¡AWEM! Daniel koni kiñe weda dungu mu trokifiñ. ¡Welu tati pu trapial (fücha peñi) chummekelaeyew rume! ¿Kimimi chumngelu (chemu)? ¿Iney am tukueyew rangiñ kom tüfachi trapial mu Daniel? Inaduamafiyiñ.

Fewla rey ngelu Babilonia mu Dario pingey. Rume ayüfi ta Daniel ñi küme che ngen ka ñi kimche ngen, fey mu Dario üytufi kiñe fütra longkoleal ñi reyno mu. Feymu lle, kakelu pu wentru ütrirfi Daniel, ka femi tüfachi dungu engün:

Pemefi Dario engün ka feypingün: ‘Kom iñchiñ, awem rey, feypiwayiñ dewmayafuymi kiñe ley dungu ñi feypial küla mari antü mu iney no rume ñi mülenoal ñi llellipuafiel kiñe dio no rume, wentru no rume, welu eymi müten, awem rey. Feyentunole engün, müley ñi ütrüftükungeal rangiñ pu trapial mu.’ Dario kimlay chumngelu tüfachi pu wentru ayüyngün ñi tukuafiel tüfachi ley dungu. Welu “kümelu” trokifi, feymu wirintükuy tati ley dungu. Fewla ngelay ñi kakünungeal tüfachi ley dungu.

Daniel allkütulu tüfa, amuy ñi ruka mew ñi llellipual chumngechi ñi rumel femken. Tüfachi wedake wentru, dew kimniey ta Daniel ñi elkünunoal ñi llellipuafiel ta Jewba. Ayüwi engün dirpual ñi ayünieelchi rakiduam, trokiwi engün, ñi apümkayafiel Daniel.

Kimlu ti rey Dario chem ñi rupalen, rume weñangkünagi. Welu dew ngelay ñi kakünuafiel ti ley dungu, feymu werküy ñi ütrüftükungeal Daniel ti rüngan nielu pu trapial. Welu ti rey feypifi ta Daniel: ‘Pewmangen tami Ngünechen tami serfiniefiel, montulaeymu.’

Dario ngelay ñi tüngünkülen, feychi pun (trafia) pepi umawtulay. Puliwen mu lefi ti rüngan nielu pu trapial. Tüfa pefimi. Wirari: ‘¡Daniel, mongelechi Ngünechen ñi kona! ¿Tami Ngünechen mi serfikeel feyta montuleymu pu trapial mu?’

‘Ngünechen werküy tañi werken püllü, ka rakümtükuñmafi ñi wün ti pu trapial tañi allfüñnoaetew,’ wiñoldunguy Daniel.

Ti rey rume ayüwi. Werküy ñi entungeal Daniel ti rüngan mu. Feymu ütrüftükungey rangiñ pu trapial feychi wedake wentru ayüfulu ñi apümafiel Daniel. Petu ñi puwnon tüfachi wedake wentru doy nagaltu ti rüngan nielu pu trapial, nüfingün ka watrolmafi kom ñi foro engün.

Fey mew ti rey Dario wirintükufi kom ñi reyno: ‘Kom eymün müley tamün yamnieafiel Daniel ñi Ngünechen. Kidu femkey fütrake afmatun dungu. Kidu montulfi Daniel ñi inoaetew pu trapial.’