1, 2. Ti Pentekoste 33 tripantu mew, ¿chem afmatun dungu rupay?

KIÑE antü 33 tripantu mew, Jesus feypifi tañi pu inanieetew ñi mülenagal Jerusalen waria mu, fey tañi llowal engün kiñe falin dungu (Hecho 1:⁠4, 5). Pichin antü rupalu, puwi ñi femngeal ti Pentekoste. Fey domingo puliwen mu, trawülefuy 120 discipulo peno kiñe ruka mu (Hecho 1:⁠13-15; 2:⁠1). ¿Chem dungu rupay?

² ‘Feymu ka müten, kiñe fütra wüwükün nagpay wenu kiñe fütra kürüf reke. Trününi kom ti ruka chew ñi mülemum engün’. “Feymew kake kiñeke che mew pewfaluwi kiñe üykülechi kütral, küde reke felelu”, fey “kom kidu engün ngünepaeyew” Ngünechen ñi newen (Hecho 2:⁠2-4). Femngechi afmatun dungu mu, Jewba wüli tañi newen tüfachi pu discipulo mew (Hecho 1:⁠8). Tüfa engün tati wünelu ñi dullingeel Ngünechen tañi newen mew,⁠ * fey ñi ngünenieal Jesus engu wenu mapu mew.

3. Pu cristiano 33 tripantu mew, ¿chumngelu kimniefuyngün ñi dullietew Ngünechen ñi newen?

³ Mülefulmi feychi 33 tripantu mew, rumel longkontukunieafuymi chem ñi rupafel. Kiñe küdetuwe reke pewfaluwi tami wente longko mu, fey eluwimi tami dungual ka kewün mu (Hecho 2:⁠5-12). Femngechi dungu rupafulmi, rüf kimafuymi tami dullietew Ngünechen ñi newen. Welu, ¿rumel femngechi  afmatun dungu mu Jewba dullikefi pu cristiano? Femkelay llemay. Ngüneduamafiyiñ chumngelu (chemu) kimnieiñ tüfa.

4. Feychi pu cristiano kuyfi mu, ¿kom trür femngechi felekefuyngün ñi dullingeel mew?

⁴ Inaduamaiñ chumngechi felefuyngün ti pu kuyfike cristiano dullingelu engün. Feychi Pentekoste 33 tripantu mew, pu 120 cristiano müten dullingelayngün Ngünechen ñi newen mu. Doy amulelu feychi antü, ka 3.000 che llowingün Ngünechen tañi newen fautisawlu engün (Hecho 2:⁠37, 38, 41). Welu rupalelu chi tripantu, kiñeke cristiano dullingelayngün fautisawlu engün. Tati pu samariache dullingeyngün mufüke antü rupalu kam doy chi tañi fautisawün mu (Hecho 8:⁠14-17). Kornelio kay tañi pu che engün dullingeyngün Ngünechen tañi newen mu petu ñi fautisawnon rume, welu müte rupakelafuy feychi dungu (Hecho 10:⁠44-48).

5. Ñi feypin 2 Korintio 1:⁠21, 22, ¿chumngechi dullikefi Jewba tati pu cristiano amualu wenu mapu?

⁵ Fewla inaduamaiñ chumngechi ñi dullingekeel pu cristiano Ngünechen ñi newen mew. Ellaka mu kiñeke cristiano küdawtuafuyngün longkontukual ñi dullietew Chaw Ngünechen, fey ramtuwafuyngün: “¿Chumngelu iñche dullingen?”. Welu kakelu dullingelu femngechi rakiduamkelayngün. Chem rakiduamle engün rume, Pablo feypi chumngechi ñi dullingeken pu cristiano amualu wenu mu: “Feychi allkülu ti rüfngechi werken kimelün dungu, ti we kimelün montuluwün dungu, fey feyentuymün ta Kristo mew, kiñewimün ta kidu mew, ka marcakünungeymün⁠ * ta Ngünechen tañi ngen-ngetun ta eymün mew” kidu tañi newen mew (Efes. 1:⁠13, 14). Feley llemay, Jewba elukefi ñi newen tüfachi pu cristiano, femngechi kimfalkünulelkefi ñi dullifiel engün. Tañi newen mew Jewba feypikünukefi tüfachi pu cristiano chem tañi llowal engün küpalechi antü mu, femngechi rüf maneluwkeyngün tañi rumel mongeleal  wenu mapu mew, faw tati Mapu mew no (papeltunge 2 Korintio 1:⁠21, 22).

6. Pu dullingelu ñi rüf amual wenu mapu mew, ¿chumngechi müley ñi yenieal tañi poyefiel ta Jewba?

⁶ Tati pu dullin cristiano, ¿rakiduampeafuyngün may ñi amual wenu mapu mu chem weda dungu rume femfule? Femlay tati. Kidu engün dullingeyngün müten ñi amual wenu mapu mew, welu müley ñi longkontukual tüfachi ngülam: ‘Feymew tati pu peñi ka pu lamngen, eymün am Ngünechen dew mütrümetew ka dullietew, ayütuniefimün tüfachi dungu fey ñi foliluwal reke eymün mew, fey ta famngechi felelmün, chumkawnorume elkünulayaymün tamün feyentulen’ (2 Ped. 1:⁠10). Feymu llemay kiñe cristiano dullingele rume ñi amual wenu mapu mew, müley ñi püntütripanoal Chaw Ngünechen mew, femngechi ñi rüf mülepual üye mu (Filip. 3:⁠12-14; Eb. 3:⁠1; Apok. 2:⁠10).

7. Pu cristiano, ¿chumngechi kimkey ñi dullingeel tañi mülepual wenu mapu mew?

⁷ ¿Chumngechi kimafuy pu cristiano ñi dullingeel tañi amual wenu mew? Taiñ kimafiel tüfachi dungu, ngüneduamaiñ ñi feypifiel Pablo tati pu dullin cristiano Roma mew ñi mülekefel. Kidu feypifi engün: ‘Fey eymün ta llowlaymün kiñe püllü presu reke tamün nieaetew femngechi tamün wiño llükaletual, welu may llowimün Ngünechen tañi newen tamün nietuaetew kidu ñi yall reke. Fey tüfachi newen mew llellipukefiyiñ ta Ngünechen, feypilen mew: “¡Iñche ñi Chaw!”’. “Ngünechen tañi newen kimfalkünukeeiñmu Ngünechen tañi yall ngen ta iñchiñ” (Rom. 8:⁠15; 8:⁠16, TNM; 1:⁠6, 7). Feymu llemay Jewba elukefi ñi newen tati pu dullin cristiano, femngechi kimfalkünulelkefi engün tañi dullingen tañi amual wenu mapu mew (1 Tes. 2:⁠11, 12).

8. Ñi feypin 1 Juan 2:⁠20, 27, ¿chumngelu pu cristiano duamnielayngün iney no rume tañi feypiaetew ñi dullingeel engün?

⁸ Jewba rakiduamelfi tati pu cristiano ñi dullingeel, feymu ramtuwkelayngün rume: “¿Dullipeenew may Jewba?”. Biblia feypi: “Ngünechen dullieymünmew tañi newen mu, fey kom eymün kimniefimün ti rüf dungu. Eymün kay, Ngünechen dullieymünmew tañi newen mu. Fey tüfachi newen mülenagkey eymün mu, feymu duamnielaymün iney no rume tamün feypiaetew tamün dullingeel. Rüfngey Ngünechen tamün dullietew ñi newen mu, tüfa koylangelay, femngechi Ngünechen kimeltukeeymünmew itrokom dungu. Kiñewküleaymün kidu mu” (1 Juan 2:⁠20, 27, TNM). Rüfkünu may tati pu dullingelu duamnieyngün ñi kimeltuaetew Jewba ti trawünche mu chumngechi ñi kimeltungeken kom pu cristiano. Welu pu dullin cristiano duamnielayngün iney no rume tañi feypiaetew ñi dullingeel engün. ¿Chumngelu am? Chaw Ngünechen doy newen-ngey itrokom ñi mülen wenu mapu mu ka nag Mapu mew, fey tañi fütra newen mu kimelelfi pu dullin cristiano tañi dullingeel.

9. Ñi feypin Efesio 1:⁠18, ¿chem rakiduamtukey pu cristiano ñi dullingeel tañi mülepual wenu mapu mew?

⁹ Epe kom pu poyekefilu ta Jewba dullingelayngün tañi amual ta wenu mew, feymu küdawtuafuyngün ñi longkontukual chumngechi ñi dullingeken kiñeke cristiano. Chaw Dios dewmalafi tati pu che ñi rumel mongeleal wenu mapu mu, doy may nag Mapu mew (Gén. 1:⁠28; Sal. 37:⁠29). Welu Jewba dullifi kiñeke che ñi müleal wenu mapu mew. Feymu dullifiel mu kiñeke cristiano, Jewba elukefi engün kiñe we rakiduam ka kiñe we maneluwün, femngechi ayürpukeyngün ñi mülepual wenu mu (papeltunge Efesio 1:⁠18).

10. ¿Chumngechi wiño choyüngetukey reke pu dullin cristiano? (Inaduamnge ti kimal dungu).

 ¹⁰ Jewba dullifiel mu pu cristiano tañi newen mew, wiño choyüngetukeyngün reke.⁠ * Jesus kimeltuy pu cristiano dullingenolu kimürpulayafuy chumngechi tati pu dullin cristiano ayürpukeyngün ñi mülepual wenu mapu mu (Juan 3:⁠3-8).

11. 1) Petu ñi dullingenon, ¿chem rakiduamkefuy pu cristiano? 2) Dew dullingelu pu cristiano, ¿chem rakiduam nietuyngün?

¹¹ Petu ñi dullingenon tüfachi pu cristiano piwkentukukefuy ñi rumel mongeleal Mapu mew. Fey rume ayüniefuyngün ñi akual feychi antü ñi küme mülewe ngetual ti Mapu, fey ñi afal kom wedake dungu. Fey engün rakiduamkefuy chi ñi wiño petuafiel kiñeke tañi pu che yem kam kiñeke tañi pu weni yem. Welu dullingelu tüfachi pu cristiano, we rakiduam nietuyngün. Jewba elueyew tañi newen, femngechi nietuyngün kiñe we rakiduam ka maneluwürpuyngün ñi mülepual wenu mapu mew. Welu petu ñi dullingenon tüfachi pu cristiano rakiduamkelafuyngün: “Ayüniewelan tañi rumel mongeleal Mapu mu, doy ayüafun mülepual wenu mew”. Afeluwün-ngelu trokikelafingün ti rumel mongen Mapu mu, feypikelayngün rume: “Fente ñi kutrankawün Mapu mew, ayüwelan ñi rumel mongeleal faw”. Pu dullingelu niekelayngün femngechi rakiduam.

12. Ñi feypin 1 Pedro 1:⁠3, 4, ¿chum duamnagkey pu cristiano rakiduamün mu ñi mülepual wenu mu?

¹² Kiñeke dullin cristiano feypikeyngün: “¿Rume falipen may tañi amual ta wenu?”. Welu kiñe dullin cristiano no rume ramtuwkelay: “¿Iñche pemay dullienew Chaw Ngünechen tañi amual wenu mu?”. Doy may, pu dullin cristiano küfküfkey tañi piwke ayüwün mu ñi rakiduamken engün tañi mülepual wenu mapu (papeltunge 1 Pedro 1:⁠3, 4).

13. Pu dullin cristiano, ¿chem rakiduamkeyngün petu tañi mongelen Mapu mu?

¹³ Welu, ¿ayükepeyngün may pu dullin cristiano ñi layal? Femkelayngün llemay. Ti apostol Pablo küme kimeltuy feytachi dungu. Kidu trürümfi pu dullin cristiano ñi cuerpo tañi wesakelu mew, feypi: ‘Feymew llemay petu taiñ mongelen tüfachi mülewe mew kutrankawün mew afduamkülekeiñ, welu ayülelafuiñ taiñ triltrangkünungeal, welu may taiñ tukutukünungeal, fey femngechi tüfachi mapu mew taiñ nieelchi cuerpo fey tañi we cuerpokünungetual ñi rumel mongeleal’ (2 Kor. 5:⁠4). Feymu pu dullin cristiano pilayngün ñi pürüm layal engün, doy may ayüwmakey petu ñi mongelen Mapu mew ka ayünieyngün ñi fill antü küdawelafiel ta Jewba tañi pu che ka tañi pu weni engün. Welu chem rume femle engün, tati pu dullin cristiano rumel longkontukukeyngün ñi mülepual wenu mu (1 Kor. 15:⁠53; 2 Ped. 1:⁠4; 1 Juan 3:⁠2, 3; Apok. 20:⁠6).

14. ¿Chem dungu kimfalkünukey kiñe cristiano ñi dullinoetew Chaw Ngünechen?

¹⁴ Kiñeke cristiano rakiduamafuy chi: “¿Iñche pemay dullienew Chaw Ngünechen tañi amual wenu mu?”. Femngechi rakiduamfulmi, kümeafuy tami ramtuwal: “¿Rume ayükepen may ñi femal Jewba tañi ayükeel? ¿Rume ayüken ñi amual kimeltucheal? ¿Rume ayükepen may ñi chillkatual Biblia ka doy kimal Ngünechen ñi dungu mu? Jewba, ¿kümelkakepeenew may tañi amuldungun küdaw? Kimeltulelafiel pu che Chaw Dios tañi kümeke dungu, ¿rüf falintukepen may? ¿Ngüneduamkepen may ñi rume kellukeetew Jewba tañi mongen mu?” (1 Kor. 2:⁠10). “May” pile tami wiñoldungun, rakiduamfemlayaymi  tami dullietew Jewba tami amual wenu mu. ¿Chumngelu am? Kom pu poyekefilu ta Jewba “may” piafuy ramtuwle femngechi dungu. Jewba eluafuy ñi newen tañi pu poyekeetew ñi kelluafiel engün maneluwle rume ñi müleal wenu mu kam nag Mapu mew. Fey küme kimnolmi tami dullietew Chaw Ngünechen tami amual wenu mapu mu, rüf dullingelaymi tami mülepual üye mu. Pu dullin cristiano rüf küme kimnieyngün tañi dullietew Chaw Ngünechen, ramtuwkelayngün rume.

15. ¿Chumngechi kimnieiñ kom pu llowlu Ngünechen tañi newen dullingelayngün tañi amual wenu mew?

¹⁵ Tati Biblia nütramkakey fentren nor wentru ñi llowel Ngünechen tañi newen, welu dullingelayngün ñi mülepual wenu mapu mu. Longkontukuaiñ ñi rupan ta David, kidu ta adniekefeyew Jewba tañi newen (1 Sam. 16:⁠13). Femngechi kimürpuy falinke dungu Chaw Ngünechen mu ka wirintukuy fentren trokiñ Biblia mew mülelu (Mar. 12:⁠36). Welu David amulay wenu mu chumngechi ñi feypiel ti apostol Pedro (Hecho 2:⁠34). Ka femngechi Juan tati Fautisachefe llowkey Ngünechen tañi newen (Luka 1:⁠13-16). Kafey “Juan ti Fautisachefe doy kimfali kom pu wentru mew” pi ta Jesus. Welu ka feypi Juan ñi mülepunoal wenu mapu mu (Mat. 11:⁠10, 11). Jewba elufi ñi newen ta David ka Juan ñi femal fütrake dungu, welu dullilafi engu ñi amual wenu mu. Femngeafuy rume, feypilayafuiñ pu dullin cristiano ñi doy nor piwkengen ta David ka Juan mu. Doy may Jewba wiñomongeltuafi engu Mapu mu küme mülewe ngetule (Juan 5:⁠28, 29; Hecho 24:⁠15).

16. Epe kom pu poyekefilu ta Jewba, ¿chem ayünieyngün?

¹⁶ Famülke mu, epe kom pu poyekefilu ta Jewba dullingelayngün ñi amual wenu mu. Doy may ayünieyngün ñi müleal Mapu mew, fey ñi ngünenieaetew Chaw Dios chumngechi ñi ayükefel Abraam, Sara, David, Juan tati Fautisachefe ka fentren wentru ka domo tripalu Biblia mu (Eb. 11:⁠10).

17. ¿Chem ramtun inaduamaiñ küpalechi chillkatun mu?

¹⁷ Petu mülewey kiñeke dullin cristiano Mapu mew, feymu ramtuwafuiñ kiñeke dungu (Apok. 12:⁠17). Küpalechi chillkatun mu ngüneduamaiñ küla ramtun: pu dullin cristiano, ¿chumngechi müley ñi trokiwal tañi dullingeel mew? ¿Chumngechi müley taiñ trokiafiel tati pu dullin cristiano? Kiñeke mu doy amuleafuy tunten cristiano feypikey ñi dullietew Chaw Ngünechen, femngechi rupale, ¿rakiduamküleafuiñ kay?