1. Wiñotun mu kiñe che trawünche mu, ¿chumkey Jewba?

RUPACHI chillkatun mu, ngüneduamiyiñ Jewba kiñe cuidaufisakelu reke feley, piwkeyenkechi cuidakefi tañi pu ufisa. Kidu kintukefi chuchi rume ñamkiyawlu. Jewba feypifi tati pu israelche kiñe püle tripalu kidu mu: “Wiñotumün iñche mew, fey iñche wiñotuan eymün mu”. Jewba femngechi rakiduamküley müten (Mal. 3:⁠6, 7). Jesus feypi Jewba ka pu kümeke püllü rume ayüwkey wiñotulu iney rume kiñe püle tripalu ti trawünche mu (Luka 15:⁠10, 32).

2. ¿Chem inaduamaiñ feytachi chillkatun mu?

² Feytachi chillkatun mu, peafiyiñ küla nütram ñi entuel ta Jesus. Kimeltuaeiñmu chumngechi kelluafiel pu kiñe püle tripalu trawünche mu. Inaduamaiñ chumngechi chengeafuiñ taiñ kelluafiel engün ka chumngelu fente ayüwün-ngey taiñ femal.

3, 4. Ti domo ñi nütramkael Luka 15:⁠8-10, ¿chumngelu fente kintufi tañi moneda?

³ Taiñ peafiel pu kiñe püle tripalu ti trawünche mu, müley taiñ küme kintunieafiel engün. Jesus nütramkay kiñe domo mu ñamümlu kiñe falin moneda. Tüfachi domo rume küdawtuy ñi peal tañi moneda (papeltunge Luka 15:⁠8-10).

⁴ Jesus ñi antü mu, kiñeke ñuke elukefuy mari moneda  tañi püñeñ fütangelu. Feytachi domo ñi nütramkael ta Jesus ñamümpelafuy kiñe feytachi moneda peno. Tüfachi domo ütrüfnakümfilu mapu mu trokiwi, feymu üyümfi kiñe küdetuwe tañi kintuafiel, welu pelafi. Feymu kuñiwünkechi lepütufi kom tañi ruka. Femlu, perumetufi tañi moneda. Rume ayüwpelay ñi petufiel tañi moneda. Feymu mütrümfi kom tañi pu weni, tañi pu karukache ñi feypiafiel ñi petun tañi moneda.

5. ¿Chumngelu müley taiñ küme kintuafiel tati pu kiñe püle tripalu Jewba mu?

⁵ ¿Chem kimeltukeeiñmu Jesus tañi nütram? Ñamümfiliyiñ chem rume, müley taiñ küme kintuafiel fey taiñ petuafiel. Ka femngechi müley taiñ küme kintuafiel pu kiñe püle tripalu Jewba mu. ¿Chumngelu am? Kiñeke engün pütrün tripantu kiñe püle tripaley trawünche mu. Kakelu pu peñi ka pu lamngen amutuyngün kake mapu mu, fey pu trawünche kimlaeyew ñi mülepun fey mu. Kiñeke tüfachi pu peñi ka pu lamngen kiñe püle tripalu Jewba mu ayüniepelay ñi wiñotual kidu mu, welu duamnieyngün ñi kellungeal engün.

6. ¿Chumngechi kom kelluntukuafuiñ ñi kintuafiel pu kiñe püle tripalu Jewba mu?

⁶ ¿Iney müley ñi kintuafiel pu kiñe püle tripalu ti trawünche mu? Tañi pu familia, pu longkolelu, pu wünelekelu amuldungun mu ka kom iñchiñ. Kiñeke taiñ pu che ka kiñeke taiñ pu weni kiñe püle tripaley chi Jewba mu. Kafey amuldungun mu, peafuiñ kiñe peñi kam lamngen kiñe püle tripalu Jewba mu. Feypiafuiñ tati che: “Ayülmi tami pemeaetew pu longkolelu, iñche wirintukuñmayafeyu tami numero telefono ka chew tami mülen, femngechi ñi eluafiel engün”.

7. ¿Chem kimeltukeeiñmu ñi feypin Tomás?

⁷ Pu longkolelu müley ñi kintuafiel pu küpa wiñotulu Jewba mu. Kiñe longkolelu, Tomás⁠ * pingelu, kellufi doy 40 che ñi wiñotual Jewba mu. Kidu feypi: “Ramtukefiñ pu peñi, pu lamngen: ‘Faw püle, ¿mülepey may kiñe peñi kam lamngen kiñe püle tripalu ti trawünche mu?’. Pu peñi ka pu lamngen ayüwünkechi kelluntukukey ñi kintuafiel pu kiñe püle tripalu Jewba mu. Femngechi kimürpuken chew ñi mülen kiñeke peñi, kiñeke lamngen kiñe püle tripalu ti trawünche mu. Fey pemefilu engün, ramtukefiñ ñi chumlen tañi pu che. Kiñeke tañi pu familia trawükefuyngün ka amuldungukefuyngün, welu ka kiñe püle tripayngün Jewba mu. Kidu engün ka kellungeafuy ñi wiñotual Jewba mu”.

8. Ñi feypilen Luka 15:⁠17-24, ti chaw ¿chumngechi llowfi tañi fotüm?

⁸ ¿Chem chengeaiñ taiñ kelluafiel pu kiñe püle tripalu Jewba mu? Taiñ wiñoldungual, ngüneduamaiñ kiñe nütram ñi entuel Jesus (papeltunge Luka 15:⁠17-24). Jesus nütramkay kiñe weche wentru wedwedkawlu, fey tripatuy tañi chaw ñi ruka mu. Rupachi antü mu, chekontuy, fey wiñotuy tañi chaw ñi ruka mu. Tañi chaw pefilu ñi wiñotun, lefkülen llowmefi ka piwkeyenkechi pangkofi. Fente tañi weda duamkülen ti weche wentru, “yewen-ngey iñche ñi fotüm tami piafiel ta iñche” pifi tañi chaw. Fey tañi chaw kutranpiwkeyeeyew. Fey tañi chaw adkünuy kiñe fiesta ka feypi ñi doy kümeke ropa ñi elungeal tañi fotüm. Femngechi pengeli ñi nietufiel fotüm reke.

9. ¿Chumngechi chengeaiñ taiñ kelluafiel pu kiñe püle tripalu Jewba mu? (Inaduamnge ti wichulechi dungu “ ¿Chumngechi kelluafuiñ pu küpa wiñotulu Jewba mu?”).

 ⁹ Jewba trürümngeafuy feychi chaw ñi nütramkael Jesus. Chaw Jewba rume piwkeyeniefi pu kiñe püle tripalu kidu mu ka ayüniey ñi wiñotual kidu mu. Jewba reke, ñom piwkengeaiñ, kutranpiwkeyecheaiñ ka piwkeyecheaiñ, femngechi kelluafuiñ pu peñi ka pu lamngen ñi wiñotual Jewba mu. ¿Chumngelu duamnieiñ taiñ femngechi chengeal? ¿Chumngechi femürpuafuiñ?

10. ¿Chumngelu ñom piwkengeaiñ taiñ kelluafiel pu kiñe püle tripalu Jewba mu?

¹⁰ Tati pu kiñe püle tripalu Jewba mu alüñmayafuy ñi wiñotual engün, feymu duamfali taiñ ñom piwkengeal. Fentren peñi ka lamngen kiñe püle tripalefulu Jewba mu, pemengeyngün fentren rupa, feychi mu wüla wiñotuyngün Jewba mu. Kiñe lamngen Nancy pingey, feypi: “Kiñe lamngen tañi trawünche mu rume kellukeenew. Kidu tañi wünen lamngen trokikeenew. Kidu acordalenew fente tayu küme rupan kuyfi mu. Iñche feypikefiñ chem ñi mülen tañi piwke mew. Kidu allkütukeenew ka ngülamtukeenew. Kidu rüf küme weniyeenew ka kellukeenew chem dungu rume duamniefuli”.

11. ¿Chumngelu kutranpiwkeyeafiyiñ pu weda duamkülelu?

¹¹ Allfülechi che duamniey lawen tañi küme duamtual. Ka femngechi weñangkülechi che duamniey tañi kutranpiwkeyengeal, fey tañi doy küme duamtual. ¿Chumngelu am? Kiñeke peñi ka lamngen weda duamelngeyngün trawünche mu, feymu  kiñe püle tripaleyngün ka ayülayngün ñi wiñotual Jewba mu. Kiñeke engün wedalkangelu trokiwkeyngün, feymu illkuleyngün. Tüfachi pu peñi ka pu lamngen duamnieyngün ñi allkütungeal tañi chum duamkülen (Sant. 1:⁠19). Kiñe lamngen Maria pingelu, kiñe püle tripalefuy ti trawünche mu, kidu feypi: “Duamniefun tañi allkütungeal, yafültukungeal ka kellungeal”.

12. Jewba piwkeyenkechi küpalkeeiñmu kidu mu, ¿chumngechi trürümafuiñ?

¹² Kuyfi mu, Jewba feypi ñi piwkeyenkechi küpalafiel pu israelche kiñe püle tripalu kidu mu (Os. 11:⁠4). Ka femngechi famülke mu, Jewba piwkeyenkechi küpalkeeiñmu kidu mu. ¿Chumngechi am? Rakiduamnge tüfachi dungu mu: kiñe antü ütrüfkonpuymi kiñe alü konchi lolo mu. Kidu tripapalayafuymi, duamnieymi tami ütrüftukulelngeal kiñe llasu, fey tami entungeal. Ka femngechi famülke mu, kiñeke taiñ pu peñi ka lamngen ütrüfkonküleyngün kiñe lolo mew reke. Fill wedake dungu nieyngün, fey kiñe püle tripaleyngün Jewba mu. Welu Chaw Jewba piwkeyenieeyew engün, fey ayüniey ñi entuafiel feychi lolo mew reke ka ñi küpaltuafiel kidu mu. Kiñeke mu, Jewba adniekeeiñmew iñchiñ taiñ piwkeyenkechi kelluafiel engün.

13. Kiñe peñi, ¿chem kellueyew ñi wiñotual Jewba mu?

¹³ Feypiafiyiñ pu kiñe püle tripalu ti trawünche mu ñi piwkeyeetew Jewba. Ka femngechi pengelelafiyiñ iñchiñ taiñ piwkeyeniefiel. Rupachi chillkatun mu nütramkaiñ ñi rupan taiñ peñi Pablo pingelu, doy 30 tripantu kiñe püle tripalefuy ti trawünche mu.  Kidu feypi: “Kiñe antü tripalelu tañi ruka mu, kiñe kushe lamngen chalipaenew ka piwkeyenkechi dunguenew. Tüfa puwi tañi piwke mu. Feymu ngümakawün pichi wentru reke. ‘Jewba werküeymu tami küpayal’ pifiñ. Feychi mu eluwün ñi wiñotual Jewba mu”.

14. Ñi feypin Luka 15:⁠4, 5, ¿chumkey kiñe cuidaufisafe petufilu kiñe ñamkülechi ufisa?

¹⁴ Kiñeke peñi ka kiñeke lamngen eluwkeyngün ñi wiñotual Jewba mu. Femfule engün rume, amuleaiñ taiñ kelluafiel ka yafültukuafiel. Kidu engün weda duamkülepelayngün tañi weda rupan mu. Ka kiñe püle tripalelu engün am ti trawünche mu, küme weniyelafingün ta Jewba. Feymu kelluafiyiñ engün ñi doy fülmawküleal Jewba mu. Taiñ longkontukual tüfa, ngüneduamaiñ ka nütram ñi entuel Jesus. Jesus nütramkay kiñe cuidaufisafe rume küdawi ñi kintuafiel kiñe ufisa ñamkiyawlu. Petufilu tati ufisa newenkülelay, feymu meñkupüramfi ñi küpaltuafiel tati kechan mu (papeltunge Luka 15:⁠4, 5).

15. ¿Chumngechi kelluafuiñ pu küpa wiñotulu Jewba mu? (Inaduamnge ti wichulechi dungu “ Kiñe fütra kellu”).

¹⁵ Eluwaiñ taiñ kelluafiel pu kiñe püle tripalu ti trawünche mu ñi küme weniyetuafiel ta Jewba. Taiñ femürpual, Jewba elukeeiñmu tañi newen, tati Biblia ka fentren kimeltun (Rom. 15:⁠1). Kiñe longkolelu feypi: “Fentren pu peñi ka pu lamngen ayünielu ñi wiñotual Jewba mu, duamnieyngün kiñe che ñi wiño kimelelaetew Biblia ka ñi küme  weniyeaetew” pi.⁠ * Kiñeke mu, pu longkolelu feypiafeiñmu taiñ kimeltulelafiel Biblia kiñeke peñi kam lamngen, fey ayüwünkechi femaiñ.

16. ¿Chumngelu feypiafuiñ taiñ kellukeetew pu kümeke püllü?

¹⁶ Tati pu kümeke püllü kellukeeiñmu taiñ peafiel pu küpa wiñotulu Jewba mu, fentren rupan dungu pengelkeeiñmu tüfa (Apok. 14:⁠6). Kiñe peñi Silvio pingelu, kiñe püle tripalefuy ti trawünche mu. “Kelluen” pifi ta Jewba ñi wiñotual ti trawünche mu. Petu llellipulu, epu longkolelu puwi tañi ruka mu. Feychi mu müten eluwingün ñi kelluafiel ta Silvio.

17. Kellufiliyiñ pu peñi, pu lamngen ñi wiñotual Jewba mu, ¿chumay taiñ piwke?

¹⁷ Ayüwün-ngey taiñ kelluafiel pu peñi ka pu lamngen ñi wiñotual Jewba mu. Kiñe peñi Salvador pingelu, kellukefi pu kiñe püle tripalu ti trawünche mu. Kidu feypi: “Jewba tañi kellun mu, kellukefiñ kiñeke peñi ka lamngen ñi wiñotual Jewba mu. Rakiduamün mu tüfa, llangkünagkey tañi külleñu fente tañi ayüwün” (Hecho 20:⁠35).

18. Kiñe püle tripalelmi Jewba mu, ¿chem maneluwafuymi?

¹⁸ Eymi kiñe püle tripalelmi ti trawünche mu, rüf maneluwküleafuymi tami piwkeyenieetew Jewba ka ayüniey tami wiñotual ta kidu mu. Welu tami wiñotual Jewba mu, duamfali tami yafüluwal. Kiñe küme chaw reke, Jewba esperanieeymu. Wiñotulmi kidu mu, ayüwünkechi llowaeymu.