1. Jewba, ¿chumngelu trürümuwi kiñe ñuke mu?

FÜTRA kuyfi mu, Chaw Dios feypifi tati pu israelche: “¿Ngoymakünupeafuy may kiñe domo tañi moyol püñeñ, ka kutranpiwkeyelayafuy tañi püñeñ kidu ñi choyüel? Tüfachi pu domo ngoymafule rume, iñche turpu ngoymanentulayaeyu” (Is. 49:⁠15). Pu ñuke rume piwkeyeniefi tañi pu püñeñ. Feymu feytachi versiculo mu, Jewba trürümuwi kiñe ñuke mu, femngechi taiñ kimal fente taiñ piwkeyenieetew. Kiñe lamngen Jasmín pingelu, feypi: “Pu domo moyolfiel mu tañi pu püñeñ, doy kiñewkey. Fentren tripantu rupale rume, piwkentukunieafi” pi. Fentren ñuke ka femngechi rakiduamkey.

2. Kiñeke peñi ka lamngen kiñe püle tripan mu Jewba mu, ¿chumkey Jewba tañi piwke?

² Jewba rume falintukefi kom ñi femken tañi pu poyekeetew, welu fill tripantu fentren peñi ka lamngen amuldunguwekelay ka trawüwekelay engün.⁠ * Pefiel mu tüfa, rume weñangkükepelay ta Jewba.

3. ¿Chem ayüniey Jewba?

³ Fentren taiñ pu peñi ka pu lamngen amuldunguwekenolu, wiñotukeyngün Jewba mu, iñchiñ ayüwünkechi llowkefiyiñ. Jewba rume ayüniey tüfachi pu peñi ka pu lamngen ñi wiñotual kidu mu. Iñchiñ ka femngechi ayünieiñ (1 Ped. 2:⁠25). Fewla ngüneduamaiñ chumngelu tüfachi pu peñi ka pu lamngen amuldunguwekelay ka trawüluw-wekelay. Ka peaiñ chumngechi kelluafuiñ engün ñi wiñotual ti trawünche mu.

4. Kiñeke peñi ka kiñeke lamngen fente tañi küdawken, ¿chumkeyngün?

⁴ Kiñeke taiñ pu peñi ka pu lamngen doyümürpufingün tañi küdaw, feymu kiñe püle tripayngün Jewba mu. Kiñe peñi Hung⁠ * pingelu, Asia mapu mu müley, feypi: “‘Doy plata niefuli, doy küme küdawelafun ta Jewba’ pikefun tañi rakiduam mu. Feymu rume küdawkefun. Welu müna welulkalefuy tañi rakiduam. Rume küdawürpun, feymu ñochikechi amuwelan trawün mu, fey kiñe püle triparpun ti trawünche mu. Tüfa ñi ayükeel tati Weküfü. Kidu welurakiduamelkefi tati pu che, femngechi ñochikechi famentukefi Jewba mu” pi.

5. Fente ñi weda rupan kiñe lamngen, ¿chumi?

⁵ Ka kiñeke peñi ka lamngen fentren wedake dungu rupakeyngün, feymu kiñe püle tripayngün Jewba mu. Kiñe lamngen Anne pingelu, niey kechu püñeñ, kidu feypi: “Kiñe tañi püñeñ choyüfilu müten, rume kutran che ngefuy. Tremfule rume, kidutu pepi cuidawlayafuy. Rupachi antü mu, kiñe tañi pu domo püñeñ wemünentungey tati trawünche mu. Ka kiñe wentru püñeñ küme longko ngewelay kutran mu. Fente tañi weda duamün mu, kiñe püle tripan ti trawünche mu” pi. Ka femngechi Anne reke, fentren peñi ka lamngen pütrün wedake dungu rupakeyngün, müna kutranpiwkeyefiyiñ engün.

6. Kiñe cristiano inanole Kolosense 3:⁠13, ¿chumngelu kiñe püle tripayafuy ti trawünche mu?

⁶ Kiñeke mu weda duamelafeiñmu ka wedalkayafeiñmu ñi femün kiñeke pu peñi ka kiñeke taiñ pu lamngen. Femngechi rupale, mülefuy taiñ perdonayafiel. Apostol Pablo feypi: ‘Welukonkechi ngenoafelniewaymün, ka wiñoduamawaymün kiñeke femle weda dungu ñi lladkülkayafiel ta kangelu. Chumngechi ta Jewba wiñoduamatueymünmew, wiñoduamawaymün kay ta eymün’ (Kolosense 3:⁠13). Inanoliyiñ tüfachi ngülam, illkutunieafuiñ feychi peñi ka lamngen, fey kiñe püle tripayafuiñ Jewba mu. Ngüneduamnge ñi rupan kiñe peñi Pablo pingelu. Taiñ peñi koyla dalluntukungey, kidu chumlafuy rume, welu feyentungelay. Feymu müntuñmangey tañi küdaw ti trawünche mu. Taiñ peñi fente tañi illkulewen, ñochikechi kiñe püle triparpuy ti trawünche mu.

7. Weda duamkülele kiñe che tañi culpan mu, ¿chumürpuafuy?

⁷ Kiñeke peñi ka lamngen weda culpay kuyfi mu, welu perdonangelu engün rume, weda duamkülekeyngün. Feymu “Jewba piwkeyewepeafenew iñche” pikeyngün, “falilan tañi koneltuleal Jewba tañi pu che mu” piafuyngün. Femngechi rakiduamkülefuy kiñe peñi Francisco pingelu, kidu feypi: “Iñche weda culpan Jewba mu, feymu norümtuenew pu longkolelu. Amukafun trawün mu, welu rume weñangküken, falinolu trokiwkefun kidutu. Fente ñi weda duamkülen, ‘Jewba perdonalaenew’ pikefun tañi rakiduam. Fey rupachi antü mu, kiñe püle tripan trawünche mu” pi Francisco. Pefiel mu eymi pu peñi ka pu lamngen femngechi weda rupamekelu, ¿chumkey tami piwke? ¿Kutranpiwkeyekepefimi may? Jewba kay, ¿chumkey kidu engün mu?

8. Jewba, ¿ngoymakepefi may pu kiñe püle tripalu kidu mu? ¿Chumngelu kimnieiñ tüfa?

⁸ Kiñe püle tripakelu rume kiñeke peñi ka lamngen, Jewba ngoymakelaeyew engün. Rume falintukefi kom tañi femkefel engün (Eb. 6:⁠10). Isaia adentukünuy chumngechi ñi duamniefiel Jewba tañi pu che. Kidu feypi: “Ngünechen inaduamafi tañi pu ufisa kiñe  cuidaufisakelu reke. Trapümafi tañi pu ufisa ka metayawülafi” (Is. 40:⁠11). Jewba pefiel mu ñi kiñe püle tripan kiñeke tañi pu poyekeetew ufisa reke felelu, ¿chumkey tañi piwke? Weñangkükey. Feymu Jesus feypifi tañi pu inanieetew: ‘¿Kümelu trokifimün kay? Kiñe wentru niele pataka ufisa, fey ñamfule kiñe tüfa engün, ¿elkünulayafuy chi am tati pu aylla mari aylla lelfün mew, ñi amual ñi kintumeafiel tati ñamlu? Fey petufile, rume ayüwafuy tañi petuelchi ufisa mew, tati aylla mari aylla mew ñamnolu engün am’ (Mat. 18:⁠12, 13).

9. Fütra kuyfi mu, ¿chumkefuy pu cuidaufisakelu? (Inaduamnge ti adentun wenulelu).

⁹ ¿Chem dungu mew Jewba trürküley ta kiñe cuidaufisakelu? Kuyfi mu, pu cuidaufisakelu rume duamniekefi tañi ufisa. Rakiduamnge tüfachi dungu mu. David langümfi kiñe trapial ka kiñe oso ñi montulafiel tañi ufisa (1 Sam. 17:⁠34, 35). Kiñe cuidaufisakelu fentren ufisa niele rume, ngüneduamay ñamle kiñe tati ufisa (Juan 10:⁠3, 14, 15). Cerrantukuafuy tañi ufisa, kam elfalkünuafuy tañi ufisa, fey ñi kintumeafiel tati ñamkiyawlu. Jesus nütramkay kiñe wentru rume yafüluwi ñi petuafiel kiñe ufisa ñamkiyawlu. Jesus feypi: “Chaw Ngünechen ka femngechi ayülelay ñi ñamal kiñeke tañi pu che ufisa reke felelu” (Mat. 18:⁠14).

10. Ñi feypiel Ezequiel 34:⁠11, 12, 16, ¿chumngechi kellukefi Jewba tati pu kiñe püle tripalu kidu mu?

¹⁰ Jewba kake kiñeke iñchiñ piwkeyenieeiñmu, kenü tati pu kiñe püle tripalu kidu mu. Ezequiel mu, Chaw Dios feypikünuy ñi kintuafiel tañi ñamkiyawchi ufisa ka kelluafi tañi küme weniyewtual engün. Chaw Ngünechen Jewba feypi: “Iñche llemay kintuafiñ tañi pu ufisa ka cuidayafiñ. Kiñe cuidaufisakelu petukefi tañi pu ufisa ka elukefi iyael, ka femngechi iñche cuidayafiñ ñi pu ufisa. Feychi antü kurü tromülelu püdümngey tañi pu ufisa. Chew rume tañi yengen engün, iñche montulmeafiñ. Kintuafiñ tati pu ufisa  ñamkiyawlu, ka küpaltuafiñ tati pu kiñe püle tripalu. Tati allfülechi ufisa, iñche küme trarikünuñmayafiñ tañi allfen. Newentukuafiñ tati newen-ngenolu” (Ezequiel 34:⁠11, 12, 16). Feyta mu, Jewba feypi ñi kelluafiel tañi ufisa kiñe cuidaufisakelu reke, ¿chumngechi? Wünelu mu, tati cuidaufisafe kintuafuy tañi pu ufisa küdawngefule rume. Petufile, küpaltuafi tañi pu kechan ufisa mu. Tati ufisa allfülele, ngüñülele, tati cuidaufisafe ütalafi, lawentuñmayafi tañi allfeñ ka metayetuafi. Feychi cuidaufisakelu reke, Jewba kellukefi tañi pu ufisa. Ka femngechi pu longkolelu cuidakefi Ngünechen tañi pu che ufisa reke felelu (1 Ped. 5:⁠2, 3). Feymu kintukefi pu kiñe püle tripalu ti trawünche mu, kellukefi ñi wiñotual engün ka kellukefi ñi weniyetuafiel engün ta Jewba.⁠ *

11. ¿Chem kimniey kiñe küme cuidaufisakelu?

¹¹ Kiñe küme cuidaufisafe kimniefuy ñi ñamrumeafel kiñe ufisa. Ñamün mu ti ufisa, tati cuidaufisafe lladkütukelafi ka wülelkakelafi. Ka femngechi kiñe püle tripale kiñe tañi pu che, Jewba lladkütukelafi, doy may kellukefi. Ngüneduamaiñ chumngechi ñi femün tüfa kuyfi mu.

12. Jewba, ¿chumngechi kellufi ta Jona?

¹² Ngüneduamaiñ Jona ñi rupan. Jewba “amuaymi Ninife mu” pieyew, welu kidu kañpüle amuy. Femfulu rume, Jewba famentulaeyew. Kiñe cuidaufisakelu reke, Jewba montulfi ta Jona ka kellufi ñi küme femal tañi küdaw (Jona 2:⁠7; 3:⁠1, 2). Kafey Jewba tremümelfi kiñe pichi anümka, ka antü angkümfi, femngechi pengelelfi ta Jona fente ñi falin-ngen pu che tañi mongen (Jona 4:⁠10, 11). Pu longkolelu, ¿chumngechi inayentuafuy ta Jewba? Kiñe püle tripale kiñe peñi ka kiñe lamngen ti trawünche mu, pu longkolelu “wiñopetuafuy trawün mu” pikelay. Doy may, ngüneduamkeyngün chemu tañi püntüwün engün ti trawünche mu. Wiñotun mu feytachi pu ufisa ti trawünche mu, pu longkolelu kidukünukelaeyew, piwkeyenkechi kellukeeyew.

13. Ñi femün Jewba welurakiduamlu ti salmista, ¿chumngechi kelluafeiñmu?

 ¹³ Fewla ngüneduamaiñ ñi rupan ti wirintukulu ti Salmo 73. Kidu weda duami tañi pefiel mu ñi küme felen tati pu wedake che. Kidu rakiduami ñi ngünam serfimekefiel ta Jewba (Sal. 73:⁠12, 13, 16). ¿Chumi am Jewba? Jewba condenalaeyew, doy may wirintukukünuy tañi feypin tüfachi wentru Biblia mu. Rupachi antü mu, tati salmista inaduamürpuy weniyeafiel ta Jewba doy falin-ngey chem dungu mu rume (Sal. 73:⁠23, 24, 26, 28). Ka femngechi famülke mu, kiñeke taiñ pu peñi ka pu lamngen rakiduamafuy ñi ngünam serfimekefiel ta Jewba. Femngechi rupale, pu longkolelu ngelay ñi condenayafiel engün, doy may ngüneduamkey chumngelu tañi femngechi rakiduamken engün. Femngechi müten yafültukuafeyew Biblia mu.

14. 1) ¿Chem dungu mu rupafuy ta Elia? 2) ¿Chumngechi kellueyew ta Jewba?

¹⁴ Fewla nütramkayaiñ ñi rupan ta Elia. Kidu lefmawi Jesafel mu tañi langümnoaetew (1 Rey. 19:⁠1-3). Elia rakiduamfuy kidu müten tañi profeta ngen. Re ngünam küdawlu trokiwi. Elia müna weda duamkülefuy, feymu ayüfuy tañi layal müten (1 Rey. 19:⁠4, 10). Jewba condenalafi ta Elia, doy may “kidulelaymi” pifi. Kafey pengelelfi ta Elia tañi nieel fütra newen. Jewba allkütufi chem ñi mülen Elia tañi piwke mu ka doy küdaw elufi (1 Rey. 19:⁠11-16, 18). Kom iñchiñ, doyelchi may pu longkolelu, müley taiñ kutranpiwkeyeafiel taiñ pu peñi ka pu lamngen. Kiñeke taiñ  pu peñi ka pu lamngen weda duamkülekey ka “perdonapeafenew Jewba” pikey. Entule chem mülen tañi piwke mu, pu longkolelu allkütuaeyew, fey pengelelafuyngün fente ñi piwkeyenieetew Jewba.

15. Ñi feypin Juan 6:⁠39, ¿chumngechi trokikefuy Jesus Jewba tañi pu ufisa?

¹⁵ Jesus tañi femün mu, kimeltukeeiñmu chumngechi müley taiñ trokiafiel pu kiñe püle tripalu ti trawünche mu. Jesus kimniefuy Jewba ñi falintukefiel kom tañi pu ufisa. Feymu mülepalu Mapu mu, eluwi ñi kelluafiel pu che kiñe püle tripalelu ñi wiñotual Chaw Dios mu (Mat. 15:⁠24; Luka 19:⁠9, 10). Kiñe küme cuidaufisafe reke, Jesus ka femngechi cuidafi Jewba tañi pu ufisa, femngechi tañi ñamümnoafiel (papeltunge Juan 6:⁠39).

16, 17. Pu longkolelu, ¿chem rakiduamkey feychi pu peñi ka pu lamngen kiñe püle tripalu ti trawünche mu? (Inaduamnge ti wichulechi dungu “ ¿Chem rakiduamkey pu kiñe püle tripalu ti trawünche mu?”).

¹⁶ Pablo ngülamtufi pu longkolelu ñi inayentuafiel ta Jesus. Feypifi ñi kelluafiel tati pu duamtulu ka ñi inayal Jesus tañi feypin “doy kümey ta wülal ta llowün mew” (Hecho 20:⁠17, 35). Ka femngechi famülke mu, pu longkolelu müley ñi cuidayafiel Ngünechen tañi pu che. Kiñe longkolelu Salvador pingelu, feypi: “Rakiduamün mu fente ñi piwkeyefiel Jewba tañi pu ufisa ñamkiyawlu, chumken rume tañi kelluafiel engün. Longkolelu am iñche, Jewba ayüniey ñi cuidayafiel tañi ufisa”.

¹⁷ Kom pu peñi, pu lamngen ñi nütramkangeel feytachi chillkatun mu, kellungeyngün ñi fülkontual Jewba mu. Fentren taiñ pu peñi ka pu lamngen kiñe püle tripalelu Jewba mu, ayükefuy tañi wiñotual kidu mu. Küpalechi chillkatun mu, nütramkayaiñ chumngechi kelluafuiñ feytachi pu peñi ka pu lamngen ñi wiñotual Jewba mu.