SALOMON kiñe weche wentru ngey ñi rey ngerpulu. Piwkeyefi Jewba, ka inafi ti küme ngülam elueyew tañi chaw David. Jewba rume ayüfi Salomon, feymu lle kiñe pun (trafia) kiñe pewma mu feypifi: ‘Salomon, ¿chem ayüymi iñche tañi eluafiel eymi?’

Feymew Salomon llowdunguy: ‘Jewba tañi Ngünechen, iñche rume weche wentru ngen, ka kimlan chumngechi ñi ngünenieal. Feymu lle, eluaen kimün tañi küme ngünenieafiel tami pu che.’

Jewba ayüy Salomon ñi ngillatuetew. Feymu lle feypi: ‘Ngillatuymi kimün am, fütra mongen no ka ülmen ngetual no, eluayu doy kimün ta iney no rume elukelafiñ fentepun fachantü mu. Welu ka tüfa, eluayu ti dungu tami ngillatunofiel, may, eluayu tami fütra ülmen ngerpual, ka rume püramkünuafiñ tami üy.’

Pichin antü wüla, epu domo küpalelfi Salomon kiñe rume küdawngechi dungu. ‘Tüfachi domo iñchiw müleyu kiñe ruka mu,’ pirkey kiñe domo. ‘Iñche püñeñün kiñe we püñeñ, ka epu antü wüla kidu ka püñeñi kangelu we püñeñ. Kiñe pun, kidu ñi we püñeñ lay. Welu petu ümawtulen iñche, kidu elkünufi ñi la püñeñ ñi afkadi mu, ka yeñmaenew tañi we püñeñ. Trepelu iñche ka pefilu ti la püñeñ, pefiñ feychi we püñeñ, iñche no ñi püñeñ.’

Allkütulu tüfa, kangelu domo feypi: ‘¡Femlay tati! ¡Ti mongelelu iñche ñi püñeñ ngen, ka lalu püñeñ fey ñi püñeñ ngey!’ Ti wüne domo llowdungutuy: ‘¡Femlay tati! ¡Ti lalu eymi tami püñeñ, ka mongelelu iñche ñi püñeñ!’ Femngechi notukawingu ti epu domo. ¿Chumay Salomon?

‘Küpalelen kiñe fütra kuchillo’ pi Salomon. Küpalelngelu feypi: ‘Katrüfinge epu trokiñ ti mongelechi we püñeñ, ka elufinge kake kiñeke domo rangiñ püñeñ.’

‘¡Femkilnge!’ wirari ti rüfngechi ñuke. ‘Füreneen, langümkilmün ti we püñeñ. ¡Elufinge feychi domo!’ Welu kangelu domo feypi: ‘Elukilfinge iney no rume ti we püñeñ, katrüfimün epu trokiñ müten.’

Fewla Salomon feypi: ‘¡Langümkilnge ti we püñeñ! Elufinge ti wünen domo. Kidu rüfngechi ñuke ngey.’ Salomon kimi tüfa, ti rüfngechi ñuke am rume piwkeyefi ti we püñeñ, eluñmakey ñi eluafiel kangelu domo ti we püñeñ ñi langümüñmangenoal. Allkütulu pu che chumngechi Salomon apümfi chi dungu, ayüwi engün ñi nieal doy kim rey.

Petu amuley Salomon ñi ngünenien, Ngünechen kümelkalefi pu che, ti mapu wülkey fentren kachilla ka kawella, ufad ka igo, ka kakelu iyael (yagel). Tati pu che takuniey kümeke takun, ka kümeke ruka ñi mülen engün. Fillke kümeke dungu niey kom pu che.