1. ¿Chem ramtukawafuy kiñe lamngen petu fütangenon?

KOM pu cristiano mu longkoley ta Jesus, fey turpu welulkakelay. Welu fütangen mu kiñe domo, tañi füta longkoley kidu mu. Tañi füta welulkakey. Feymu küdawngeafuy kiñeke mu. Kiñe lamngen dew peniele ñi ayün, ramtuwafuy: “¿Chem pengelenew ñi küme longkolerpual iñche mu? ¿Doy falintukepefi may ñi küdawelafiel ta Jewba? Femnole, ¿rüf kellupeafenew may ñi küme weniyenieafiel ta Jewba dew niewliyu?”. Ka femngechi ti lamngen mülefuy ñi ngüneduamuwal ñi chumngen, fey ramtuwafuy: “¿Chem mu kelluntukuafun ñi kümelkaleal tayu kurewen-ngen? ¿Niekepen may ta paciencia? ¿Duamchefe ngepen may? ¿Eluwkülepen may ñi fürenecheal? ¿Küme weniyewpen may Jewba mu?” (Ecl. 4:⁠9, 12). Küme dullile petu ñi fütangenon, küme triparpuay ñi kurewen-ngen.

2. ¿Chem peaiñ tüfachi trokiñ mu?

² Millonke pu lamngen eluwkey ñi adnieaetew tañi füta. Feymu inayentufali ka sakifalingün. Ayüwün-ngey kiñentrür küdawal tüfachi pu lamngen iñchiñ. Tüfachi trokiñ mu ngüneduamaiñ küla ramtun: 1) ¿Chem dungu mu küdawngeafuy ñi küme yenieal ñi fütangen? 2) ¿Chumngelu pu lamngen eluwkey ñi adnieaetew tañi füta? 3) Pu kurewen, ¿chem kimürpuafuy Jesus mu, Abigaíl ka Maria mu, Jesus tañi ñuke?

3. ¿Chumngelu pu kurewen rupakey wedake dungu mu?

³ Chaw Jewba eli pu kurewen ñi ayüwküleal, welu ti wentru ka ti domo mür welulkakeyngu tañi culpanchengen mu (1 Juan 1:⁠8). Feymu Biblia feypifi pu kurewen ñi rupayal küdawngechi dungu mu (1 Kor. 7:⁠28). Ngüneduamaiñ  kiñeke dungu ñi küdawngeafel pu domo mu.

4. Kiñeke lamngen, ¿chumngelu küdawtuafuy ñi allkütuafiel tañi füta?

⁴ Chumngechi ñi tremümngen kiñeke domo, rakiduamafuy ñi kidu ngünewal fütangefule rume. “Yewen-ngey ti domo ñi adnieaetew tañi füta” piafuyngün. Femngechi dungu mu rupay taiñ lamngen Marisol. Feypi: “Chew ñi tremün iñche, pu domo feypingekey ñi trürküleal pu wentru mu. Iñche kimnien Jewba ñi elufiel pu wentru ñi adnieafiel tañi domo, welu kafey Jewba ayüniey ñi yamniengeal pu domo. Fill püle feypingekey pu domo ñi allkütunoafiel tañi füta, feymu kiñeke mu iñche ka küdawtuken tañi femal” pi taiñ lamngen.

5. Kiñeke pu wentru, ¿chem welulkan rakiduam nieyngün pu domo mu?

⁵ Ka dungu mu rupayafuy taiñ pu lamngen. Kiñeke wentru rakiduamafuy ñi müte falin-non ti domo. Kiñe lamngen Ivón pingelu, feypi: “Chew ñi mülen iñche, wüne ikey pu wentru, fey wüla pu domo. Pu pichike domo mülefuy ñi liftual ka dewmaiyalal, welu pu pichike wentru femngechi femkelay. Doy may serfikeeyew tañi ñuke ka tañi pu lamngen. Doy falintungekeyngün, ‘rey de la casa’ pingekey”. Kiñe lamngen mülelu Asia mapu mu feypi: “Tañi kewün dungu mu feypingekey duamfalngelay ñi pepiluwün-ngeal pu domo. Doy may müley ñi küme adnieal tañi ruka müten ka ñi dunguntukunoafiel tañi füta, pingekey” pi taiñ lamngen. Femngechi rakiduam piwkeyen-ngelay ka tripalay ta Biblia mu. Feymu pu wentru inafile feychi rakiduam, weda duamelafi tañi domo, inayentulayafi ta Jesus ka weñangkülafi ta Jewba (Efes. 5:⁠28, 29; 1 Ped. 3:⁠7).

6. ¿Chem müley ñi femal pu lamngen ñi doy küme weniyewal Jewba mu?

⁶ Ti wentru müley ñi küme duamelafiel tañi pu che, eluafiel kom tañi duamnieel ka müley ñi kelluafiel engün ñi fülküleal ta Jewba mu (1 Tim. 5:⁠8). Welu taiñ pu lamngen müley ñi püntülal antü ñi papeltuafiel Biblia ka rakiduamnieafiel ka ñi llellipuafiel ta Jewba kom piwke mu. Tüfa küdawngeafuy. Taiñ pu lamngen niey fentren küdaw, feymu “nielan tiempo, rume ürkülen” piafuyngün chi. Welu Chaw Jewba ayüniey kake kiñeke iñchiñ taiñ küme weniyeafiel. Feymu küdawngefule rume, taiñ pu lamngen ka müley ñi femal (Hecho 17:⁠27).

7. ¿Chem kelluaeyew pu domo ñi yamafiel ñi füta?

⁷ Rüfngey, taiñ pu lamngen müley ñi yamafiel tañi füta ka eluwal tañi adnieaetew. Welu kiñeke mu küdawngeafuy. ¿Chem kelluafeyew? Müley ñi kimtukunieal ka piwkentukunieal chumngelu Chaw Dios elkünuy pu wentru ñi longkoleal tañi domo mu.

8. Ñi feypin Efesio 5:⁠22-24, ¿chumngelu pu cristiana eluwkey ñi adnieaetew tañi füta?

⁸ Pu cristiana kimnieyngün Jewba ñi werküetew ñi yamafiel ñi füta, feymu femkeyngün (papeltunge Efesio 5:⁠22-24). Maneluwkey tañi Wenu Chaw mu. Kimniey ñi piwkeyenieetew, fey feypilayafeyew chem no rume ñi wedalkayaetew (Deut. 6:⁠24; 1 Juan 5:⁠3).

9. Ti domo eluwle ñi adnieaetew ñi füta, ¿chumlerpuay ñi familia?

⁹ Pu poyekenofilu ta Jewba rakiduamelkefi pu domo ñi yewen-ngen ñi adnieaetew tañi füta, femngechi ngüchaltukukefi ñi inanoal Jewba tañi ngülam.  Pu inaniekefilu femngechi rakiduam kimlafi taiñ küme Chaw Jewba. Jewba turpu feypilayafuy tañi pu sakin ñawe ñi femal chem rume ñi illamkayafetew. Pu domo eluwle ñi adnieaetew ñi füta, femay Jewba tañi ayükeel, fey kümelkaleay kidu ka tañi pu che (Sal. 119:⁠165).

10. Carol ñi feypin, ¿chem kimeltueiñmu?

¹⁰ Chaw Jewba adkünuy ti wentru ñi longkoleal tañi familia mu. Feymu ti domo eluwle ñi adnieaetew tañi füta, pengelay ñi yamniefiel ka ñi piwkeyeniefiel ta Jewba. Taiñ lamngen Carol feypi: “Küme kimnien ñi welulkayal tañi füta. Welu ka femngechi kimnien ñi yamnieafiel tañi füta welulkawle rume, femngechi pengelan tañi küme weniyefiel ta Jewba. Iñche ayünien ñi ayüwülafiel tañi Fütra Chaw, feymu eluwken ñi yamnieafiel tañi füta”.

11. 1) ¿Chem kellueyew kiñe lamngen ñi perdonacheal? 2) ¿Chem kimeltueiñmu ñi femken mu?

¹¹ Ti domo rakiduamle ñi duamnienoetew tañi füta, doy küdawtuafuy ñi yamnieafiel ka ñi eluwal tañi adnieaetew. Peaiñ ñi chumken taiñ lamngen Anis femngechi dungu mew rupalu. Feypi: “Eluwken ñi illkunoal. Acordaken kom taiñ welulkawken. Chaw Jewba rüf perdonachekey, feymu iñche ka eluwken ñi perdonayafiel tañi füta. Perdonayüm, tüngduamküleketun” pi taiñ lamngen (Sal. 86:⁠5). Ti domo perdonachefe ngele, doy küdawtulayay ñi adnieaetew tañi füta.

12. ¿Chumngechi che ngefuy pu che nütramkangelu ta Biblia mu?

¹² Kiñeke che rakiduamkey yafü piwkengelay pu eluwkülelu ñi adniengeal. Welu, ¡feyngelay tati! Biblia pengeli fentren che eluwkülefulu ñi adniengeal, welu kom newen piwkengefuyngün. Femngechi che ngefuyngün Jesus, Abigaíl ka Maria. Feymu inaduamafiyiñ ñi femün engün.

13. 1) ¿Chumngelu Jesus eluwküley ñi adnieaetew Jewba? 2) ¿Chumngelu feypilayafuiñ Jesus ñi kimchengenon eluwlu ñi adniengeal?

¹³ Jesus eluwkülekey ñi adnieaetew tañi Chaw tañi piwkeyefiel mu. Feypilayafuiñ Jesus ñi kimchengenon, doy may müna pepiluwün-ngey. ¿Chumngelu feypiafuiñ?  Kiñe pepiluwün-ngelu müten kimeltuafuy chumngechi ñi femün Jesus (Juan 7:⁠45, 46). Jewba kimniefuy ñi rume adümuwün-ngen ta Jesus, feymu eluwi ñi kelluntukuaetew dewmalu kom tati mülelu (Prov. 8:⁠30; Eb. 1:⁠2-4). Jewba dew wiñomongeltufilu ta Jesus, elufi kom autoridad wenu mu ka Mapu mu (Mat. 28:⁠18). Jesus rume kimün niefuy rume, welu maneluwküley tañi Chaw mu (Juan 14:⁠31).

14. 1) Pu füta, ¿chumngechi inayentuafuy ñi femün Jewba? 2) Pu füta, ¿chumngechi inayafuy ñi feypin Proverbios 31?

¹⁴ ¿Chem kimafuy pu füta? Chaw Jewba elkünuy ti wentru ñi longkoleal tañi domo mu. Welu tüfa feypilay Jewba ñi doy falintukefiel pu wentru. Jewba dullifi wentru ka domo ñi ngünenieal Jesus engün, femngechi pengeli ñi trür falintuniefiel (Gal. 3:⁠26-29). Fente tañi maneluwkülen Jesus mu, Jewba elufi autoridad. Ka femngechi kim füta fente tañi maneluwkülen tañi domo mu, eluafi autoridad tañi kelluntukuaetew. Biblia pengeli ñi chumken ti kim domo. Feypi: “Kafey tüfachi domo witrakey petu ñi wün-non. Elukefi iyael tañi pu che ka tañi pu küdawelkeetewchi domo. Dew küme rakiduamlu, ngillafi kiñe mapu. Fente ñi küdawün mu anümkey fentren ofad. Küme tripakey tañi negociaken. Alü punlu rume, chongkelay ñi küdetuwe” (Proverbios 31:⁠15, 16, 18). Ti domo pengekelay kiñe esclava reke, “ñüküfkülenge müten” pingekelay. Doy may tañi füta eluwküley ñi allkütuaetew fente tañi maneluwkülen tañi domo mu. Biblia feypi: “Tañi wentru kom ñi piwke mu maneleyew. Tañi wentru chem rume duamnielay. Kimün mew dungukey ka piwkeyen mew entukey ñi feypin. Kidu llüwatulekey kom ñi küme amulen tañi ruka mu, ka chofülekelay tañi femken mu” (Proverbios 31:⁠11, 26, 27). Femngechi ti wentru yamniefile tañi domo, kidu ayüwünkechi eluwküleay ñi adnieaetew.

15. Pu domo, ¿chumngechi inayentuafuy ta Jesus?

¹⁵ ¿Chem kimafuy pu domo? Jesus fentren dungu femfuy rume, welu illamkan dungu trokilafi ñi adnieetew mu Jewba (Juan 6:⁠38; 1 Kor. 15:⁠28). Ka femngechi pu kim domo müley ñi inayentuafiel ta Jesus, fey illamkan dungu trokilayafi ñi adnieetew mu tañi füta. Ti domo kelluntukuafi tañi füta tañi piwkeyefiel mu, welu doyelchi may ñi piwkeyefiel ka yamniefiel mu ta Jewba.

16. Ñi feypin 1 Samuel 25:⁠3, 23-28, ¿chem dungu puñmatuy Abigaíl? (Inaduamnge ti adentun wenulelu).

¹⁶ Abigaíl niefuy ñi füta Nabal pingelu. Rume mallma ngefuy, kim mañumlafuy ka kidutu duamuwkefuy (1 Sam. 25:⁠3). Tañi weda femün mu ta Nabal, David ayüfuy ñi langümafiel. Abigaíl ayüfule ñi langümüñmangeal tañi füta, katrükonlayafuy. Welu dunguñpefi ta Nabal ka tañi pu che ñi montulafiel. Abigaíl llükanon mu trafyemefi ta David ka pu 400 weychafe. Fey eluwi ñi dunguafiel ta David. ¡Müna newen piwkengefuy ta Abigaíl! Nabal weda femlu rume, Abigaíl eluwi ñi “perdonaen” piafiel ta David. Biblia feypi: “Abigaíl pefilu ta David, pürüm müten nagpay ti furiku mu, fey lukutunagi David tañi adkiñ mu. Fülkonpuy David tañi namun mu, fey feypifi: “Chachay, iñche ta culpantukuen. Füreneen, dunguafeyu. Chachay füreneen, allkütuafen” (1 Samuel 25:⁠23, 24; 25:25-28). Fey David ngüneduami Jewba ñi duam mu dungueyew Abigaíl ñi weda culpanoal.

17. Pu wentru, ¿chumngechi inayentuafuy ñi femün ta David?

 ¹⁷ ¿Chem kimafuy pu füta? Abigaíl kim domo ngefuy, feymu David kümelkay ñi allkütufiel. Tüfa kellueyew ñi langümnoafiel culpan-ngenochi pu che. Ka femngechi müley ñi femal pu füta. Kim wentru ngele, allkütuafi tañi domo petu ñi dullinon falinke dungu. Kiñeke mu ñi feypietew ñi domo katrütuafeyew ñi weda femnoal tañi dulliel.

18. ¿Chem kimafuy ti domo ñi femün ta Abigaíl?

¹⁸ ¿Chem kimafuy pu domo? Kiñeke wentru serfikelafi ta Jewba. Kakelu testigo ngefulu rume, küme weniyekelafi ta Jewba. Chumngechi rume, pu domo poyefile ka yamniefile ta Jewba kümelkayafi tañi pu che. Feychi pu lamngen kintukadungulayay ñi wüdawal tañi füta engu. Doy may yamnieafi tañi füta ka inayay tañi feypin, femngechi tañi wentru eluwafuy ñi fülmawal Jewba mu (1 Ped. 3:⁠1, 2, TNM). Welu femnofule rume, müley ñi eluwküleal ñi adnieaetew Jewba ka tañi füta, femngechi ka ayüwülafi ta Jewba.

19. Pu lamngen, ¿chem dungu mu femlayafuy ñi feypietew tañi füta?

¹⁹ Ti wentru feypifile ñi domo ñi femal chem rume ñi ayükenoel ta Jewba, ngelafuy ñi femal. Kiñe lamngen tañi füta feypifeliyew ñi koylatual, weñeal ka femal chem dungu rume ñi ayükenoel Jewba, fütangechi domo wüne müley ñi inayal ñi chem pin ta Jewba. Feymu kiñe lamngen feypifeliyew tañi füta ñi femal chem weda dungu rume, femlayay. Piwkeyenkechi feypiafi ñi füta chumngelu ñi femnoal, welu newenkünuway (Hecho 5:⁠29).

20. ¿Chumngechi kimiyiñ Maria ñi küme weniyefiel ta Jewba?

²⁰ Maria küme weniyekefi ta Jewba. Feychi nütramkalu Elisabet (Isabel) engu, doy epu mari rupa entuy ñi feypin ti Hebreo Wirintukun mu. Feymu Maria müna küme kimniefuy ti Wirin Chillka (Luka 1:⁠26-33). Maria dew dunguniewi Jose engu tañi niewal, welu ti küme püllü pewfaluwlay Jose mu. Doy may pewfaluwi Maria mu, fey feypieyew ñi nieal kiñe wentru püñeñ, Dios tañi Fotüm. Jewba  küme kimniefuy ta Maria ka maneluwkülefuy ñi cuidañmayaetew ñi Fotüm. Maria rumel weniyeniefi ta Jewba feychi lalu rume ta Jesus (Hecho 1:⁠14).

21. Pu wentru, ¿chem kimeltun entuafuy Maria tañi femün mu?

²¹ ¿Chem kimafuy pu füta? Ti kim füta ngüneduamle ñi domo ñi küme kimniefiel ti Biblia, ayüwülaeyew. Tunte pepiluwün-ngele rume ñi domo, ti wentru weda duamlayay, lladkütulayafi ka “notukayaenew” pilayay rume. Ti wentru kimtukuniey ñi domo küme kimniefile ti Biblia, küme kelluafi tañi familia. Welu ti domo niele doy educacion rume tañi füta mu, ti füta müley ñi adnieafiel ñi familia ñi poyeafiel ta Jewba (Efes. 6:⁠4).

22. Pu domo, ¿chem kimafuy Maria tañi femün mu?

²² ¿Chem kimafuy pu domo? Ti domo eluwküley ñi adnieaetew ñi füta, welu müley ñi kidu eluwal ñi doy weniyeafiel ta Jewba (Gal. 6:⁠5). Müley ñi elantükünual ñi papeltual Biblia ka ñi rakiduamal. Femle tati domo, yamnieafi ka piwkeyenieafi ta Jewba, fey ayüwünkechi eluwküleay ñi adnieaetew ñi füta.

23. ¿Chumngelu fente kümey pu lamngen ñi eluwkülen ñi adniengeal?

²³ Pu lamngen ñi piwkeyefiel mu ta Jewba eluwle ñi adnieaetew tañi füta, doy ayüwküleayngün. Welu pu domo femnole, ayüwkülelayafuy. Taiñ pu lamngen eluwle ñi adnieaetew ñi füta, inayentuafeyew pu wecheke wentru ka pu üllchake domo. Kafey kellukonküleyngün ñi tüngküleal tañi familia ka tañi trawünche mu (Tito 2:⁠3-5). Famülke mu doy alün-ngey pu domo Jewba tañi trokiñche mu (Sal. 68:⁠11). Welu kom iñchiñ, domo ngeliyiñ, wentru ngeliyiñ rume, kelluntukuafuiñ ñi ayüwküleal ti trawünche. Küpalechi trokiñ mu peaiñ chumngechi femafuiñ kake kiñeke iñchiñ.