1. Iñchiñ mu, ¿chem ngüneduamkey Jewba?

“JEWBA ayüwülkeeyew tañi pu che” (Sal. 149:⁠4). Taiñ kimfiel tüfa, rume küme duamelkeeiñmu. Chaw Jewba ngüneduamkeeiñmu taiñ küme femken, chem taiñ femürpuafel ka kellukeeiñmu taiñ weniyeafiel. Femliyiñ Chaw Dios tañi ayükeel, chumkawnorume kidukünulayaeiñmu (Juan 6:⁠44).

2. Kiñeke peñi, lamngen, ¿chumngelu Jewba piwkeyenoetew trokiwkeyngün?

² Kiñeke peñi, lamngen rakiduamafuy chi: “Jewba piwkeyeniefi tañi pu che, welu iñche piwkeyepeafenew chi”. ¿Chumngelu femngechi rakiduamkeyngün? Taiñ kimal, peafiyiñ ñi rupan epu lamngen. Kiñe lamngen Oksana pingelu,⁠ * rume kutrankawi pichikalu. Feypi: “Dew fautizawlu iñche, wünelerpun amuldungun mu, fey rume ayüwkülefun. Welu 15 tripantu rupalu, acordarumetun wedake dungu ñi rupan kuyfi, fey weda duamkülewen. Feymu rakiduamün ‘weniyewelaenew ta Jewba’. Fey falilan tañi piwkeyeaetew” pi taiñ lamngen. Ka femngechi dungu mu rupay kiñe lamngen, Yua pingelu, wünelekey amuldungun mu. Rume kutrankawi petu pichikalu, fey feypi: “Ayülefun ñi ayüwülafiel ta Jewba, feymu eluwün ñi serfiafiel. Welu ‘Jewba turpu piwkeyelayaenew’ pikefun” pi taiñ lamngen.

3. ¿Chem ngüneduamaiñ tüfachi trokiñ mu?

 ³ Feychi lamngen reke, iñchiñ müna piwkeyeniefiyiñ ta Jewba, welu kiñeke mu “Chaw Dios piwkeyelaenew” piafuiñ chi. Tüfachi trokiñ mu wiñoldunguaiñ epu ramtun: ¿Chemu müley taiñ rüf maneluwal taiñ piwkeyenieetew Jewba? Rakiduamliyiñ kay taiñ piwkeyenienoetew Jewba, ¿chem chumafuiñ?

4. Rakiduamliyiñ taiñ piwkeyenoetew Jewba, ¿chumngelu fente kuñiwün-ngeafuy?

⁴ Rüf maneluwliyiñ taiñ rüf piwkeyenieetew Jewba, serfiafiyiñ kom taiñ newen mu chem rume rupafuliyiñ. Welu Chaw Dios piwkeyenoetew trokiwliyiñ, yafüngewelayaiñ (Prov. 24:⁠10). Feyta kuñiwün-ngeafuy, ti Weküfü püntünentuafeiñmu Chaw Jewba mu (Efes. 6:⁠16).

5. Kiñeke peñi, lamngen rakiduamkelu ñi piwkeyenoetew Chaw Dios, ¿chem pingün kay?

⁵ Kiñeke peñi, lamngen rakiduamürpuy ñi piwkeyenoetew Jewba. Feymu fente maneluw-wekelay Jewba mu. Kiñe longkolelu Jaime pingelu, feypi: “Iñche küdawkefun Betel mu ka ayüwünkechi amuldungukefun pu che ka kewün nielu. Welu ‘¿rüf ayükepey may Jewba ñi femkeel iñche?’ pikefun. Kiñeke mu rakiduamürpun: ‘Chaw Jewba allkütuwelaenew ñi llellipun’” pi taiñ peñi. Ka femngechi taiñ lamngen Eva küdawkelu Betel mu, feypi: “Rakiduamliyiñ taiñ piwkeyenoetew Jewba, kuñiwün-ngeafuy, newen-ngewelayafuiñ. Feymu ayüwünkechi serfiwelayafuiñ ta Jewba” pi. Taiñ peñi Miguel longkoley ka wüneley amuldungun mu, feypi: “Feyentunolmi tami duamnieetew Chaw Dios, ñochikechi püntüwafuymi kidu mu”.

6. Rakiduamliyiñ taiñ piwkeyenoetew Chaw Dios, ¿chumafuiñ?

⁶ Ñi feypin rupachi parrafo pengeli fente kuñiwün-ngey rakiduamal taiñ piwkeyenoetew Chaw Dios. Feymu nieliyiñ femngechi rakiduam, ¿chem mülefuy taiñ femal? Pürüm famentuafiyiñ llemay. “Eluen tami tüngün” piafiyiñ ta Chaw Jewba, femngechi taiñ entual femngechi weda rakiduam taiñ piwke mu ka taiñ longko mu (Sal. 139:⁠23; Filip. 4:⁠6, 7). Kidulelaymi tati, kakelu peñi ka lamngen  ka femngechi rakiduamkey ñi piwkeyenoetew Chaw Dios. Kiñeke poyekefilu ta Jewba kuyfi ka femngechi rakiduamürpuyngün. Feymu peafiyiñ Pablo tañi rupan.

7. ¿Chem wedake dungu mu rupay Pablo?

⁷ ¿Rakiduamkeymi tami fentren nien küdaw, fey “fentepuan” pikeymi chi? Apostol Pablo ka femngechi rakiduami. Kidu ka feypi: “Fill antü mew rume rakiduamelkeenew kom ti trokiñ feyentulechi pu che” (2 Kor. 11:⁠23-28). ¿Nieymi kiñe kutran tami weñangkülkeetew? Pablo kutrankülekefuy chi, feymu weñangkülekefuy ñi piwke. Kidu ayüniefuy ñi nienoal femngechi kutran, welu pepi femlay (2 Kor. 12:⁠7-10, TNM). ¿Ka femngechi weda duamkülekeymi tami culpanchengen? Pablo küdawtukefuy ñi femal norngechi dungu küpalu Jewba mu, feymu feypi: “¡Awüngen may ta iñche!” (Rom. 7:⁠21-24).

8. ¿Chem am kellueyew Pablo ñi poyenieafiel ta Chaw Dios?

⁸ Fillke wedake dungu mu rume rupay Pablo, welu poyeniefi müten ta Chaw Jewba. ¿Chem am kellueyew? Pablo kimtukuniefuy tañi culpanchengen, welu feyentulekey Jesus tañi lan mu. Tüfa kellueyew llemay. Apostol Pablo kimtukuniefuy Jesus tañi feypin: “Kom tati feyentulu kidu mew chumkawnorume ñi lanoal, welu may ñi nieal ta rumel mongen” (Juan 3:⁠16; Rom. 6:⁠23). Pablo maneluwkülefuy Jewba perdonakey pu culpalu repentiwkületule (Sal. 86:⁠5).

9. Ñi feypin Galata 2:⁠20, ¿chem kimeltukeeiñmu?

⁹ Apostol Pablo kimniefuy Jewba ñi werküel tañi Fotüm ñi lapayal kom iñchiñ mu. Feymu apostol Pablo maneluwküley Jewba tañi piwkeyeetew. Ngüneduamaiñ chem pilen ti lifru Galata mu. Feypi: “Rüfkünu llemay, tañi feyentufiel mu ta Ngünechen ñi Fotüm ta mongelen, kidu ta piwkeyeenew ka wüli ñi mongen iñche ñi duam mu” (Galata 2:⁠20, TNM). Pablo rakiduamkelafuy rume “tañi weda chengefel kuyfi, Chaw Dios piwkeyelaenew” pilay. Ka feypilay: “Chaw Dios kakelu che müten piwkeyefi, iñche piwkeyelaenew” pilay. Doy may Pablo feypi pu romano: ‘Feychi petu culpafengelu ta iñchiñ, Kristo lay iñchiñ taiñ duam’ (Rom. 5:⁠8).

10. Ñi feypin Romanu 8:⁠38, 39, ¿chem kimeltukeeiñmu?

 ¹⁰ (Papeltunge Romanu 8:⁠38, 39). Pablo küme kimniefuy fente ñi piwkeyecheken ta Chaw Dios. Feymu feypi: “Ngelay chem rume taiñ püntünentuaetew Ngünechen tañi piwkeyechen mew”. Pablo kimniefuy Jewba ñi rume nielfiel paciencia tati pu israelita. Pablo ka kimniefuy Jewba tañi kutranpiwkeyeetew. Feymu Pablo feypi reke: “Chaw Dios werküfi ñi Fotüm ñi lapayal iñche mu, ¿piwkeyelayafenew am chi?” (Rom. 8:⁠32).

11. 1 Timotew 1:⁠12-15 feypi ñi weda culpan Pablo kuyfi, welu ¿chumngelu maneluwkülefuy ñi piwkeyenieetew Jewba?

¹¹ (Papeltunge 1 Timotew 1:⁠12-15). Pablo weda duamkülekefuy chi tañi weda femün kuyfi. Petu ñi kimnon ta Jewba, Pablo inantukufi pu wünenke cristiano fillke waria mu. Presuntukufi kiñeke engün ka kelluntukufi tañi langümngeal. Feymu kimfilu ta Jewba, kom pu culpafe mew “iñche ta wünelen” pi ta Pablo (Hecho 26:⁠10, 11). Pablo kimürpupelafi tañi pu fotüm feychi pu cristiano langümngelu. Feymu pefilu, weda duampelafuy. Pablo weda duamkülekefuy ñi weda femün kuyfi mu, welu rakiduamkülekelafuy feychi dungu mew müten. Pablo feyentulekefuy Jesus tañi lan kom iñchiñ mu. Feymu feypi: ‘Iñche llowün tüfachi küdaw Ngünechen tañi küme kutranpiwkeyeetew mew’ (1 Kor. 15:⁠3, 10). ¿Chem am kimeltueiñmu? Müley taiñ feyentual Jesus lay kiduke iñchiñ mu, femngechi fültukunieeiñmu Chaw Jewba mu (Hecho 3:⁠19). Taiñ femal fachantü ka küpalechi antü, Jewba ngüneduamniekey. Taiñ kuyfike culpan, testigongeliyiñ  kam femnofuliyiñ rume, Jewba ngüneduamkelay feychi dungu (Is. 1:⁠18).

12. Ñi feypin 1 Juan 3:⁠19, 20, ¿chumafuiñ falinolu trokiwliyiñ?

¹² Kimnieiñ Jesus ñi lapan kom iñchiñ mu. Welu kiñeke mu taiñ piwke ngünenkayafeiñmu. Feymu “falinolu trokiwken, iney no rume piwkeyelayafenew” piafuiñ chi (papeltunge 1 Juan 3:⁠19, 20). Feymu weda duamküleafuiñ. “Iñche tañi culpan perdonangekelay” piafuiñ. Femngechi rakiduamküleliyiñ, longkontukunieaiñ Chaw Jewba ‘doy fentrey iñchiñ taiñ piwke mew’. Kiñeke mu rakiduamafuiñ “Jewba piwkeyelaenew, perdonakelaenew rume”. Welu, ¡feyngelay tati! Taiñ Chaw Jewba piwkeyeeiñmu ka perdonakeeiñmu llemay. Küdawtufuliyiñ rume, piwkentukunieafiyiñ tüfachi kimeltun. ¿Chumngechi femürpuafuiñ? Müley taiñ papeltunieafiel Biblia, llellipunieafiel ta Jewba ka weniyeafiel taiñ pu peñi, pu lamngen. ¿Chemu fente falin-ngey taiñ femal? Peafiyiñ.

13. ¿Chumngechi kelluafeiñmu estudiayal Biblia? (Ka inaduamnge ti wichulechi dungu “ ¿Chumngechi am kellueyew tati Biblia?”).

¹³ Fill antü estudiayafiyiñ ta Biblia. Femliyiñ, doy küme kimürpuaiñ fente ñi küme piwkengen ta Chaw Jewba ka fente taiñ piwkeyenieetew. Fill antü rakiduamliyiñ ñi chem pilen ta Biblia, doy küme rakiduam nieaiñ taiñ piwke mu ka taiñ longko mu (2 Tim. 3:⁠16). Kiñe longkolelu Kevin pingelu, che trokiwkelay. Feypi: “Iñche papeltuken ka rakiduamken ti Salmo 103, femngechi doy küme rakiduam nietuken ka doy küme kimtukuken chumngechi ñi penieetew Jewba”. Taiñ lamngen Eva, taiñ nütramkapeel parrafo 5 mu, feypi: “Pun mu ngüneduamken Jewba tañi rakiduam, femngechi tüngküleken ka doy maneluwken Jewba mu”.

14. Llellipufiliyiñ ta Jewba, ¿chumngechi kelluafeiñmu?

¹⁴ Llellipunieafiyiñ ta Chaw Jewba (1 Tes. 5:⁠17). Taiñ weniyeafiel kiñe che, müley taiñ rüf nütramkanieafiel. Ka femngechi taiñ weniyeafiel ta Chaw Jewba, müley taiñ nütramkayafiel chem ñi mülen taiñ piwke mu ka chem taiñ rakiduamelnieetew. Femliyiñ, feypiafiyiñ reke ta Jewba: “Kimnien tami piwkeyeniefiel, maneluwkülen eymi mu” (Sal. 94:⁠17-19; 1 Juan 5:⁠14, 15). Taiñ lamngen Yua, taiñ nütramkapeel parrafo 2 mu, feypi: “Llellipufiel mu ta Jewba, feypikelafiñ ñi femün müten feychi antü. Ka femngechi feypikefiñ kom ñi mülen tañi piwke mu. Rupalu chi antü, kimürpun Jewba ngen-ngeafuy rume kom tati mülelu, alü kamapulelay iñchiñ mu. Doy may iñchiñ taiñ Chaw tati. Müna piwkeyenieeiñmu”.

15. ¿Chem elkünuy Jewba fente taiñ duamnieetew?

¹⁵ Weniyewaiñ pu peñi, pu lamngen iñchiñ. Fey engün kiñe regalo reke feley Jewba mu küpalu (Sant. 1:⁠17). Taiñ pu peñi, pu lamngen taiñ familia reke feleyngün, rume piwkeyenieeiñmu (Prov. 17:⁠17). Chaw Jewba elkünuy ñi müleal peñiwen ka lamngenwen trawünche mu, femngechi pengeli taiñ duamnieetew. Apostol Pablo feypi ñi rume kelluetew kiñeke cristiano, ‘fey engün ta fütra yafültukuenew’ pi (Kol. 4:⁠10, 11). Jesus kütu culpanchengelafuy rume, duamniefuy ñi kelluaetew ka yafültukuaetew  tañi pu weni ka tati pu kümeke püllü (Luka 22:⁠28, 43).

16. ¿Chumngechi kellukeeiñmu taiñ pu weni taiñ fülküleal Jewba mu?

¹⁶ ¿Eluwkeymi tami kelluaetew tami pu weni trawünche mu? “Kelluen” pifilmi tami weni, weda dungu no tati. Tami weni püllelele Jewba mu, rume kelluafeymu. Peafiyiñ ñi chem pin taiñ peñi Jaime taiñ nütramkapeel parrafo 5 mu, feypi: “Tañi pu weni püllelelu Jewba mew, rume kellukeenew. Tañi weda duamkülen, tañi pu weni tüngkechi allkütukeenew, ka feypikeenew ‘rume piwkeyewiyiñ’. Femngechi ngüneduamken ñi piwkeyeetew Chaw Jewba ka tañi falintukeetew” feypi. Rume falin-ngey taiñ weniyeafiel taiñ pu peñi ka taiñ pu lamngen.

17, 18. ¿Iney am allkütuafuiñ? ¿Chumngelu am?

¹⁷ Tati Weküfü ayüfuy taiñ elkünuafiel Jewba tañi kümeke dungu. Feymu Weküfü “falintukelaeymu Jewba” pikeeiñmu. Welu rüfngelay.

¹⁸ Chaw Jewba piwkeyenieeiñmu ka falintukeeiñmu kom iñchiñ. Allkütufiliyiñ ta Chaw Dios, fey rumel piwkeyeaeiñmu. Feymu allkütulayafiyiñ tati Weküfü. Rakiduamrumeliyiñ taiñ piwkeyenoetew Jewba, pürüm famentuafiyiñ feychi weda rakiduam taiñ piwke mu. Jewba ngüneduamkeeiñmu taiñ küme femken müten, feymu kidu müten allkütuafiyiñ. Maneluwnge, Jewba falintunieeymu.