen ta kom che”. Welu Pedro wirintukuy: ‘Kiñe mufülewechi antü mew, wülan tañi newen kom che mew’. Feychi “mufülewechi antü” pengeli ñi fülkülepan ñi apümkangeal ta Jerusalen. Feymu kimnieiñ ñi rupan fentren tripantu tañi wechurpual ñi feypikünuel Joel.

16. 1) Jewba ñi newen mu, ¿chumingün tati pu wünenke cristiano? 2) Famülke mu, ¿chumngechi amuley taiñ amuldungun küdaw?

¹⁶ Feychi Pentekoste 33 tripantu mew, Jewba elufi ñi newen tati pu wünenke cristiano, feymu alü kamapu puwingün tañi amuldungual. Pablo pefilu tüfa, feypi tati amuldungun puwi fentren trokiñke mapu mu feychi antü mu (Kol. 1:⁠23). Famülke mu Jewba tañi newen mew, tati amuldungun küdaw puwkey “tuntepu ñi mülen ta mapu” (Hecho 13:⁠47; inaduamnge ti wichulechi dungu “ ‘Eluafiñ tañi newen’ tañi pu poyekeetew”).

17. ¿Chumngechi adümfiyiñ wüla ñi feypin Joel?

¹⁷ Fewla doy küme adümfiyiñ ñi feypin Joel capitulo 2, versiculo 7 puwlu 9. Tüfachi versiculo adentulelay taiñ amuldungun küdaw, doy may adentuley ñi femün Babilonia ñi pu weychafe. 607 tripantu mew, kidu engün nüfingün Jerusalen waria.

18. Fantepu mew, ¿chem amuleiñ taiñ femken?

¹⁸ Fantepu mew, Chaw Ngünechen tañi pu che ngen fillke dungu femkeiñ taiñ amuldungucheal ti kümeke dungu (Mat. 24:⁠14). Kiñeke gobierno küpa katrütukeeiñmu, welu iñchiñ amuleiñ taiñ amuldungumeken. Jewba tañi kellun mu amuldungulelkefiyiñ itrokom pu che Ngünechen tañi kümeke dungu. Ñom piwke mu eluwkeiñ taiñ kimeltuaetew Jewba, femngechi taiñ küme adümafiel Biblia ñi feypikünuel. Chaw Ngünechen kimeltuaeiñmew “kom rüfngechi dungu” puwchi antü mew (Juan 16:⁠13).