1. ¿Chem müley taiñ femal iñchiñ taiñ pu cristiano ngen?

FAUTIZAWÜN mu iñchiñ, pengelkeiñ taiñ maneluwkülen Jewba mu ka taiñ küpa serfikefiel tañi trokiñche mu. Welu taiñ feyentun Jewba mu müley ñi foliluwküleal. Ka femngechi müley taiñ doy küme maneluwküleal Jewba ñi adniekefiel tañi trokiñche famülke mu.

2, 3. 1) Jewba ñi adniekefiel tañi trokiñche, ¿chem pengelkeeiñmu? 2) Jewba tañi trokiñche mu, ¿chem küla dungu kimürpuafuiñ?

² Jewba ñi adniekefiel tañi trokiñche pengelkeeiñmu ñi chumngen, chem ayüniey tañi femürpual ka tañi werkün dungu. Peafiyiñ küla dungu.

³ Kiñe, Jewba dullintuchekelay (Hecho 10:⁠34). Fente tañi piwkeyechen Jewba, wüli tañi Fotüm “ñi montulafiel ta itrokom che” (1 Tim. 2:⁠6; Juan 3:⁠16). Jewba adniekefi tañi trokiñche ñi amuldungulelafiel itrokom che, femngechi pu küme piwkengelu ñi feyentual Jesus mu, fey tañi montual. Epu, Chaw Jewba tüngün-ngey ka ayükelay ti welulkalechi dungu (1 Kor. 14:⁠33, 40). Feymu Jewba ayüniey tañi pu che ñi adkünuleal ka ñi tüngküleal engün. Küla, Jewba rume küme kimeltufe ngey (Is. 30:⁠20, 21). Feymu Jewba tañi trokiñche kimeltukeeiñmu iñchiñ Biblia mu ka kimeltukefi tati pu che amuldungun mu. Pu wünenke cristiano, ¿chumngechi inayentufingün Jewba ñi dullintuchekenon, ñi tüngün-ngen ka ñi küme kimeltufe ngen? ¿Famülke mu kay? ¿Chumngechi inayentuafuiñ? Jewba tañi newen, ¿chumngechi kelluafeiñmu taiñ küme küdawküleal tañi trokiñche mu?

4. 1) Ñi feypilen Hecho 1:⁠8, ¿chem feypifi Jesus tañi pu inanieetew? 2) ¿Chumngechi kellungeafuyngün?

⁴ Chem ñi rupan pu wünenke cristiano tañi antü mu. Ñi amuldungukeel ta Jesus, elufi maneluwün kom tati pu che (Luka 4:⁠43). Jesus feypifi tañi pu inanieetew ñi amuleal feytachi kudaw mu, fey ñi amuldungual engün tuntepu ñi mülen ta Mapu (papeltunge Hecho 1:⁠8). Tati pu wünenke cristiano kidu tañi newen mu müten femürpulayafuyngün feytachi küdaw. Jesus feypikünueyew Chaw Dios ñi eluaetew tañi newen, femngechi müten femürpuafuyngün tañi amuldungun küdaw (Zac. 4:⁠6; Juan 14:⁠26).

5, 6. Chaw Dios tañi newen, ¿chumngechi kellufi tati pu wünenke cristiano?

⁵ Feychi Pentekoste 33 tripantu mu, pu wünenke cristiano llowingün Jewba tañi newen. Feymu eluwingün tañi amuldungucheal. Pichi rupalu müten, fentren che feyentuyngün tati kümeke dungu, fey fautizawingün (Hecho 2:⁠41; 4:⁠4). Inantukungelu feytachi pu wünenke cristiano, llükalayngün ka fentekünulayngün tañi amuldungual. Doy may llellipufingün ta Jewba tañi kelluaetew. Feypifingün: ‘Kellufinge tami pu poyekeetew ñi kimeltual engün tami dungu ngeno llükan mew’. Feymu Chaw Dios elueyew ñi newen tañi amuldunguleal ngeno llükan mew (Hecho 4:⁠18-20, 29, 31).

⁶ Feychi antü mu rume küdawngefuy tañi amuldungual. Rume pichilekefuy tati wirin dungu nielu Chaw Dios tañi dungu. Ka nielafuyngün rume lifru tañi kelluaetew ñi adümafiel ta Biblia. Kafey mülefuy ñi amuldungulelafiel engün kake rume dungun pu che. Tunte küdawngefulu rume ti amuldungun küdaw feychi antü mu, tati pu wünenke cristiano amuldungurpuyngün “itrofill püle ka kom mapu mew” (Kol. 1:⁠6, 23).

7. 1) Taiñ pu peñi ka pu lamngen, ¿chumngechi kimürpuyngün ñi falin-ngen tañi amuldungucheal? 2) Kimlu wüla, ¿chumingün kay?

⁷ Chem ñi rupan famülke mu. Fentren tripantu rupafuy rume, Jewba adniefi tañi trokiñche ka newentukuniefi ñi femal engün tañi ayükeel. Chaw Jewba tañi newen mu wirintukungey tati Biblia, femngechi doy adniekefi tañi trokiñche. Biblia mu nütramkangey Jesus tañi amuldungun küdaw ka pengeli taiñ werküetew taiñ ka femngechi amuldungucheal (Mat. 28:⁠19, 20). Julio küyen 1881 tripantu mu, tüfachi revista feypi: “Jewba dullilaeiñmu taiñ püramyengeal kam taiñ ricu ngeal, doy may dullieiñmu taiñ amuldungucheal kom taiñ newen mew”. Ka kiñe folleto feypi: “Pütrün küdaw müley, welu Ñidol tañi küdaw llemay. Feymu eluaeiñmu newen taiñ femürpuafiel” (A quiénes se les confía la obra tripalu 1919 tripantu gringodungun mu). Pu wünenke cristiano reke, tüfachi pu peñi ka pu lamngen maneluwkey ñi kelluaetew Jewba ñi newen ñi amuldungulelafiel itrokom che. Feymu newen piwkekünuwingün ñi femal tüfachi küdaw. Iñchiñ ka femngechi maneluwküleiñ taiñ kelluaetew Chaw Dios tañi newen.

8, 9. Jewba tañi trokiñche, ¿chem adkünuy tañi amuldungungeal doy fentren che?

⁸ Jewba tañi trokiñche fillke dungu femkey ñi doy küme amuldungucheal. Feymu dewmangey fillke publicacion ka tati “Foto-Drama de la Creación”. Dungulkefuyngün tocadisco ka niekefuyngün auto fütrake parlante nielu. Amuldungukefuyngün radio mu. Ka famülke mu nieiñ fillke kimeltun internet mu ka taiñ electronico chemkün mu. Ka femngechi rulpadungungekey fentren kimeltun fentren kewün dungu mu, turpu fente femngekelafuy. Chaw Dios tañi trokiñche femngechi femkey kom che tañi allkütual ti kümeke dungu kidu tañi kewün dungu mu. Chaw Jewba dullintuchekelay, feymu feypikünuy ñi  amuldungungeal “itrokom trokiñke mapu, ka tripanche, dungun ka trokiñche” (Apok. 14:⁠6, 7). Jewba ayüniey kom che tañi allkütual tati kümeke dungu.

⁹ Kiñeke mu pepi konpukelaiñ chew ñi mülen ta kiñeke che, müleyngün edificio mu chi. Fey, ¿chumngechi amuldungulelafuiñ engün? Jewba adniefi tañi trokiñche ñi amuldungulafiel feychi pu che. 2001 tripantu mu, tati Cuerpo Gobernante elufi pu peñi ka pu lamngen mülelu Francia mapu mu ñi amuldungual carrito mu ka ñi femal fillke dungu ñi amuldungual chew ñi rupaken alünke che. Rupalechi tripantu mu, kakelu pais mu pu peñi ka pu lamngen elungey ñi ka femngechi amuldungucheal engün. ¡Rume küme tripay tachi küdaw! 2011 tripantu, adkünungey taiñ pu peñi ka pu lamngen Nueva York waria mu ñi amuldungucheal carrito mu ka kakelu femngechi dungu mu. Kiñe tripantu rupalu müten, wülngey 102.129 lifru ka 68.911 revista. Ka 4.701 che feypintukuy tañi enseñalelngeal ta Biblia. Kimfali llemay Jewba ñi kelluntukukefiel feytachi küdaw tañi newen mu. Feymu tati Cuerpo Gobernante elufi taiñ pu peñi ka pu lamngen wall Mapu püle ñi amuldungucheal carrito mu ka kakelu femngechi dungu mu.

10. ¿Chumafuiñ taiñ doy küme amuldungucheal?

¹⁰ ¿Chumafuiñ iñchiñ? Trawün mu Jewba pepikakeeiñmu taiñ amuldungucheal. Feymu inayaiñ taiñ feypingeel. Fillke trawünche wüdamngey pichike trokiñche mu tañi amuldungucheal, grupos de predicacion pingelu. Eluwaiñ taiñ amuldungual taiñ grupo de predicacion mu. Femngechi pu peñi ka pu lamngen mülelu taiñ grupo mu kelluafeiñmu taiñ doy küme kimeltucheal ka yafültukuafeiñmu tañi küme femken mu. Amulepe taiñ kimeltucheken küdawngefule rume. Jewba ngen-ngey feytachi amuldungun küdaw mu, feymu femlayaiñ kidu taiñ newen mu. Jewba llemay eluaeiñmu ñi newen taiñ femürpuafiel (Zac. 4:⁠6).

11. Pu longkolelu Jewba tañi trokiñche mu, ¿chumingün ñi kiñewküleal tati trawünche?

¹¹ Chem ñi rupan pu wünenke cristiano tañi antü mu. Pu peñi longkolekefulu Jewba tañi trokiñche mu, trür küdawingün ñi kiñewküleal ka tüngküleal Jewba tañi pu che (Hecho 2:⁠42).  49 tripantu püle, kimngekelafuy ñi duamfalngepen may ñi circuncidangeal tati pu cristiano. Feymu Jewba tañi newen mu adniefi pu longkolelu ñi ngüneduamal tüfa. Duamfalngefuy ñi kimal chem tañi chumal engün, femngechi ñi kiñewküleal ka tañi küme amuldungual engün. Pu longkolelu judio tuwün-ngelu rume, eluwlayngün ñi inayal pu judio tañi kimeltun. Doy may eluwingün ñi ngüneduamal Chaw Dios tañi dungu ka llellipufingün ñi eluaetew tañi newen, femngechi ñi küme dullial engün (Hecho 15:⁠1, 2, 5-20, 28). ¿Chum tripay tañi femün? Jewba kümelkaeyew engün. Tati trawünche kiñewkületuy ka doy küme feletuy ka amuleyngün ñi kimeltucheken (Hecho 15:⁠30, 31; 16:⁠4, 5).

12. ¿Chumngelu feypiafuiñ ñi küme adkünulen ka ñi kiñewkülen Jewba tañi trokiñche?

¹² Chem ñi rupan famülke mu. Jewba tañi trokiñche kellukeeiñmu taiñ küme adkünuleal ka tüngküleal. 15 noviembre 1895 tripantu mu, tüfachi revista gringodungun mew tripay kiñe trokiñ feypilu “Femkeaymün itrokom dungu nor dungu mew ka yamün mew”, chumngechi ñi feypilen 1 Korintio 14:⁠40. Fey mu feypi: “Pu apostol wirintukufingün pu cristiano fentren dungu ñi küme adkünuleal. Famülke mu müna kümelkakeeiñmu inayal itrokom dungu wirintukungelu iñchiñ taiñ kimeltungeal” pi tati revista (Rom. 15:⁠4). Pu wünenke cristiano ñi antü mu, pu trawünche küme adkülekey ka tüngkülekefuy engün. Famülke mu, Jewba tañi trokiñche rume küdawkey taiñ ka femngechi feleal iñchiñ. Kañpüle amulmi trawün mu, fey ngüneduamngele Ti Werken, kimaymi chumngechi ñi adkünungeal ti chillkatun ka chem tañi ngüneduamngeal, ¡rume küme duamküleaymi! Jewba tañi newen mu müten fente kiñewküley tañi pu che (Sof. 3:⁠9).

13. Ñi feypin Santiaw 3:⁠17, ¿chem ramtuwafuiñ?

¹³ ¿Chumafuiñ iñchiñ? Chaw Jewba eluaeiñmu ñi newen taiñ kiñewküleal. Feymu ayüniey taiñ femngechi feleal (Efes. 4:⁠1-3). Feymu ramtuwaiñ: “¿Kelluntukukepen may ñi kiñewküleal ka tüngküleal ti trawünche? ¿Inaniekepen may ñi chem pin pu adniekelu ti trawünche?”. Ka ramtuwafuiñ: “¿Manelfalngepen may?”. Nielmi falinke küdaw ti trawünche mu, doy mülefuy tami ramtuwal feychi dungu. Ka ramtuwafuiñ: “¿Tarde puwken  kam temprano puwken chew tañi puwafel? ¿Eluwkepen may tañi kellucheal?” (papeltunge Santiaw 3:⁠17). Ngüneduamuwliyiñ taiñ müte küme femnon kiñeke tüfachi dungu, llellipuafiyiñ ta Jewba, “eluen tami newen” piafiyiñ. Eluwliyiñ taiñ kelluaetew Jewba tañi newen, doy küme küdawküleaiñ ti trawünche mu. Fey pu peñi ka pu lamngen doy piwkeyenieaeiñmu ka falintunieaeiñmu.

14. 1) Ñi feypin Kolosense 1:⁠9, 10, ¿chem duamniefuy pu wünenke cristiano? 2) Jewba, ¿chumngechi elufi tañi duamnieel engün?

¹⁴ Chem ñi rupan pu wünenke cristiano tañi antü mu. Jewba rume ayüniey ñi kimeltuafiel tañi pu che (Sal. 32:⁠8). Ayüniey tañi pu che ñi kimaetew ka piwkeyeaetew ka ñi rumel mongeleal engün, feymu kimeltulelkefi (Juan 17:⁠3). Kuyfi mu, Jewba elkünuy tati wünen trawünche ñi enseñayafiel tañi pu che (papeltunge Kolosense 1:⁠9, 10). Chaw Jewba tañi newen kellufi feytachi pu wünenke cristiano chumngechi ñi feypikünuel Jesus (Juan 14:⁠16, 17). Chaw Dios ñi newen kellufi tati pu wünenke cristiano ñi adümal Chaw Dios ñi dungu ka acordalelfi ñi feypin ka ñi femün ta Jesus. Feymu tüfachi pu cristiano doy piwkeyerpufingün ta Jewba ka Jesus, doy maneluwürpuyngün ka welukonkechi doy piwkeyewürpuyngün.

15. Ñi feypikünuel Jewba Isaías 2:⁠2, 3, ¿chumngechi femtripamekey? ¿Chem pimi kay?

¹⁵ Chem ñi rupan famülke mu. Jewba feypikünuy pichilewechi antü mu fentren che ñi puwal tañi fütra wingkul mu. Tüfa feypiley fentren che ñi konpual tañi trokiñche mew. Biblia feypi: “Pichilewechi antü mew, Jewba ñi fütra wingkul ruka küme anükünungeay wente kake wingkul ñi wechuñ mew, ka witrañpüramngeay wente wingkul mu; ka fey mu akunkepiay engün kom tati pu trokiñche. Ka fentren pu trokiñche amuayngün, ka feypiayngün: ‘Amuiñ, ka püraiñ Jewba ñi fütra wingkul  mew ka Jakob ñi Ngünechen tañi ruka mu; ka kidu kimeltuaeiñmew ñi rüpü mu, ka miyawaiñ ñi rüpü mu’” (Isaías 2:⁠2, 3). Famülke mu femtripamekey feychi profecia. Taiñ poyefiel ta Jewba doyküley kom pu koylake religion mu. Jewba elukeeiñmu fentren kimeltun Biblia mew küpalu (Is. 25:⁠6). Jewba adniefi “ti kim manelfal kona”, esclavo fiel y prudente pingelu taiñ kimeltuaetew (Mat. 24:⁠45, TNM). Kakerumey chumngechi taiñ kimeltungeel. Müley fillke papel ka lifru, wewpin ka müley ta video. Feymu Elihú reke rakiduamküleiñ. Kidu feypi Chaw Dios “rume küme kimeltufe ngey, ¿iney am trürümafeyew?” (Job 36:⁠22).

16. ¿Chumafuiñ taiñ kelluaetew Jewba tañi kimeltun?

¹⁶ ¿Chumafuiñ iñchiñ? Jewba tañi newen kelluaeiñmu taiñ inayal chem taiñ kimürpun Biblia mu. Tati salmista reke llellipuafiyiñ ta Jewba: “Awem Jewba, kimeltuen tami rüpü. Iñche amulean tami rüf dungu mu. Eluen kiñe rume piwke, femngechi ñi yamnieafiel tami üy” (Sal. 86:⁠11). Kafey estudianieafiyiñ ta Biblia ka fillke publicaciones ñi entuel Jewba tañi trokiñche. Welu re nielayaiñ müten ta kimün, doy may ka piwkentukuafiyiñ ti rüf dungu ka inayafiyiñ taiñ mongen mu. Jewba tañi newen kelluafeiñmu taiñ femngechi femal. Ka femngechi yafültukuafiyiñ taiñ pu peñi ka pu lamngen, kidu engün taiñ familia reke feley (Eb. 10:⁠24, 25). Llellipuafiyiñ ta Jewba taiñ piwke mu ñi tripayal taiñ wiñoldungun trawün mu. Ka femngechi nieliyiñ wewpin, nütramkan kam chem rume ti trawün mu, ka llellipuafuiñ ta Jewba taiñ küme enturpual. Kom femliyiñ ta tüfa, pengelelafiyiñ ta Jewba ka Jesus taiñ piwkeyefiel tañi pu che ufisa reke felelu (Juan 21:⁠15-17).

17. ¿Chumngechi kelluntukuafuiñ Jewba tañi trokiñche?

¹⁷ Pichiñma mu, Chaw Dios tañi trokiñche müten müleweay Mapu mu. Feymu kom taiñ newen mu küdawaiñ Jewba tañi trokiñche mu. Amuldungulelafiyiñ itrokom che, femngechi inayentuafiyiñ Jewba ñi dullintuchekenon ka ñi piwkeyecheken. Kelluntukuafiyiñ ñi kiñewküleal ti trawünche, femngechi inayentuafiyiñ Jewba ñi tüngün-ngen ka ñi ayükenon ti welulkalechi dungu. Jewba rume küme kimeltufe ngey, feymu eluwaiñ taiñ küme kimeltuaetew. Fey afle Weküfü ñi ngünenieel, llükalayaiñ. Doy may newen piwke mu küdawküleaiñ Jewba ñi trokiñche mu.