INADUAMFINGE tati kadena yenielu Pablo, ka adkintufinge ti Roma che soltaw ñi llüwatunieetew. Pablo presuley Roma waria mew. Kidu üngümküley chem dungu ñi chumaetew Sesar ta Roma che. Petu ñi presulen, eluñmangey ñi llowal witran.

Dew (chay no) mülepulu küla antü ta Roma mew, fey wüla Pablo mütrümfalfi tati longkolechi pu judio ñi pemeaetew engün. Feymu lle fentreken pu judio mülelu Roma mu küpayngün. Pablo nütramelkefi Jesu ka Ngünechen ñi reyno mu. Kiñeke feyentuyngün (mangeltuyngün) ka kristiano ngetuyngün, welu kakelu feyentulayngün.

Ka Pablo nütramelfi kakerume (fill) pu soltaw ñi llüwatunieetew. Chew ñi mülemum Pablo ñi presungen puwülüy epu tripantu, Pablo nütramelfi chem che rume pepi dungufilu. Feymew müten, Sesar ñi rukache allkütuy ti kümeke dungu reyno mu, ka kiñeke kristiano ngerpuyngün.

Welu, ¿iney am tüfachi witran mülelu mesa mew, petu wirintükulu? ¿Iney am trokifimi eymi? May, Timotew tati. Kidu ka presutükungefuy ñi kimeltufiel reyno mu, welu fewla lifrekünungetuy. Kellupafi ta Pablo. ¿Kimimi chem ñi wirintükumeken? Peafiyiñ.

¿Tukulpaymi feychi waria Filipo ka Efeso nütramelngelu chi 110 Nütram? Pablo kelluy ñi wüne llitual pu trawülukelu kristiano fey mu. Fewla, petu ñi presulen, Pablo wirilelfi chillka (karta) feychi pu kristiano. Feychi chillka (karta) mülelu Biblia mew, Efesio ka Filipense üytungeyngu. Fewla Pablo feypifi ta Timotew chem dungu ñi wirintükual tañi pu kristiano weni mülelu Filipo mu.

Tati pu Filipo che rume (mütre) kümelkakefi ta Pablo. Yefalelngey kiñe yewün karsel mew, feymu lle Pablo ‘mañumtuwiyiñ eymün mu’ pifi engün. Epafrodito küpaleleyew ti yewün. Welu rume kutrankülefuy, ka epe lafuy. Fewla kümeletuy ka pürüm (pür) wiñotuay tañi waria mu. Yeay Pablo ka Timotew ñi chillka wirin engu wiñotule Filipo waria mu. 

Petu ñi mülen karsel mew, Pablo wirintükuy kakelu epu chillka nielu iñchiñ Biblia mu. Kiñe werkülelfi tati pu kristiano mülelu Kolosa pingechi waria mu. ¿Kimimi chumngechi ñi pingen? Kolosense. Kangelu feyta kiñe chillka tañi weni Filemon pingelu, mülelu Kolosa mu. Tati chillka nütramyey ta Onesimo, Filemon ñi küdawelkeetewchi kona.

Onesimo lefmawfi Filemon, ka küpay Roma mu. Onesimo kimniey Pablo ñi presulen tüfa mu, welu kimlafiyiñ chumngechifel. Pemefi, ka Pablo kimeltueyew. Pürüm Onesimo kristiano ngetuy ka. Welu fewla Onesimo weda duamnagi ñi lefmawün mu. Feymu lle, ¿kimimi chem ñi wirilelfiel Pablo ta Filemon tüfachi chillka (karta) mu?

Pablo llellipufi ta Filemon ñi wiñoduamtuafiel ta Onesimo. ‘Wiñoleltuaeyu,’ wirintükuy Pablo. ‘Welu tüfa tami kona müten ngelay. Welu may tami küme peñi ngetuy.’ Amutulu Onesimo ta Kolosa, yey tüfachi epu chillka, kiñe ta pu Kolosa che, ka kangelu ta Filemon. ¡Pellenienge (peyelfe) ñi rume ayüwkülen ta Filemon ñi kimürpuel tañi kona Onesimo, kristiano ngetuy fey reke!

Wirilelfilu Pablo tati pu Filipo che ka Filemon, niey rume kümeke dungu. ‘Iñche werküleluwayiñ ta Timotew,’ pifi Pablo tati pu Filipo che. ‘Welu pürüm pemeawiyiñ iñche ka.’ Ta Filemon ka wirintükulfi: ‘Pepikalelen chew iñche tañi umapual (umañpual).’

Lifrekünungelu, Pablo pemey tañi pu kristiano peñi ka lamngen fill püle ñi mülen engün. Welu alüñma mu Pablo ka wiño presuntükuletuy Roma mu. Fewla kimniey ñi langümngeal. Feymu lle wirilelfi ta Timotew: ‘Matu küpange. Küme inayefiñ Ngünechen ñi dungu,’ wirintükuy, ‘ka kidu eluaenew kiñe wewelchi kullitun.’ Pichiñ tripantu wüla rupalu ñi lan ta Pablo, Jerusalen ka apümngetuy, welu fewla tati pu Roma che mu engün.

Welu Biblia mew doy müley. Jewba femfi tati apostol Juan tañi wirintükual tañi afchi pu lifru, koneltulelu ti lifru Apokalipsi (Revelación) pingelu. Tüfachi lifru feypi ta küpalechi antü mu. Peafiyiñ chem dungu müleay ti küpalechi antü mu.