1, 2. ¿Iney engün kelluntukuafuy pu estudiante ñi fautizawürpual?

KIÑE domo Amy pingelu, feypi: “Rume ayüwülkeenew tañi kimeltulelngeel Biblia. Kimtukuniefun ñi enseñalngeel ti rüf dungu, welu kimfilu wüla pu lamngen eluwün ñi küme elkünutual tañi mongen ka fautizawün” pi. Amy tañi rupan kimeltueiñmu kiñe rume falin dungu: kom ti trawünche müley ñi kelluafiel pu estudiakelu Biblia, femngechi doy eluwküleayngün ñi küme elkünutual tañi mongen ka fautizawal.

² Kom kelluntukuafuiñ ñi koneltual trawünche mu pu estudiakelu Biblia (Efes. 4:⁠16). Kiñe lamngen wünelekelu amuldungun mu, Leilani pingey, feypi: “Kelluwün mu tripakey dungu, feymu kom ti trawünche müley ñi kelluafiel pu estudiakelu Biblia ñi fautizawürpual” pi taiñ lamngen. Kiñe pichiche duamniey ñi yafültukuaetew ka enseñayaetew tañi chaw, ñuke ka tañi pu profesor, femngechi ñi küme amuleal ñi mongen. Ka femngechi pu estudiakelu Biblia duamniey ñi yafültukuaetew ka ngülamtuaetew pu peñi ka pu lamngen trawünche mu, femngechi ñi küme amuleal ti rüf dungu mu ka fautizawal (Prov. 15:⁠22).

3. Ñi feypin Ana, Darío ka Leilani, ¿chem rakiduameleymu?

³ Enseñalfilmi Biblia kiñe che ka kelluntukule tami pu peñi ka pu lamngen, ayüwküleaymi. ¿Chumngelu fente kümey ñi kelluñmangeal tami estudio? Ngüneduamnge ñi feypin kiñeke peñi ka lamngen. Ana, precursora especialngey, feypi: “Kiñe che estudiakelu Biblia rume duamniey kellu,  feymu rume küdawngeafuy kiñe che müten ñi kelluaetew” pi. Kangelu peñi, Darío⁠ * pingelu, feypi: “Fentren rupa pu peñi ka pu lamngen feypifingün tati estudiakelu kiñeke dungu püwkey tañi piwke mu. Iñche rakiduamlafun rume ñi feypial” pi taiñ peñi. Inaduamnge ka falin dungu ñi feypin taiñ lamngen Leilani: “Tati estudiakelu ngüneduamfiel mu ñi piwkeyenieetew ka duamnieetew pu lamngen, kimtukuafuy taiñ rüf cristianongen” pi taiñ lamngen (Juan 13:⁠35).

4. ¿Chem ngüneduamaiñ tüfachi trokiñ mu?

⁴ Eymi ramtuwafuymi chi: “¿Chumngechi kelluafun kiñe che iñche ñi enseñakenofiel Biblia ñi fautizawürpual?”. Feymu tüfachi trokiñ mu peafiyiñ chem taiñ chumafel mangelngeliyiñ taiñ enseñameafiel kiñe che. Kafey peafiyiñ chumngechi kelluafuiñ pu estudiakelu we trawüluwlu iñchiñ mu. Ka femngechi ngüneduamaiñ pu longkolelu chumngechi kelluafuyngün pu estudiakelu Biblia ñi fautizawürpual.

5. Mangelngelmi tami enseñameafiel kiñe che, ¿chem müley tami femal?

⁵ Tati peñi kam lamngen enseñalfilu Biblia kiñe che, müley ñi kelluafiel tañi adümafiel Biblia ñi feypin. Feymu mangelngelmi tami compañafiel, müley tami kelluafiel ñi küme kimeltucheal (Ecl. 4:⁠9, 10). Fey ¿chumngechi femafuymi tüfa? Peafiyiñ.

6. Mangelngelmi tami enseñameafiel kiñe che, ¿chumngechi inayafuymi ñi feypin Proverbios 20:⁠18?

⁶ Küme pepikawkülenge. Ramtuafuymi tami mangeletew: “¿Iney am enseñalmeafiyu Biblia?”. Biblia feypi: “Müleyüm küme nütramkan, küme tripakey kom dungu” (Proverbios 20:⁠18). Ka ramtuafuymi: “¿Chumngey ti estudiakelu? ¿Chem dungu ngüneduammekeeymu? ¿Chem ayünieymi ñi piwkentukual ti che fachantü? ¿Mülepey may kiñeke dungu iñche tañi feypial kam feypinoal? Ka, ¿mülepey may kiñeke dungu iñche tañi femal kam femnoal? ¿Chumngechi yafültukuafun tati estudiakelu ñi doy küme weniyeafiel Jewba?”. Kiñe misionera, Joy pingelu, femngechi dungu nütramkakey tañi pu compañ engu, fey feypi: “Tayu nütramkawün mu, tañi compañ doy eluwküley ñi kelluafiel ti estudiakelu ka küme kimniey chem feypial” pi taiñ lamngen. Chem dungu rume nütramelngelu ti compañ, kelluafeyew ñi küme kimeltuafiel tati estudiakelu. Welu tati kimeltuchefe ngelay ñi kom feypiafiel tañi compañ tañi nütramkaetew tati estudiakelu Biblia.

7. Mangelngelmi tami enseñachemeal, ¿chumngelu müley tami küme pepikawal?

 ⁷ Mangelngelmi tami enseñachemeal, kümeafuy tami ngüneduamal ti trokiñ tamün estudiayal (Esd. 7:⁠10). Taiñ peñi Darío feypi: “Rume mañumniefiñ ñi pepikawün tañi compañ, femngechi doy küme entukey tañi feypin” pi taiñ peñi. Kafey tati kimeltuchefe ka tati compañ küme pepikawkülele, tati estudiakelu inayentuafeyew. Küme pepikawnofulmi rume, ngüneduamafuymi tati doy falinke dungu mülelu ti trokiñ mu.

8. Ngillatulmi, ¿chumafuymi tami doy küme kelluafiel ti estudiakelu?

⁸ Estudiayam rume falin-ngey wüne ngillatual. Feymu feypingelmi tañi ngillatukünual, küme rakiduamaymi tami chem pial tami ngillatun mew. Femngechi tami ngillatun mew, doy küme kelluafimi ti estudiakelu (Sal. 141:⁠2). Kiñe domo, Hanae pingelu, petu piwkentukuniefi ñi llellipuel kiñe lamngen compañfilu tañi enseñaletew. Fey feypi: “Kimfali ti lamngen ñi küme weniyefiel Jewba, fey iñche ka ayüfun ñi inayentuafiel. Üytukefenew tañi ngillatun mew, fey kimün tañi piwkeyenieetew” pi tati domo.

9. Ñi feypin Santiaw 1:⁠19, ¿chumngechi kelluntukuafuymi mangelngelmi ñi enseñachemeal?

⁹ Kelluntukuafimi tati kimeltuchefe. Kiñe peñi, precursor especialngelu Nigeria mapu mew, feypi: “Pu kümeke compañ kim allkütukey petu ñi enseñalmeken ti che. Kimniey tati kimeltuchefe feley ñi adnieafiel chi estudio. Feymu küme dullintukey chem tañi feypial ka rume dungulay” pi taiñ peñi. Feymu compañfilmi kiñe peñi kam lamngen, ramtuwafuymi: “¿Chumül kümeafuy tañi feypial? Ka, ¿chem mülefuy ñi feypial?” (Prov. 25:⁠11). Küme allkütunge ñi chem pimeken tati kimeltuchefe ka tati estudiakelu (papeltunge Santiaw 1:⁠19). Femngechi femülmi, pepikawküleaymi tami kelluntukual. Müley tami rakiduamal petu tami dungunon. Katrükonlayaymi petu ñi dungumeken ti kimeltuchefe ka nütramkalayaymi kiñe dungu nüwkülenolu ti kimeltun mu. Feymu, ¿chumafuymi tami kelluntukual? Pichin dungufuymi rume, feypiafuymi falinke dungu. Ka entuafuymi kümeke pengelün dungu ka kümeke ramtun, femngechi ñi küme adümal ti che ti kimeltun. Kiñeke mu rakiduamafuymi tami müte kelluntukukenon. Welu sakifilmi ti estudiante ka duamtufilmi, kelluafuymi llemay ñi fautizawürpual.

10. ¿Chumngechi kelluafeyew ti estudiakelu kimal chem tami rupan?

¹⁰ Nütramkayafuymi kiñeke dungu tami rupan. Mangelngelmi tami enseñachemeal, feypiafuymi tati estudiakelu chumngechi kimürpufimi ta Jewba, chem wedake dungu chaftukefimi ka chumngechi tami  kelluetew Jewba tami mongen mew (Sal. 78:⁠4, 7). Rume kelluafeyew tati estudiante kimal chem tami rupan. Yafültukuafuy tañi maneluwal Jewba mu ka ñi küme chaftuafiel kiñe weda dungu ñi rupan, femngechi ñi fautizawürpual (1 Ped. 5:⁠9). Kiñe wünelekelu amuldungun mu, Gabriel pingelu, feypi chem kellueyew kuyfi petu enseñalngelu Biblia, fey feypi: “Allkütulu iñche chem ñi rupan pu peñi, pu lamngen, kimnien Jewba ñi duamnieetew engün. Pepil-lu kay fey engün, iñche ka pepilafun piken” pi taiñ peñi.

11, 12. ¿Chumngelu küme llowafiyiñ pu estudiakelu?

¹¹ Ñi fautizawürpual kiñe estudiakelu Biblia, müna kelluaeyew amual taiñ trawün mu (Eb. 10:⁠24, 25). Wünelu mu, ti kimeltuchefe mangelpelayafi ti estudiakelu ñi amual taiñ trawün mu. Amule wüla, yafültukuafuiñ ñi fentekünunoal ñi trawüluwal. ¿Chumngechi femafuiñ tüfa? Peafiyiñ.

¹² Küme llowafiyiñ pu estudiakelu (Rom. 15:⁠7). Trawün mu küme duamelfiliyiñ pu estudiakelu, doy eluwayngün ñi trawüluwal. Piwkeyenkechi chaliafiyiñ ka kelluafiyiñ ñi kimafiel kakelu peñi ka lamngen trawünche mu. Welu kuñiwtukuwaiñ, weda duamel-layafiyiñ ka yewentukulayafiyiñ. Kiñeke mu, we akun mu kiñe che trawün mu, tañi kimeltuchefe petu akulayafuy chi ka rume duam nieafuy, fey rume kümeafuy tami nütramkayafiel ti che. Küme allkütuafimi ñi feypin ka duamnieafimi. Ngüneduamnge ñi rupan kiñe peñi, Dimitri pingelu. Pichin tripantu yeniey tañi testigongen ka famülke mu siervo ministerialngey, feypi: “Ti wünen rupa amulu iñche trawün mu, pichi yewelefun, feymu wekun müten mülekefun. Fey kiñe peñi peenew ka piwkeyenkechi mangelenew ñi konal. Fentren che chalipaenew, afmatulewen. Fente tañi küme duameletew, ayülefun fill antü ñi femngechi trawüluwal. Turpu pekelafun femngechi dungu”.

13. ¿Chumngelu rume falin-ngey tami küme femün?

¹³ Inayentufalngeaymi. Tami küme femün mew kelluafuymi pu estudiakelu Biblia ñi kimtukual taiñ rüf cristianongen (Mat. 5:⁠16). Taiñ peñi Vitali pingey, wünelekey amuldungun mu, feypi: “Kuyfi mu petu enseñalngelu Biblia, ngüneduamkefun ñi chumken pu peñi ka pu lamngen, tüfa kelluenew ñi kimtukual tañi koneltumeken ti rüf religion mew” pi taiñ peñi.

14. Tami küme femün mew, ¿chumngechi kelluafuymi kiñe estudiakelu ñi fautizawürpual?

¹⁴ Petu ñi fautizawnon pu estudiakelu Biblia müley ñi inayal tañi kimürpuel.  Tüfa küdawngeafuy kiñeke mu. Welu ti estudiakelu Biblia ngüneduamafuy fente tami kelluetew inayal Biblia ñi ngülam, fey doy eluwafuy ñi inayafiel (1 Kor. 11:⁠1). Ngüneduamaiñ ñi feypin taiñ lamngen Hanae, taiñ inaduampeel parrafo pura mu, feypi: “Iñche küpa inakefun kiñeke ngülam tañi kimürpuel, ka ngüneduamün pu lamngen ñi dew femmeken tüfa. Tañi küme femün mu engün, kimürpun tañi yafültukucheal, perdonacheal ka piwkeyecheal. Siempre küme dungukefuyngün kake che mu, iñche küpa inayentukefiñ” pi taiñ lamngen.

15. ¿Chumngechi inayafuiñ ñi feypin Proverbios 27:⁠17 taiñ kelluafiel pu estudiakelu Biblia?

¹⁵ Weniyeafimi tati estudiakelu. Ti estudiakelu fentekünunole tañi trawüluwal, duamnieafimi (Filip. 2:⁠4). Eluwafuymi tami doy küme kimafiel. Sakiafuymi ñi küme inaniefiel mu Biblia ñi ngülam. Ramtuafuymi: “¿Chum amuley tami estudio? ¿Chumley tami pu che? ¿Chum amuley tami küdaw?”. Welu kuñiwtuwnge tami yewelnoafiel tami feypin mu. Femngechi nütramkawün mu doy küme weniyewaiñ. Fey tüfa rume kelluafuy tati estudiakelu ñi fautizawürpual. Biblia feypi: “Epu pañillwe yungümuwkey, ka femngechi kiñe wentru yungümkefi reke tañi weni” (Proverbios 27:⁠17). Famülke mu, taiñ lamngen Hanae wünelekey amuldungun mew. Petu longkontukuniey we eluwlu ñi trawüluwal, feypi: “Weniyerpufiñ pu lamngen trawünche mu, fey rume ayüwülenew trawüluwal. Feymu cansalen mu rume, amuken. Rume küme duamelenew weniyeafiel pu lamngen, fey tüfa kelluenew ñi famentuafiel pu weni inaniekenolu Biblia ñi ngülam. Ayüniefun ñi doy küme weniyeafiel Jewba ka pu lamngen, feymu fautizawün”.

16. ¿Ka chem femafuymi tami kelluafiel pu estudiakelu Biblia?

¹⁶ Ti estudiakelu doy küme yeniele tañi mongen, kelluafimi ñi ayüwküleal tañi koneltulen trawünche mu. Tami femal tüfa, mangelafuymi tati estudiakelu tamu küme rupaleal ka trür amuldungual (Eb. 13:⁠2). Kiñe peñi, Danilo pingey, petu acordaniey chem ñi rupan enseñalngelu Biblia, fey feypi: “Tañi domo iñchiw fentren rupa mangelngeyu ñi küme rupaleal pu peñi, pu lamngen iñchiñ. Feymu allkütukefuyu chumngechi kellueyew Jewba, fey tüfa yafültukueyumu. Kafey rume kellueyumu tayu küpa serfifiel ta Jewba, femngechi taiñ nieal kiñe küme mongen” pi taiñ peñi. Inaduamnge ñi feypin taiñ peñi Diego, feypi: “Fentren pu peñi mangelenew trür amuldungual. Femngechi doy küme kimürpufiñ engün. Ka kimelenew fentren dungu, fey tüfa kelluenew ñi doy küme weniyeafiel Jewba ka Jesus” pi taiñ peñi.

17. ¿Chumafuy pu longkolelu ñi kelluafiel pu estudiakelu?

¹⁷ Pengelafimi tati estudiakelu tami duamniefiel. Eymün pu longkolelu piwkeyenkechi duamniefilmün pu estudiakelu, kelluafimün ñi fautizawürpual. Trawün mu, eluwnge tami nütramkayafiel pu estudiakelu engün. Acordanieafimi ñi üy, fey pu estudiakelu küpa wiñoldungule trawün mu, ngüneduamay tami duamniefiel engün. Kafey compañafuymi pu peñi ka pu lamngen ñi enseñalmeafiel Biblia pu estudiakelu. Rakiduamlayafuymi rume fente tami kelluafiel pu estudiakelu. Kiñe lamngen wünelekelu amuldungun mu, Jackie pingey, feypi: “Fentren che afmatulewey kimün mu tañi compañetew kiñe longkolelu trawünche mu. Enseñalkefiñ Biblia kiñe familia, fey ti wentru feypi: ‘Tañi pastor turpu femlayafuy tüfa, kullingele müten pemekefi tati ricungelu’ pi” pi taiñ lamngen. Famülke mu, feychi wentru amukey trawün mu.

18. Pu longkolelu, ¿chumngechi inayafuyngün ñi feypin Hecho 20:⁠28?

¹⁸ Kelluafimi pu peñi, pu lamngen ñi doy küme kimeltucheal ka sakiafimi engün. Eymün pu longkolelu müley tamün kelluafiel pu peñi, pu lamngen ñi doy küme kimeltucheal (papeltunge Hecho 20:⁠28). Yewele ti peñi, ti lamngen ñi enseñacheal eymi tami adkiñ mu, feypiafuymi: “Ayülmi, iñche adnieafun ti estudio”. Taiñ lamngen Jackie feypi: “Pu longkolelu ramtukeenew ñi chum amulen pu che tañi enseñalfiel Biblia. Ka elukeenew kümeke ngülam ñi doy küme kimeltucheal. Pu longkolelu yafültukuenew ka feypikeenew ‘rume falin-ngey tami küdaw’, fey tüfa rume ayüwülkeenew. Tañi feypin mu füshküñmaenew reke tañi piwke, kimfalkünuenew ñi küme kimeltucheken” pi taiñ lamngen (Prov. 25:⁠25). Fey llemay, pu longkolelu rume kelluafuy pu peñi, pu lamngen ñi amuleal tañi kimeltucheken (1 Tes. 5:⁠11).

19. ¿Chumngelu rume ayüwküleafuiñ?

¹⁹ Penoliyiñ rume kiñe estudio, kelluafuiñ kiñeke che ñi fautizawürpual. Mangelngeliyiñ ñi enseñachemeal, rume dungulayaiñ. Welu may küme dulliaiñ chem taiñ pial, femngechi müna kelluafiyiñ tati kimeltuchefe. Pu estudiakelu amule taiñ trawün mu, küme weniyeafiyiñ. Kafey inayentufalngeaiñ. Pu longkolelu elkünuafuy tiempo ñi kelluafiel pu estudiakelu ka pu peñi, pu lamngen ñi doy küme kimeltucheal, femngechi müna kümelkayafingün. Pichin kelluntukufiliyiñ rume kiñe che ñi poyeafiel ta Jewba, rume ayüwküleaiñ.