JOSE ngünewelay ñi weñangkülen. Feypifi kom ñi pu kona: ‘¡Kom tripamün eymün!’ Kidulelu ñi pu peñi engün, Jose ngümakawi. Pellenieafuyiñ ñi pu peñi ñi afmatulewen, kimlayngün chumngelu (chemu) ñi ngüman. Fey wüla, feypi: ‘Iñche Jose. ¿Petu mongeley tañi chaw?’

Ñi pu peñi rume afmatuleweyngün, fey pepi dungulayngün. Llükaley engün. Welu Jose feypifi engün: ‘Fürenemuchi, fülkonpamün.’ Femlu engün, feypifi: ‘Iñche tamün peñi Jose, eymün fendemun nga Egipto mew.’

Jose piwkeyen mew dunguniefi: ‘Kidutu dalluntükuwkilmün tamün fendemufiel faw. Rüf ta Ngünechen tañi werküetew tati Egipto mu ñi montulafiel che. Faraon elfalkünuenew ñi ngünenieal kom ti mapu. Feymu lle, matu wiño amutuaymün ñi chaw mew, ka feypifimün tüfachi dungu. Ka feypiafimün: “Küpange tami mülepayal tüfa mew”. ’

Fey mew Jose pangkontükuy kom ñi pu peñi, ka kiduke pangkofi ka trurukafi (trepetukafi). Allkütulu Faraon Jose ñi pu peñi küpalu, feypifi ta Jose: “Feypifinge tami pu peñi: ‘Yengepe karreta, ka küpalfimün tamün chaw ka tamün pu reñma, ka wiñoaymün faw. Eluwayiñ doy kümeke mapu kom Egipto mu’.”

Femngechi femi engün. Peafuymi faw ta Jose amuy trafmealu tañi chaw, petu chalifi tati, küpalu Egipto kom reñmawen engün.

Jakob ñi reñma doy alün-ngerpuyngün. Kom ngefuy regle mari che wiñamtu amulu engün Egipto mu, koneltuley Jakob, ñi pu yall ka ñi pu laku. Welu ka kom amuley ñi pu domo, ka alün kona chi. Kom tüfa mülenagingün Egipto mu. Israelche pingerkeyngün, Ngünechen am kangelu üytufi Jakob Israel pingetuy. Kiñe doy sakin che ngerpuy Ngünechen mew, chumngechi peafiyiñ wüla.