1954 tripantu mu, choyüngen Saint Paul pingechi waria mu, mülelu Estados Unidos. Tañi pu che ricu ngelafuyngün, welu küme felekefuyngün. Catolico ngefuyngün. Niefun epu peñi ka epu lamngen. Amukefun kiñe catolico colegio mu. Ka kellukefun tati sacerdote misa mu. Welu müte kimkelafun tati Biblia. Iñche feyentukefun Chaw Dios mu, welu kellunoaetew ti iglesia catolica trokiwkefun.

Koneltun kiñe universidad mu tañi abogado ngerpual. Kiñe antü, epu kurewen poyekefilu ta Jewba puwi tañi ruka mu. Iñche küchatumekefun tañi ropa, feymu “ka antü wüla wiñotuafuyu” pienew engu. Wiñotulu engu, ramtufiñ: “Pu wedake che, ¿chumngelu doy küme felekey tati pu kümeke che mu? ¿Chumngechi rüf ayüwküleafuy ta che?” pifiñ. Elungen ti lifru La verdad que lleva a vida  eterna ka ti Traducción del Nuevo Mundo karü tapa nielu. Kafey eluwün ñi kimeltulelngeal Biblia. Afmatulenew ñi kimürpun. Rume ayüwülenew kimfiel Chaw Dios tañi Gobierno kom ngünenietuafi ti Mapu. Kimürpun tati pu gobierno ñi küme ngünenienofiel tati pu che, feymu küme felekelayngün ka fente rupakeyngün wedake dungu mu.

1982 tripantu mu, wültukun tañi mongen Jewba mu. Feymu feychi tripantu fautizawün kiñe fütra trawün mu. Ka semana amun ñi femal ti prueba tañi abogado ngerpual. Küme tripan tañi prueba mu, feymu abogado ngerpun.

Feychi fütra trawün tañi fautizawün, kimfiñ kiñe peñi Mike Richardson pingelu. Kidu küdawkefuy ti Betel mülelu Brooklyn waria mu, Estados Unidos. Kidu feypienew ñi mülerpun kiñe oficina ngüneduamkefilu ti asuntos legales. Fey abogado ngelu am iñche, rakiduamün feychi eunuco etiope reke, “kümeafuy ñi küdawal fey mu” pin (Hecho 8:⁠36). Feymu mandafiñ chi papel küdawal Betel mu.

Iñche tañi chaw ka tañi ñuke ayülafuy iñche tañi poyerpuafiel ta Jewba. Tañi chaw ayükelafuy iñche ñi küdawal Betel mu, feymu feypienew: “Küdawülmi Betel mu, doy küme abogado ngerpulayaymi”. Iñche feypifiñ: “Iñche küdawlayan Betel mu tañi ricu ngerpual, iñche llowan pichin plata müten pu kakelu betelita reke”.

Iñche dew küdawkülekefun tribunal mu, feymu pepi pürüm amulafun Betel mu. 1984 mu wüla, konpun ñi küdawal Betel mu. Elungen ñi küdawal ti oficina ngüneduamkefilu ti asuntos legales. Dew küdawkülefulu am iñche kiñe tribunal mu, rume kimürpun. Fey kelluenew ñi küme femal tañi küdaw Betel mu.

Noviembre 1983 tripantu mu, pu Dungukelu Iney Ngen Jewba ngillafi ti Teatro Stanley, mülelu Jersey City pingechi waria mu. Pu peñi feypifi ti autoridad ñi eluaetew tañi doy küme elkünutual ti teatro. Feypifingün feychi teatro mu ñi femngeal tañi fütrake trawün. Welu tati ley feypi ñi  mülenoal kiñe iglesia ka trawünwe ruka no rume rangiñ waria mu. Welu ti teatro, chew taiñ trawüluwal, mülefuy rangiñ waria mu. Feymu elungelaiñ taiñ küme elkünutuafiel. Taiñ pu peñi ka amuyngün pu autoridad mu, welu elungelay permiso ñi küme elkünutuafiel engün ti teatro.

Kiñe semana puwlu Betel mu iñche, yengey ti dungu tribunal mu. Iñche dew epu tripantu küdawkefun ti tribunal mu, feymu kimniefun tüfachi dungu. Kiñe taiñ abogado feypi tati teatro ñi pünengekeel fillke dungu mu, musica ka pelicula, feymu ‘¿chumngelu am iñchiñ pünenoafuilu taiñ trawüluwal?’. Tati tribunal inaduamfi tati dungu, fey feypi re ngünam katrütungeiñ taiñ poyefiel ta Jewba. Feymu tati pu autoridad feypingeyngün taiñ eluaetew permiso taiñ küme elkünutuafiel ti teatro. Femngechi pefiñ reke Jewba ñi kellukefiel tañi pu che ñi ingkañpewal pu autoridad mu. Müna ayüwün pichi kelluntukual tati küdaw mu.

Taiñ pu peñi eluwi ñi kom küme elkünutuafiel ti teatro epe kiñe tripantu. Jersey City mülechi fütra trawünwe ruka pingetuy feytachi teatro. 8 konchi septiembre küyen 1985 tripantu mu, feychi teatro mu femngey kiñe fütra trawün dewlu ti clase 79 Galaad pingechi chillkatuwe mu. Rume ayüwkülefun ñi küdawelfiel ta Jewba Betel mu. Chem küdaw no rume fente ayüwülkelafenew. Rakiduamkelafun rume Jewba tañi pepikalniekeetew kakelu falin küdaw.

Konlu 1980 tripantu, pu peñi, pu lamngen feypifule rume ñi tukulelngenoal mollfüñ, allkütungekelafuyngün. Tati pu juez feypikefuy: “Pu niepüñeñkülechi domo duamniele ta mollfüñ, tukulelngeafuy müten” pikeyngün. ¿Chemu feypikeyngün? “Lale tañi ñuke, kuñifall tremafuy” pikeyngün.

29 konchi diciembre 1988 tripantu mu, taiñ lamngen Denise Nicoleau dew nielu tañi püñeñ, katrülafuy tañi mollfüñ. Layalu trokieyew tati doctor, feymu ayüfuy ñi tukulelafiel mollfüñ. Feytachi lamngen pilay ñi tukulelngeal mollfüñ. Ka antü mu, tati doctor entupermisofi tati juez ñi tukulelafiel ta mollfüñ. Tati juez elufi müten tati doctor ñi tukulelafiel mollfüñ taiñ lamngen. Kidu ka tañi füta feypingelayngu rume.

 Feychi antü mu müten ñi elungeel permiso, tukulelngey ta mollfüñ tati lamngen. Tañi pu che ka pu longkolelu ayülafuy tañi femngeal. Feymu kiñeke engün koyla feypintukungeyngün, feymu presuntukungeyngün. Ka antü, sabado antü mu, kom püle tripatripangey ñi presungen tüfachi pu peñi ka pu lamngen.

Ka antü mu amuiñ kiñe fütra tribunal ñi ngüneduamafiel ti dungu. Fey lunes puliwentu nütramkafiñ kiñe juez, Milton Mollen pingelu. Nütramkafiñ chem ñi rupan, ka feypifiñ ti kangelu juez feypi müten ñi tukulelngeal mollfüñ taiñ lamngen, ramtulaeiñmu rume. Ti juez feypienew ñi rumeal oficina mu tañi nütramkayal. Compañenew kiñe longkolelu Betel mu, Philip Brumley pingelu. Tati oficina mu, ka yengey tati abogado ingkañpekefilu ti pital. Pichike weda tripay taiñ feypiwün. Ti peñi tañi compañetew wirintukulenew tañi cuaderno mu: “Tüngkülenge” pienew. Iñche lladkünkechi dungufuiñ tati abogado, feymu rume kümey tañi ngülamtungeel.

Kiñe hora nütramkaiñ, fey ti juez feypienew: “Wüle, puliwen mu, wüne ngüneduamaiñ tami dungu”. Tripalelu ta oficina mu, ti juez ka feypienew: “Ti abogado rume küdawtuay ñi ingkañpeafiel ti pital”. Jewba feypikaenew reke taiñ wewal tati juicio. Jewba adnieeiñmu taiñ femal kidu ñi ayükeel. Feymu rume ayüwkülefun.

Alü punmaiñ taiñ pepikawal taiñ chem pial. Tati tribunal püllelefuy Betel mu. Feymu ka antü, konlu tati juicio, taiñ pu compañ amuyngün üyew. Meli juez allkütueiñmu taiñ chem pin, fey feypingün: “Ngelafuy ñi tukulelngeal mollfüñ feytachi domo”. Tati tribunal ka feypi: “Kom pu che müley ñi wüne ramtungeal tañi chem pin, fey wüla tati juez feypiafuy tañi chem chumal”.

Nueva York mülechi doy fütra tribunal feypi taiñ lamngen mülefuy ñi lawentungeal, welu ñi tukulelngenoal mollfüñ. Wewiyiñ kakelu küla femngechi juicio tati doy fütrake tribunal mülelu Estados Unidos mapu mu (inaduamnge ti wichulechi dungu “ Wewiyiñ  fütrake tribunal mu”). Ka femngechi küdawkefun Betel mu kakelu abogado iñchiñ taiñ kelluafiel pu peñi ka pu lamngen fillke dungu mu.

Rupachi tripantu, kimfiñ ta Denise. Kidu fütangekefuy, welu fewla kiduletuy. Küla püñeñ niey. Küdawkefuy ka wünelekefuy amuldungun mu. Feytachi lamngen fentren wedake dungu rupakefuy, welu yafüluwi tañi poyeafiel ta Jewba, feymu afmatulewen. 1992 tripantu mu, pewiyu kiñe fütra trawün Nueva York pingechi waria mu, fey feypifiñ tayu doy kimuwal. Kiñe tripantu rupalu, niewiyu. Dew niewlu iñchiw, amulerpun ñi kelluntukual Betel mu. Tañi domo ayüwünkechi serfikefi ta Jewba ka ayüwkülekey, feymu rume falintukefiñ. Tañi domo fill antü kümelkakeenew (Prov. 31:⁠12).

Niewlu iñchiw, Denise tañi pu püñeñ niefuy 11 tripantu, 13 tripantu ka 16 tripantu. Feymu kintuken Jewba tañi ngülam tañi küme chaw ngerpual kidu engün mu. Kiñeke mu, rupakefuiñ wedake dungu mu, welu rupachi antü mu, chaw ka weni trokikeenew engün. Feymu rume ayüwkülen. Ayüwünkechi llowkefiyiñ tañi pu weni ruka mu.

2013 tripantu mu, Denise iñchiw wiñamtuwiyu Wisconsin waria mu taiñ cuidayafiel taiñ pu fütakeche. Wiñamtuwlu rume, fentekünulan ñi kelluntukual Betel mu. Doy may, amulerpun ñi küdawal tañi abogado ngen mu.

Konlu septiembre 2018 tripantu mu, kangentuwün. Müna trüfonkefun petu tañi dungunon. Kiñe doctor ngüneduamenew, welu kimürpulay chem kutran tañi nieel. Ka doctor mu amun, fey “amuaymi neurologo mu” pienew. Enero 2019 tripantu mu, ti neurologo feypienew: “Kangechi kutran nieymi. Rupalechi antü, ñochikechi lañmayay tami cuerpo”.

Küla antü rupalu, awkantumekelu trananagün. Wetroy tañi troy kuwü. Iñche rumel konkefun feytachi awkantun mu, feymu tranlu iñche inaduamün ñi küme felenon tañi cuerpo. Pürüm doyelkülerpuy tañi kutran. Feymu newe pepi dunguwelan, newe pepi nengümuw-welan, ka newe pepi rulmewelan tañi iyael.

Rume ayüwülenew fente tañi küdawelfiel ta Jewba tañi abogado ngen mu. Ka elungen ñi wirintukual kiñeke revista mu ka ñi wülal wewpin, femngechi ñi yamniengeal pu poyekefilu ta Jewba, fey ñi tukulelngenoal ta mollfüñ. Rume ayüwülenew ñi femün tüfachi küdaw. Femlu rume kom tüfa, Luka reke feypiken: iñche kiñe küdawfe müten reke felen, iñche femün tañi femafel müten (Luka 17:⁠10).