Saquin peñi, saquin lamngen:

Eimi amuldunguqueimi Chau Dios tañi Reino, quiñeque apostol reque feleimi Olivo huincul mu mülelu. Üye mu, Jesús petu ñi amutunon huenu mu, feipifi pu apostol: “Elungelmün Chau Ngünechen ñi nehuen, yafüluhuaimün. Fei huldunguaimün iñche meu Jerusalén püle, com Judea, Samaria ca huall mapu püle” (Hech. 1:8). Eimi feipielmu Jesús, ¿chumafuimi?

Llicayafuimi chi. “Fütra cüdau tati” piafuimi. “Rume fentren che mülei huall mapu püle, ¿chumngechi amuldunguafuiñ?” ramtuhuafuiñ. Fei acordayafuiñ ñi feipin Jesús petu ñi lanon, feipi: “Ti cüdaufe doicülelai tañi ñidol meu. Caiñetungeli iñche, eimün ca caiñetungeaimün. Pu che inaniefile iñche tañi feipin, ca inayaingün eimün tamün feipin. Iñche tañi üi meu pu che femaimünmeu com tüfachi dungu. Fei engün quimlai inei tañi huercüeteu iñche” (Juan 15:20, 21). Rume caiñetungeaiñ ca inantucungeaiñ. Fei, “¿chumngechi anta amuldunguafuiñ com pu che?” piafuiñ.

Famülque mu, pu Dunguquelu Ineingen Jehová mülei taiñ femal tüfachi fütra cüdau: mülei taiñ amuldungual “com troquiñ mapu mülechi pu che meu” (Mat. 28:19, 20). Caiñetungeliyiñ rume, ¿chumngechi huechunenturpuaiñ tüfachi fütra cüdau?

Ti lifru Hechos nütramcaquei chem ñi femün pu apostol ca caquelu cristiano hunen siglo mu, pengelquei Jehová chumngechi quelluqueyu engün ñi amuldungucheal. Tüfachi lifru pepicangei tami doi cüme adümafiel chem ñi rupan feichi mu, quelluaimu tami raquiduamal ñi chum duamcülen pu apostol femlu feichi fütra cüdau. Ñi rupan feichi mu trürcülei ñi rupamequen fachantü, feimu afmatuafimi. Trürcülei taiñ cüdau, cafei chumngechi ñi adcünungen. Raquiduamtucuniefilmi com tüfa, quimtucuaimi Chau Jehová petu adcünumequefi tañi troquiñche mapu meu.

Com piuque mu llellipuquefiyiñ ta Chau Jehová tami nehuentucuaeteu tüfachi lifru. Doi maneluhuaimi Jehová tami elueteu nehuen tami ‘cüme huldungual Chau Ngünechen ñi ngünenietual ta mapu’ fei quelluafimi caquelu che ñi quimafiel ta Jehová (Hech. 28:23; 1 Tim. 4:16).