TÜFACHI epu wentru petu rupamekeyngu weda dungu mu. Müley ñi lefmawal engu, ñi langümngenoal. Israel ellka-ngüneduammapufe ngeyngu, ka tati domo kellunieyew Raab pingey. Raab niey ñi ruka ti fütra kura malal Jeriko waria. Peayiñ chumngechi rupay kom tüfa.

Tati pu Israel che puwküley ñi noal nome Jordan lewfü mu, ka ñi konal Kanaan mapu mew. Welu petu ñi konnon engün, Josue werküfi ti epu ellka-ngüneduammapufe. Feypifi: ‘Inaduamaymu ti mapu ka Jeriko waria mu.’

Konlu Jeriko mu ti epu ellka-ngüneduammapufe, amuyngu Raab ñi ruka mu. Welu kiñe che feypifi feychi ngünenielu Jeriko mu: ‘Trafia konpay epu Israel che ñi ngüneduammapual.’ Allkülu tüfa, chi longkolelu werküy kiñeke wentru Raab mew, ka feypifi: ‘¡Entufinge feytichi epu wentru tami nieel ruka mew!’ Welu Raab ellkakünufi tüfachi epu wentru wenteruka mu. Feymew llowdungufi: ‘Kiñeke wentru küpayngu tañi ruka mew, welu kimlan chew ñi küpan. Petu ñi dumiñnon amutuyngu, petu ñi rakümtükunon ti waria ñi wülngiñ. ¡Lefülmün, diafimün!’ Ka tüfachi pu wentru lefkülen tripayngün ñi kintuafiel engu.

Amutulu engün, Raab lefi ti wenteruka mu. ‘Iñche kimün Jewba tamün eluaetew tüfachi mapu,’ pifi tati epu ellka-ngüneduammapufe. ‘Allküyiñ fey ñi arkümün ti Kelü Lafken tripalu eymün Egipto mu, ka eymün langümfimün tati pu longkolelu Seon ka Og pingelu. Iñche kümelkawyiñ eymu, feypikünumuan tamün kümelkamuafiel iñche, fürenemuan. Montulüñmamuan tañi chaw ka tañi ñuke, tañi pu wentru lamngen ka tañi pu domo lamngen.’

Tati epu ellka-ngüneduammapufe feypikünufi ñi femal tüfa, welu Raab müley ñi femal kiñe dungu. ‘Nünge tüfachi kelü def ka trarintükufinge tami fentana mu,’ pieyew ti epu ellka-ngüneduammapufe, ‘ka trawülelnge kom tami pu che tami ruka mew. Ka wiñoliyiñ kom iñchiñ ñi nüal Jeriko, ka pefiliyiñ tüfachi def, langümlayafiyiñ iney no rume mülelu tami ruka mew.’ Wiñotulu ti epu ellka-ngüneduammapufe ta Josue mew, feypifingu kom dungu ñi rupan.