TÜFACHI wentru witralelu fey tati apostol Pedro, ka kiñeke ñi pu weni müley furi püle. Welu, ¿chumngelu (chemu) tüfachi wentru lukutunagi Pedro mew? ¿Mülepey may ñi femal? ¿Kimimi iney ngen?

Ti wentru Korneliu pingey. Fey ta kapitankülelu soltaw Roma mu. Korneliu kimkelafi ta Pedro, welu feypingey ñi mangeltuafiel ñi ruka mu. Peafiyiñ chumngechi rupay tüfa.

Tati pu wünen inanieetew Jesu judio ngeyngün, welu Korneliu judio tuwüngelay. Welu piwkeyefi ta Ngünechen, ngillatukefi, ka rume kümelkamekefi tati pu che. Fey mew, kiñe nag antü kiñe werken püllü pewfaluweyew ka feypieyew: ‘Eymi ayülfimi ta Ngünechen, ka llowaymew tami llellipun mu. Feypifinge kiñeke mi pu kona ñi yemeafiel ta Pedro pingelu. Umañküley ta Jope waria, Simon ñi ruka mew, inaltu lafken mülelu.’

Fey mew, pürüm (pür) femi Korneliu tüfa. Ka antü mu, Pedro müley ta Simon ñi wenu ruka mew. Üye mew Ngünechen rakiduamelfi ta Pedro ñi pefiel kiñe fütra katrün pañu kallfü wenu mu nagkülepalu. Feychi pañu mu müley fillke kulliñ. Chumngechi feypiley Ngünechen ñi ley dungu, tüfachi pu kulliñ lif ngelay ñi iyafiel, welu kiñe dungun feypieyew: ‘Witrapürange, Pedro. Langümnge ka inge.’

‘¡Femlayan!’ llowdunguy Pedro. ‘Chumkawnorume ikelafiñ lifngenolu.’ Welu ti dungun feypieyew: ‘Ngünechen tañi liftuel tañi ingeael tati ikenoel “lif ngelay” pikefilnge ta eymi.’ Tüfachi dungu küla rupay. Petu ramtuwkülelu Pedro ñi chem pifel tüfachi dungu, akuyngün ruka mew Korneliu ñi werküelchi pu wentru ñi yefalaetew.

Pedro nagpay ka feypi: ‘Iñche tati tamün kintuyawülel. ¿Chem dungu mew anta wütumupan?’ Tati pu wentru feypifilu kiñe werken püllü feypifi ta Korneliu ñi mangelafiel Pedro tañi ruka mew, Pedro ‘iñche amuan eymün mew’ pieyew engün. Ka antü mu, Pedro ka kiñeke weni tripayngün ñi pemeafiel ta Korneliu mülelu Sesarea waria mu.

Korneliu trawülniey tañi pu reñmawen ka tañi pu kümeke weni. Akulu Pedro, Korneliu lukunagi ta Pedro ñi namün püle, chumngechi adkintufimi tüfa mew. Welu Pedro feypi: ‘Witrapüratunge; iñche ta ka femngechi wentrungen müten.’ May, ti Biblia pengeli kümelay ñi lukutuafiel ka poyeafiel kiñe wentru. Müley taiñ poyeafiel Jewba müten.

Fewla Pedro amuldungufi tati pu trawüluwlu. ‘Ngüneduamün ta Ngünechen llowkefi kom tati pu che ayükelu ñi poyeaetew,’ pi Pedro. Ka petu ñi dungumeken, Ngünechen werküy ñi lif küme püllü, feychi pu che llituyngün ñi dungual fillke kewün mu. Tüfa afmatuy tati tuwüngechi pu judio feyentuleyelu Pedro engün küpayelu, feyentukelu am Ngünechen ñi dullituniefiel (ngümintuniefiel) ti pu judio müten. Tüfa kimeltukeeyew engün, ta Ngünechen pekelafi kiñe trokiñche doy kümey kam doy falin-ngey ta kakelu trokiñche. ¿Kümengepelay may ta kom iñchiñ tukulpaniefiliyiñ tüfa?