¿PEYMI chem dungu rupaley tüfa? Tüfachi pu awkafe (weychafe), Israel che tati. Pefimi feychi pochongkülelu pütokoley engün. Feychi witralelu ina fey engün, fey ti kues Gedeon. Kidu pey chumngechi pütokoley engün.

Küme peafimi kakerumey ñi pütokolen tüfachi pu wentru. Kiñeke pochongnakümi ñi ange ko mew. Welu kiñeke wentru yeniey ko ñi kuwü mew ñi pütokoal, ñi üpewtuleam (trepeleam) chem dungu rupay inal mew. Doy fali tüfachi dungu, Jewba feypifilu am ta Gedeon: ‘Dulliyeafimi (ngümintuafimi) feychi pu wentru petu ñi pütokoal üpewtulelu (trepelelu). Welu kakelu wentru müley ñi amutual ñi ruka mew engün.’ Peafiyiñ chumngelu (chemu).

Tati pu Israel che ka nietuyngün rume wedake dungu, feyentuwelafingün (müngeltuwelafingün) Jewba. Tati pu Madian che doy newen niey Israel che mew, ka wedalkamekefi engün. Feymew, pu Israel che ngillatuy Jewba ñi kelluaetew engün, fey Jewba allkütuy ñi mütrümün engün.

Jewba feypifi ta Gedon ñi trapümal fentren awkafe, feymew Gedeon trawüli küla mari epu warangka awkafe. Welu müley pataka küla mari kechu warangka kayñe awkafe ñi kewayafiel Israel. Welu Jewba feypirkefi ta Gedeon: ‘Rumeñma wentru nieymi.’ ¿Chumngelu feypi tüfa?

Wewle am pu Israel che ti awkan, kidu wewlu, trokiwafuyngün: ‘Duamlafiyiñ Jewba ñi kelluaetew taiñ wewal’ piafuyngün. Feymu lle Jewba feypifi ta Gedeon: ‘Feypifinge kom pu wentru llükalelu, amutuay müten tañi ruka mew.’ Gedeon femlu tüfa, epu mari epu warangka awkafe amutuy. Mari warangka wentru mülewey ñi kewayafiel kiñe pataka küla mari kechu warangka awkafe.

Welu ¡allkütunge! Jewba feypi: ‘Petu nieymi rumeñma wentru.’ Feymew feypifi ta Gedeon ñi werküafiel pu wentru ñi pütokoal tüfachi witrunko mew, ka feymew kom pu wentru pochongnakümlu ñi ange ko mew ñi pütokoal, müley ñi amutual ñi ruka mew. ‘Eluaeyu wewkayñen tüfachi küla pataka wentru mew amuy ñi üpewtulen (trepelen) petu pütokolu,’ feypikünuy Jewba.

Akuy chi antü ti awkan (weychan) mu. Gedeon wüdamfi ñi küla pataka awkafe, küla trokiñ che. Kake wentru elufi kiñe kullkull, ka kiñe metawe ponwi mu kiñe pelontuwe. Epe rangi pun (trafia), trawüluwingün fey wallmafingün umawtulechi pu kayñe. Feymew, kiñentrür, dungulfi ñi kullkull, ka trafolyefi tañi metawe engün, ka wiraringün: ‘¡Chi awkan fey Jewba ñi awkan engu Gedeon ñi awkan!’ Nepelu (trepelu) pu kayñe, welulkawingün ka llükayngün. Kom lefmawingün, fey pu Israel che wewi engün.